35 C
Phnom Penh

រដ្ឋាភិបាល​បដិសេធ​របាយការណ៍​ដែល​ចោទ​ថា​មាន​ការ​បំពាន​សិទ្ធិ​កម្មករ

ដោយ ឌឹ ខេមបូឌា ដេលី

បទវិភាគ

ក្រសួង​ការងារ​បាន​បដិសេធ​របាយការណ៍​ថ្មី​របស់​អង្គការ​ឃ្លាំមើល​សិទ្ធិ​មនុស្ស Human Rights Watch (HRW) មាន​មូលដ្ឋាន​នៅ​អាមេរិក ដែល​លើក​ឡើង​នូវ​ការ​បំពាន​ជាច្រើន​លើ​សិទ្ធិ​កម្មករ​ពីសំណាក់​រោងចក្រ​កាត់ដេរ​របស់​ប្រទេស​នេះ ដោយ​ទទូច​ឲ្យ​ក្រុម​អធិការ​រដ្ឋាភិបាល​ឃ្លាំ​មើល​ឲ្យ​ដិតដល់​លើ​និយោជក។

កាលពី​ថ្ងៃ​សៅរ៍ អង្គការ​សិទ្ធិ​មនុស្ស HRW បាន​ចេញ​លទ្ធផល​នៃ​បទ​សម្ភាស​របស់​ខ្លួន​ជាមួយ​កម្មករ​កាត់ដេរ​រាប់រយ​នាក់​កាលពី​ឆ្នាំ​មុន ព្រមទាំង​ជាមួយ​មន្ត្រី​រដ្ឋាភិបាល​និង​រោងចក្រ​ផងដែរ។ ក្នុង​របាយការណ៍​មាន​១៤០​ទំព័រ បាន​ឲ្យ​ដឹង​ថា ការ​ធ្វើ​ការ​លើស​ម៉ោង​ដោយ​បង្ខំ ពលកម្ម​កុមារ ការ​បំបែក​សហជីព និង​ការ​បំពាន​កិច្ចសន្យា​រយៈ​ពេល​ខ្លី និង​អ្នក​ម៉ៅការ​បន្ត​ស្រមោល នៅ​តែ​កើត​មាន​ជា​ទូទៅ។

របាយការណ៍​នេះ​បាន​ហៅ​ការ​ត្រួត​ពិនិត្យ​មើល​របស់​រដ្ឋាភិបាល​លើ​វិស័យ​មាន​ទឹក​ប្រាក់​៥,៧៥ពាន់លាន​ដុល្លារ​នេះ ជា​ឧស្សាហកម្ម​នាំ​ចេញ​ដ៏​ធំ​បំផុត​របស់​ប្រទេស​កម្ពុជា និង​ជា​វិស័យ​ផ្តល់​ការងារ​ច្រើន​បំផុត ថា​គួរ​ឲ្យ​ “ស្រងាក​ចិត្ត”។

ការ​លើក​ឡើង​នូវ​តួលេខ​ដែល​ផ្តល់​​ដោយ​ក្រសួង​ការងារ របាយការណ៍ HRW និយាយ​ថា រដ្ឋាភិបាល​បាន​ពិន័យ​តែ​១០​រោងចក្រ​ប៉ុណ្ណោះ​ក្នុង​ចំណោម​រោងចក្រ​កាត់ដេរ​នាំ​ចេញ​ជាង​៥០០​របស់​ប្រទេស​កម្ពុជា ក្នុង​រយៈ​ពេល​ប្រាំ​ឆ្នាំ ពី​ឆ្នាំ​២០០៩​ដល់​ឆ្នាំ​២០១៣ និង​​២៥​រោងចក្រ​ផ្សេង​ទៀត​ប៉ុណ្ណោះ​ក្នុង​រយៈ​ពេល​១១​ខែ​ដំបូង​នៃ​ឆ្នាំ​២០១៤។ អង្គការ HRW បាន​ពណ៌នា​តួលេខ​នេះ​ថា​ “តិចតួច​ណាស់” បើ​ធៀប​នឹង​ចំនួន​រោងចក្រ​ទាំងអស់ និង​បញ្ហា​ឥត​ឈប់ឈរ​នៃ​ការ​រំលោភ​សិទ្ធិ​ពលករ”។

ក្នុង​សេចក្តី​ប្រកាស​ព័ត៌មាន​មួយ​ចេញ​កាលពី​ថ្ងៃ​សុក្រ ក្រសួង​ការងារ​និយាយ​ថា ខ្លួន​បាន​ធ្វើ​ការ​ជាមួយ​អង្គការ​ពលកម្ម​អន្តរជាតិ (ILO) និង​កម្មវិធី​រោងចក្រ​ល្អ​ប្រសើរ​នៅ​កម្ពុជា (BFC) ដើម្បី​ធ្វើ​ឲ្យ​លក្ខខណ្ឌ​ការងារ​ប្រសើរ​ឡើង និង​បាន​​ហៅ​របាយការណ៍​របស់​ HRW ថា​”មិន​អាច​ទទួល​យក​បាន”ទេ។

សេចក្តី​ប្រកាស​ព័ត៌មាន​នេះ​និយាយ​ថា “ក្រសួង​ការងារ​និង​បណ្តុះ​បណ្តាល​វិជ្ជា​ជីវៈ​មាន​ការ​សោក​ស្តាយ​យ៉ាង​ខ្លាំងនិង​បដិសេធ​ចំពោះ​របាយការណ៍​អង្គការ​ឃ្លាំមើល​សិទ្ធិ​មនុស្ស HRW”។

សេចក្តី​ប្រកាស​ព័ត៌មាន​នេះ​និយាយ​ថា “សហគមន៍​អន្តរជាតិ អ្នក​បញ្ជា​ទិញ និង​អង្គការ​អន្តរជាតិ​ខាង​ការងារ បាន​គាំទ្រ​និង​ទទួល​ស្គាល់​ថា លក្ខខណ្ឌ​ការងារ​នៅ​កម្ពុជា​មាន​ភាព​ល្អ​ប្រសើរ ស្របតាម​បទដ្ឋាន​អន្តរជាតិ ព្រមទាំង​បាន​លើក​ទឹកចិត្ត​ឲ្យ​បណ្តា​ប្រទេស​ផ្សេងទៀត​យក​គំរូ​តាម​ប្រទេស​កម្ពុជា​ក្នុង​ការ​អនុវត្ត​គម្រោង​រោងចក្រ​កាន់តែ​ប្រសើរ​នៅ​កម្ពុជា។ ដូច្នេះ អ្វី​ដែល​បាន​លើកឡើង​ក្នុង​របាយការណ៍​របស់​អង្គការ​នេះ គឺ​មិន​អាច​ទទួល​យក​បាន​ឡើយ”។

ក្រសួង​នេះ​បាន​បន្ថែម​ថា ក្រុម​អធិការកិច្ច​ការងារ​៤៩​ក្រុម​បាន​ធ្វើ​អធិការ​កិច្ច​ការងារ​ចំនួន​៧.១៩១​លើក​ក្នុង​ចំណោម​ ៨០៥​”សហគ្រាស”​ក្នុង​ឆ្នាំ​២០១៤ និង​បាន​ពិន័យ​១២៨​សហគ្រាស។ ក៏​ប៉ុន្តែ សេចក្តី​ប្រកាស​ព័ត៌មាន​នេះ​មិន​បាន​ប្រាប់​ឈ្មោះ​សហគ្រាស​ទាំង​នោះ សហគ្រាស​ប៉ុន្មាន​ជា​រោងចក្រ​កាត់ដេរ ឬ បញ្ជាក់​ថា​បាន​ពិន័យ​ពួកគេ​ប៉ុន្មាន​នោះ​ទេ។

អ្នក​នាំពាក្យ​ក្រសួង​នេះ​មិន​អាច​ទាក់ទង​បាន​ទេ​កាលពី​ថ្ងៃ​អាទិត្យ។

កាលពី​ថ្ងៃ​ព្រហស្បតិ៍ សមាគម​​​រោង​​​ចក្រ​​​កាត់​​​ដេរ​​​នៅ​​​កម្ពុជា​​​ ហៅ​​​កាត់​​​ថា GMAC ដែល​​​តំណាង​​​ឲ្យ​​​រោង​​​ចក្រ​​​​​​ផលិត​​​​​​សម្លៀក​​​បំពាក់​​​​​​សម្រាប់​​​ការ​​​នាំ​​​ចេញ​​​ របស់​​​កម្ពុជា​​​ បាន​និយាយ​ថា កម្មករ​២៧០​នាក់ ដែល HRW បាន​សម្ភាស​សម្រាប់​របាយការណ៍​​របស់​ខ្លួន​នោះ ជា​ចំនួន​តិចតួច​ណាស់​មិន​អាច​តំណាង​ឲ្យ​វិស័យ​មួយ​ដែល​មាន​មនុស្ស​៦០០.០០០​នាក់​បាន​ឡើយ។

សមាគម​នេះ​ក៏​បាន​បន្ទោស​កង្វះ​ធនធាន​លើ​ផ្នែក​ក្រុម​អធិការ​ក្រសួង​ការងារ​ស្តីពី​គម្រោង​រោងចក្រ​កាន់តែ​ប្រសើរ​នៅ​កម្ពុជា ដែលធ្វើ​ការ​ជាមួយ​រដ្ឋាភិបាល​ដើម្បី​ឲ្យ​លក្ខខណ្ឌ​ការងារ​បាន​ប្រសើរ​នៅ​តាម​រោងចក្រ។ ក៏​ប៉ុន្តែ​ក្នុង​របាយការណ៍​របស់​ខ្លួន HRW និយាយ​ថា កម្មវិធី​នេះ​កំពុង​ត្រូវ​បាន​រារាំង​​ដោយ​អ្នក​គ្រប់គ្រង​រោងចក្រ ដែល​បាន​ណែនាំ​កម្មករ​របស់​ខ្លួន​ឲ្យ​ប្រាប់​ក្រុម​អធិការ BFC នូវ​ចំណុច​វិជ្ជមាន​មុន​ការ​ចុះ​មក​ពិនិត្យ ឬ​បាន​គំរាម​ពួកគេ​មិន​ឲ្យ​ត្អួញត្អែរ​ជាដើម។

HRW និយាយ​ថា “បន្ថែម​ទៅ​នឹង​ត្រូវ​គេ​ណែនាំ​ឲ្យ​និយាយ កម្មករ​ត្រូវ​បាន​គេ​ប្រាប់​ឲ្យ​ត្រៀម​ខ្លួន​សម្រាប់​ជួប​អ្នក​ចុះ​មកពិនិត្យ”។

“គេ​បាន​ប្រាប់​កម្មករ​ឲ្យ​យក​គំនរ​ខោអាវចេញ​ពី​ម៉ាស៊ីន​ដេរ​របស់​ខ្លួន​ ហើយ​លាក់​វា និង​បាន​ផ្តល់​ស្រោម​ដៃ​និង​ម៉ាស់​មុន​ក្រុម​អធិការ​មក​ដល់។ ភ្លើង​និង​កង្ហារ​ដែល​ជា​ធម្មតា​ត្រូវ​គេ​បិទ​នោះ ​បាន​បើក កន្លែង​ទឹក​ផឹក​ត្រូវ​ដាក់​បំពេញ ហើយ​កម្មករ​ក្មេង​មិន​គ្រប់​អាយុ​ត្រូវ​បាន​គេ​លាក់​មិន​ឲ្យ​ឃើញ​ទេ”។

នៅ​ពេល​ដែល BFC ចាត់​វិធានការ​តប​នឹង​​ល្បិច​បែប​នេះ របាយការណ៍​នេះ​និយាយ​ថា កម្មករ​នៅ​តែ​ចង់​បាន​ការ​​ទាក់ទង​ដោយ​ផ្ទាល់​នឹង​ក្រុម​អធិការ​ដើម្បី​ធ្វើការ​តវ៉ា ដោយ​មិន​មាន​ការ​សងសឹក​ពី​ថៅកែ​របស់​ខ្លួន។

ប្រតិកម្ម​កាលពី​ថ្ងៃ​អាទិត្យ​ទៅ​នឹង​សេចក្តី​ប្រកាស​ព័ត៌មាន​របស់ក្រសួង​ការងារ លោក​ស្រី អារុណា កាស៊ីយ៉ាប អ្នក​ស្រាវជ្រាវ​សិទ្ធិ​ស្ត្រី​ជាន់​ខ្ពស់​របស់ HRW បាន​និយាយ​ថា តួលេខ​ថ្មី​របស់​ក្រសួង​នេះ​កាន់តែ​ធ្វើ​ឲ្យ​មាន​ការ​បារម្ភ​ថែម​ទៀត។

កាលពី​ខែ​ធ្នូ ក្រសួង​ការងារ ក្នុង​ការ​ឆ្លើយ​សំណួរ​ពី HWR បាន​និយាយ​ថា ខ្លួន​បាន​ចុះ​ធ្វើ​អធិការ​កិច្ច​១.៦៨៦​លើក​អំឡុង​ពេល​១១​ខែ​ដំបូង​នៃ​ឆ្នាំ២០១៤។ លោក​ស្រី​បាន​និយាយ​ថា ដោយ​​បាន​ធ្វើ​អធិការ​កិច្ច​៧.១៩១​លើក​ ដែលក្រសួង​នេះ​ឥឡូវ​នេះនិយាយ​ថា ​ខ្លួន​បាន​ធ្វើ​អធិការ​កិច្ច​តាម​រោងចក្រ​កាត់ដេរ​កាលពី​ឆ្នាំ​មុន​នោះ ខ្លួន​នឹង​ត្រូវ​ធ្វើ​អធិការ​កិច្ច​៥.៥០៥​លើក​ក្នុង​ពេល​តែ​មួយ​ខែ​ប៉ុណ្ណោះ ពោល​គឺ​ជា​មធ្យម​ធ្វើ​អធិការ​កិច្ច​ជិត​១៧៨​លើក​ក្នុង​មួយ​ថ្ងៃ។

លោក​ស្រី កាស៊ីយ៉ាប បាន​និយាយ​ថា “ដូច្នេះ​យើង​បារម្ភ​ណាស់​ចំពោះ​អធិការកិច្ច​ដែល​ធ្វើ​ឡើង​តាម​វិធី​ប្រញាប់​ប្រញាល់​រួសរាន់​បែប​នេះ”។

លោក​ស្រី​បាន​បន្ថែម​ថា ហើយ​បើ​រដ្ឋាភិបាល​ច្រានចោល​នូវ​អ្វី​ដែល​កម្មករ​បាន​ប្រាប់ HRW នោះ “ពួកគេ​និយាយ​ថា កម្មករ​របស់​ខ្លួន​ជា​អ្នក​កុហក​…។ ហើយ​នោះ​ជា​រឿង​ព្រួយ​បារម្ភ​ណាស់ ហើយ​ជា​សារ​ខក​ចិត្ត​បញ្ជូន​ទៅ​កម្មករ”។

លោក​ស្រី កាស៊ីយ៉ាប បាន​និយាយ​ថា រដ្ឋាភិបាល​គួរ​បញ្ចេញ​ឲ្យ​ដឹង​ព័ត៌មាន​ថែម​ទៀត​ ថាតើ​រោងចក្រ​ណា​ខ្លះ​ត្រូវ​ទទួល​ពិន័យ ពួកគេ​ត្រូវ​បង់​ពិន័យ​ប៉ុន្មាន ហើយ​ថាតើ​ពួកគេ​បាន​បង់​ពិត​មែន​ដែរ​ឬអត់។

អ្នក​ស្រាវជ្រាវ​ជាន់​ខ្ពស់​រូប​នេះ​បាន​និយាយ​ថា “សាធារណជន​នឹង​ដឹង​ប្រាកដ ប្រសិនបើ​រដ្ឋាភិបាល​ប្តេជ្ញា​ឲ្យ​រោងចក្រ​ទទួល​ខុសត្រូវ​មែន​នោះ”៕ និត

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស