យោងតាមសចក្តីថ្លែងការមួយចេញកាលពីម្សិលមិញបានឲ្យដឹងថា ត្រឹមតែជាងមួយសប្តាហ៍ប៉ុណ្ណោះ បន្ទាប់ពីលោកនាយករដ្ឋមន្ត្រី ហ៊ុន សែន បានចេញបទបញ្ជាឲ្យក្រសួងរ៉ែ និងថាមពល ទទួលបន្ទុកគ្រប់គ្រងរាល់អាជ្ញាប័ណ្ណបូមខ្សាច់ទាំងអស់ ក្រុមអធិការកិច្ចដែលដឹកនាំដោយក្រសួងនេះបានបិទកន្លែងបូមខ្សាច់ខុសច្បាប់ចំនួនពីរកន្លែងកាលពីថ្ងៃអាទិត្យ។
ក្រុមមន្ត្រីបានលើកឡើងថា គ្មានសកម្មភាពបូមខ្សាច់ទៀតឡើយនៅកន្លែងបូមខ្សាច់មួយកន្លែងក្នុងចំណោមកន្លែងបូមខ្សាច់នានាក្នុងស្រុកស្អាង ខេត្តកណ្តាល រីឯនៅកន្លែងផ្សេងមួយទៀតក្នុងរាជធានី កម្មករមួយក្រុមត្រូវបានឃាត់ខ្លួនមួយភ្លែត បន្ទាប់មកត្រូវបានដោះលែងវិញ ហើយគ្មានឧបករណ៍ណាមួយត្រូវបានរឹបអូសឡើយ។
យោងតាមសេចក្តីថ្លែងការដែលបង្ហោះនៅលើគេហទំព័ររបស់ក្រសួងនេះ បានឲ្យដឹងថា ក្រសួងនេះបានចាប់ផ្តើមធ្វើការដើម្បីលុបបំបាត់ការបូមខ្សាច់គ្មានអាជ្ញាប័ណ្ណនៅទូទាំងប្រទេសជាផ្នែកនៃយុទ្ធនាការ “ការពារទន្លេ”ថ្មីរបស់ខ្លួន។
សេចក្តីថ្លែងការនេះមានខ្លឹមសារដូច្នេះថា “ជាលទ្ធផល យើងបានបង្ក្រាបការបូមខ្សាច់នៅក្នុងទីតាំងពីរខុសគ្នា”។ សេចក្តីថ្លែងការនេះមានខ្លឹមសារបន្ថែមថា ក្រុមអធិការកិច្ចរួមមានក្រសួងនិងមន្ត្រីមូលដ្ឋាន ក៏ដូចជាកងរាជអាវុធហត្ថផងដែរ។
លោក ម៉េង ស័ក្តិធារ៉ា រដ្ឋលេខាធិការក្រសួងនេះបានលើកឡើងថា ក្រុមអធិការកិច្ចបានឃាត់ខ្លួនកម្មករនៅកន្លែងបូមខ្សាច់មួយកន្លែងត្រង់ចំណុចប្រសព្វទន្លេចតុមុខនៅមុខព្រះបរមរាជវាំង ប៉ុន្តែ បានត្រឹមតែធ្វើកំណត់ត្រាអំពីអត្តសញ្ញាណរបស់កម្មករនេះតែប៉ុណ្ណោះ។
លោកបានមានប្រសាសន៍ថា “កម្មករកំពុងធ្វើការជាធម្មតាប៉ុន្តែថៅកែរបស់ពួកគេមិនមកក្បែរនោះឡើយ។ យើងបានដោះលែងពួកគេ ព្រោះពួកគេគ្រាន់តែជាកម្មករប៉ុណ្ណោះ មិនមែនជាអ្នកដែលត្រូវទទួលខុសត្រូវទេ”។
លោក ស័ក្តិធារ៉ា បានបន្ថែមថា នៅពេលក្រុមអធិការកិច្ចបានទៅដល់កន្លែងផ្សេងទៀតនៅក្នុងខេត្តកណ្តាល គេបានរកឃើញថា គ្មានសកម្មភាពបូមខ្សាច់ទៀតឡើយនៅទីនោះ។
លោកបានមានប្រសាសន៍បន្តថា “ពួកគេហាក់បីដូចជាដឹងថា យើងចុះទៅទីនោះត្រួតពិនិត្យអ៊ីចឹង។ នៅពេលក្រុមការងាររបស់យើងបានទៅដល់ ពួកគេបានគេចខ្លួនអស់បាត់ទៅហើយ”។
នៅក្នុងអីម៉ែលមួយកាលពីម្សិលមិញ លោក ឌិត ទីណា រដ្ឋលេខាធិការមួយរូបទៀតនៅក្រសួងនេះបានលើកឡើងថា គ្មានការចាប់ខ្លួនឡើយ ហើយក៏គ្មានការរឹបអូសឧបករណ៍នៅ កន្លែងបូមខ្សាច់ក្នុងរាជធានីដែរ។
លោកបានមានប្រសាសន៍ថា ” ប៉ុន្តែ យើងបានពន្យល់ពួកគេអំពីការចោទប្រកាន់ដែលពួកគេនឹងត្រូវប្រឈម ប្រសិនបើពួកគេត្រូវបានចាប់ខ្លួនម្តងទៀត”។ លោក ទីណា បានបន្ថែមថា ក្រសួងកំពុងតែទាក់ទងជាមួយអ្នកភូមិមូលដ្ឋានរស់នៅតាមដងទន្លេដែលមានបំណងរាយការណ៍អំពីការបូមខ្សាច់ខុសច្បាប់។
លោកបានបន្ថែមថា “ប្រសិនបើមានសកម្មភាពគួរឲ្យសង្ស័យណាមួយ យើងនឹងទទួលបានព័ត៌មាន ហើយអាចធ្វើអន្តរាគមន៍បានគ្រប់ពេលវេលា”។
លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីសប្តាហ៍មុនថា លោកបានចេញបទបញ្ជាឲ្យក្រសួងរ៉ែ និងថាមពលទទួលបន្ទុកគ្រប់សកម្មភាពទាំងអស់ដែលទាក់ទិននឹងអាជ្ញាប័ណ្ណបូមខ្សាច់ ព្រោះអាជ្ញាធរបដិសេធមិនទទួលខុសត្រូវចំពោះការបូមខ្សាច់នេះឡើយ ដែលគេបន្ទោសថា បានធ្វើឲ្យបាក់ជ្រាំងទន្លេនោះ៕ស៊ុយឈាង