35 C
Phnom Penh

តុលាការ​ចោទ​ប្រកាន់​បុរស​រឹតកសម្លាប់ក្មេង​ប្រុស​ម្នាក់ពីបទ ​មនុស្ស​ឃាត​ដោយ​គិត​ទុក​ជាមុន

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយ​ថា កាលពី​ម្សិលមិញ សាលា​ដំបូង​ខេត្ត​កំពង់​ចាម​បាន​ចោទ​ប្រកាន់​អ្នកភូមិ​ម្នាក់​​ពី​បទ​មនុស្សឃាត​ដោយគិត​ទុក​ជាមុន ដោយ​បាន​យក​ខ្សែ​នីឡុង​រឹតក​សម្លាប់​ក្មេង​ប្រុស​អាយុ​៧ឆ្នាំ បន្ទាប់ពី​ក្មេង​ប្រុស​​រូប​នេះ​បាន​ធាក់​ក្មួយ​ប្រុស​របស់​ខ្លួនអំឡុង​ពេល​​ឈ្លោះ​គ្នា។

លោក ចាន់ ហោ នាយ​រង​ការិយាល័យ​នគរ​បាល​ព្រហ្មទណ្ឌ​ខេត្ត​បាន​មាន​ប្រសាសន៍​ថា ចៅក្រម​ ថាន់ ឡេង បាន​សាក​សួរ​ជន​សង្ស័យ​ឈ្មោះ ហួង ប៊ុនថេន កាលពី​ព្រឹក​ម្សិលមិញ ហើយ​បាន​ចោទ​ប្រកាន់​ជន​នេះ​ពីបទ​មនុស្ស​ឃាត​ដោយគិត​ទុក​ជាមុន​តាម​មាត្រា​២០០​នៃ​ក្រម​ព្រហ្មទណ្ឌ។

ការ​ចោទ​ប្រកាន់​នេះ​មាន​​ទោស​ជាប់ពន្ធនាគារ​អស់​មួយ​ជីវិត​។ លោក ចាន់ ហោ បាន​មាន​ប្រសាសន៍​ថា តុលាការ​បាន​ចេញ​ដីកា​បង្គាប់​ឲ្យ​ឃុំខ្លួន​រួច​ហើយ ហើយ​យើង​បាន​បញ្ជូន​ជន​សង្ស័យ​រូប​នេះ​ទៅ​ពន្ធនាគារ​ខេត្ត​ ដើម្បី​រង់ចាំ​ការ​កាត់​ក្ដី​”។

ប៊ុនថេន អាយុ​៣៣​ឆ្នាំ ត្រូវ​បាន​ចាប់​ខ្លួន​កាលពី​ថ្ងៃ​សុក្រ គឺ​ថ្ងៃ​ដែល​ជន​នេះ​បាន​យក​ខ្សែ​នីឡុង​​រឹត​ក​សម្លាប់​ក្មេង​ប្រុស​ គង់ ពិសិដ្ឋ ហើយ​បាន​យក​សាកសព​បោះ​ចូល​ក្នុង​ព្រែក​មួយ​ក្បែរ​ភូមិ​ស្ថិត​ក្នុង​ឃុំ​ពាមកោះស្នា ស្រុក​ស្ទឹង​ត្រង់។

ប៊ុនថេន ទំនង​ជា​ខឹង​នឹង​ក្មេង​ប្រុស​ គង់ ពិសិដ្ឋ បន្ទាប់ពី​ក្មេង​ប្រុស​រូប​នេះ​បាន​ឈ្លោះ​គ្នា​ជាមួយ​ក្មួយ​ប្រុស​អាយុ​៥ឆ្នាំ​របស់​ខ្លួន​កាលពី​ព្រឹក​ថ្ងៃសុក្រ ហើយ​បាន​ធាក់​ក្មួយ​ប្រុស​របស់​ខ្លួនទៀត​៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស