លោកនាយករដ្ឋមន្ត្រី ហ៊ុន សែន បានបន្តការរិះគន់របស់លោកលើលោក កឹម សុខា អនុប្រធានគណបក្សសង្គ្រោះជាតិកាលពីថ្ងៃព្រហស្បតិ៍ ដោយបានគំរាមថានឹងចាប់ខ្លួនគាត់ និងប្រើយោធា ប្រសិនបើគាត់ហ៊ានដឹកនាំការតវ៉ាទាមទារឲ្យមានការដោះលែង លោក មាជ សុវណ្ណារ៉ា មន្ត្រីបក្សប្រឆាំងដែលជាប់ពន្ធនាគារ។
លោក ហ៊ុន សែន កាលពីថ្ងៃពុធ បានគំរាម “ចាត់វិធានការច្បាប់” លើលោក សុខា ទាក់ទិននឹងការថ្លែងនៅអាមេរិកកាលពីសប្តាហ៍មុន ដែលលោកនាយករដ្ឋមន្ត្រី បានចាត់ទុកថាជាការសារភាពអំពីបំណងផ្តួលរំលំរដ្ឋាភិបាល។
ថ្លែងនៅក្រុងភ្នំពេញកាលពីថ្ងៃព្រហស្បតិ៍ លោក ហ៊ុន សែន បានចាប់យកផ្នែកមួយនៃសម្តីរបស់លោក សុខា ដោយរិះគន់សម្តីរបស់លោក សុខា ដែលថាលោកមិនអាចទទួលយកការបន្តជាប់ឃុំរបស់លោក សុវណ្ណារ៉ា បានទេ។
លោកនាយករដ្ឋមន្ត្រីបានមានប្រសាសន៍ថា “លោកឯងបាននិយាយថា ‘ខ្ញុំមិនអាចទទួលយកបាន’។ ឥឡូវខ្ញុំសួរសំណួរទៅលោក បើសិនជាលោក មាជ សុវណ្ណារ៉ា មិនអាចចេញពីគុកក្រោយចូលឆ្នាំ តើលោកនឹងធ្វើអ្វី? លោកនឹងដឹកនាំមនុស្សតាមចិញ្ចើមថ្នល់ទៀត ឬអី?។
លោកនាយករដ្ឋមន្ត្រីបានបន្តថា “ធាតុផ្សំកំពុងរង់ចាំលោកហើយ។ អាវុធហត្ថ នគរបាល ត្រៀមខ្លួន ខ្នោះធើលាបពណ៌ឲ្យស្អាតតិច”។
លោក ហ៊ុន សែន បានបន្តការវាយប្រហារលើលោក សុខា ពីថ្ងៃពុធ ដោយចោទជាថ្មីលើមេដឹកនាំបក្សប្រឆាំង ថាបានសារភាពថា គាត់បានព្យាយាមផ្តួលរំលំរដ្ឋាភិបាលតាមរយៈបាតុកម្មរបស់គណបក្សសង្គ្រោះជាតិក្រោយពីការបោះឆ្នោតឆ្នាំ២០១៣។
លោក ហ៊ុន សែន បានមានប្រសាសន៍បន្តថា “ឥឡូវខ្ញុំ ចង់សួរលោកឯង លោកឯងត្រៀមធ្វើអ្វី ព្រោះលោកឯង កំពុងតែស្ថិតក្នុងពិរុទ្ធភាពជាមេដឹកនាំនៃការផ្តួលរំលំរដ្ឋាភិបាលស្របច្បាប់?។ តើលោកឯងនឹងធ្វើអ្វី ដឹកនាំបាតុកម្មដើម្បីទៅរំដោះអ្នកទោស ឬលោកឯងធ្វើអីទៀត?”។
លោកនាយករដ្ឋមន្ត្រីបានមានប្រសាសន៍ថា លោកមិនអាចអន្តរាគមន៍ក្នុងរឿងក្តីតុលាការរបស់លោក សុវណ្ណារ៉ា បានទេ ក្នុងនាមជាសមាជិកនៃអង្គនីតិប្រតិបត្តិរបស់រដ្ឋាភិបាល ប៉ុន្តែបានលើកឡើងថា តួនាទីរបស់លោកអនុញ្ញាតឲ្យលោកប្រើកម្លាំងប្រដាប់អាវុធលើលោក សុខា។
លោកមានប្រសាសន៍ថា “ខ្ញុំសូមជម្រាបថា ច្បាប់បោះឆ្នោត ឬច្បាប់រៀបចំជ.គ.ប. អត់ពាក់ព័ន្ធទៅនឹងដំណើរការក្តីនៅតុលាការ របស់អ្នកមានពិរុទ្ធភាពទៅលើសំណុំរឿងព្រហ្មទណ្ឌ នៅថ្ងៃទី១៥កក្កដា២០១៤នោះទេ”។
លោកមានប្រសាសន៍ថា “បើលោកឯងហ៊ានធ្វើ ខ្ញុំក៏ហ៊ានលេងលោកឯងដែរ។ លោកឯងប្រថុយលមើល។ រដ្ឋបាលនេះណា រដ្ឋអំណាចណា ហើយកុំថានាយករដ្ឋមន្ត្រីត្រួតត្រាកម្លាំងប្រដាប់អាវុធ អ្វីដែលខ្ញុំមិនអាចត្រួតត្រាបាន គឺតុលាការ សភា ព្រឹទ្ធសភា ក្រុមប្រឹក្សាធម្មនុញ្ញ តែកម្លាំងប្រដាប់អាវុធខ្ញុំអាចត្រួតត្រាបាន”។
លោក ហ៊ុន សែន ក៏បានទម្លាយឲ្យដឹងនូវការបដិសេធជាច្រើនខែ ដែលថាលោកមានតួនាទីក្នុងការបញ្ជាការចាប់ខ្លួនសមាជិកសភាជាប់ឆ្នោតគណបក្សសង្គ្រោះជាតិ៧នាក់ ក្នុងពេលប៉ុន្មានថ្ងៃក្រោយពីមានការតវ៉ាហិង្សានៅទីលានប្រជាធិបតេយ្យក្នុងក្រុងភ្នំពេញកាលពីថ្ងៃទី១៥ខែកក្កដាឆ្នាំមុន។
លោកបានបញ្ចេញឲ្យដឹងថា លោកបានធ្វើការប្រជុំមួយនៅយប់នោះ ដើម្បីពិភាក្សា ថាតើធ្វើយ៉ាងណាដោះស្រាយការតវ៉ានេះ ហើយបានសម្រេចចាប់ខ្លួនអ្នកដែលមានវត្តមានជាក់ស្តែងប៉ុណ្ណោះនៅកន្លែងបាតុកម្ម ហើយមិនមែនលោក សុខា ដែលនៅពេលនោះជាប្រធានស្តីទីនៃគណបក្សសង្គ្រោះជាតិទេ។
លោក ហ៊ុន សែន មានប្រសាសន៍ថា “នឹងមានការចាប់ខ្លួនលោក កឹម សុខា នៅល្ងាចថ្ងៃទី១៥កក្កដា។ ឯកឧត្តម និងលោក ជំទាវ និងឧបនាយករដ្ឋមន្ត្រីបានប្រជុំនៅផ្ទះរបស់ខ្ញុំនៅម៉ោង៥ល្ងាច[នៅថ្ងៃនោះ] ហើយស្ទើរតែសម្រេចចាប់ខ្លួន កឹម សុខា នៅពេលនោះទៅហើយ”។
លោកបានមានប្រសាសន៍ថា “ប៉ុន្តែ ខ្ញុំខ្លួនឯងបាននិយាយថា៖ យើងត្រូវតែឲ្យច្បាស់ ហើយបេសកកម្មរបស់យើងគឺចំពោះអ្នកដែលឈរនៅសមរភូមិជាក់ស្តែងប៉ុណ្ណោះ ហើយ កឹម សុខា មិននៅឯសមរភូមិនោះទេ”។
លោក យ៉ែម បុញ្ញឫទ្ធិ អ្នកនាំាពាក្យគណបក្សសង្គ្រោះជាតិ បាននិយាយថា លោក សុខា ដែលស្ថិតនៅអាមេរិកនៅឡើយ មិនបារម្ភនឹងការគំរាមកំហែងរបស់លោក ហ៊ុន សែន ថានឹងចាប់ខ្លួន ឬដាក់គុកគាត់នោះទេ ត្បិតអីគណបក្សប្រឆាំងធ្វើតាមតែច្បាប់ប៉ុណ្ណោះ។
លោក បុញ្ញឫទ្ធិ បានមានប្រសាសន៍ថា “មិនមានបញ្ហាអ្វីទាំងអស់ ព្រោះយើងបានធ្វើអ្វីៗឈរលើវប្បធម៌សន្ទនាគ្នា។ យើងមិនមានបញ្ហាទេ”។
ក្នុងបទសម្ភាសមួយជាមួយវិទ្យុអាស៊ីសេរីកាលពីយប់ថ្ងៃពុធ លោក សុខា បានបដិសេធការលើកឡើងរបស់លោក ហ៊ុន សែន ដែលថាសម្តីរបស់លោកនៅអាមេរិក ដែលលោកបានសុំទោសព្រោះមិនសម្រេចបានការផ្លាស់ប្តូរទាំងស្រុងនោះ គឺជាការសារភាពថា គណបក្សសង្គ្រោះជាតិបានព្យាយាមផ្តួលរំលំរដ្ឋាភិបាល។
មុនពេលឲ្យលោកនាយករដ្ឋមន្ត្រីស្តាប់សម្តីរបស់លោកម្តងទៀត លោក សុខា បាននិយាយថា “ខ្ញុំមិនបាននិយាយពាក្យ ‘ផ្តួលរំលំ’ ហើយមិនដែលបានគិតអំពីរឿងហ្នឹងទេ។ ប្រហែលនរណាម្នាក់បកស្រាយវាឲ្យគាត់ច្រឡំហើយ”។
“ក្នុងខ្សែអាត់សំឡេង…ខ្ញុំមិនបានប្រើពាក្យ ‘ផ្តួលរំលំ’ ហើយខ្ញុំក៏បដិសេធដែរ ថាគណបក្សសង្គ្រោះជាតិដែលដឹកនាំដោយរូបខ្ញុំនិង សម រង្ស៊ី មិនមាននយោបាយផ្តួលរំលំនិងប្រើហិង្សាឡើយ”។
លោក សុខា ក៏បានចោទលោក ហ៊ុន សែន ថាព្យាយាមបំបែកបំបាក់លោកនិងលោក រង្ស៊ី ដែលគណបក្សប្រជែងគ្នាទាំងពីរបានរួមបញ្ចូលគ្នាទៅជាគណបក្សសង្គ្រោះជាតិកាលពីខែកក្កដាឆ្នាំ២០១២ ដោយបានផ្តោតលើលោកថាជាមេគំនិតនៃការ”ផ្តួលរំលំ”រដ្ឋាភិបាល។
លោកបានមានប្រសាសន៍ថា “វាមិនមែនជា ‘បញ្ហា កឹម សុខា ទេ’ [ប៉ុន្តែ] បញ្ហាទាំងអស់និងបាតុកម្មមិនមែនដឹកនាំដោយ កឹម សុខា [ប៉ុណ្ណោះ]ទេ។ ថ្នាក់ដឹកនាំគណបក្សសង្គ្រោះជាតិ គឺ កឹម សុខា និង សម រង្ស៊ី”។
ក្នុងការថ្លែងរបស់លោកកាលពីថ្ងៃព្រហស្បតិ៍ លោក ហ៊ុន សែន នៅតែរិះគន់ ការបកស្រាយរបស់លោក សុខា ដែលថាលោកមិនដែលប្រើពាក្យ “ផ្តួលរំលំ” និងចង់ឲ្យមានការកែប្រែការរៀបចំការបោះឆ្នោត ដោយរំឭកអនុប្រធានបក្សរូបនេះថា ការតវ៉ារបស់គណបក្សសង្គ្រោះជាតិបានចាប់ផ្តើមក្នុងពេលប៉ុន្មានខែ បន្ទាប់ពីការបោះឆ្នោតជាតិខែកក្កដាឆ្នាំ២០១៣។
លោក ហ៊ុន សែន បានមានប្រសាសន៍ទាក់ទិននឹងសម្តីរបស់លោក សុខា ថា “មិនមានន័យថាលោកឯងចង់ប្តូរតាមរយៈការបោះឆ្នោតទេ។ លោកឯងធ្វើបាតុកម្មក្រោយពីការបោះឆ្នោត។
ដោយលើកឡើងនូវការស្រែកដដែលៗដ៏ពេញនិយមក្នុងការតវ៉ារបស់គណបក្សសង្គ្រោះជាតិ លោកបានមានប្រសាសន៍ថា “ទាំងអស់គ្នានៅចាំរឿងនេះទេ៖ ‘ហ៊ុន សែន អើយចុះចេញទៅ ហ៊ុន សែន អើយចុះចេញទៅ’។ លោកឯងចង់និយាយថាប្តូរ ប៉ុន្តែពាក្យ ‘ប្តូរ’ របស់លោកឯងមានន័យថា “ផ្តួលរំលំ”៕ និត