32 C
Phnom Penh

អគ្គស្នង​ការ​នគរ​បាល​ជាតិ​​អំពាវ​នាវ​​ឲ្យ​មាន​ការ​បង្ក្រាប​បទល្មើស​ឲ្យ​បាន​ច្រើនជាង​មុន​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ លោក នេត សាវឿន អគ្គស្នង​ការ​នគរ​បាល​ជាតិ​បានអំពាវ​នាវ​ឲ្យ​កង​កម្លាំង​នគរ​បាល​រាជធានី​បង្កើត​អត្រា​ចាប់​ខ្លួន​នៅ​ក្នុង​រាជធានី​ភ្នំពេញ​ឲ្យ​បាន​ដល់​៧៥​ភាគរយ នៃ​បទ​ល្មើស​ដែល​​ត្រូវ​បាន​រាយការណ៍​ ហើយ​លោក​ក៏​បាន​ស្នើ​ឲ្យ​ចៅក្រម​សាលា​ដំបូង​រាជធានី​​កាត់​បន្ថយ​ការ​ដោះលែង​​ឲ្យ​នៅក្រៅឃុំ​ផង​ដែរ។

ពេល​ថ្លែង​ទៅ​កាន់​នគរ​បាល​ កង​រាជអាវុធហត្ថ និង​មន្ត្រី​តុលាការ​ដែល​ចូល​រួម​ក្នុង​កិច្ច​ប្រជុំ​ប្រចាំ​ឆ្នាំ​របស់​នគរ​បាល​រាជធានី ឧត្ដម​សេនីយ៍ នេត សាវឿន បាន​លើក​ឡើង​ថា នគរ​បាល​ត្រូវ​តែ​ផ្ដោត​លើ​ការ​ខិត​ខំប្រឹង​ប្រែង​របស់​ខ្លួន​ក្នុង​ការ​ទប់​ស្កាត់​ការ​ឆក់​កាបូប​នៅ​ក្នុង​រាជធានី។

លោក​បាន​មាន​ប្រសាសន៍​ថា “បញ្ហា​ប្រឈម​​ទី១​របស់​យើងគឺ​អំពើ​ចោរកម្ម​តូច​តាច និង​អំពើ​ឆក់​ ហើយ​ខ្ញុំ​សូម​ស្នើ​ឲ្យ​អភិបាល​រាជធានី​​ជួយ​សហការ​ជាមួយ​កម្លាំង​ និង​​ស្នើ​ឲ្យ​អភិបាល​ខណ្ឌ​ទាំងអស់​ជួយ​​លុប​បំបាត់​អំពើ​ទាំង​នេះ”។

បន្ទាប់​មក ឧត្ដម​សេនីយ៍ នេត សាវឿន បាន​លើក​ឡើង​ទាក់​ទិន​នឹង​មន្ត្រី​តុលាការ​ ហើយ​ស្នើ​ឲ្យ​ពួកគេ​កុំ​សូវ​ដោះ​លែង​ចោរ​ដែល​ចាប់​បាន​ឲ្យ​នៅ​ក្រៅឃុំ។

លោក​បាន​មាន​ប្រសាសន៍​ថា “ទោះបី​ជា​មាន​អ្នក​មក​ធានា​ពួកគេ​ឲ្យ​នៅ​ក្រៅឃុំ​ក៏ដោយ អស់​លោកមិន​គួរ​ដោះលែង​ពួកគេ​លឿនពេក​នោះ​ឡើយ​។ យើង​ចាំបាច់​ត្រូវ​តែ​ចាត់វិធានការ​​តឹង​រ៉ឹង​ចំពោះ​ពួកគេ​។ យើង​ទទួល​រង​ការ​រិះគន់ពី​សហភាព​អឺរ៉ុប និង​បន្ទាប់​មក​ទៀត​​ពី​ជប៉ុន​ជុំវិញ​​អំពើ​ឆក់​នេះ​”។

