ពេលនេះនគរបាលកំពុងសើុបអង្កេតករណីលួចដុតរថយន្តមែកសឺដេស បិន (Mercedis-Benz) មួយគ្រឿងនៅក្នុងក្រុងព្រះសីហនុ ដែលបានឆេះមិនយូរប៉ុន្មានក្រោយពីម្ចាស់ជនជាតិតួកគី ម្នាក់ដើរចេញពីរថយន្តនេះកាលពីវេលាទៀបភ្លឺឈានចូលព្រឹកថ្ងៃម្សិលមិញ។
យោងតាមនគរបាលបានឲ្យដឹងថា រថយន្តពណ៌ខ្មៅនេះបានឆេះនៅម៉ោងជាង៣ទៀបភ្លឺ ប៉ុន្តែអាជ្ញាធរបានប៉ាន់ស្មានខុសៗគ្នាជុំវិញថា តើការឆេះនេះជាឧបទ្ទវហេតុដែលកើតឡើងដោយឯកឯង ឬជាការវាយប្រហារចុងក្រោយបំផុតនៅក្នុងជម្លោះដែលកាន់តែសាហាវរវាងជនបរទេសពីរក្រុមនៅក្នុងទីក្រុងមាត់ឆ្នេរមួយនេះ។
លោក ភុល ភ័ស្តា អធិការក្រុងព្រះសីហនុ បានមានប្រសាសន៍ថា បុរសឈ្មោះ បូរ៉ា អូស្ទើក (Bora Ozturk) អាយុ៣៦ឆ្នាំ បានចតរថយន្តនេះនៅខាងក្រៅផ្ទះជួលរបស់ខ្លួន ហើយបានដើរចូលទៅខាងក្នុង មុនពេលរថយន្តនេះឆេះដែលធ្វើឲ្យខូចខាតគម្របក្បាលរថយន្ត និងបែកកញ្ចក់ខាងមុខ។
លោកមានប្រសាសន៍ទៀតថា “រថយន្តនេះបានឆេះនៅម៉ោងជាង៣ទៀបភ្លឺឈានចូលព្រឹកថ្ងៃអង្គារ នៅក្នុងភូមិ២ សង្កាត់៣។ យើងមិនដឹងថា អ្វីបង្កឲ្យរថយន្តឆេះទេ ហើយពេលនេះយើងកំពុងសើុបអង្កេតករណីនេះ”។
ហេតុការណ៍នេះបានកើតឡើងតែប៉ុន្មានថ្ងៃប៉ុណ្ណោះក្រោយពីចុងផ្នែកខាងមុខនៃរថយន្តរ៉ង់រ៉ូវើ (Range Rover) សេ៊រីថ្មីមួយគ្រឿងបានរងការខូចខាតដោយសារការផ្ទុះនៅខាងក្រៅផ្ទះរបស់លោក នីកូឡៃ ដូរ៉ូសេនកូ (Nikolai Doroshenko) អាយុ៥៤ឆ្នាំ ជាអ្នកជំនួញជនជាតិរុស្សី ដែលរស់នៅកម្ពុជាយូរមកហើយ និងដែលជាប់ពាក់ព័ន្ធជម្លោះផ្លូវច្បាប់មួយចំនួនជាមួយលោក សេរហ្គេ ប៉ូលុនស្គី អាយុ៤២ឆ្នាំ ដែលរស់នៅលើកោះឯកជនមួយនៅឯនាយឆ្នេរក្រុុងព្រះសីហនុ។
កូនប្រុសរបស់លោក នីកូឡៃ ដូរ៉ូសេនកូ ឈ្មោះ អូស្តាប ដូរ៉ូសេនកូ (Ostap Doroshenko) វ័យ៣៦ឆ្នាំដែលមានតំណែងជាអនុសេនីយ៍ឯកក្នុងជួរកងកម្លាំងនគរបាលអន្តោប្រវេសន៍ខេត្តនេះបានចោទប្រកាន់លោក សេរហ្គេ ប៉ូលុនស្គី ថាជាអ្នកនៅពីក្រោយករណីផ្ទុះរថយន្តរ៉ង់រ៉ូវើ កាលពីពេលទៀបភ្លឺឈានចូលព្រឹកថ្ងៃសុក្រ ដែលលោកអះអាងថាជាផ្នែកមួយនៃផែនការធ្វើឃាតឪពុកម្តាយរបស់លោក។
លោក អូស្តាប ដូរ៉ូសេនកូ និយាយថា “នៅយប់នោះ មានមនុស្សព្យាយាមសម្លាប់ឪពុកម្តាយរបស់ខ្ញុំ”។ លោកបានលើកឡើងបន្ថែមទៀតថា ពេលនោះលោក និងឪពុករបស់លោកស្ថិតក្នុងរាជធានីភ្នំពេញ ចំណែកឯម្តាយរបស់លោកដែលស្ថិតនៅក្នុងផ្ទះ បានរត់គេចខ្លួនដោយសុវត្ថិភាពក្នុងឈុតរាត្រី។
លោកបានបន្តថា លោកជឿថា ករណីភ្លើងឆេះចុងក្រោយដែលប៉ះពាល់លោក បូរ៉ា អូស្ទើក ដែលជាដៃគូជំនួញរបស់លោក សេរហ្គេ ប៉ូលុនស្គី នេះ ត្រូវបានបង្កឡើងដោយកំហុសចរន្តអគ្គិសនីក្នុងរថយន្ត ហើយមិនពាក់ព័ន្ធការផ្ទុះនៅខាងក្រៅផ្ទះឪពុកម្តាយរបស់លោកកាលពីសប្តាហ៍មុនឡើយ។
លោក សេរហ្គេ ប៉ូលុនស្គី អតីតមហាសេដ្ឋីមានចរិតដ៏ចម្លែកដែលក្រុងមូស្គូ កំពុងតាមចាប់ខ្លួនពីបទបន្លំកិបកេងប្រាក់ជាច្រើនលានដុល្លារ បានបដិសេធថា ខ្លួនមិនជាប់ពាក់ព័ន្ធក្នុងករណីណាមួយក្នុងចំណោមករណីទាំងនេះទេ។
លោក កាស្ប៉ាស សេកូទីន (Kaspars Cekotins) មេធាវីការពារលោក សេរហ្គេ ប៉ូលុនស្គី បានមានប្រសាសន៍ថា “មានតែ ដូរ៉ូសេនកូ ខ្លួនឯងទេដែលអាចរៀបរាប់បានច្បាស់អំពីអ្វីដែលបានកើតឡើងនៅទីនោះ”។
លោកបានសរសេរនៅក្នុងសារតាមហ្វេសប៊ុកថា “វាប្រហែលជាជាប់ពាក់ព័ន្ធនឹងការរកស៊ីរបស់គាត់ ឬប្រហែលជារឿងមួយរបស់គាត់ យើងអាចត្រឹមតែទាយប៉ុណ្ណោះ។ រឿងមួយគឺច្បាស់ណាស់ថា ប៉ូលុនស្គី ពិតជាមិនពាក់ព័ន្ធនឹងរឿងនេះ និងហេតុការណ៍ថ្មីៗនេះក្នុងក្រុងព្រះសីហនុឡើយ”។
ពេលទាក់ទងកាលពីម្សិលមិញ លោក ណុប សារឿន នាយការិយាល័យព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ បានមានប្រសាសន៍ថា ករណីទាំងពីរនេះទំនងជាមានការពាក់ព័ន្ធគ្នា។លោកបានថ្លែងថា “យើងសង្ស័យថា ករណីទាំងនេះបានកើតឡើង [ដោយសារ] ជម្លោះរវាងជនបរទេស” ដោយលោកបដិសេធមិនធ្វើអត្ថាធិប្បាយទៀតទេ។ ទោះជាយ៉ាងណា លោក សៀង កុសល ស្នងការខេត្តព្រះសីហនុ បានមានប្រសាសន៍ថា ករណីទាំងពីរនេះគឺ “ដាច់ដោយឡែកពីគ្នា” ហើយខណៈអ្នកខ្លះប៉ាន់ស្មានថា ការវាយប្រហារទាំងនេះជាប់ពាក់ព័ន្ធនឹងក្រុមម៉ាហ្វីយ៉ានោះ គឺគ្មានភ័ស្តុតាងទេ”។
លោកបានបង្វែរសំណួរបន្ថែមទៀតទៅលោក សារ៉ាត់ វិទ្យា នាយការិយាល័យកោសល្យវិច័យនៃស្នងការដ្ឋាននគរបាលខេត្តព្រះសីហនុ ដែលសុំមិនធ្វើអត្ថាធិប្បាយបន្ថែមទៀត។
