39.8 C
Phnom Penh

នគរ​បាល​ដុត​ជម្រក​របស់​សហគមន៍​ជន​ជាតិ​ដើម​ភាគតិច​ក្នុង​ខេត្ត​មណ្ឌលគិរី

ដោយ ឌឹ ខេមបូឌា ដេលី

បទវិភាគ

មន្ត្រី​មូល​ដ្ឋាន​ម្នាក់​បាន​និយាយ​ថា កាល​ពី​ម្សិលមិញ​នគរ​បាល​ខេត្ត​មណ្ឌល​គិរី​បាន​ដុតជម្រក​​ជាង​១៣០​ដែល​​​​ជា​កម្មសិទ្ធិ​របស់​សហគមន៍​​ជនជាតិដើមភាគ​តិច​ព្នង​ ក្នុង​​ស្រុក​កែវសីមា ដែល​អាជ្ញាធរ​ចោទ​​ថា បាន​សាងសង់​ខុស​ច្បាប់លើដី​​របស់ក្រុមហ៊ុន​​ចម្ការ​កៅស៊ូ​វៀតណាម​។

ទោះជាយ៉ាង​ណា អ្នកភូមិជនជាតិ​ដើមភាគ​តិច​ព្នង​ជាង​២០០​គ្រួសារ​អះអាង​ថា ក្រុម​ហ៊ុន Binh Phuoc 1 ដែល​ទទួល​បាន​ដី​សម្បទាន​​ទំហំ​៥.១០០​ហិកតា​នៅ​ក្នុង​តំបន់​នេះ​បាន​រំលោភ​យក​ដី​​ដែល​ពួកគាត់​បាន​ធ្វើ​ស្រែចម្ការ​ច្រើន​ជំនាន់​មក​ហើយ។

លោក យិន សុខឡេង អភិបាល​រង​ស្រុក​បាន​មាន​ប្រសាសន៍​ថា លោក​បាន​ដឹក​នាំ​កម្លាំង​នគរ​បាល​​ និង​កង​រាជអាវុធ​ហត្ថ​ចុះ​ទៅ​​តំបន់​ដែល​មាន​វិវាទ​នោះ​ក្នុង​ឃុំ​ស្រែឈូក​កាលពី​ព្រឹក​ម្សិលមិញ ដើម្បី​ដុត​​ជម្រក​បណ្ដោះ​អាសន្ន​​ចំនួន​១៧២​ ដែល​សាង​សង់​លើ​ផ្ទៃ​ដី​ទំហំ​១.៥០០​ហិកតា​ស្ថិត​នៅ​ក្នុងដី​​សម្បទាន​របស់​ក្រុម​ហ៊ុន​វៀតណាម ប៉ុន្តែ​មុន​ក្រុម​មន្ត្រី​ទាំង​នេះ​ដុត​ជម្រក​ទាំង​នោះ ពួកគេ​​ត្រូវ​បាន​បំភ័យ​ដោយ​កសិករ​ដែល​មាន​កំហឹង​ប្រដាប់​ដោយ​ដំបង​ឈើ​។

លោក សុខឡេង បាន​មាន​ប្រសាសន៍​ថា ” ខ្ញុំ​បាន​ដឹក​នាំ​ក​ម្លាំង​​ទៅ​ដុត​ជម្រក​នោះ ពីព្រោះ​ពួកគាត់​បាន​សាង​សង់​​ខុស​ច្បាប់​លើ​ដី​របស់​ក្រុម​ហ៊ុន​​។ លោក​បាន​បន្ថែម​ថា ជម្រក​១៣៦​ត្រូវ​បាន​បំផ្លាញ​នៅ​ក្នុង​ប្រតិបត្តិការ​នោះ។

លោក ប្រុប ជិប អាយុ​៣៦​ឆ្នាំ ដែល​ជម្រក​របស់​គាត់​ស្ថិត​ក្នុង​ចំណោម​ជម្រក​ដែល​ត្រូវ​បាន​ដុត​បំផ្លាញ​បាន​និយាយ​ថា នគរ​បាល​ និង​កង​រាជអាវុធ​ហត្ថ​ភាគ​ច្រើនបាន​​ការ​ពារ​ក្រុម​កម្មករ​របស់​ក្រុម​ហ៊ុន Binh Phuoc 1 ដែល​បាន​ធ្វើ​ការ​​ដុត​បំផ្លាញ​។

លោក ជិប បាន​និយាយ​ថា ” ក្រុម​ហ៊ុន​បាន​ប្រើ​កម្មករ​ប្រាំមួយ​នាក់ និង​ចាប់​ផ្ដើម​ដុត​បំផ្លាញ​ជម្រក​ពី​ម៉ោង​១១​ព្រឹក​ដល់​ម៉ោង​៥​ល្ងាច ខណៈ​ដែល​នគរ​បាល​ និង​កង​រាជអាវុធ​ហត្ថ​ផ្ដល់​ការ​ការ​ពារ​ដល់​កម្មករ​ទាំង​នោះ”។

លោក​បាន​និយាយ​ថា ” នគរ​បាល​បាន​ព្យាយាម​ដុត​ជម្រក​ដែល​នៅ​សេស​សល់​នៅ​ល្ងាច​ថ្ងៃ​នោះ ប៉ុន្តែ​ពួកគេ​បានឈប់​​បន្ទាប់ពី​អ្នកភូមិ​ប្រហែល​៦០​នាក់​ប្រដាប់​ដោយ​ដំបង​មក​ឃាត់​ពួកគេ​”។ លោក​បាន​បន្ថែម​ថា មិន​មាន​ការ​ប្រើ​អំពើ​ហិង្សា​ទេ ហើយ​ថា​កសិករ​ទាំង​អស់​នឹង​ព្យាយាម​សាង​សង់​ជម្រក​ថ្មី​នៅ​ថ្ងៃ​នេះ​។

លោក ជិប បាន​និយាយ​ថា កាលពី​ឆ្នាំ​២០១២ អាជ្ញាធរ​ឃុំ​​បាន​ផ្ដល់​ដី​មួយ​ក្បាល​ដល់​សហគមន៍​ជនជាតិ​ដើមភាគ​តិច​ព្នង ដើម្បី​ដាំ​ដំឡូង​មី ស្វាយ និង​ចេក។ ក្រោយ​មក​ តំណាង​ក្រុម​ហ៊ុន​ Binh Phuoc 1 បាន​សួរអ្នកភូមិ​ថា តើ​ពួកគេ​អាច​សាង​សង់​ស្ពាន​ដែក​ឆ្លង​ស្ទឹង​ដែល​​កាត់​តាម​ដី​នេះ​ ដើម្បី​ដឹក​ឈើ​តាម​តំបន់​នេះ​បានឬទេ។ សហគមន៍​បាន​យល់ព្រម ប៉ុន្តែ​ផ្ទុយ​ទៅវិញ​​ក្រុម​ហ៊ុន​បាន​​ប្រើ​ស្ពាន​នេះ​​ដើម្បី​យក​គ្រឿង​​​ចក្រ​មក​​រាន​ដី​របស់​ពួកគាត់​ទៅវិញ​។

លោក​​ អ៊ាង ម៉េងលី អ្នក​សម្របសម្រួល​អង្គការ​សិទ្ធិ​មនុស្ស​អាដ​ហុក​ប្រចាំ​ខេត្ត​បាន​មាន​ប្រសាសន៍​ថា រដ្ឋាភិបាល​បាន​​ផ្ដល់​ដី​សម្បទាន​ទំហំ​៥.១០០​ហិកតា​ដល់​ក្រុម​ហ៊ុន Binh Phuoc 1 កាលពី​ដើម​ឆ្នាំ​២០១២ ប៉ុន្តែ​ថា ក្រុម​ហ៊ុន​បាន​​ដំណើរ​ការ​ហួស​ពី​ព្រំប្រទល់​របស់​ខ្លួន​។

លោក ម៉េងលី បាន​មាន​ប្រសាសន៍​ថា គ្រួសារ​អ្នកភូមិ​បាន​ព្យាយាម​សុំ​ជំនួយ​ពី​រដ្ឋាភិបាល និង​ស្ថាប័ន​ពាក់​ព័ន្ធ ប៉ុន្តែ​ពួកគេ​មិន​ដែល​រក​ដំណោះ​ស្រាយ​ដល់​​អ្នកភូមិ​ឡើយ ពីព្រោះ​ពួកគេ​ការ​ពារ​ផល​ប្រយោជន៍​ក្រុម​ហ៊ុន​។

គេ​មិន​អាច​ទាក់​ទង​តំណាង​ក្រុម​ហ៊ុន Binh Phuoc 1 បាន​ឡើយ​៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស