មន្ត្រីមួយរូបបានឲ្យដឹងថា កាលពីម្សិលមិញលោកនាយករដ្ឋមន្ត្រី ហ៊ុន សែន បានធ្វើមាតុភូមិនិវត្តពីសន្និសីទអន្តរជាតិមួយស្តីពីការគ្រប់គ្រងគ្រោះមហន្តរាយដែលរៀបចំឡើងនៅក្នុងប្រទេសជប៉ុន ដោយនៅទីនោះនាយករដ្ឋមន្ត្រីជប៉ុន លោក សីុនហ្សូ អាបេ បានសន្យាជាមួយកម្ពុជាថានឹងជួយរៀបចំបញ្ជីឈ្មោះបោះឆ្នោតនៅពេលច្បាប់បោះឆ្នោតថ្មីចូលជាធរមាន។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងប្រាប់អ្នកយកព័ត៌មានថា លោក អាបេ បានសន្យាបញ្ជូនអ្នកជំនាញខាងរៀបចំបញ្ជីឈ្មោះបោះឆ្នោតមកកាន់ប្រទេសកម្ពុជានៅពេលឮលោក ហ៊ុន សែន មានប្រសាសន៍ថា ច្បាប់បោះឆ្នោតជិតដាក់ជូនឲ្យរដ្ឋសភាអនុម័ត។
លោកបានមានប្រសាសន៍ទៀតថា “លោក ស៊ីនហ្សូ អាបេ សង្ឃឹមថា កំណែទម្រង់បោះឆ្នោតនឹងបន្តរហូតទាល់តែគណបក្សទាំងពីរសម្រេចការងារទាំងអស់។ លោក សីុនហ្សូ អាបេ បានមានប្រសាសន៍ថា លោកនឹងជំរុញឲ្យជប៉ុនចូលរួមការងារបោះឆ្នោតនៅក្នុងប្រទេសកម្ពុជា”។
លោកបានពន្យល់ថា ជប៉ុននឹងបញ្ជូនអ្នកជំនាញខាងរៀបចំបញ្ជីឈ្មោះបោះឆ្នោតនៅពេលគណៈកម្មាធិការជាតិរៀបចំការបោះឆ្នោត (គ.ជ.ប.) ត្រូវបានបង្កើតឡើង ហើយចាប់ផ្តើមធ្វើបញ្ជីឈ្មោះបោះឆ្នោតថ្មីសម្រាប់កម្ពុជា។
លោកក៏បានមានប្រសាសន៍ដែរថា អំឡុងសន្និសីទនោះ លោក បាន គីមូន អគ្គលេខាធិការអង្គការសហប្រជាជាតិ បានអញ្ជើញលោក ហ៊ុន សែន ឲ្យចូលរួមសន្និសីទមួយស្តីពីនិរន្តភាពបរិស្ថាន ដែលនឹងត្រូវរៀបចំឡើងនៅខែកញ្ញា នៅទីស្នាក់ការកណ្តាលរបស់អង្គការសហប្រជាជាតិក្នុងក្រុងញូវយ៉ក សហរដ្ឋអាមេរិក៕សុខុម