32 C
Phnom Penh

ក្រសួង​អប់រំ​នឹង​ចុះ​ធ្វើអធិការកិច្ច​​នៅតាម​សាលារៀន​ទូទាំង​ប្រទេស ដោយមិន​ប្រកាស​ឲ្យ​ដឹង​មុន​ឡើយ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​អប់រំ​បាន​មាន​ប្រសាសន៍​កាលពីម្សិលមិញ​ថា ក្រសួង​អប់រំ​នឹង​​ចុះ​ធ្វើ​អធិការ​កិច្ច​ចោះៗ​ និង​ដោយ​មិន​ប្រកាស​​​ឲ្យ​ដឹង​ជាមុន​នៅ​តាម​សាលា​រៀន​ទូទាំង​ប្រទេស​ ក្នុង​គោល​បំណងពង្រឹង​ការ​ខិត​ខំ​របស់​ខ្លួនដើម្បី​បោស​សម្អាត​ប្រព័ន្ធ​អប់រំ។

ថ្លែង​នៅ​សិក្ខា​សាលា​មួយ​ស្ដីពី​កំណែទម្រង់​ប្រព័ន្ធ​អប់រំ​នៅ​រដ្ឋសភា លោក ហង់ ជួន ណារ៉ុន រដ្ឋមន្ត្រី​ក្រសួងអប់រំ​បាន​មាន​ប្រសាសន៍​ថា ប្រព័ន្ធ​ធ្វើ​អធិការកិច្ច​ថ្មី​នឹង​ធ្វើ​ឲ្យ​លោក​ដឹង​កាន់​តែ​ច្បាស់​ពី​ស្ថានភាព​ជាក់​ស្ដែង​​កន្លែង​ដែល​អះអាង​ថា មាន​ការ​សូកប៉ាន់ អំពើ​ពុក​រលួយ និង​ការ​បង្រៀន​ក្រោម​ស្តង់ដារ​ជាដើម។

លោក ហង់ ជួន ណារ៉ុន បាន​មាន​ប្រសាសន៍​ថា ” យើង​បាន​ចាប់​ផ្ដើម​អនុវត្ត​កម្មវិធី​មួយ…​គឺ​អ្នក​ធ្វើ​អធិការកិច្ច​នឹង​ចុះ​ទៅ​ដោយ​មិន​ប្រកាស​ឲ្យ​ដឹង​ជាមុន ដើម្បី​ពិនិត្យ​និង​វាយ​តម្លៃ​គ្រូបង្រៀន ដើម្បី​រក​ឲ្យ​ឃើញ​ថា​តើ​ពួកគេ​មាន​សមត្ថភាព​បង្រៀន​ឬអត់​ និង​ថា​តើ​ពួកគេ​មក​បង្រៀន​ទៀងទាត់ឬអត់ និង​រក​ឲ្យ​ឃើញ​ថា​តើ​នាយក​សាលា​មក​ធ្វើ​ការ​ឬអត់​”។

​រដ្ឋមន្ត្រី​ក្រសួង​អប់រំ​មិន​បាន​បង្ហើប​ឲ្យ​ដឹង​ថា តើ​នឹង​ចាប់​ផ្ដើម​ចុះធ្វើ​អធិការកិច្ច​នៅពេល​ណា ឬកន្លែង​ណា​នោះឡើយ ប៉ុន្តែ​ពួកគេ​នឹង​ដោះ​ស្រាយ​បញ្ហា​ជាច្រើន​ដែល​អ្នក​ចូល​រួម​បាន​​លើក​ឡើង​នៅ​សិក្ខាសាលា​កាលពី​ម្សិលមិញ។

លោក​បាន​មាន​ប្រសាសន៍​ថា ” ការ​ចុះ​ធ្វើ​អធិការកិច្ច​របស់​យើង​ក្នុងគោល​​បំណង​ពិនិត្យ​មើល​ឲ្យ​បាន​លម្អិត​នៅ​តាម​សាលា​រៀន​នីមួយៗ និង​​ដើម្បី​ដោះ​ស្រាយ​បញ្ហា​ពិត​ប្រាកដ​”។

អំឡុង​រលកនៃសកម្មភាព​នយោបាយ​​បន្ទាប់ពី​ការ​បោះ​ឆ្នោត​ជាតិ​ឆ្នាំ​២០១៣ សមាគម​គ្រូបង្រៀន​ធំបំផុត​ក្នុង​ប្រទេស​កម្ពុជា​បាន​ទាម​ទារ​ដំឡើង​ប្រាក់​ខែ ហើយ​បាន​គំរាម​ធ្វើ​ការ​តវា៉​នៅ​តាម​ផ្លូវ។ ទោះជាយ៉ាង​ណា កាលពី​ខែ​សីហា​ឆ្នាំ​មុន លោក​នាយក​រដ្ឋមន្ត្រី ហ៊ុន សែន បាន​ប្រកាស​​ដំឡើង​ប្រាក់​ខែ​គោល​ដល់គ្រូបង្រៀនទូទាំង​ប្រទេស​ ពី​១០៥​ដុល្លារ​ដល់​១៣៨​ដុល្លារ​ក្នុង​​បី​ដំណាក់​កាល ដែល​ដំណាក់​កាល​ចុង​ក្រោយ​គ្រោង​ចូល​ជា​ធរមាន​នៅ​ថ្ងៃ​នេះ​​។

នៅ​សិក្ខាសាលា​កាលពី​ម្សិលមិញ លោក ហង់​ ជួន ណារ៉ុន ដែល​បានគាំទ្រ​ការ​ដំឡើង​ប្រាក់​ខែ​គ្រូបង្រៀន​បាន​មាន​ប្រសាសន៍​ថា វា​ដល់​ពេល​ដែល​គ្រូបង្រៀន​​បញ្ចប់​ការ​តថ្លៃ​ហើយ។

លោក​រដ្ឋមន្ត្រី​បាន​មាន​ប្រសាសន៍​ថា ” ទី១​យើង​បាន​ទាម​ទារ​ប្រាក់​ខែ​សមរម្យ ឥឡូវ​នេះ​ពួកគេ​មាន​ហើយ ជំហានទី២​គឺ​យើង​ត្រូវ​ជំរុញ​ឲ្យ​មាន​អាកប្បកិរិយា​ ក្រម​សីលធម៌ និង​វិន័យ​សមរម្យ​ក្នុង​ចំណោម​គ្រូបង្រៀន​”។

លោក ហង់​ ជួន ណារ៉ុន ដែល​កាលពី​ឆ្នាំ​មុន​បាន​ផ្ដួច​ផ្ដើម​គំនិត​ឲ្យ​មាន​ការ​ផ្លាស់​ប្ដូរ​ការ​ប្រឡង​សញ្ញាបត្រ​មធ្យម​សិក្សា​ទុតិយភូមិ​ទូទាំង​ប្រទេស​​ដែលធ្លាប់​ញាំញី​ដោយ​ការ​សូក​ប៉ាន់​នោះ​ក៏​បាន​ប្រកាសពី​ការ​ចាប់​ផ្ដើម​ប្រើ​ប្រព័ន្ធ​ថ្មី​មួយ​ ដែល​នឹង​ផ្ដល់​រង្វាន់​លើក​ទឹក​ចិត្ត​​ដល់​គ្រូបង្រៀន​ផ្អែក​តាម​ការ​វាយ​តម្លៃ​ពី​សមត្ថភាព និង​សុចរិត​ភាព​។

លោក​បានមាន​ប្រសាសន៍​ថា ” យើង​នឹង​ពិនិត្យ​​មើល​គ្រូបង្រៀនទាំង​នោះ ហើយ​​គ្រូបង្រៀន​ណា​ដែល​បង្រៀន​បាន​ល្អ​នឹង​ត្រូវ​ទទួល​បាន​រង្វាន់។ ជា​មួយ​គ្នា​នេះ​ដែរ​ យើង​អាច​ដោះស្រាយ​បញ្ហា​គ្រូបង្រៀន​ដែល​យក​លុយ​ជា​សំណូក​ពីសិស្ស​”។

យោង​តាម​រដ្ឋមន្ត្រី​រូប​នេះ​បាន​ឲ្យ​ដឹង​ថា បញ្ហា​មួយ​ដែល​​នឹង​ត្រូវ​ដោះស្រាយ​នៅ​ក្នុង​ការ​ចុះ​ធ្វើ​អធិការកិច្ច​ចោះៗ​នោះ គឺ​អនុបាត​គ្រូបង្រៀន​-​សិស្ស​នៅ​តាម​សាលា​រៀន​។លោក​បាន​មាន​ប្រសាសន៍ថា របាយ​​កុមារ​កំពុង​ផ្លាស់​ប្តូរ​ជាមួយ​នឹង​ការ​អភិវឌ្ឍរាជ​ធានី​ភ្នំពេញ​ដ៏ឆាប់​រហ័សធ្វើ​ឲ្យ​គ្រឹះស្ថាន​មួយ​ចំនួន​មាន​សិស្ស​​ច្រើន​ហួស​ ហើយ​គ្រឹះស្ថាន​​ផ្សេង​ទៀត​​​ប្រឹង​ប្រែង​បំពេញ​បំណង​សិស្ស​របស់ខ្លួន។​​

លោក​បាន​មាន​ប្រសាសន៍​ថា “ប្រជា​ពល​រដ្ឋរស់​នៅ​ក្នុង​រាជធានី​ដឹង​​ថា ​ដី​របស់​ខ្លួន​មាន​​តម្លៃ​ជាង​ពីមុន ដូច្នេះ​ពួក​គាត់​លក់​ដី​ហើយ​ផ្លាស់​​ទៅ​រស់​នៅ​ជាយ​ក្រុង” ដោយ​លោក​ពន្យល់​ថា វិទ្យាល័យ​ ជា ស៊ីម សន្ធរម៉ុក មាន​សិស្ស​ថយ​ចុះ​ពី​១០.០០០​នាក់​មក​​ប្រហែល​៥.០០០​នាក់​។ នៅ​ក្នុង​រាជធានី​ភ្នំពេញ​ឥឡូវ​នេះ​មាន​គ្រូបង្រៀន​ប្រហែល​១.០០០​នាក់​។

លោក រ៉ុង ឈុន អ្នក​រិះគន់​រដ្ឋាភិបាល​ឥត​សំចៃ និង​ជា​ប្រធាន​សមាគម​គ្រូបង្រៀន​កម្ពុជា​ឯករាជ្យ ដែល​បាន​ដឹក​នាំ​​ការ​ទាម​ទារ​ដំឡើង​ប្រាក់​ខែ​ដល់​គ្រូបង្រៀន​បាន​មាន​ប្រសាសន៍​ថា ការ​ចុះ​ធ្វើ​អធិការកិច្ច​ថ្មី​នេះគឺ​ជាការ​បិទបាំង​។

លោក​ រ៉ុង ឈុន បាន​មាន​ប្រសាសន៍​ថា ” ក្រុម​អធិការកិច្ច​​ដែល​នឹង​ចុះ​ទៅ​ពិនិត្យ​​​​មើល​នោះ ​​​នឹង​មិន​ដោះ​ស្រាយ​បញ្ហា​អ្វី​​ឡើយ​។ លោក​ ហង់ ជួន ណារ៉ុន ចេះ​តែ​លើក​ឡើង​​ពីបញ្ហា​ទាំង​នេះ​ឲ្យ​អ្នក​ស្ដាប់​​ឃើញ​ថា​ល្អ​តែ​ប៉ុណ្ណោះ។ គំនិត​ដែ​ល​គាត់​លើក​ឡើង​គឺ​ល្អ​ណាស់ ប៉ុន្តែ​វានឹងមិន​​ជោគជ័យ​ទេ ពីព្រោះ​ក្រសួង​មិនឯករាជ្យ​”។

ទោះ​ជា​យ៉ាង​ណា លោក យ៉ែម បុញ្ញឫទ្ធិ សមាជិក​សភា​​គណបក្ស​សង្គ្រោះជាតិ ដែល​ជា​ប្រធាន​គណៈកម្មការ​អប់រំ​នៃ​រដ្ឋ​សភា ដែល​បាន​រៀបចំ​សិក្ខាសាលា​កាលពី​ម្សិលមិញ បាន​មាន​ប្រសាសន៍​ថា ប្រព័ន្ធ​អធិការកិច្ច​ថ្មី​ដែល​ដឹកនាំ​ដោយ​ក្រសួង​ជា​ជាង​មន្ត្រី​ខេត្ត​នោះ មិន​បាន​ធ្វើ​យូរ​មក​​​ហើយ។

លោក​បាន​មាន​ប្រសាសន៍​ថា ” យើង​បាន​ចុះទៅ​ពិនិត្យ​​មន្ទីរ​អប់រំ​ក្នុង​ខេត្ត​កំពត ហើយ​បាន​រក​ឃើញ​ថា អ្នក​ធ្វើ​អធិការកិច្ច​ខេត្ត​ម្នាក់បាន​ចូល​និវត្ត​ មិន​មាន​នរណា​ម្នាក់​ជំនួស​គាត់​ទេ​​រយៈពេល​ពីរឆ្នាំ”។

លោក​បាន​មាន​ប្រសាសន៍​ថា ” នេះ​មាន​ន័យ​ថា រយៈ​ពេល​២​ឆ្នាំ​មានតែការ​ធ្វើ​អធិការកិច្ច​​ផ្ទៃ​ក្នុង​ដោយ​នាយក​សាលា​តែ​ប៉ុណ្ណោះ ដែល​មិន​អាច​ជឿទុក​ចិត្ត​បាន​ ពីព្រោះ​នាយក​សាលា​ទាំង​នោះ​គ្មាន​បំណងវាយ​តម្លៃ​​​សាលា​របស់​ខ្លួន​អន់​នោះ​ទេ។ ប្រព័ន្ធ​ថ្មី​នេះ​នឹង​មិន​បណ្ដោយ​ឲ្យ​មាន​បញ្ហា​បែប​នោះ​ឡើយ​”៕ សារុន​​​

​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស