លោក ម៉ម សូណង់ដូ នាយកស្ថានីយវិទ្យុសំបុកឃ្មុំឯករាជ្យ ដែលមានជម្លោះជាមួយបុគ្គលិកមួយចំនួនរបស់លោកកាលពីសប្តាហ៍មុន បានយល់ព្រមបើកប្រាក់ខែឲ្យបុគ្គលិក៤នាក់ដែលលោកបានបណ្តេញចេញពីការងារ។
លោក សូណង់ដូ បានមានប្រសាសន៍ថា លោកបានយល់ព្រមផ្តល់ប្រាក់ខែដល់បុគ្គលិកបួននាក់ដែលលោកបណ្តេញចេញ ប៉ុន្តែលោកមិនអាចទទួលពួកគេឲ្យមកធ្វើការវិញបានទេ។
លោក សូណង់ដូ បានមានប្រសាសន៍ថា “ខ្ញុំមិនទទួលយកបួននាក់នោះទៀតទេ ព្រោះពួកគេមិនគោរពពេលវេលា និងម៉ោងការងារទេ”។
ដំណោះស្រាយនេះបានកើតឡើង បន្ទាប់ពីលោក សូណង់ដូ បានជួបជាមួយមន្ត្រីមន្ទីរការងារក្រុងភ្នំពេញកាលពីព្រឹកមិញនេះទាក់ទងនឹងការបណ្តេញបុគ្គលិកចេញពីការងារ។
កាលពីថ្ងៃសុក្រ បុគ្គលិកសំបុកឃ្មុំប្រាំពីរនាក់ បានធ្វើបាតុកម្មខាងក្រៅស្ថានីយនៅក្នុងខណ្ឌមានជ័យ ក្រុងភ្នំពេញ។ បុគ្គលិកប្រហែលពាក់កណ្តាលនៃបុគ្គលិកវិទ្យុសំបុកឃ្មុំ២២នាក់ មិនសប្បាយចិត្ត ពីព្រោះថាប្រាក់ខែមួយខែ ត្រូវបានដកពីបុគ្គលិកបួននាក់ដែលទទួលរងចោទថា បានមកធ្វើការយឺតយ៉ាវ។