28 C
Phnom Penh

ក្មេង​ជំទង់​ម្នាក់​ត្រូវ​បាន​ចាប់​ខ្លួន​​ពីបទ​​រំលោភ​ក្មេងស្រី​ជា​ច្រើន​នាក់​នៅ​ខេត្ត​ស្ទឹង​ត្រែង​

ដោយ ឌឹ ខេមបូឌា ដេលី

បទវិភាគ

យោង​តាម​នគរ​បាល​បាន​ឲ្យ​ដឹង​ថា កាលពី​ម្សិលមិញ ក្មេងប្រុស​ជំទង់​​​​​ម្នាក់​​ត្រូវ​បាន​ចាប់​ខ្លួន​​នៅ​ក្នុង​ខេត្ត​ស្ទឹងត្រែង ពីបទ​សង្ស័យ​ថា បាន​រំលោភ​​ក្មេងស្រី​ចំនួនពីរ​នាក់​ម្ដង​ហើយ​ម្ដង​ទៀត​ក្នុង​រយៈពេល​ប្រហែល​៣ខែ។ នគរ​បាល​​ក៏​បាន​សង្ស័យផង​ដែរ​​ថា អាច​មាន​ជន​រងគ្រោះ​ច្រើន​ជាង​នេះ​។

យោង​តាម​លោក ឡុង សាវ៉េត នាយ​ប៉ុស្តិ៍​នគរ​បាល​ឃុំ​កាំងចាម​បាន​​ឲ្យ​ដឹង​ថា ជន​សង្ស័យ​ដែល​​ឪពុក​របស់​ខ្លួន​និយាយ​ថា មាន​អាយុ​១៤​ឆ្នាំ ត្រូវ​បាន​ចាប់​ខ្លួន​​នៅ​ក្នុង​ផ្ទះ​របស់​ខ្លួន​ក្នុង​ឃុំ​កាំងចាម ស្រុក​ថាឡាបរិវ៉ាត់ បន្ទាប់ពី​ឪពុក​ម្ដាយ​របស់​ក្មេងស្រី​រងគ្រោះ​​ដែល​មាន​អាយុ​៩ឆ្នាំ និង​១១​ឆ្នាំ បាន​រាយការណ៍​ជូន​នគរ​បាល​​ ហើយ​អះអាង​ថា ជន​​សង្ស័យ​រូប​នេះ​ក៏​បាន​រំលោភ​ក្មេងស្រី​ផ្សេងៗទៀត​ក្នុង​ភូមិ​​ផង​ដែរ​។

លោក សាវ៉េត បានមាន​ប្រសាសន៍​ថា “ជន​សង្ស័យ​​ត្រូវ​បាន​ចាប់​ខ្លួន​នៅ​ម៉ោង​ប្រហែល​៣រសៀល​នេះ​ក្នុង​​ភូមិ​ ហើយ​ត្រូវ​បាន​ចោទ​ប្រកាន់​ពីបទ​រំលោភ​ក្មេងស្រី​ជាច្រើន​នាក់​”។ លោក​បាន​មាន​ប្រសាសន៍​បន្ថែម​ថា “ឪពុក​របស់​ជន​នេះ​អះអាង​ថា ​ជន​នេះ​មាន​អាយុ​១៤​ឆ្នាំ ប៉ុន្តែ​​បើ​តាម​មើល​ទៅ​មាន​អាយុ​ប្រហែល​១៦​ឆ្នាំ​ទៅ​១៧​ឆ្នាំ​ទៅ​ហើយ”។ លោក​បាន​បន្ថែម​ថា ក្មេង​ជំទង់រូប​នេះ​កំពុង​ត្រូវ​បាន​ឃុំខ្លួន​នៅ​​អធិការដ្ឋាន​នគរ​បាល​ស្រុក​។

លោក ឌួង ស៊ីវុត្ថា នាយ​ការិយាល័យ​ព្រហ្មទណ្ឌ​កម្រិត​ធ្ងន់​នៃ​ស្នង​ការ​ដ្ឋាន​នគរ​បាល​ខេត្ត​នេះ​បាន​លើក​ឡើង​ថា ការ​ចាប់​រំលោភ​ទាំងនេះ​បាន​កើត​ឡើង​ប្រហែល​៣ខែ​មក​ហើយ ដោយ​ចាប់​ផ្ដើម​​ពី​ខែ​ធ្នូ​មក​។

លោក​បានមាន​ប្រសាសន៍​ថា “ជន​នេះ​រំលោភ​ជន​រងគ្រោះ​អាយុ​៩​ឆ្នាំ និង​១១​ឆ្នាំ​ ចន្លោះ​ពី​បី​ទៅ​បួន​ដង​ក្នុង​ម្នាក់​ៗ​ចាប់​តាំង​ពីដើម​ខែ​ធ្នូ​ ឆ្នាំ​២០១៤​មក”។ លោក​បាន​បន្ថែម​ថា ការ​​រំលោភ​ថ្មីៗ​នេះ​ត្រូវ​បាន​គេ​ជឿ​ជាក់​ថា កើត​ឡើង​កាលពី​ដើម​ខែ​នេះ​។

នាយ​ការិយាល័យ​ព្រហ្មទណ្ឌ​កម្រិត​ធ្ងន់​រូប​នេះ​បាន​លើក​ឡើង​ទៀត​ថា ជន​រងគ្រោះ​បួន​ឬ​ប្រាំនាក់​ផ្សេង​ទៀត​ដែល​មាន​អាយុ​ក្រោម​១៤​ឆ្នាំ​នឹងទៅ​មន្ទីរ​ពេទ្យ​បង្អែក​ខេត្ត​ថ្ងៃ​នេះ ដើម្បី​​ពិនិត្យ​ថា​ តើ​ត្រូវ​គេ​រំលោភឬក៏អត់​។

ឪពុក​របស់​ក្មេង​ស្រី​អាយុ​១១​ឆ្នាំ​បាន​លើក​ឡើង​ថា គាត់​​រាយការណ៍​ទៅ​នគរ​បាល​បន្ទាប់​​កូនស្រី​របស់​គាត់ និង​ក្មេងស្រី​ផ្សេងៗទៀត​នៅ​ក្នុង​ភូមិ​ក្បែរ​គ្នា​​បាន​ប្រាប់​ថា ក៏​ត្រូវ​ក្មេង​ជំទង់​រូប​នេះ​រំលោភ​ដែរ​នោះ​។

លោក​បាន​និយាយ​ថា “កាលពី​ថ្ងៃទី​១៤ ខែ​មីនា ខ្ញុំ​បាន​ឮ​ក្មេងស្រី​ពីរ​ឬបី​នាក់​រួម​ទាំង​កូន​ស្រី​របស់​ខ្ញុំ​ផង​និយាយ​ថា [ជន​សង្ស័យ​]​ បាន​រំលោភ​ពួកគេ​។ នៅ​ពេល​ប្រពន្ធ​របស់​ខ្ញុំ​សួរ​នាង​ម្ដង​ទៀត​ នាង​បាន​និយាយ​ថា ជន​សង្ស័យ​បាន​រំលោភ​នាង​បី​ដង ប៉ុន្តែ​ថា នាង​​ខ្លាច​ជន​សង្ស័យ​វាយ​ធ្វើ​បាប​​ប្រសិន​បើ​នាង​​ប្រាប់​ខ្ញុំឬប្រពន្ធ​ខ្ញុំ​”។

ឪពុក​របស់​ក្មេងស្រី​រូប​នេះ​ក៏​បាន​លើក​ឡើង​ទៀត​ផង​ដែរ​ថា គ្រួសារ​របស់​គាត់​ចង់​ឲ្យ​តុលាការ​ចាប់​ក្មេងជំទង់រូប​នេះទៅ​ផ្ដន្ទាទោស​ ហើយ​បង់​ប្រាក់សំណង​ជំងឺ​ចិត្ត​ចំនួន​៥.០០០​ដុល្លារ​មក​​ឲ្យ​គ្រួសារ​គាត់​។

យោង​តាម​ច្បាប់​ក្នុង​ប្រទេស​កម្ពុជា អាយុ​ផ្លូវ​ច្បាប់​ដែល​ត្រូវ​ទទួល​ខុស​ត្រូវ​ចំពោះ​​បទ​ល្មើស​គឺ​១៨​ឆ្នាំ ប៉ុន្តែ​ចៅក្រម​អាច​ផ្ដន្ទាទោស​អនីតិជន​​​អាយុ​១៤​ឆ្នាំ​ឬ​លើស​ពី​នេះបាន​​ ប្រសិន​បើ​​ស្ថាន​ទម្ងន់​ទោស​​​បង្ហាញ​ថា ពួកគេ​​​​ត្រូវ​ទទួល​ខុស​ត្រូវ​នោះ​៕ ស៊ុយឈាង​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស