លោកស្រី ណានស៊ី ភេឡូស៊ី ដឹកនាំគណៈប្រតិភូ​អាមេរិក​មក​កម្ពុជា

លោកស្រី ណានស៊ី ភេឡូស៊ី មេដឹកនាំ​សំឡេង​ភាគតិច​ក្នុង​សភា​តំណាង​រាស្ត្រ​អាមេរិក ត្រូវ​គេ​រំពឹង​ថា នឹង​ជួប​ជាមួយ​ក្រុម​សិទ្ធិ​មនុស្ស​ក្នុង​ក្រុង​ភ្នំពេញ​នៅ​ថ្ងៃ​ច័ន្ទ អំឡុង​ការ​ឈប់​សំចត​លើក​ទី​១​ក្នុង​ដំណើរ​ទស្សនកិច្ច​ប្រាំ​ប្រទេស​នៅ​អាស៊ី ដែល​នឹង​ផ្តោត​លើ​សិទ្ធិ​មនុស្ស ពាណិជ្ជកម្ម សហ​ប្រតិបត្តិការ​សន្តិសុខ។np

យោងតាម​សេចក្តី​ប្រកាស​ព័ត៌មាន​ចេញ​ដោយ​ការិយាល័យ​របស់​លោក​ស្រី ភេឡូស៊ី បាន​ឲ្យ​ដឹង​ថា លោក​ស្រី ភេឡូស៊ី សមាជិក​សភា​គណបក្ស​ប្រជាធិបតេយ្យ តំណាង​មណ្ឌល​សភា​ទី​១២​របស់​រដ្ឋកាលីហ្វ័រញ៉ា បាន​ធ្វើ​ដំណើរ​មកដល់​ប្រទេស​កម្ពុជា​កាលពី​ថ្ងៃ​សៅរ៍ ជាមួយ​គណៈ​ប្រតិភូ​ដែល​ក្នុង​នោះ​មាន​សមាជិក​សភា​ជើង​ចាស់​មណ្ឌល​ញ៉ូយ៉ក លោក ឆាល រ៉ែនហ្គែល និងសមាជិក​សភា​៨​រូប​ផ្សេងទៀត។

ពេល​ស្ថិត​នៅ​ក្នុង​ខេត្ត​សៀមរាប​កាលពី​ថ្ងៃ​សៅរ៍ លោក​ស្រីបាន​បង្ហោះ​រូបថត​តាម​បណ្តាញ​ធ្វិតធឺ​របស់​លោក​ស្រី ដោយ​បង្ហាញ​រូប​លោក​ស្រី​ជាមួយ​សមាជិក​អង្គការ​ដោះ​មីន ហាឡូ ត្រាស និង​នៅ​កន្លែង​មើល​ថែ​សហគមន៍ វត្ត​ថ្មី ដែល​ជួយ​ប្រជាជន​មាន​ហ៊ីវ/អេដស៍ និង​ផ្តល់​មូលនិធិ​ដោយ​ទីភ្នាក់ងារ​អាមេរិក​អភិវឌ្ឍន៍​អន្តរជាតិ។

ក្រុម​សិទ្ធិ​មនុស្ស​ក្នុង​ស្រុក អាដហុក និង លីកាដូ បាន​មាន​ប្រសាសន៍​ថា ពួកគេ​មាន​គម្រោង​ជួប​លោក​ស្រី ភេឡូស៊ី នៅ​ថ្ងៃ​ច័ន្ទ​ក្នុង​ក្រុង​ភ្នំពេញ។ លោក ធន សារ៉ាយ ប្រធាន​អង្គការ​អាដហុក បាន​និយាយ​ថា លោក​សង្ឃឹម​ថា​ប្រាប់​លោក​ស្រី ភេឡូស៊ី គណៈ​ប្រតិភូ​នៃ​សមាជិក​សភា​អាមេរិក​៩​នាក់​ផ្សេងទៀត​របស់​លោក​ស្រី អំពីបញ្ហា​មួយ​ចំនួន​ដែល​ប៉ះពាល់​ប្រទេស​កម្ពុជា។

លោក សារ៉ាយ បាន​និយាយ​ថា “យើង​ត្រូវ​លើក​បញ្ហា​សំខាន់ៗ​ក្នុង​សង្គម​កម្ពុជា​សព្វថ្ងៃ​នេះ។ ខ្ញុំ​គិត​ថា បញ្ហា​ដី​ធ្លី និង​បញ្ហា​នៃ​សេរីភាព​បញ្ចេញ​មតិ ជា​បញ្ហា​សិទ្ធិ​មូលដ្ឋាន​បំផុត ហើយ​ខ្ញុំ​គិត​ថា អាមេរិក​បន្ត​ព្យាយាម​ធ្វើ​ឲ្យ​ស្ថានការណ៍​នៅ​កម្ពុជា​ប្រសើរ​ឡើង”។

លោក​ស្រី ពុង ឈីវកេក  ប្រធាន​អង្គការ​សិទ្ធិ​មនុស្ស​លីកាដូ បាន​មាន​ប្រសាសន៍​ថា អង្គការ​របស់​លោក​ស្រី​គ្រោង​នឹង​ជួប​គណៈ​ប្រតិភូ​អាមេរិក​នៅ​ថ្ងៃ​ច័ន្ទ​នេះ។ លោក​ស្រី ឈីវកេក មាន​ប្រសាសន៍​ថា “ពួកគេ​ចង់​ដឹង​ស្ថានការណ៍​ទូទៅ​នៅ​កម្ពុជា”។ លោក​ស្រី​មិន​អត្ថាធិប្បាយ​បន្ថែម​ទេ​រហូត​ទាល់តែ​ជំនួប​ចប់​សិន។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​កាន់​អំណាច បាន​មាន​ប្រសាសន៍​ថា គណបក្ស​របស់​លោក​មិន​មាន​ផែនការ​ជួប​ជាមួយ​គណៈ​ប្រតិភូ​នេះ​ទេ។ លោក​ស្រី មូរ សុខហួរ ប្រធាន​កិច្ចការ​សាធារណៈ​គណបក្ស​សង្គ្រោះ​ជាតិ បាន​មាន​ប្រសាសន៍​ថា លោក​ស្រី​មិន​ដឹង ថាតើ​មន្ត្រី​គណបក្ស​ប្រឆាំង​នឹង​ជួប​ជាមួយ​ក្រុម​អ្នក​នយោបាយ​កំពុង​ធ្វើ​ទស្សន​កិច្ច​នេះ​ឬ​យ៉ាង​ណាទេ។

យោងតាម​សេចក្តី​ប្រកាស​ព័ត៌មាន​ពី​ការិយាល័យ​របស់​លោក​ស្រី ភេឡូស៊ី បាន​ឲ្យ​ដឹង​ថា បន្ថែម​ទៅ​នឹង​ការ​មក​បំពេញ​ទស្សនកិច្ច​នៅ​កម្ពុជា គណៈ​ប្រតិភូ​នេះ​នឹង​ធ្វើ​ទស្សនកិច្ច​ប្រទេស​ភូមា វៀតណាម កូរ៉េ​ខាង​ត្បូង និង ប្រទេស​ជប៉ុន។

លោក​ស្រី ភេឡូស៊ី និយាយ​ក្នុង​សេចក្តី​ប្រកាស​ព័ត៌មាន​ថា “គណៈ​ប្រតិភូ​របស់​យើង​នឹង​ពិភាក្សា​អំពី​វិធី​នានា​ដែល​យើង​អាច​ពង្រឹង​កិច្ច​សហប្រតិបត្តិការ​សន្តិសុខ ជំរុញ​សិទ្ធិ​មនុស្ស​ដោយ​យក​ចិត្ត​ទុក​ដាក់​ខ្លាំង​លើ​ស្ត្រី កម្មករ ក្រុម​សាសនា​ភាគតិច ហើយ​បង្កើន​ពាណិជ្ជកម្ម​ត្រឹមត្រូវ”។

លោក ដ្រូ ហែមមីល អ្នក​នាំពាក្យ​លោក​ស្រី ភេឡូស៊ី មិន​បាន​ឆ្លើយតប​សំណើ​សុំ​ការ​អត្ថាធិប្បាយ​ទេ។

យោងតាមសេចក្តី​ប្រកាស​ព័ត៌មាន​បាន​ឲ្យ​ដឹង​ថា គណៈ​ប្រតិភូ​ពីរ​គណបក្ស មាន​ខាង​គណបក្ស​ប្រជាធិបតេយ្យ​៩​រូប និង​ខាង​គណបក្ស​សាធារណរដ្ឋ​១​រូប ក៏​នឹង​ស្វះ​ស្វែង​ឲ្យ​មាន​ការ​យល់​ដឹង​ប្រសើរ​អំពី​ដៃគូ​ឆ្លងកាត់​មហា​សមុទ្រ​ប៉ាស៊ីហ្វិក អំឡុង​ដំណើរ​ទស្សនកិច្ច​នេះ​ដែរ។

ដៃគូ​ឆ្លងកាត់​មហា​សមុទ្រ​ប៉ាស៊ីហ្វិក ជា​កិច្ច​ព្រមព្រៀង​ពាណិជ្ជកម្ម​ដែល​ស្នើ​ឡើង​រវាង​អាមេរិក​និង​ប្រទេស​១១​ផ្សេងទៀត ក្នុង​នោះ​មាន​វៀតណាម និង​ជប៉ុនផង​ដែរ បាន​រង​ការ​រិះគន់​ចំពោះ​ភាព​សម្ងាត់​នៃ​ការ​ចរចា​របស់​ខ្លួន។

រហូត​មកដល់​ពេល​នេះ ប្រទេស​កម្ពុជា​មិន​ទាន់​បាន​ចូលរួម​ក្នុង​សន្ធិសញ្ញា​នេះ​ទេ។

លោក​ស្រី ភេឡូស៊ី បាន​ធ្វើការ​នៅ​សភា​តាំង​ពី​ឆ្នាំ១៩៨៧​មក​ម៉្លេះ។ ក្នុង​ឆ្នាំ​២០០៧ លោក​ស្រី​បាន​ក្លាយ​ជា​ស្ត្រី​ទី​១​ធ្វើ​ជា​ប្រធាន​សភា ជា​តំណែង​ដែល​លោក​ស្រី​បាន​កាន់​រហូត​ដល់​ឆ្នាំ​២០១១។

ក្នុង​អត្ថបទ​មួយ​អបអរ​ខួប​កំណើត​ទី​៧៥​របស់​លោក​ស្រី ភេឡូស៊ី កាលពី​ថ្ងៃ​ព្រហស្បតិ៍ កាសែត វ៉ាស៊ីនតោន ប៉ុស្តិ៍ បាន​ពណ៌នា​លោក​ស្រី​ថា​ជា “មេដឹកនាំ​មាន​ប្រសិទ្ធ​ភាព​បំផុត​ក្នុង​សភា”៕ និត

 

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.