26 C
Phnom Penh

ព្រះ​មហា​ក្សត្រ ​នរោត្តម ​សី​ហមុនី​​ ឡាយ​ព្រះ​ហត្តលេខា​លើ​ច្បាប់​បោះ​ឆ្នោត​ថ្មី

ដោយ ឌឹ ខេមបូឌា ដេលី

បទវិភាគ

សមាជិក​សភា​គណបក្ស​ប្រឆាំង​ម្នាក់​បាន​និយាយ​កាលពី​ម្សិលមិញ​ថា ព្រះមហាក្សត្រ​ នរោត្តម​ សីហមុនី បាន​ឡាយ​ព្រះហស្ត​លេខា​លើ​ច្បាប់​បោះ​ឆ្នោត​ថ្មី​ចំនួន​ពីរ​កាលពី​សប្ដាហ៍​មុន ដែល​មិន​ប្រកាស​ជា​សាធារណៈ​ ដែល​បាន​ចូល​​ជាធរមាន​ដ៏ចម្រូងចម្រាស​។

លោក យ៉ែម បុញ្ញឫទ្ធិ អ្នក​នាំពាក្យ​គណបក្ស​សង្គ្រោះជាតិ​បាន​មាន​ប្រសាសន៍​ថា “ច្បាប់​ទាំង​ពីរ​នេះ​ត្រូវ​បាន​ឡាយ​ព្រះហស្តលេខា​ដោយព្រះមហាក្សត្រ​កាលពី​ថ្ងៃទី​២៦ ខែមីនា ហើយ​ច្បាប់​ទាំង​ពីរ​នេះ​បាន​ចូល​ជា​ធរមាន​នៅ​ថ្ងៃដែលព្រះមហាក្សត្រ​បាន​ឡាយ​ព្រះហស្ត​លេខាលើច្បាប់​ទាំងពីរនេះ​​”។

លោក​ បុញ្ញឫទ្ធិ បាន​មាន​ប្រសាសន៍​ថា លោក​មិន​ច្បាស់​ថា តើ​ព្រះមហាក្សត្រ​ សីហមុនី ដែល​បច្ចុប្បន្ន​នេះ​ព្រះអង្គគង់​នៅ​ទីក្រុង​ប៉េកាំង ដើម្បី​ពិនិត្យ​ព្រះសុខភាព​​​បាន​ឡាយ​ព្រះហស្ត​លេខា​លើ​ច្បាប់​នេះ​ដោយ​របៀប​ណានោះឡើយ​ ប៉ុន្តែ​បាន​លើក​ឡើង​ថា លោក​បាន​ឃើញ​ព្រះហស្ត​លេខារបស់​ព្រះ​មហាក្សត្រ​​នៅ​លើ​ច្បាប់​ទាំង​ពីរ​នេះ។

អ្នកនាំពាក្យ​គណបក្ស​ប្រឆាំង​រូប​នេះ​ក៏​បាន​លើក​ឡើង​ផង​ដែរ​ថា ច្បាប់​ទាំង​ពីរ​នេះ​ដែល​ចាត់​ទុក​ថា ផ្ទុយ​នឹង​រដ្ឋធម្មនុញ្ញ​ដោយ​អង្គការ​សង្គម​ស៊ីវិល​មួយ​ចំនួន​ ដោយ​សារ​មាត្រា​មួយ​ចំនួនដាក់​កម្រិត​ទៅ​លើ​​ការ​បញ្ចេញមតិ​អំឡុង​យុទ្ធនាការ​ឃោសនា​បោះ​ឆ្នោត​នោះ ត្រូវ​បាន​​ពិនិត្យ​ដោយ​ក្រុម​ប្រឹក្សាធម្មនុញ្ញ ហើយ​បាន​អនុម័ត​ដោយ​គ្មាន​​ការ​កែប្រែ​អ្វីឡើយ​។

លោក បុញ្ញឫទ្ធិ បាន​មាន​ប្រសាសន៍ថា “ពិតមែនហើយ ​ច្បាប់​ទាំង​ពីរ​នេះ​ត្រូវ​បាន​ពិនិត្យ និង​អនុម័ត​ដោយ​ក្រុម​ប្រឹក្សាធម្មនុញ្ញ ហើយ​មិនមាន​ការ​កែប្រែ​អ្វីឡើយ​”។

លោក ព្រហ្ម ញាណវិចិត្រ អ្នក​នាំពាក្យ​ក្រុម​ប្រឹក្សា​ធម្មនុញ្ញ​​មិន​​អាច​​ទាក់ទង​សុំការ​អត្ថា​ធិប្បាយ​បាន​ទេ។

ច្បាប់ទាំង​ពីរ​នេះ​នឹង​អនុញ្ញាត​ឲ្យ​បង្កើត​គណៈកម្មាធិការ​ជាតិ​រៀបចំ​ការ​បោះ​ឆ្នោត​ថ្មី ដែល​​មាន​ពីរ​គណបក្ស​នៅ​ពេល​សមាជិក​ប្រាំបួន​រូប​របស់​ស្ថាប័ន​នេះ​ចូល​កាន់​តួនាទី​របស់​ខ្លួន ដោយ​ការ​ជ្រើស​រើស​តួនាទី​​នេះ​​ត្រូវ​បាន​​ធ្វើ​ឡើង​កាលពី​ថ្ងៃសុក្រ។

គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​នឹង​ជ្រើស​រើស​សមាជិក​​របស់​ខ្លួន​បួន​រូប​ម្ខាង​សម្រាប់​​ស្ថាប័ន​ថ្មី​នេះ​។

លោក អ៊ា ផារ៉ាឌី ប្រធាន​នាយកដ្ឋាន​គ្រប់​គ្រង​បុគ្គលិក​រដ្ឋសភា​បាន​មាន​ប្រសាសន៍​ថា លោក​មិន​ទាន់​ទទួល​បាន​ការ​ដាក់​ពាក្យ​សុំ​សម្រាប់​តួនាទី​ទាំង​នេះ​ទេ​មក​ដល់​ថ្ងៃ​ម្សិលមិញ ប៉ុន្តែ​ថា មនុស្ស​ជា​ច្រើន​បាន​​មកយក​ឯកសារដើម្បី​​ដាក់​ពាក្យ​។

លោក ផារ៉ាឌី បាន​មាន​ប្រសាសន៍​ថា រហូត​មក​ទល់​ថ្ងៃ​នេះ យើង​មិន​ទាន់​ទទួល​បាន​ការ​ដាក់​ពាក្យ​សុំណាមួយនៅឡើយ​ទេ ប៉ុន្តែ​យើង​បាន​ចែក​ទម្រង់​ដាក់​ពាក្យ​សុំជាច្រើន​ដល់​មនុស្ស​ជាង​៣០​នាក់ រួម​ទាំង​ឥស្សរជន​នយោបាយ សមាជិកអង្គការ​​សង្គម​ស៊ីវិល និង​សមាជិក​គណៈកម្មាធិការ​ជាតិ​រៀបចំ​ការ​បោះឆ្នោតបច្ចុប្បន្ន​​មួយ​ចំនួនទៀត”៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស