28 C
Phnom Penh

គណៈប្រតិភូ​របស់​លោក​ស្រី មីសែល អូបាម៉ា ចំណាយ​ប្រាក់​ជិត២៥០.០០០​ដុល្លារ​លើ​ការ​ស្នាក់​នៅ

ដោយ ឌឹ ខេមបូឌា ដេលី

បទវិភាគ

យោងតាម​ឯកសារ​​នៃ​កិច្ចសន្យា​រដ្ឋាភិបាល​អាមេរិក​ចេញ​នៅ​សប្តាហ៍​នេះ​បាន​ឲ្យ​ដឹង​ថា ការ​ស្នាក់​នៅ​របស់​លោក​ស្រី មីសែល អូបាម៉ា ស្ត្រី​ទី​១​សហរដ្ឋ​អាមេរិក​នៅ​សណ្ឋាគារ សូហ្វីតែល អង្គរ ភូគិត្រា អំឡុង​ដំណើរ​ទស្សនកិច្ច​រយៈ​ពេល​ពីរ​ថ្ងៃ​របស់​លោក​ស្រី​នៅ​ខេត្ត​សៀមរាប ដើម្បី​ជំរុញ​គំនិត​ផ្តួចផ្តើម “ឲ្យ​ក្មេង​ស្រី​រៀន” កាលពី​ចុង​សប្តាហ៍​មុន បាន​ចំណាយ​ប្រាក់​អ្នក​បង់​ពន្ធ​ជិត​២៥០.០០០​ដុល្លារ។

យោងតាម​ឯកសារ​បង្ហោះ​លើ​វិបសាយ​ឱកាស​ជំនួញ​សហព័ន្ធ​បាន​ឲ្យ​ដឹង​ថា គណៈប្រតិភូ​មន្ត្រី​អាមេរិក សមាជិក​សេវា​សម្ងាត់ និង​បុគ្គលិក​ភ័ស្តុភារ បាន​ជួល​៨៥​បន្ទប់ និង​៥​បន្ទប់​ដេក​ធំៗ​ក្នុង​សណ្ឋាគារ​ផ្កាយ​៥​សម្រាប់​រយៈ​ពេល​ពីរ​សប្តាហ៍ ព្រម​ទាំង​បន្ទប់​ការិយាល័យ​៥ និង​បន្ទប់​សន្និសីទ​មួយ។

យោងតាម​កិច្ចសន្យា​នេះ តាម​ការ​អះអាង​បញ្ជាក់​នៅ​នាទី​ចុងក្រោយ​អំពី​ទស្សនកិច្ច​របស់​លោក​ស្រី អូបាម៉ា ​របស់​ក្រសួង​ការបរទេស​អាមេរិក វិក្កយបត្រ​អស់​ចំនួន​ទឹក​ប្រាក់​សរុប​២៤២.៥០០​ដុល្លារ។

ស្ត្រីទី១​សហរដ្ឋ​អាមេរិក​បាន​ធ្វើ​ដំណើរ​មក​ដល់​ក្រុង​សៀមរាប​កាលពី​ល្ងាច​ថ្ងៃ​ទី​២១​ខែ​មីនា បន្ទាប់ពី​ការ​ធ្វើ​ទស្សនកិច្ច​រយៈ​ពេល​បី​ថ្ងៃ​នៅ​ប្រទេស​ជប៉ុន​ដើម្បី​ផ្សព្វ​ផ្សាយ​គំនិត​ផ្តួចផ្តើម​ដូចគ្នា​នេះ ដែល​លើក​កម្ពស់​ការ​ផ្តល់​អំណាច​ដល់​ក្មេង​ស្រី​តាម​រយៈ​ការ​អប់រំ​បន្ថែម។

ការ​ធ្វើ​ដំណើរ​ជើង​ទី​១​របស់​លោក​ស្រី​ក៏​បាន​ធ្វើ​ឲ្យ​មាន​ការ​ភ្ញាក់ផ្អើល​ផងដែរ ពេល​ដែល​គេ​បាន​បញ្ចេញ​ឲ្យ​ដឹង​ថា ការ​ធ្វើ​ទស្សនកិច្ច​របស់​លោក​ស្រី​ទៅ​កាន់​វត្ត​មួយ​ក្នុង​ក្រុង​តូក្យូ បាន​ចំណាយ​ប្រាក់​អ្នក​បង់​ពន្ធ​ជិត​៨០.០០០​ដុល្លារ​លើថ្លៃ​ឈ្នួល​រថយន្ត​លីម៉ូហ្សីន។

ឌឹ វ៉ាស៊ីនតោន ហ្វ្រី ប៊ីខុន ជា​កាសែត​តាម​អីុនធឺណិត​ដែល​បាន​រាយការណ៍​ដំបូង​អំពី​តួលេខ​នេះ ក៏​បាន​កត់​សម្គាល់​ខ្លីៗ​នូវ​សកម្មភាព​របស់​លោក​ស្រី​មួយ​លើកៗ​ក្នុង​ខេត្ត​សៀមរាប គឺ​សុន្ទរកថា​ពីរ​លើក រយៈ​ពេល​សរុប​ជាង​កន្លះ​ម៉ោង ការ​ធ្វើ​ទស្សន​កិច្ច​២១​នាទី​ដើម្បី​ជួប​សិស្ស​វិទ្យាល័យ និង​ការ​ដើរ​លំហែ​នា​ពេល​រសៀល​នៅ​តាម​ឧទ្យាន​បុរាណ​ប្រាសាទ​អង្គរវត្ត។

លោក ចេ រ៉ាម៉ាន អ្នក​នាំពាក្យ​ស្ថានទូត​អាមេរិក​ប្រចាំ​ក្រុង​ភ្នំពេញ បាន​បដិសេធ​មិន​ធ្វើ​អត្ថាធិប្បាយ​លើ​ការ​ចំណាយ​នេះ​ទេ។ ក្រុម​អ្នក​គ្រប់គ្រង​នៅ​សណ្ឋាគារ​សូហ្វីតែល​អង្គរ​ក៏​មិន​បានធ្វើ​អត្ថាធិប្បាយ​ដែរ។

ក្នុង​ពេល​ប៉ុន្មាន​ថ្ងៃ​បន្ទាប់ពី​ទស្សនកិច្ច​របស់​លោក​ស្រី អូបាម៉ា នោះ លោក​នាយក​រដ្ឋ​មន្ត្រី ហ៊ុន សែន បាន​រិះគន់​អាមេរិក ព្រោះ​មិន​បាន​គាំទ្រ​សារ​របស់​ខ្លួន​នៃ​ការ​ផ្តល់​អំណាច​ឲ្យ​ក្មេងស្រី​តាម​រយៈ​ការ​អប់រំ ដោយការ​ផ្តល់​មូលនិធិ​សម្រាប់​អាហារូបករណ៍​ដែល​នឹង​អាច​ឲ្យ​ពួកគេ​ចូលរៀន​នៅ​សាកល​វិទ្យាល័យ៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស