27.1 C
Phnom Penh

ពល​​​រដ្ឋ​​​​​​ខ្មែរ​​​ជំទាស់​​​ទៅ​​​នឹង​​​កិច្ច​​​ព្រម​​​ព្រៀង​​​ស្តី​​​ពីជនភៀស​​​ខ្លួន​​​ ខណៈ​​​​​​ជន​​​ភៀស​​​ខ្លួន​​​មិន​​​ចង់​​​តាំង​​​ទីលំនៅ​​​ថ្មី​​​នៅកម្ពុជា​​​

ដោយ ឌឹ ខេមបូឌា ដេលី

បទវិភាគ

ខណៈ​​​ជន​​​ភៀស​​​ខ្លួន​​​ដែល​​​ត្រូវ​​​បាន​​​ឃុំខ្លួន​​​ដោយ​​​ប្រទេស​​​អូស្ត្រាលី​​​នៅ​​​លើ​​​ប្រទេស​​​ដែន​​​កោះ​​​ណូរូ​​​ស្ថិត​​​នៅ​​​ភាគ​​​ខាង​​​ត្បូង​​​មហា​​​សមុទ្រ​​​ប៉ាស៊ីហ្វិក​​​បន្ត​​​​​​ច្រាន​​​ចោល​​​ការ​​​តាំង​​​ទីលំនៅថ្មី​​​នៅក្នុង​​​ប្រទេស​​​កម្ពុជា​​​ ពល​​​រដ្ឋ​​​ខ្មែរ​​​ជា​​​ច្រើន​​​នាក់​​​បាន​​​សំដែង​​​ការ​​​ជំទាស់​​​​​​ស្រដៀង​​​នេះ​​​ថា ពួក​​​គាត់​​​​​​មិន​​​ចង់​​​ឃើញ​​​ជន​​​ភៀស​​​ខ្លួន​​​ណា​​​មួយ​​​ត្រូវ​​​បាន​​​បញ្ជូន​​​មក​​​ប្រទេស​​​កម្ពុជា​​​ឡើយ​​​។

កាល​​​ពី​​​ខែ​​​កញ្ញា រដ្ឋាភិបាល​​​ក្រុង​​​កង់បេរ៉ា និងរដ្ឋាភិបាល​​​ក្រុង​​​ភ្នំពេញ​​​បាន​​​ចុះ​​​ហត្ថលេខា​​​លើក​​​ច្ច​​​ព្រម​​​ព្រៀង​​​មួយ​​​ ដែល​​​នឹង​​​អនុញ្ញាត​​​ឲ្យ​​​ជន​​​ភៀសខ្លួនដែល​​​ត្រូវ​​​បាន​​​បញ្ជូន​​​ទៅ​​​​​​ឃុំ​​​ឃាំង​​​​​​​​​នៅ​​​លើ​​​​​​ប្រទេស​​​ដែន​​​កោះ​​​ណូរូ ដើម្បី​​​រង់​​​ចាំ​​​​​​គេ​​​រៀប​​​ចំ​​​ពាក្យ​​​សុំ​​​សិទ្ធិ​​​ជ្រក​​​កោន​​​ឲ្យ​​​នោះ តាំង​​​ទី​​​លំនៅថ្មី​​​ក្នុង​​​ប្រទេស​​​កម្ពុជា​​​​​​​​​​​​ដោយ​​​ផ្អែក​​​លើការ​​​ស្ម័គ្រ​​​ចិត្ត​​​។ ជា​​​ថ្នូរ​​​នឹង​​​កិច្ច​​​ព្រម​​​ព្រៀង​​​នេះ​​​ ប្រទេស​​​អូស្ត្រា​​​លី​​​បាន​​​សន្យា​​​ផ្តល់​​​ជំនួយ​​​បន្ថែម​​​ក្នុង​​​ទឹក​​​ប្រាក់​​​៣៥​​​លាន​​​ដុល្លារ​​​សម្រាប់​​​រយៈ​​​ពេល​​​បួន​​​ឆ្នាំ​​​។

