អង្គការទស្សនៈពិភពលោក (World Vision) និងអាជ្ញាធរមូលដ្ឋានបានឲ្យដឹងកាលពីម្សិលមិញថា អ្នកភូមិប្រហែល៨០០នាក់បានធ្លាក់ខ្លួនឈឺនៅក្នុងខេត្តសៀមរាប កាលពីថ្ងៃសៅរ៍ បន្ទាប់ពីហូបនំប៉័ងសាច់នៅក្នុងកម្មវិធីមួយរៀបចំឡើងដោយអង្គការទស្សនៈពិភពលោកស្ដីអំពីភាពគ្រោះថ្នាក់នៃពលកម្មកុមារ។
យោងតាមលោក ចាន់ភក្ត្រា ហុង បុគ្គលិកផ្នែកទំនាក់ទំនងសាធារណៈនៅអង្គការទស្សនៈពិភពលោកបានឲ្យដឹងថា អ្នកភូមិប្រហែល១២០នាក់កំពុងត្រូវបានព្យាបាលនៅឡើយនៅតាមគ្លីនិកក្នុងមូលដ្ឋានកាលពីរសៀលម្សិលមិញ ដោយភាគច្រើនមានភាពល្ហិតល្ហៃដោយសារការពុលនំប៉័ងសាច់ ដែលគេយកមកចែកអំឡុងកម្មវិធីនេះក្នុងឃុំពង្រលើ ស្រុកជីក្រែង។
លោក ហុង បានឲ្យដឹងទៀតថា អង្គការដែលទទួលបានជំនួយពីសាសនាគ្រិស្តមួយនេះកំពុងតែធ្វើការជាមួយគ្លីនិក និងមន្ទីរពេទ្យតាមមូលដ្ឋាន ដើម្បីធានាឲ្យបានថា មានកន្លែងនិងបុគ្គលិកគ្រប់គ្រាន់សម្រាប់ព្យាបាលអ្នកភូមិកំពុងមានជំងឺ ហើយបានរៀបចំរថយន្តសង្គ្រោះបន្ទាន់ ដើម្បីដឹកអ្នកជំងឺទៅកាន់មន្ទីរពេទ្យបង្អែកខេត្តប្រសិនបើស្ថានភាពរបស់ពួកគាត់កាន់តែធ្ងន់ធ្ងរ។
លោកបានមានប្រសាសន៍ថា “ពលរដ្ឋខ្លះឈឺខ្លាំង គឺមានន័យថា ពួកគាត់ល្ហិតល្ហៃខ្លាំង ហើយមានអារម្មណ៍ថាមិនអាចកម្រើកខ្លួនបាន ហេតុដូច្នេះពួកគាត់ចាំបាច់ត្រូវតែស្នាក់នៅក្នុងមន្ទីរពេទ្យ ដើម្បីទទួលការព្យាបាលបន្ថែម”។ លោកបានបន្ថែមទៀតថា គេក៏បានបោះតង់នៅក្នុងសហគមន៍ដើម្បីព្យាបាលអ្នកភូមិដែលឈឺផងដែរ។
លោក ហុង បានមានប្រសាសន៍បន្ថែមទៀតថា “យើងនឹងបន្តតាមដានស្ថានភាពនេះតទៅមុខទៀត ប៉ុន្តែចំនួននៃពលរដ្ឋដែលស្នាក់នៅក្នុងមន្ទីរពេទ្យកំពុងតែថយចុះជាបណ្ដើរៗហើយ ហេតុដូច្នេះយើងសង្ឃឹមថា វានឹងមានភាពល្អប្រសើរនៅថ្ងៃស្អែក”។
លោក តឹង វិសាល គ្រូបង្រៀនម្នាក់អាយុ២៨ឆ្នាំ ដែលស្ថិតក្នុងចំណោមអ្នកពុលអាហារបានលើកឡើងថា លោកបានចាប់ផ្ដើមឈឺកាលពីយប់ថ្ងៃសៅរ៍ ហើយបានទៅពេទ្យបង្អែកស្រុកកាលពីព្រឹកម្សិលមិញ។
លោកបាននិយាយថា “ខ្ញុំបានហូបនំប៉័ងសាច់នៅពេលព្រឹក ហើយបន្ទាប់មកនៅពេលយប់ខ្ញុំក៏ចាប់ផ្ដើមក្ដៅខ្លួន ចុកពោះ ក្អួតចង្អោរ និងរាគរុស”។ លោកបានបន្ថែមថា លោកចេញពីពេទ្យត្រឡប់មកផ្ទះវិញនៅរសៀលម្សិលមិញ។
យោងតាមសេចក្ដីថ្លែងការណ៍មួយរបស់អង្គការទស្សនៈពិភពលោកបានឲ្យដឹងថា នំប៉័ងសាច់ទាំងនេះផ្ដល់ដោយក្រុមយុវជនមូលដ្ឋានដែលរៃអង្គាសប្រាក់យកមកឧបត្ថម្ភអាហារសម្រាប់កម្មវិធីនៅក្នុងតំបន់នេះ។
សេចក្ដីថ្លែងការណ៍នេះមានខ្លឹមសារដូច្នេះថា “អាហារសម្រន់ត្រូវបានរៀបចំដោយក្រុមយុវជននៅក្នុងស្រុកជីក្រែង ដែលអង្គការទស្សនៈពិភពលោកជាអ្នកចំណាយប្រាក់”។
លោក ពៅ ប៊ុនធឿន អភិបាលស្រុកនេះបានលើកឡើងថា មូលហេតុពិតប្រាកដនៃការធ្វើឲ្យមានការពុលអាហារនេះគេនៅមិនទាន់ដឹងនៅឡើយទេ។
លោកបានមានប្រសាសន៍ថា “យើងមិនទាន់អាចធ្វើការសន្និដ្ឋានបាននៅឡើយទេ ព្រោះនៅក្នុងនុំប៉័ងសាច់មានគ្រឿងផ្សំជាច្រើន ដូចជា ជ្រក់ សាច់ជ្រូកចិញ្ច្រាំ សាច់ប៉ាតេ និងទឹកម្ទេសជាដើម។
លោក ប៉ែន ផល្គុន ប្រធានមន្ទីរពេទ្យបង្អែកខេត្តនេះបានលើកឡើងថា បាក់តេរីនៅក្នុងនុំប៉័ងសាច់គឺជារឿងដែលត្រូវបន្ទោស ប៉ុន្តែលោកមិនដឹងថា តើគ្រឿងផ្សំណាមួយដែលមានផ្ទុកបាក់តេរីនោះឡើយ។
លោកបានមានប្រសាសន៍ថា “វាបង្កឡើងដោយអាហារដែលពួកគាត់ហូប អាហារត្រូវបានធ្វើខូចដោយបាក់តេរី ហើយវាប្រហែលជាដោយសារជ្រក់ ឬក៏សាច់ប៉ាតេ ព្រោះថា គ្រឿងផ្សំទាំងនេះងាយនឹងកើតបាក់តេរីណាស់ ព្រោះគេប្រើដៃដើម្បីធ្វើវា”។
លោក សត ណាឌី ស្នងការនគរបាលខេត្តនេះបានលើកឡើងថា សំណាកនុំប៉័ងសាច់ត្រូវបានបញ្ជូនទៅរាជធានីភ្នំពេញ ដើម្បីឲ្យនគរបាលប្រឆាំងបទល្មើសសេដ្ឋកិច្ចត្រួតពិនិត្យ។ លោកបានលើកឡើងទៀតថា ហាងដែលធ្វើនុំប៉័ងនេះត្រូវបានបិទទ្វារបណ្ដោះអាសន្នកាលពីថ្ងៃសៅរ៍ ប៉ុន្តែត្រូវបានអនុញ្ញាតឲ្យបើកឡើងវិញបន្ទាប់ពីអាជ្ញាធរសន្និដ្ឋានថា វាមិនមែនជាហាងនេះទេ ដែលជាប្រភពធ្វើឲ្យមានពលរដ្ឋឈឺជាច្រើននាក់នោះ។
លោក ហុង បានឲ្យដឹងទៀតថា មន្ត្រីពាក់ព័ន្ធនៅក្នុងការស៊ើបអង្កេតជឿជាក់ថា ថ្នាំសម្លាប់សត្វល្អិតដែលគេប្រើសម្រាប់បាញ់ត្រសក់មុនពេលគេយកវាមកជ្រក់គឺជារឿងដែលត្រូវបន្ទោស។
តំណាងក្រុមយុវជនដែលទទួលខុសត្រូវក្នុងការផ្ដល់អាហារ និងដែលបដិសេធមិនប្រាប់ឈ្មោះ ប៉ុន្តែលោក ហុង បានកំណត់អត្តសញ្ញាណថា ” មានឈ្មោះ ស្រីអឿយ” នោះបាននិយាយថា នាងទិញនំប៉័ងពីអ្នកលក់តាមចិញ្ចើមផ្លូវ ហើយបានធ្វើជ្រក់ និងសាច់ជ្រូកចិញ្ច្រាំដោយខ្លួនឯង។
នៅពេលត្រូវបានសួរថា តើមូលហេតុអ្វីទៅដែលបង្កឲ្យមានការពុលអាហារនេះ នាងបាននិយាយថា “ខ្ញុំអត់ច្បាស់ទេ” ហើយនាងបានបង្វែរសំណួរបន្ថែមទៅអង្គការទស្សនៈពិភពលោក ដែលនាងលើកឡើងថា បានសួរដេញដោលនាងអំពីអាហាររួចហើយនោះ។
នៅក្នុងសេចក្ដីថ្លែងការណ៍របស់ខ្លួន អង្គការទស្សនៈពិភពលោកបានលើកឡើងថា ខ្លួនមិនចង់ឃើញស្ថានភាពបែបនេះកើតឡើងម្ដងទៀតឡើយ។
សេចក្ដីថ្លែងការណ៍នេះមានខ្លឹមសារដូច្នេះថា “ការស៊ើបអង្កេតផ្ទៃក្នុងដ៏ហ្មត់ចត់មួយនឹងត្រូវធ្វើឡើង ដោយមានការសហការជាមួយការស៊ើបអង្កេតរបស់នគរបាលមូលដ្ឋាន ហើយលទ្ធផលនៃការរកឃើញនឹងជួយឲ្យអង្គការទស្សនៈពិភពលោកអាចចាត់វិធានការជាក់លាក់ ដើម្បីធានាឲ្យបានថា អាហារដែលផ្ដល់សម្រាប់កម្មវិធីរបស់អង្គការទស្សនៈពិភពលោកមានសុវត្ថិភាព”៕ ស៊ុយឈាង