នគរបាលខេត្តព្រះសីហនុ បាននិយាយថ្ងៃនេះថា មានជនជាតិហ្វាំងឡង់ម្នាក់ និងជនជាតិកាណាដាម្នាក់ បានទទួលរងរបួសជាទម្ងន់ពីការវាយប្រហារដោយកាំបិតកាលពីយប់ថ្ងៃព្រហស្បតិ៍នៅក្នុងក្រុងព្រះសីហនុ។
លោក ភុល ភស្តា អធិការក្រុងព្រះសីហនុ បានមានប្រសាសន៍ថា ការកាប់នឹងកាំបិតទៅលើជនរងគ្រោះទាំងពីរនាក់ បានកើតឡើងនៅម៉ោង១១.៣០នាទីយប់ថ្ងៃព្រហស្បតិ៍ក្នុងភូមិសុខសាន្ត សង្កាត់កោះរ៉ុង ក្រុងព្រះសីហនុ ក្នុងពេលដែលពួកគេកំពុងធ្វើការក្នុងហាង។
លោក ភស្តា បានមានប្រសាសន៍ថា “ជនរងគ្រោះត្រូវកាប់ចំក្បាល និងមុខ ធ្វើឲ្យរបួសយ៉ាងធ្ងន់ ហើយបញ្ជូនមកភ្នំពេញ។ យើងមិនទាន់សន្និដ្ឋានថា វាកើតឡើងដោយសារអីទេ”។
លោក ភស្តាបាននិយាយថា ប៉ូលិសកំពុងស៊ើបអង្កេតករណីនេះនៅឡើយ ហើយមិនទាន់បានដឹងថា តើជនល្មើសមានគ្នាប៉ុន្មាននាក់នៅឡើយទេ។
លោក ស៊ាង កុសល ស្នងការខេត្តព្រះសីហនុ បានមានប្រសាសន៍ថា ជនជាតិហ្វាំងឡង់មានអាយុ៤០ឆ្នាំជាម្ចាស់ហាង និងជនជាតិកាណាដាមានអាយុ៣៥ឆ្នាំ ជាអ្នកគិតលុយ បានបាត់លុយ៣០០០ដុល្លា ទូរស័ព្ទដៃមួយគ្រឿង កុំព្យូទ័រ laptopមួយគ្រឿង និងម៉ាស៊ីនថតមួយគ្រឿង។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍កាលពីម្សិលមិញថា លោកឧបនាយករដ្ឋមន្ត្រី ស ខេង បានបញ្ជូនមន្ត្រីជាន់ខ្ពស់ក្រសួងមហាផ្ទៃមួយក្រុម ដើម្បីស៊ើបអង្កេតបទល្មើសហិង្សា ដែលជាប់ពាក់ព័ន្ធនឹងជនបរទេសនៅក្នុងក្រុងព្រះសីហនុ។
រថយន្តម៉ាកសឺដេស ប៊ិន មួយគ្រឿងត្រូវភ្លើងឆេះកាលពីព្រឹកថ្ងៃអង្គារ បន្ទាប់ពីអ្នកបើកបរជនជាតិតួកគីឈ្មោះ បូរ៉ា អូស្សធឺក បានចុះពីរថយន្ត គឺជាឧប្បត្តិហេតុចុងក្រោយក្នុងអំពើហិង្សា ដែលពាក់ព័ន្ធនឹងជនជាតិរុស្ស៊ី តួកគី និងអីុស្រាអែល នៅក្នុងក្រុងព្រះសីហនុ។
នៅឯក្រសួងមហាផ្ទៃកាលពីថ្ងៃទី១៣ ខែមីនា លោក នេត សាវឿន អគ្គស្នងការនគរបាលជាតិ បានព្រមានជនបរទេសដែលប្រព្រឹត្តខុសច្បាប់នៅក្នុងក្រុងព្រះសីហនុថា ពួកគេមិនអាចគេចពីច្បាប់បានទេ៕