ក្រុងព្រះសីហនុ មានការកើនឡើងបទល្មើសហិង្សាពាក់ព័ន្ធជនបរទេសក្នុងរយៈពេលពីរបីខែកន្លងមកនេះ ដោយរួមទាំងករណីចាក់មនុស្ស ករណីបាញ់ប្រហារទៅលើរថយន្ត និងការប៉ុនប៉ងធ្វើឃាតមិនបានសម្រេចមួយផងដែរ។
អំឡុងសុន្ទរកថាថ្លែងទៅកាន់មន្ត្រីនៅក្រសួងមហាផ្ទៃកាលពីថ្ងៃសុក្រ លោក នេត សាវឿន អគ្គស្នងការនគរបាលជាតិបានលើកឡើងអំពីការកើនឡើងនូវបទល្មើសប្រព្រឹត្តដោយជនបរទេស និងប្រឆាំងជនបរទេសនៅក្នុងប្រទេសកម្ពុជា ជាពិសេសក្រុងព្រះសីហនុ។
យោងតាមសម្រង់ពាក្យសម្តីរបស់លោកដែលបានបង្ហោះក្នុងគេហទំព័ររបស់អគ្គស្នងការដ្ឋាននគរបាលជាតិបានឲ្យដឹងថា លោក នេត សាវឿន បានមានប្រសាសន៍ថា “កម្ពុជាមិនអនុញ្ញាតឲ្យជនបរទេសដែលជាក្រុមម៉ាហ្វីយ៉ា មកប្រព្រឹត្តបទល្មើសខុសច្បាប់នៅលើទឹកដីកម្ពុជាឡើយ”។
លោក បូរ៉ា អូស្ទើក ម្ចាស់រថយន្តមែកសឺដេសដែលត្រូវភ្លើងឆេះ មិនអាចទាក់ទងបានទេកាលពីម្សិលមិញ។ ប៉ុន្តែជនជាតិខ្មែរម្នាក់ឈ្មោះ កាន់ ដែលជាអ្នកគ្រប់គ្រងមជ្ឈមណ្ឌលមុជទឹកកោះរ៉ុង ជាមួយលោក បូរ៉ា អូស្ទើក ដែលលោកបានឲ្យរថយន្តខ្ចី និយាយថា មួយថ្ងៃក្រោយពីនគរបាលសាកសួរនៅលើដីគោក គាត់បានសម្រេចចិត្តមិនដាក់ពាក្យបណ្តឹង។
ទាំងលោក បារ៉ា អូស្ទើក និងលោក កាន់ គឺជាដៃគូពាណិជ្ជកម្មរបស់លោក សេរហ្គេ ប៉ូលុនស្គី ដោយលោក កាន់ ជួយសាងសង់ “សារមន្ទីរសង្គ្រាមក្រោមទឹក” (Underwater War Museum) នៅក្នុងទឹកនៅកោះតាង ចំណែកឯលោក បារ៉ា អូស្ទើក ទើបតែបញ្ចប់ការមើលខុសត្រូវលើការសាងសង់បឹងកាឡូនៅលើកោះដំឡូង ដែលមហាសេដ្ឋីរុស្សុី រូបនេះកំពុងអភិវឌ្ឍ។
លោក កាន់ និយាយថា “បើខ្ញុំរាយការណ៍ទៅប៉ូលិស ខ្ញុំមិនជឿថា ពួកគេរកឃើញអ្នកដុតរថយន្តរបស់ខ្ញុំឡើយ ហើយវានឹងធ្វើឲ្យខ្ញុំអស់លុយទៅវិញទេ ដូច្នេះហើយខ្ញុំក៏និយាយថា វាជាការឆេះឆ្លងចរន្តអគ្គិសនី រួចយករថយន្តរបស់ខ្ញុំត្រឡប់មកវិញ ហើយបញ្ចប់ករណីនេះ។ ខ្ញុំមិនដឹងថា នរណានៅពីក្រោយរឿងនេះទេ ដូច្នេះខ្ញុំត្រូវតែត្រឡប់ទៅកោះរ៉ុងវិញទើបមានសុវត្ថិភាព”៕សុខុម (រាយការណ៍បន្ថែមដោយ Ben Woods)