អ្នកនាំពាក្យក្រសួងយុត្តិធម៌បានឲ្យដឹងកាលពីម្សិលមិញថា ក្រសួងយុត្តិធម៌កំពុងពិនិត្យមើលសេចក្តីព្រាងសន្ធិសញ្ញាបត្យាប័នជាមួយប្រទេសរុស្ស៊ី ដែលអាចឃើញថា លោក សេរហ្គេ ប៉ូលុនស្គី ពាណិជ្ជករដែលកំពុងរត់គេចខ្លួន ប្រឈមនឹងការចោទ ប្រកាន់ពីបទកិបកេងប្រាក់រាប់លានដុល្លារនៅក្នុងប្រទេសកំណើតរបស់ខ្លួន។
ក្រុងមូស្គូ បានលើកសំណើពីការសុំធ្វើបត្យាប័នអតីតមហាសេដ្ឋីអាយុ៤២ឆ្នាំរូបនេះ ដែលត្រូវបានបដិសេធដោយតុលាការកម្ពុជា ប៉ុន្តែ បន្ទាប់ពីជំនួបរវាងលោក ហោ ណាំហុង រដ្ឋមន្ត្រីក្រសួងការបរទេស និងលោក សេរហ្គេ ឡាវរូវ សមភាគីរបស់លោកក្នុងទីក្រុងមូស្គូ កាលពីខែមុន លោក ឡាវរូវ បានប្រាប់អ្នកយកព័ត៌មានថា ប្រទេសទាំងពីរកំពុងស្ថិតក្នុងដំណាក់កាលចុងក្រោយនៃការពិភាក្សាពីសន្ធិសញ្ញាបត្យាប័ននេះ។
យោងតាមប្រតិចារឹកដែលបានចុះផ្សាយក្នុងគេហទំព័ររបស់ក្រសួងការបរទេសរុស្ស៊ី លោក ឡាវរូវ បានមានប្រសាសន៍ដល់សន្ធិសញ្ញានោះថា “ជំនួបចុងក្រោយនៃក្រុមអ្នកជ ំនាញត្រូវបានគ្រោងធ្វើនៅខែនេះ ហើយយើងសង្ឃឹមថា បន្ទាប់ពីជំនួបអាចមានការចុះហត្ថលេខា”។
លោក គឹម សន្តិភាព អ្នកនាំពាក្យក្រសួងយុត្តិធម៌បានបញ្ជាក់កាលពីម្សិលមិញថា បច្ចុប្បន្ននេះ ក្រុមការងារកំពុងពិនិត្យមើលសេចក្តីព្រាងនេះ។
លោក សន្តិភាព បានមានប្រសាសន៍ថា “យើងកំពុងពិនិត្យមើលការងារបច្ចេកទេស និងនីតិវិធីច្បាប់”។ លោកបានបន្ថែមថា សមាជិកក្រុមការងារកំពុងដោះស្រាយភាពផ្សេងគ្នារវាងច្បាប់រុស្សី និងច្បាប់កម្ពុជា។
អ្នកនាំពាក្យរូបនេះបានបដិសេធមិនផ្តល់ព័ត៌មានលម្អិតអំពីខ្លឹមសារនៃសន្ធិសញ្ញា ឬលើកឡើងថា តើនឹងបញ្ចប់នៅពេលណានោះឡើយ។
បន្ទាប់ពីជំនួបកាលពីថ្ងៃទី៤ ខែមីនា រវាងលោក ហោ ណាំហុង និងលោក ឡាវរូវ លោក កាស្ប៉ា សេកូទីន មេធាវីរបស់លោក ប៉ូលុនស្គី បានឆ្លើយតបទៅនឹងរបាយការណ៍ទាំងនោះដោយលើកឡើងថា សន្ធិសញ្ញានេះទំនងជាមិនប្រតិសកម្មទេ ហេតុដូច្នោះហើយនឹងមិនប៉ះពាល់ដល់កូនក្តី របស់លោកឡើយ ដោយលោកកត់សម្គាល់ថា សំណើបត្យាប័នរបស់ក្រុងមូស្គូ ត្រូវបានបដិសេធរួចហើយដោយសាលាឧទ្ធរណ៍ និងតុលាការកំពូល។
នៅពេលត្រូវបានទាក់ទងកាលពី ម្សិលមិញ លោក សេកូទីន បានមានប្រសាសន៍ថា លោកកំពុងពិចារណាពីបញ្ហានេះនៅឡើយ។
លោកបានមានប្រសាសន៍ដល់សន្ធិសញ្ញានោះថា “ខ្ញុំទទួលព័ត៌មានថា វាកំពុងត្រូវបានរៀបចំនៅឡើយ ប៉ុន្តែ វាមិននឹងប៉ះពាល់ដល់លោក ប៉ូលុនស្គី ទេ ពីព្រោះតុលាការកំពូលបានសម្រេចរួចហើយ”។
ទោះជាយ៉ាងណា លោក សុក សំអឿន អ្នកជំនាញផ្នែកច្បាប់បានមានប្រសាសន៍ថា តាមពិត សន្ធិសញ្ញាបត្យាប័ននឹងជាប្រតិសកម្មលុះណាតែវាមានខចែងផ្សេងពីនេះ។
លោកបានមានប្រសាសន៍ថា “ប្រសិនបើសន្ធិសញ្ញានេះចែងយ៉ាងច្បាស់ថា វាមិនប្រតិសកម្ម នោះគេនឹងអនុវត្ត។ ប្រសិនបើមិនទាន់ក្លាយជាសន្ធិសញ្ញា នោះសន្ធិសញ្ញាបត្យាប័ន នឹងជាប្រតិសកម្ម”។
លោក សន្តិភាព អ្នកនាំពាក្យក្រសួងយុត្តិធម៌បានមានប្រសាសន៍ថា លោកមិនច្បាស់ថា តើសេចក្តីព្រាងនៅការិយាល័យរបស់លោកមានខបែបនេះ ឬយ៉ាងណានោះឡើយ៕សារុន