អគ្គស្នង​ការ​នគរ​បាល​ជាតិ​រូប​នេះ​បាន​លើក​ឡើង​ទៀត​ថា នគរ​បាល​រាជធានី​ភ្នំពេញ​​បាន​ចង​ដៃ​របស់​ខ្លួន​អំឡុង​ភាព​តាន​​តឹង​ផ្នែក​នយោបាយ​​ចន្លោះ​រយៈពេល​នៃ​ការ​បោះ​ឆ្នោត​ជាតិ​កាលពី​ខែ​កក្កដា ឆ្នាំ​២០១៣ ដល់​ខែ​កក្កដា​ឆ្នាំ​មុន ប៉ុន្តែ​​ឥឡូវ​​ដាច់​ខាត​ត្រូវ​តែ​ធ្វើ​ការ​ចាប់​ខ្លួន​ឲ្យ​បាន​ច្រើន​​ក្នុង​បទល្មើស​ដែល​ត្រូវ​បាន​រាយ​ការណ៍ទៅ​ឲ្យពួកគេ​។

ឧត្ដម​សេនីយ៍ នេត សាវឿន បាន​មាន​ប្រសាសន៍​បន្ថែម​ទៀត​ថា​ “យើង​ធ្វើ​ការ​ចាប់​ខ្លួន​បាន​ត្រឹម​តែ​៦៦ភាគ​រយ​ប៉ុណ្ណោះ​នៃ​បទ​ល្មើស​ដែល​បាន​កើត​ឡើង ហើយ​ថា ភាគ​រយ​នេះ​គឺ​នៅ​ទាប​នៅឡើយ​ ខណៈ​ទូទាំង​ប្រទេស​មាន​​ [អត្រា​​ចាប់​ខ្លួន] ​ចំនួន​៧៣ភាគរយនៃ​បទ​ល្មើស​ដែល​បាន​កើត​ឡើង​ទាំង​អស់​ ហើយ​បណ្ដាខេត្ត​មួយ​ចំនួន​បាន​ធ្វើ​ការ​ចាប់​ខ្លួន​បាន​៩០​ភាគរយ​”។

លោក​បាន​មាន​ប្រសាសន៍​ទៀត​ថា “ហេតុ​ដូច្នេះ រាជធានី​ភ្នំពេញ​​ចាំបាច់​ត្រូវ​តែ​ខិត​ខំ​ធ្វើ​ការ​បន្ថែម​ទៀត​​ គឺ​មិន​ឲ្យ​តិ​ចជាង​៧៥​ភាគរយ​ឡើយ ហេតុ​ដូច្នេះ យើង​ត្រូវ​តែ​ធ្វើ​កា​រចាប់​ខ្លួន​ឲ្យ​បាន​ច្រើន​ជាង​មុន​នៅពេល​មាន​ករណី​កើត​ឡើង​”។

ពេល​បិទ​អង្គ​ប្រជុំ​ ឧត្ដម​សេនីយ៍ នេត សាវឿន បាន​ប្រកាស​ពីការ​ផ្ដល់​ជំនួយ​មួយ​ចំនួន​ដល់​កង​កម្លាំង​នគរ​បាលរាជធានី ក្នុង​នោះ​មាន​រួម​ទាំង​រូប​លោក​ផង​ដែរ។

លោក ស ខេង រដ្ឋមន្ត្រី​ក្រសួង​មហាផ្ទៃ​បាន​ឧបត្ថម្ភ​ម៉ូតូ​ចំនួន​១០០គ្រឿង​ ឧត្ដម​សេនីយ៍ នេត សាវឿន ឧបត្ថម្ភ​កាំភ្លើង​បាញ់​គ្រាប់​បែក​ផ្សែង​ចំនួន​៤០​ដើម លោក ជួន សុវណ្ណ ស្នង​ការ​នគរ​បាល​រាជធានី​ និង​ឧត្ដម​សេនីយ៍ នេត សាវឿន ដដែល​បាន​ឧបត្ថម្ភ​ឯកសណ្ឋាន​ការ​​ពារ​​ខ្លួន​ចំនួន​៤.០០០​សម្រាប់​ ហើយ​​លោក បា៉ សុជាតិវង្ស អភិបាល​រាជធានី​ឧបត្ថម្ភ​ចំនួន​៥.០០០​ដុល្លារ​៕ ស៊ុយឈាង​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស