កាលពីម្សិលមិញ សាលាដំបូងរាជធានីភ្នំពេញបានពន្យារពេលកាត់ក្ដីស្ត្រីម្នាក់ ដែលគ្រួសាររបស់នាងមានវិវាទដីធ្លីជាមួយលោក ឃុន សៀ មហាសេដ្ឋីអចលនទ្រព្យ ដោយសារតែមា៉ស៊ីនត្រជាក់នៅក្នុងសាលសវនាការមិនដំណើរការ ហើយបានច្រានចោលសំណើសុំនៅក្រៅឃុំរបស់ស្ត្រីរូបនេះ។
កញ្ញា លី សៀវមិញ អាយុ២៣ឆ្នាំ និងគ្រួសាររបស់នាងមានជម្លោះក្ដីក្ដាំជាមួយលោក ឃុន សៀ និងក្រុមហ៊ុនរបស់លោកអស់រយៈពេល៥ឆ្នាំមកហើយជុំវិញដីមួយឡូត៍នៅក្នុងខណ្ឌទួលគោក រាជធានីភ្នំពេញ។ នាងបានជាប់ឃុំបណ្ដោះអាសន្នចាប់តាំងពីត្រូវចាប់ខ្លួនកាលពីខែវិច្ឆិកាមក ដោយសារការប្រវាយប្រតប់គ្នាកាលពីឆ្នាំ២០១៣ ជាមួយសន្តិសុខរបស់លោក ឃុន សៀ ដែលបានឃ្លាំមើលសកម្មភាពគ្រួសារនេះនៅពេលកើតហេតុ។
នៅក្នុងសាលសវនាការកាលពីម្សិលមិញ គ្មានការផ្ដល់ហេតុផលណាមួយចំពោះការពន្យារពេល ឬការច្រានចោលសំណើសុំនៅក្រៅឃុំនេះឡើយ ប៉ុន្តែលោក ស្វាយ តុញ ចៅក្រមជំនុំជម្រះ បានមានប្រសាសន៍ថា សវនាការនេះនឹងត្រូវធ្វើឡើងវិញនៅថ្ងៃទី២៥ ខែមីនា។
នៅពេលទាក់ទងតាមទូរស័ព្ទក្រោយពីសវនាការនេះ ចៅក្រម ស្វាយ តុញ បានមានប្រសាសន៍ថា ” យើងសម្រេចពន្យារពេលសំណុំរឿងនេះ ដោយសារដាច់ភ្លើងធ្វើឲ្យសាលសវនាការងងឹត និងក្ដៅខ្លាំងនៅក្នុងបន្ទប់”។
អំឡុងសវនាការ កញ្ញា លី សៀវមិញ ដែលប្រឈមការចោទប្រកាន់ពីបទប្រើអំពើហិង្សាលើម្ចាស់អចលនទ្រព្យតាមច្បាប់ភូមិបាល បានអង្វរករតុលាការឲ្យដោះលែងនាងនៅក្រៅឃុំ។ នាងនិយាយថា “ខ្ញុំនឹងមិនរត់ទៅណាចោលផ្ទះខ្ញុំទេ ព្រោះខ្ញុំជានិស្សិត ហើយខ្ញុំកើតនៅទីនោះ។ ខ្ញុំមានការងារពីមុន ហើយថៅកែរបស់ខ្ញុំនឹងទទួលយកខ្ញុំឲ្យចូលធ្វើការវិញ”។
កញ្ញា សៀវមិញ បានបន្ថែមថា នាងត្រូវការមើលថែទាំឪពុកម្ដាយរបស់នាងដែលមានវ័យចាស់ ហើយថា ប្រសិនបើនៅតែបន្តឃុំខ្លួនទៀតនោះ នាងនឹងបាត់បង់អ្វីៗទាំងអស់។ នាងបាននិយាយថា “ប្រសិនបើខ្ញុំនៅតែត្រូវបានឃុំខ្លួនបែបនេះ ខ្ញុំនឹងបាត់បង់អ្វីៗទាំងអស់ ទាំងមិនបានប្រព្រឹត្តអ្វីខុសទាល់តែសោះនោះ។ ខ្ញុំគឺជាមេគ្រួសារតែមួយគត់នៅក្នុងគ្រួសារ”។
ចៅក្រម ស្វាយ តុញ បានលើកឡើងបន្ទាប់ពីសវនាការថា លោកបដិសេធមិនដោះលែងនាងឲ្យនៅក្រៅឃុំ ព្រោះលោកបានតម្កល់សាលក្រមមុនៗ និងដោយសារកញ្ញា សៀវមិញ មានសុខភាពល្អ។
លោក ជូង ជូងី មេធាវីតំណាងកញ្ញា សៀវមិញ បានលើកឡើងថា តុលាការកំពុងឃុបឃិតជាមួយលោក ឃុន សៀ ដើម្បីធ្វើឲ្យគ្រួសាររបស់នាងចាកចេញពីដីធ្លីរបស់ខ្លួន។ លោកបានមានប្រសាសន៍ថា “ដោយសារតែកញ្ញា សៀវមិញ ជាប់ពន្ធនាគារ គ្រួសាររបស់នាងបានបាត់បង់ប្រាក់ចំណូល។ ហេតុដូច្នេះ ទង្វើបែបនេះគឺដើម្បីបង្ខំឲ្យគ្រួសារនេះយល់ព្រមប្រគល់ដីទៅឲ្យលោកឧកញ៉ា [ឃុន សៀ]”។
ផ្ទះរបស់កញ្ញា សៀវមិញ គឺស្ថិតនៅជាប់នឹងអគារដែលធ្លាប់ជាការិយាល័យរបស់គណបក្សប្រជាជនកម្ពុជា និងរបស់អាជ្ញាធរមូលដ្ឋាន និងដែលសាលារាជធានីបានប្រគល់ទៅឲ្យលោក ឃុន សៀ នៅក្នុងការដោះដូរដីមួយដែលត្រូវបានព្រមព្រៀងគ្នាកាលពីឆ្នាំ២០១០។
លោក លី ស្រា៊ងខេង ដែលជាមេគ្រួសារនេះបានអះអាងថា លោក ឃុន សៀ “បានបោកប្រាស់” ដោយអះអាងសិទ្ធិកាន់កាប់ដីនៅជុំវិញអគារ រួមទាំងដីមួយកន្លែងតូចដែលផ្ទះរបស់គាត់ស្ថិតនៅទីនេះកាលពីឆ្នាំ២០១៣ តាមរយៈមន្ទីររៀបចំដែនដីរាជធានី។ កាលពីសប្ដាហ៍មុន តុលាការបានកាន់ជើងខាងក្រុមហ៊ុន ហើយទុកពេល៣០ថ្ងៃឲ្យគ្រួសារនេះប្ដឹងទាស់ចំពោះសេចក្ដីសម្រេចរបស់ខ្លួន ដើម្បីយកដីនេះប្រគល់ឲ្យលោក ឃុន សៀ។
នៅខាងក្រៅបន្ទប់សវនាការបន្ទាប់ពីបើកសវនាការរួច កញ្ញា សៀវមិញ បានស្រែកទៅកាន់អ្នកឃ្លាំមើលសិទ្ធិមនុស្ស ខណៈសន្តិសុខពន្ធនាគារអូសនាងចេញទៅថា ” កុំព្រួយបារម្ភ! ខ្ញុំមិនខ្លាចទេ!”៕ សុខុម / ស៊ុយឈាង