កិច្ច​​​ព្រម​​​ព្រៀង​​​នេះ​​​ត្រូវ​​​បាន​​​រិះ​​​គន់​​​យ៉ាង​​​ខ្លាំង​​​ដោយ​​​អង្គការ​​​សិទ្ធិ​​​មនុស្ស និង​​​គណបក្ស​​​ប្រឆាំង​​​នៅ​​​ក្នុង​​​ប្រទេស​​​ទាំង​​​ពីរ​​​។ ដំណើរ​​​ទៅ​​​កាន់​​​ប្រទេស​​​ណូរូ​​​របស់​​​មន្ត្រី​​​កម្ពុជា​​​ក្នុង​​​ពេល​​​ថ្មី​​​ៗ​​​នេះ​​​មិន​​​អាច​​​បញ្ចុះ​​​បញ្ចូល​​​ជន​​​ភៀស​​​ខ្លួន​​​ប្រហែល​​​៤០០នាក់​​​ ដែល​​​រស់​​​នៅ​​​​​​ក្នុង​​​សហគមន៍មួយ​​​ឲ្យ​​​យល់​​​ព្រម​​​មក​​​តាំង​​​ទី​​​លំ​​​នៅថ្មី​​​នៅ​​​ប្រទេស​​​កម្ពុជា​​​បាន​​​ឡើយ​​​។

ហើយ​​​ពល​​​រដ្ឋ​​​រស់​​​នៅ​​​រាជធានី​​​ភ្នំពេញ​​​ ក៏​​​ទំនង​​​ជា​​​សំដែង​​​ការ​​​ជំទាស់​​​​​​ស្រដៀង​​​នេះ​​​ដែរ​​​។

​​​នៅ​​​ក្នុង​​​កិច្ច​​​សម្ភាស​​​មួយច​​​ំនួន​​​ដែល​​​ត្រូវ​​​បាន​​​ធ្វើ​​​ឡើង​​​​​​ក្នុង​​​រាជ​​​ធានី​​​ភ្នំពេញ​​​កាល​​​ពី​​​ថ្ងៃ​​​សុក្រ​​​  គ្មាន​​​នរណា​​​ម្នាក់​​​​​​សំដែង​​​ការ​​​គាំទ្រ​​​ចំពោះ​​​ផែនការ​​​នេះ​​​ឡើយ​​​ រួម​​​ទាំង​​​អ្នក​​​រត់​​​រ៉ឺម៉ក់​​​មូ៉តូកង់​​​បី​​​ ឱសថ​​​ការី និង​​​ម្ចាស់​​​ហាង​​​បោក​​​អុ៊ត​​​ជា​​​ដើម​​​ផង​​​ដែរ​​​។

អ្នកស្រី ព្រំ ចន្ធី អាយុ​​​៣០​​​ឆ្នាំ ដែល​​​គ្រប់​​​គ្រង​​​ភោជនីយដ្ឋាន​​​របស់​​​ឪពុក​​​ខ្លួន​​​នៅ​​​តាម​​​បណ្តោយ​​​ផ្លូវ​​​លេខ​​​១៧៨ ក្នុង​​​ខណ្ឌ​​​ដូន​​​ពេញ​​​បាន​​​លើក​​​ឡើង​​​ថា កម្ពុជា​​​ក្រខ្លាំង​​​ណាស់​​​មិន​​​អាច​​​ទទួល​​​យក​​​ជន​​​ភៀសខ្លួន​​​របស់​​​អូស្ត្រាលី​​​បាន​​​ឡើយ​​​។

អ្នកស្រី ចន្ធី បាន​​​និយាយ​​​ថា “យើង​​​ខ្លាច​​​ក្រែង​​​ ពួកគេ​​​ [ជនភៀស​​​ខ្លួន​​​] នឹង​​​បង្ក​​​បញ្ហា​​​ ដូច​​​ជា​​​​​ធ្វើ​​​ឲ្យ​​​កើត​​​មាន​​​​អំពើ​​​ភេរវកម្ម​​​ និង​​​អសន្តិសុខ​​​នៅ​​​ក្នុង​​​ប្រទេស​​​របស់​​​យើង​​​ជា​​​ដើម​​​ ព្រោះ​​​យើង​​​មិន​​​ស្គាល់​​​ប្រវត្តិ​​​របស់​​​ពួកគេ​​​ឡើយ​​​”។

អ្នកស្រី​​​បាន​​​និយាយ​​​បន្ថែម​​​ថា “ខ្ញុំ​​​នឹង​​​មិន​​​ជួល​​​ពួកគេ​​​មក​​​ធ្វើ​​​ជា​​​បុគ្គលិក​​​ឡើយ​​​ ព្រោះ​​​ខ្ញុំ​​​ចង់​​​ជួយ​​​ពល​​​រដ្ឋ​​​ខ្មែរ​​​។ យើង​​​នឹង​​​ឃើញ​​​ថា និស្សិត​​​ខ្មែរ​​​មួយ​​​ចំនួន​​​នឹង​​​គ្មាន​​​ការ​​​ងារ​​​ធ្វើ​​​នៅ​​​ពេល​​​ពួក​​​គេ​​​បញ្ចប់​​​ការ​​​សិក្សា​​​”។

ជាង​​​ចម្លាក់​​​ម្នាក់​​​ដែល​​​មាន​​​រោង​​​ជាង​​​​​​នៅ​​​តាម​​​បណ្តោយ​​​ផ្លូវ​​​លេខ​​​១៩ ហើយ​​​ប្រាប់​​​ឈ្មោះ​​​ត្រឹម​​​តែ​​​ថា ពៅ​​​ នោះ​​​បាន​​​គូស​​​បញ្ជាក់​​​ថា ប្រទេស​​​កម្ពុជា​​​មិន​​​អាច​​​ផ្តល់​​​អ្វីៗ​​​គ្រប់​​​គ្រាន់​​​សម្រាប់​​​ពល​​​រដ្ឋ​​​ខ្លួន​​​ផង។

ជាង​​​ចម្លាក់​​​អាយុ​​​៣៣ឆ្នាំរូបនេះ​​​បាន​​​និយាយ​​​ថា “ពល​​​រដ្ឋ​​​យើង​​​មិន​​​មាន​​​ផ្ទះ​​​សំបែង​​​ត្រឹម​​​ត្រូវ​​​ឡើយ​​​ អ្នក​​​ខ្លះ​​​រស់​​​នៅ​​​តាម​​​ចិញ្ចើម​​​ផ្លូវ​​​។ ប្រទេស​​​អូស្ត្រាលី​​​គឺ​​​ជា​​​ប្រទេស​​​អ្នកមាន​​​ ហើយ​​​គេ​​​មាន​​​​​​ច្បាប់​​​ល្អ​​​ ហើយ​​​គេ​​​អាច​​​​​​​​​​​​មើល​​​ថែ​​​ទាំ​​​ជន​​​ភៀស​​​ខ្លួន​​​បាន​​​ល្អ​​​ជាង​​​កម្ពុជា​​​”។

នៅ​​​ក្នុង​​​ភាពយន្ត​​​ឯកសារ​​​ខ្លី​​​មួយ​​​ចេញ​​​កាល​​​ពីសប្តាហ៍​​​មុន​​​ដោយ​​​អង្គការ​​​ Welcome to Australia ជា​​​អង្គការ​​​តស៊ូមតិ មួយ​​​​​មាន​​​មូលដ្ឋាន​​​នៅ​​​ក្នុង​​​ទីក្រុង​​​ Adelaide ពល​​​រដ្ឋ​​​ខ្មែរ​​​ដែលត្រូវ​​​បាន​​​សម្ភាស​​​បាន​​​សំដែង​​​អារម្មណ៍​​​ស្រដៀង​​​ៗគ្នា​​​។ ភាព​​​យន្ត​​​ឯកសារ​​​នេះ​​​រៀប​​​រាប់​​​ពី​​​អ្នក​​​ចម្រៀង​​​ខ្មែរ​​​វ័យ​​​ក្មេង​​​ម្នាក់​​​ដែល​​​ជួប​​​ជាមួយ​​​​​​ពល​​​រដ្ឋ​​​ខ្មែរ​​​ទាំង​​​នៅ​​​ក្នុង​​​រាជ​​​ធានី​​​ និង​​​នៅ​​​តាម​​​ទី​​​ជន​​​បទ​​​។

ស្ត្រី​​​ម្នាក់​​​នៅ​​​ក្នុង​​​ខេត្ត​​​ព្រៃ​​​វែង​​​ដែល​​​មិន​​​បញ្ចេញ​​​ឈ្មោះ​​​នៅ​​​​​​ក្នុង​​​ខ្សែភាពយន្ត​​​ឯកសារ​​​ បាន​​​រៀប​​​រាប់​​​ពី​​​របៀប​​​ដែល​​​ខ្លួន និង​​​​​​កូន​​​វ័យ​​​ជំទង់​​​ពីរ​​​នាក់​​​ដែល​​​សុទ្ធ​​​តែ​​​ជា​​​ពល​​​ករ​​​ចំណាកស្រុក​​​នោះ​​​តស៊ូ​​​ដើម្បី​​​រក​​​ប្រាក់​​​ឲ្យ​​​បាន​​ត្រឹម​​​តែគ្រប់​​​សម្រាប់​​​មួយ​​​ថ្ងៃ។

ស្ត្រី​​​រូប​​​នេះ​​​បាន​​​និយាយ​​​ថា ​​​​​​​​”ខ្ញុំ​​​មិន​​​យល់​​​សោះ​​​ហេតុ​​​អ្វី​​​បាន​​​គេ​​​ចង់​​​បញ្ជូន​​​ជន​​​ភៀស​​​ខ្លួ​​​ន​​​មក​​​ប្រទេស​​​យើង​​​ ខណៈ​​​យើង​​​​​​មាន​​​ពល​​​រដ្ឋ​​​ច្រើន​​​រួច​​​ទៅហើយ​​​នោះ​​​”។

នៅ​​​ពេល​​​ត្រូវ​​​បាន​​​សួរ​​​ថា តើ​​​អ្នក​​​ស្រី​​​នឹង​​​ទទួល​​​យក​​​ជន​​​ភៀស​​​ខ្លួន​​​ឲ្យ​​​ចូល​​​មក​​​សហគមន៍​​​របស់​​​ខ្លួន​​​ដែរ​​​ ឬ​​​ទេ ស្ត្រី​​​រូប​​​នេះ​​​បាន​​​និយាយ​​​ថា គាត់​​​មិន​​​អាច​​​​​​ជួយ​​​ពួកគេ​​​បាន​​​ទេ​​​។

លោក​​​ Joel Polkinghorne ជា​​​ជន​​​ជាតិ​​​អូស្ត្រាលី និង​​​ជា​​​អ្នក​​​ដឹក​​​នាំ​​​ថត​​​ភាពយន្ត​​​​​​​​​ឯកសារ​​​នេះ​​​បាន​​​លើក​​​ឡើង​​​ថា លោក​​​នឹង​​​អ្នក​​​រួម​​​ការ​​​ងារ​​​ផ្សេង​​​ទៀត​​​បាន​​​និយាយ​​​ជា​​​​​​មួយ​​​ពល​​​រដ្ឋ​​​ខ្មែរ​​​មួយ​​​ចំនួន​​​អំពី​​​បញ្ហា​​​នេះ ​​​មិន​​​មែន​​​ត្រឹម​​​តែ​​​អ្នក​​​ដែល​​​ចូល​​​រួ​​​ម​​​ថត​​​នៅ​​​ក្នុង​​​ភាពយន្ត​​​ឯកសារ​​​នេះ​​​ឡើយ​​​​​​ ខណៈ​​​កំពុង​​​ថត​​​ភាព​​​យន្ត​​​ឯកសារ​​​​​​រយៈ​​​ពេល​​​ជាង​​​ពីរ​​​សប្តាហ៍​​​កាល​​​ពី​​​ខែ​​​មករា​​​​​​ ។

លោក​​​បាន​​​មាន​​​ប្រសាសន៍​​​ថា “ពួក​​​គាត់​​​ភាគច្រើន​​​និយាយ​​​ថា ខ្លួន​​​មិន​​​ដឹង​​​អំពី [កិច្ច​​​ព្រម​​​ព្រៀង​​​ស្តី​​​ពី​​​ជន​​​ភៀសខ្លួន​​​]នេះ​​​ឡើយ​​​។ហើយ​​​ពួក​​​គាត់​​​ភាគច្រើន​​​សុទ្ធ​​​តែ​​​និយាយ​​​ថា ់យើង​​​មិន​​​ខ្វល់​​​អំពី​​​អ្វី​​​ដែល​​​រដ្ឋាភិបាល​​​ធ្វើ​​​ឡើយ​​​ គឺ​​​យើង​​​ខ្វល់​​​តែ​​​ពីការ​​​រក​​​ស៊ី​​​ចិញ្ចឹម​​​ជីវិត​​​ ហើយ​​​ខំ​​​ប្រឹង​​​រស់​​​តែ​​​ប៉ុណ្ណោះ’ ហើយ​​​បន្ទាប់​​​មក​​​ទៀត​​​មាន​​​ពល​​​រដ្ឋ​​​មួយ​​​ចំនួន​​​តូច​​​​​​ដែល​​​មិន​​ចង់​​​លើក​​​ឡើង​​​​​​​​​​​​​​​​​​អំពី​​​បញ្ហា​​​នយោបាយ​​​”។

នៅ​​​ក្នុង​​​ករណី​​​ជាច្រើន​​​លោក Polkinghorne បាន​​​លើក​​​ឡើង​​​ថា នៅ​​​ពេល​​​ពល​​​រដ្ឋ​​​ឮអំពី​​​ការ​​​ពន្យល់​​​នៃ​​​កិច្ច​​​ព្រម​​​ព្រៀង​​​នេះ​​​ពួក​​​គាត់​​​បាន​​​ប្រឆាំង​​​ជំទាស់​​​មិន​​​ឲ្យ​​​កិច្ច​​​ព្រម​​​ព្រៀង​​​​​​នេះ​​​មាន​​​ដំណើរ​​​ការ​​​ទៅ​​​មុខ​​​ឡើយ​​​។

លោក​​​បាន​​​មាន​​​ប្រសាសន៍​​​ទាក់​​​ទិន​​​នឹង​​​ការ​​​ព្រួយ​​​បារម្ភ​​​របស់​​​អ្នក​​​ផ្តល់​​​កិច្ច​​​សម្ភាស​​​ម្នាក់​​​ថា “វា​​​មាន​​​រឿង​​​ត្រូវ​​​ព្រួយ​​​បារម្ភ​​​​​​។ យើង​​​​​​បាន​​​ជាក្រ​​​ទៅ​​​ហើយ​​​ អ៊ីចឹង​​​អ្វីដែល​​​យើង​​​ត្រូវ​​​ធ្វើ​​​នោះ​​​គឺ​​​កុំ​​​ឲ្យ​​​កាន់​​​តែ​​​ក្រ​​​ទៅ​​​មុខ​​​ទៀត​​​​​​”៕ ស៊ុយឈាង​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស