28 C
Phnom Penh

និពន្ធ​នាយក​កាសែត​រស្មី​កម្ពុជា​​ស្លាប់​ក្នុង​អាយុ​៥៤​ឆ្នាំ

ដោយ ឌឹ ខេមបូឌា ដេលី

បទវិភាគ

លោក ប៉ែន សមិទ្ធិ និពន្ធនាយក​កាសែត​រស្មី​កម្ពុជា និង​ជា​ប្រធាន​ក្លឹប​អ្នក​កាសែត​​​កម្ពុជា​យូរ​មក​ហើយនោះ​​​បាន​ស្លាប់​​កាលពី​ម្សិលមិញ​ក្នុង​រាជធានី​ភ្នំពេញក្នុង​អាយុ​៥៤​ឆ្នាំ។

លោក ប៉ែន សីហនាថ កូន​ប្រុស​របស់​លោក​បាន​និយាយ​កាលពី​ម្សិលមិញ​ថា “ឪពុក​របស់​ខ្ញុំ​បាន​ស្លាប់​ដោយ​សារ​ជំងឺកាលពី​ព្រឹក​មិញ​នេះ”។ លោក សីហនាថ មិន​បាន​និយាយ​ថា តើ​ឪពុក​របស់​គាត់​ស្លាប់​ដោយ​សារ​ជំងឺ​អ្វី​នោះ​ឡើយ ប៉ុន្តែ​អ្នក​កាសែត​ដ៏ឆ្នើម​រូប​នេះ​បាន​ធ្វើការ​ព្យាបាល​ជំងឺ​មហារីក​បំពង់​ក​ក្នុង​ពេល​កន្លង​មក។

យោង​តាម​របាយការណ៍​របស់​ក្លឹប​អ្នក​កាសែត​កម្ពុជា​ ដែល​បាន​ចេញ​ផ្សាយ​កាលពី​ម្សិល​មិញ​បាន​ឲ្យ​ដឹង​ថា ដោយ​កើត​ក្នុង​ស្រុក​កំពង់សៀម ខេត្តកពង់​ចាម ​ក្នុង​ខែ​តុលា ឆ្នាំ​១៩៦១ ក្នុង​វ័យ​ជំទង់​​លោក ប៉ែន សមិទ្ធិ ត្រូវ​បាន​ជម្លៀស​ទៅ​ខេត្ត​ព្រៃវែង​អំឡុង​របប​ខ្មែរ​ក្រហម ហើយ​បាន​បួស​​ជា​ព្រះសង្ឃ​រយៈពេល​ខ្លី​​អំឡុង​ពេល​ដួល​រលំ​នៃ​របប​នេះ​ក្នុង​ឆ្នាំ​១៩៧៩។

ដោយ​ត្រឡប់​មក​ក្រុង​ភ្នំពេញ​វិញ លោក​បាន​​បម្រើ​ការ​ងារ​នៅ​មន្ទីរ​ឃោសនាការ​នៃ​របបថ្មី​​ដែល​គាំទ្រ​ដោយ​វៀតណាម​ក្នុង​ឆ្នាំ​១៩៧៩ ហើយ​បាន​បម្រើការ​ងារ​​ចាប់​ពី​ឆ្នាំ​១៩៨១ជា​អ្នក​កាសែត និង​ជា​អ្នក​និពន្ធ​​នៅ​កាសែត​ដែល​គ្រប់គ្រង​ដោយ​រដ្ឋ​មួយ​ចំនួន​ក្នុង​រដ្ឋធានី។

អំឡុង​​នយោបាយ​សង្គ្រាម​ត្រជាក់​នៅពេល​នោះ លោក ប៉ែន សមិទ្ធិ បាន​បញ្ចប់​ការ​សិក្សា​ថ្នាក់​បរិញ្ញាបត្រ​ខាង​វិទ្យាសាស្ត្រ​នយោបាយ​ក្នុង​ឆ្នាំ​១៩៨៦​ ពី​សាកល​វិទ្យាល័យ​មួយ​ក្នុង​ប្រទេស​វៀតណាម​ ហើយ​ក្នុង​ឆ្នាំ​១៩៨៧​ លោក​ទទួល​បាន​​បរិញ្ញាបត្រ​​ផ្នែក​សារ​ព័ត៌មាន​នៅ​សហភាព​សូវៀត​។

ងាក​មក​ការ​ងារ​ជា​អ្នក​និពន្ធ​ក្នុង​រាជធានី​ភ្នំពេញឯណោះវិញ លោក ប៉ែន សមិទ្ធិ កាលពី​ខែ​មេសា ឆ្នាំ​១៩៩៣ បាន​ក្លាយ​ជា​និពន្ធនាយក​​កាសែត​រស្មី​កម្ពុជា​ ដែល​ជា​កាសែត​ប្រចាំ​ថ្ងៃ​ដែល​មាន​អ្នក​អាន​ច្រើន​បំផុត​ក្នុង​ប្រទេស​កម្ពុជា​។

លោក ប៉ែន សមិទ្ធិ បាន​កាន់​តួនាទី​នេះ​រហូត​ដល់​ពេល​លោក​ស្លាប់​ ទន្ទឹម​នឹង​នោះ​ដែរ​លោក​ក៏​បានក្លាយ​ជា​ប្រធាន​ក្លឹប​អ្នក​កាសែត​កម្ពុជា​ក្នុង​ឆ្នាំ​២០០០​ ហើយ​បាន​បង្កើត​គេហ​ទំព័រ​ Cambodia Express News ក្នុង​ឆ្នាំ​២០០៨។

លោក ងួន សេរ័ត្ន សហសេវិក​របស់​លោក​បាន​មាន​ប្រសាសន៍​ថា ពិធី​បុណ្យ​សព​ដែល​បាន​ចាប់​ផ្ដើម​កាលពី​ម្សិលមិញ​ នឹង​បញ្ចប់​នៅ​ថ្ងៃ​ព្រហស្បតិ៍​ មុន​ពេល​សព​របស់​អ្នក​កាសែត​រូប​នេះ​នឹង​ត្រូវ​បូជា​នៅ​វត្ត​លង្កា ក្នុង​រាជធានី​ភ្នំពេញ​។ លោក ប៉ែន សមិទ្ធិ បាន​ស្លាប់​ចោល​ប្រពន្ធ​ កូនស្រី​​ម្នាក់​ និង​កូន​ប្រុស​ម្នាក់​៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស