31 C
Phnom Penh

សាលា​រាជធានី​​ហាម​ឃាត់​​ការ​តវ៉ា​ប្រឆាំង​ការ​​​ទទួល​ទាន​សាច់​ឆ្កែ

ដោយ ឌឹ ខេមបូឌា ដេលី

បទវិភាគ

ផែន​ការ​​តវ៉ា​ប្រឆាំង​នឹង​ការ​ទទួល​ទាន​សាច់​ឆ្កែ​​​ត្រូវ​បាន​ហាម​ឃាត់​ មុន​ពេល​ការ​តវ៉ា​នេះ​​ចាប់​ផ្ដើម​នៅ​ក្នុង​រាជធានី​ភ្នំពេញ​កាលពី​ម្សិលមិញ បន្ទាប់ពី​អាជ្ញាធរ​រាជធានី​បាន​លើក​ឡើង​ថា ក្រុម​អ្នក​តវ៉ា​គ្មាន​ការ​អនុញ្ញាត​ឲ្យ​ជួបជុំគ្នា​។

សាលា​ក្រុង​ហាម​ឃាត់​ផែន​ការ​​តវ៉ា​ប្រឆាំង​នឹង​ការ​ទទួល​ទាន​សាច់​ឆ្កែ​​​នៅ​ក្នុង​រាជធានី​ភ្នំពេញ​កាលពី​ម្សិលមិញ ។
សាលា​ក្រុង​ហាម​ឃាត់​ផែន​ការ​​តវ៉ា​ប្រឆាំង​នឹង​ការ​ទទួល​ទាន​សាច់​ឆ្កែ​​​នៅ​ក្នុង​រាជធានី​ភ្នំពេញ​កាលពី​ម្សិលមិញ ។

មនុស្ស​ជាង​៣០​នាក់ និង​សត្វ​សុនខ​​ក្នុង​ចំនួន​ប្រហែល​៣០​ក្បាល​ដែរ​បាន​មក​ជួបជុំគ្នា​​ក្បែរ​វិមាន​ឯករាជ្យ​​នៅ​ក្នុង​សួន​នាគ​បាញ់​ទឹក ដើម្បី​ចូល​រួម​នៅ​ក្នុង​ព្រឹត្តិការណ៍​ទូទាំង​ពិភព​លោក​។

អ្នក​តវ៉ា​ម្នាក់​ឈ្មោះ Mary Velasco អាយុ​២៩​ឆ្នាំ ជា​គ្រូបង្រៀន​មកពី​ប្រទេស​ហ្វីលីពីន និង​ជា​អ្នក​រៀបចំ​ម្នាក់​ក្នុង​ចំណោម​អ្នក​រៀបចំ​ការ​តវ៉ា​ផ្សេងៗ​ទៀត​បាន​និយាយ​ថា ​”គោលដៅ​នៃ​ព្រឹត្តិការណ៍​នេះ​ ដំបូង​​គឺ​ដើម្បី​​លើក​កម្ពស់​ការ​យល់​ដឹង​ប្រឆាំង​នឹង​​ការ​ជួញដូរ​សាច់​សត្វ​ចិញ្ចឹម”។

ប៉ុន្តែ​មុន​ពេល​ផែន​ការ​​តវ៉ា​ដែល​ត្រូវ​​ដឹក​សុនខ​ដើរ​ជុំវិញ​សួន​​​ចាប់​ផ្ដើម សន្តិសុខ​ប្រហែល​១០នាក់ កង​រាជអាវុធ​ហត្ថ​មួយ​ចំនួន និង​អាជ្ញាធរ​ខណ្ឌ​បាន​ប្រាប់​ក្រុម​អ្នក​តវ៉ា​ថា សាលា​រាជធានី​បាន​ចេញ​បទ​បញ្ជា​​ឲ្យ​បញ្ឈប់​​តវ៉ា​នេះ។

អ្នកស្រី​ Velasco បាន​​ប្រាប់​អ្នក​មក​ជួប​ជុំគ្នា​ដែល​ភាគច្រើន​ជា​ជន​បរទេស​ថា “នគរ​បាល​​បាន​ប្រាប់​កុំ​ឲ្យ​ធ្វើ​ការ​តវ៉ា​។ យើង​ត្រូវ​តែ​បំបែក​​គ្នា​”។

​បន្ទាប់​មក នគរបាល​ និង​សន្តិសុខ​បាន​ប្រាប់​អ្នក​ចូល​រួម​ថា ពួកគេ​អាច​​ប្ដូរ​ទៅ​កាន់​សួន​មួយ​ផ្សេងទៀត​ដែល​នៅ​តាម​បណ្ដោយ​មហាវិថី​សុធារសក្នុង​ខណ្ឌចំការមន ប៉ុន្តែ​ពួកគេ​ត្រូវ​បាន​​ប្រាប់​ឲ្យ​បំបែក​គ្នា​ម្ដង​ទៀត​​​ភ្លាម​ៗ​បន្ទាប់ពី​​ជួប​ជុំគ្នា​សារ​ជា​ថ្មី​។

លោក ប៊ុន សុភ័ក្ត្រ អភិបាល​រង​ខណ្ឌចំការមន​បាន​លើក​ឡើង​ថា លោក​គាំទ្រ​ការ​តវ៉ា​របស់​ក្រុម​នេះ ប៉ុន្តែ​ថា អ្នក​រៀបចំ​ការ​តវ៉ា​មិន​ទទួល​បាន​ការ​អនុញ្ញាត​ពី​សាលា​រាជធានី​ឡើយ។

ពេល​ទាក់​ទង​តាម​ក្រោយ​នៅ​ថ្ងៃដដែល លោក ឡុង ឌីម៉ង់ អ្នក​នាំពាក្យ​សាលា​រាជធានី​បាន​លើក​ឡើង​ថា សាលា​រាជធានី​បាន​ច្រាន​ចោល​​សំណើ​របស់​ក្រុម​នេះ​ ព្រោះ​ផែន​ការ​​ដឹក​សុនខ​​ក្នុង​ទ្រង់ទ្រាយ​ធំ​របស់​ពួកគេ គឺ​”ចម្លែក”។

លោក ឡុង ឌីម៉ង់ បាន​មាន​ប្រសាសន៍​ថា “យើង​មិន​បណ្ដោយ​ឲ្យ​ពួកគេ​ធ្វើ​រឿង​ប្លែក​ៗ​បែប​នេះឡើយ​។ ពួកគេ​គឺ​ជា​ជន​បរទេស​ដែល​ចង់​ហែក្បួន​ឆ្កែ។ វា​មិន​ត្រឹម​ត្រូវ​ទេ”។

កាលពី​ឆ្នាំ​២០០៣ សាលា​រាជធានី​បាន​លើក​ទឹក​ចិត្ត​​ឲ្យ​អ្នក​​រស់​នៅ​ក្នុង​រាជធានី​ភ្នំពេញ​ទទួល​ទាន​សាច់​ឆ្កែ​ឲ្យ​បាន​ច្រើន​ ដើម្បី​កាត់​បន្ថយ​ចំនួន​សុនខ​នៅ​ក្នុង​រាជធានី​ និង​ដើម្បី​ចិញ្ចឹម​អ្នកក្រីក្រ​។

លោក កែម ជុតិម៉ា អតីត​អភិបាល​រាជធានី​​បាន​មាន​ប្រសាសន៍​​កាលពី​​ពេល​នោះ​ថា ” សូម​អញ្ជើញ ​សាច់​ឆ្កែ​មាន​រស់​ជាតិ​ឆ្ងាញ់​ណាស់”។

លោក ជា សុខា សមាជិក​នៃ​ក្រុម​តវ៉ា​នេះ​​ដែល​ទទួល​​ខុស​ត្រូវ​ក្នុងការ​ជូន​ដំណឹង​ដល់​សាលា​រាជធានី​អំពី​ការ​តវ៉ា​កាលពី​ម្សិលមិញ​នេះ បាន​លើក​ឡើង​តាមរយៈទូរស័ព្ទ​ថា ទោះបី​ជា​សាលា​រាជធានី​មិន​បាន​អនុញ្ញាត​ឲ្យ​មាន​ការ​តវ៉ា​ក៏ដោយ តែ​លោក​មិន​បាន​ជូន​ដំណឹង​ដល់​​អ្នក​រៀបចំ​ការ​តវ៉ា​ផ្សេងៗ​ទៀត​ទេ ព្រោះ​លោក​គិត​ថា ពួកគេ​នៅ​តែ​មាន​សិទ្ធិ​ជួបជុំគ្នា។

លោក សុខា បាន​​និយាយ​ថា “ពលរដ្ឋ​អាច​ជួបជុំគ្នា​ពិភាក្សា​ និង​បង្ហាញ​ពី​មតិ​យោបល់​របស់​ខ្លួន ​ប្រសិន​បើ​ការ​តវ៉ា​ធ្វើ​ឡើង​ដោយ​សន្តិវិធី​។ អ៊ីចឹង​តើ​ពួកគេ​ច្រាន​ចោល​​​ការ​តវ៉ា​នេះ​ដោយ​ផ្អែក​លើ​ហេតុ​ផល​អ្វីទៅ? ពួកគេ​និយាយ​ថា ខ្លួន​គ្មាន​ហេតុ​ផលណាមួយ​ឡើយ​”។

យោង​តាម​ច្បាប់​ស្ដីពី​ការ​ជួបជុំគ្នា​ដោយ​អហិង្សា​ ក្រុម​អ្នក​តវ៉ា​អាច​ធ្វើ​ការ​តវ៉ា​បាន​​លុះត្រា​តែពួកគេ​ជូន​ដំណឹង​ដល់​សាលា​រាជធានី​ ឬ​អាជ្ញាធរ​ខេត្ត​​មុន​យ៉ាង​តិច៥ថ្ងៃ​​ ហើយ​ការ​តវ៉ា​មិន​ត្រូវ​ធ្វើ​ឲ្យ​ប៉ះពាល់​ដល់​សន្តិសុខ​សាធារណៈឡើយ៕ ស៊ុយឈាង​ (រាយការណ៍​បន្ថែម​ដោយ ហ៊ុល រស្មី)​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស