ប្រធានគណៈកម្មការសភាបានដាក់ជូនលិខិតមួយច្បាប់ទៅប្រធានរដ្ឋសភាទទួលបន្ទុកសុខភាពសាធារណៈ បានដាក់ជូនលិខិតមួយច្បាប់ទៅប្រធានរដ្ឋសភាកាលពីថ្ងៃព្រហស្បតិ៍ ស្នើសុំឲ្យរដ្ឋាភិបាលស្វែងរកមូលនិធិដើម្បីជួយអ្នកភូមិដែលមានផ្ទុកមេរោគអេដស៍នៅក្នុងឃុំរកា ខេត្តបាត់ដំបង ដើម្បីសងបំណុលដែលពួកគាត់បានជំពាក់ដោយសារតែមានផ្ទុកមេរោគនេះ។
លោកស្រី កែ សុវណ្ណរតន៍ សមាជិកសភាគណបក្សសង្គ្រោះជាតិដែលជាប្រធានគណៈកម្មការនេះបានមានប្រសាសន៍កាលពីម្សិលមិញថា លោកស្រីទទួលបានលិខិតមួយច្បាប់កាលពីថ្ងៃទី២២ ខែកុម្ភៈ របស់អ្នកភូមិមួយក្រុមដែលស្ថិតក្នុងចំណោមអ្នកភូមិជាង២៤០នាក់ ដែលបានធ្វើតេស្តរកឃើញថា មានផ្ទុកមេរោគអេដស៍ចាប់តាំងពីការផ្ទុះឡើងនូវជំងឺនេះកាលពីចុងឆ្នាំមុន។
លោកស្រី សុវណ្ណរតន៍ បានមានប្រសាសន៍ថា “មានអ្នកភូមិ៦៦គ្រួសារក្នុងចំណោមអ្នកភូមិជាង២០០គ្រួសារ ដែលមានផ្ទុកមេរោគអេដស៍បានជំពាក់បំណុល ដែលគ្រួសារមួយចំនួនចាប់ពី៥០០ដល់៣.០០០ដុល្លារ។ ពួកគាត់បារម្ភយ៉ាងខ្លាំងថា គ្រឹះស្ថានមីក្រូហិរញ្ញវត្ថុដែលពួកគាត់បានខ្ចីប្រាក់អាចរឹបអូសយកដីស្រែរបស់ពួកគាត់”។
លោកស្រី សុវណ្ណរតន៍ បានមានប្រសាសន៍ថា លោកស្រីបានសរសេរលិខិតមួយច្បាប់ផ្ញើជូនក្រសួងសុខាភិបាលស្នើសុំមូលនិធិចាំបាច់ ប៉ុន្តែថា សំណើនេះត្រូវបានបដិសេធកាលពីថ្ងៃទី៥ ខែមីនា។
លោកស្រីបានមានប្រសាសន៍ថា បន្ទាប់ពីខ្ញុំទទួលបានការឆ្លើយតបពីក្រសួងសុខាភិបាល ដែលលើកឡើងថា ការសងបំណុលមីក្រូហិរញ្ញវត្ថុរបស់អ្នកភូមិហួសពីសមត្ថភាពរបស់ក្រសួង ហើយខ្ញុំបានសម្រេចសរសេរលិខិតមួយច្បាប់ទៀតទៅប្រធានរដ្ឋសភា ដើម្បីឲ្យបញ្ជូនទៅនាយករដ្ឋមន្ត្រី”។
លោកស្រីបានមានប្រសាសន៍ថា “រដ្ឋាភិបាលទទួលខុសត្រូវចំពោះការផ្ទុះឡើងមេរោគអេដស៍នេះ ពីព្រោះរដ្ឋាភិបាលធ្វេសប្រហែសក្នុងការគ្រប់គ្រងវិស័យសុខាភិបាលទើបបង្កឲ្យមានមេរោគនេះ។
បន្ទាប់ពីសាកសួរលោក ម៉ម ប៊ុនហេង រដ្ឋមន្ត្រីក្រសួងសុខាភិបាលជុំវិញការផ្ទុះឡើងជំងឺនេះកាលពីថ្ងៃទី២៧ ខែមករាមក លោកស្រី សុវណ្ណរតន៍ បានសុំឲ្យក្រសួងរបស់លោកបង្កើតកញ្ចប់ថវិកាពិសេសមួយ ដើម្បីដោះស្រាយបញ្ហានេះ។
លោកស្រី សុវណ្ណរតន៍ បានមានប្រសាសន៍ថា ថវិកាដែលបានលៃទុកក្នុងកញ្ចប់នេះនឹងត្រូវប្រើប្រាស់សម្រាប់ជួយបន្ធូរបន្ថយបំណុលរបស់អ្នកភូមិ ជាមួយនឹងការយកចិត្តទុកដាក់ចំពោះអ្នកដែលបានឆ្លងមេរោគនេះ។
បើទោះជាក្រសួងសុខាភិបាលបដិសេធកញ្ចប់ថវិកានេះក៏ដោយ ក៏លិខិតថ្ងៃទី៤ មីនារបស់លោក ម៉ម ប៊ុនហេង ផ្ញើជូនលោកស្រី សុវណ្ណរតន៍ ណែនាំឲ្យក្រសួងមួយចំនួន មានទីស្ដីការគណៈរដ្ឋមន្ត្រី និងអាជ្ញាធរជាតិប្រយុទ្ធនឹងជំងឺអេដស៍ជាដើមឲ្យបង្កើត “ក្រុមការងារ”ដើម្បីបង្កើតផែនការរយៈពេលវែងព្យាបាលអ្នកដែលឆ្លងមេរោគអេដស៍នៅក្នុងឃុំរកានេះ។
គេមិនអាចទាក់ទងលោក ម៉ម ប៊ុនហេង បានទេកាលពីម្សិលមិញ។ ក្នុងចំណោមអ្នកភូមិជាង២៤០នាក់ ដែលបានធ្វើតេស្តរកឃើញថា មានផ្ទុកមេរោគអេដស៍នៅក្នុងឃុំរកា មនុស្ស៦នាក់បានស្លាប់ចាប់តាំងពីការផ្ទុះឡើងនូវជំងឺនេះ រួមមានកុមារផងដែរ។
ក្រុមមន្ត្រីបានដាក់ការបន្ទោសទៅលើលោក យ៉ែម ជ្រិន គ្រូពេទ្យគ្មានអាជ្ញាប័ណ្ណដែលតែងតែព្យាបាលអ្នកភូមិតាមរយៈការចាក់ថ្នាំ ហើយគាត់កំពុងជាប់ពន្ធនាគារនៅឡើយតាមការចោទប្រកាន់ពីបទមនុស្សឃាត៕ សារុន