កាលពីម្សិលមិញ លោក គួច ចំរើន អភិបាលខណ្ឌដូនពេញបានសម្រុះសម្រួលឲ្យមានការឈប់វាយតប់គ្នារវាងអ្នករត់រ៉ឺម៉កមូ៉តូកងបីពីរក្រុម ដែលបានប្រើអំពើហិង្សាដាក់គ្នាកាលពីដើមខែនេះដោយសារឈ្លោះគ្នារឿងដណ្តើមម៉ូយ។
កាលពីថ្ងៃទី២ ខែមីនា សមាជិកនៃសមាគមប្រជាធិបតេយ្យឯករាជនៃសេដ្ឋកិច្ចក្រៅប្រព័ន្ធ ហៅកាត់ IDEA បានវាយតប់គ្នាជាមួយសមាជិកនៃសមាគមរួមគ្នាដើម្បីអភិវឌ្ឍន៍កម្ពុជា ហៅកាត់ថា CCDA ជុំវិញរឿងដណ្តើមម៉ូយគ្នានៅខាងមុខស្ថានីយរថភ្លើងក្នុងខណ្ឌដូនពេញ រាជធានីភ្នំពេញ។
ដំបូងឡើយវាគ្រាន់តែជាជម្លោះពាក្យសម្តីប៉ុណ្ណោះ ប៉ុន្តែ ស្ថានភាពកាន់តែតានតឹងឡើងរហូតដល់ផ្ទុះអំពើហិង្សា ដោយអ្នករត់រ៉ឺម៉កម៉ូតូកង់បីទាំងនោះបានបើកឆាកប្រយុទ្ធគ្នាដោយប្រើបំពង់ទីប និងច្រវាក់។
កាលពីម្សិលមិញ លោក គួច ចំរើន បានធ្វើជាអធិបតីក្នុងជំនួបមួយដែលមានការចូលរួមពីសំណាក់សមាគមទាំងពីរដែលបានព្រមព្រៀងបញ្ឈប់ការវាយតប់គ្នាដោយប្រធាននៃសមាគមទាំងពីរបានចុះកិច្ចព្រមព្រៀង “បំភ្លេចចោល” ហេតុការណ៍វាយតប់គ្នា កាលពីថ្ងៃ២ ខែមីនា ហើយឈប់វាយតប់គ្នាទៀតទៅថ្ងៃក្រោយ។
កិច្ចព្រមព្រៀងនេះចែងថា ប្រសិនបើសមាជិកនៃសមាគមទាំងពីរឈ្លោះគ្នា ចាំបាច់ត្រូវហៅប្រធានសមាគមមកសម្របសម្រួល “ជាបន្ទាន់”។ CCDA ក៏បានយល់ព្រមដកពាក្យបណ្តឹងដែលខ្លួនបានដាក់ទៅនគរបាលជុំវិញហេតុការណ៍វាយតប់គ្នានេះផងដែរ។
លោក គួច ចំរើន បានមានប្រសាសន៍អំឡុងជំនួបសម្រុះសម្រួលនោះថា “យើងមិនចង់ធ្វើឲ្យប្រទេសរបស់យើងមានកេរ្តិ៍ឈ្មោះអាក្រក់ចំពោះជនបរទេសដែលតែងតែជិះធុកធុកនោះទេ។ យើងចង់ឲ្យសមាគមទាំងពីរឈប់ប្រជែងគ្នា ពីព្រោះពេលខ្លះវាអាចបណ្តាលឲ្យមានការវាយតប់គ្នា”។
លោក វន់ ពៅ ប្រធានរបស់ IDEA បានមានប្រសាសន៍បន្ទាប់ពីជំនួបនេះថា លោកមិនសូវមានសង្ឃឹមច្រើនថា កិច្ចព្រមព្រៀងនេះនឹងបញ្ឈប់សមាជិករបស់ CCDA មិនឲ្យវាយតប់ជាមួយសមាជិករបស់លោកឡើយ។
លោក វន់ ពៅ ដែលសមាគមរបស់លោកមានសម្ព័ន្ធភាពជាមួយគណបក្សប្រឆាំងលើបញ្ហាជាច្រើន បានមានប្រសាសន៍ទៀតថា “ខ្ញុំគិតថា ទោះបីជាមានកិច្ចព្រមព្រៀងជាមួយលោកអភិបាលខណ្ឌក្តី ក៏ពួកគេ [CCDA] នឹងនៅតែរើសអើងយើង ពីព្រោះពួកគេត្រូវបានគាំទ្រដោយរដ្ឋាភិបាល”។
ទោះជាយ៉ាងណា អំឡុងជំនួបកាលពី ម្សិលមិញ លោក ឯ សំភាស់ ប្រធានរបស់ CCDA បានបដិសេធថា សមាគមរបស់លោកមិនពាក់ព័ន្ធនឹងរដ្ឋាភិបាលនោះទេ ហើយបានទាមទារឲ្យសមាគម IDEA ឈប់លើកឡើងបែបនេះទៀត។
លោកបានលើកឡើងទៀតថា “ខ្ញុំសង្ឃឹមថា សមាគម [IDEA] នឹងឈប់បង្ខូចកេរ្តិ៍ឈ្មោះ និងចោទប្រកាន់ខ្ញុំថាទទួលបានការគាំទ្រពីរដ្ឋាភិបាលតទៅទៀត។ កាលពីឆ្នាំមុន ខ្ញុំទទួលបានការបរិច្ចាគពីអង្គការ ILO [អង្គការពលកម្មអន្តរជាតិ] តែ១.០០០ដុល្លារប៉ុណ្ណោះ”៕សុខុម