លោក កុយ គួង អ្នកនាំពាក្យក្រសួងការបរទេសបានឲ្យដឹងកាលពីម្សិលមិញថា ខណៈប្រទេសយេម៉ែន នៅតែបន្តធ្លាក់ចូលក្នុងអំពើហិង្សា និងភាពច្របូកច្របល់ មន្ត្រីកម្ពុជាកំពុងព្យាយាមដើម្បីជម្លៀសនិស្សិតខ្មែរចំនួនប្រាំបីនាក់ ដែលកំពុងសិក្សានៅទីនោះ និងដើម្បីបញ្ជូនពួកគេត្រឡប់មកវិញ។
លោក កុយ គួង បានលើកឡើងថា ស្ថានទូតកម្ពុជាប្រចាំប្រទេសគុយវ៉ែត កំពុងសហការជាមួយស្ថានទូតម៉ាឡេស៊ីប្រចាំប្រទេសយេម៉ែន ដើម្បីជម្លៀសនិស្សិតទាំងនេះចេញពីប្រទេសដែលកំពុងមានភាពច្របូកច្របល់ផ្នែកសាសនាមួយនេះ។
លោក កុយ គួង បានមានប្រសាសន៍ថា ” ថ្មីៗនេះ យើងបានសហការជាមួយស្ថានទូតម៉ាឡេស៊ីប្រចាំប្រទេសយេម៉ែន ហើយជំហានដំបូងយើងបានរកឃើញនិស្សិតចំនួនប្រាំបីនាក់រស់នៅក្នុងតំបន់មួយដែលយើងគិតថាគ្មានសុវត្ថិភាព។ យើងនឹងបន្តស្វែងរកអ្នកផ្សេងៗទៀត”។
លោក កុយ គួង បានលើកឡើងបន្តថា និស្សិតទាំងនេះដែលជាខ្មែរអុីស្លាមត្រូវបានជម្លៀសទៅកន្លែងមានសុវត្ថិភាពនៅក្នុងប្រទេសយេម៉ែនហើយ ប៉ុន្តែថា លោកមិនបានដឹងអំពីទីតាំងនោះឡើយ។
លោកបានមានប្រសាសន៍បន្ថែមថា ” គេនឹងជូនដំណឹងមកខ្ញុំនៅពេលពួកគេមកដល់កម្ពុជា”។
លោក អូស្មាន់ ហាសាន់ រដ្ឋលេខាធិការក្រសួងការងារ និងជាសមាជិកដ៏លេចធ្លោមួយរូបនៅក្នុងសហគមន៍ខ្មែរអុីស្លាមនៅកម្ពុជាបានលើកឡើងថា អាចនៅមាននិស្សិតខ្មែរអុីស្លាមជាច្រើននាក់ទៀតនៅក្នុងប្រទេសយេម៉ែន ប៉ុន្តែថា លោកគ្មានព័ត៌មានគ្រប់គ្រាន់ដើម្បីបញ្ជាក់ឲ្យបានកាន់តែច្បាស់នោះទេ។
លោកបានមានប្រសាសន៍ថា ” ឥឡូវនេះ យើងកំពុងតែធ្វើការលើរឿងនេះ និងកំពុងព្យាយាមស្វែងរកព័ត៌មានបន្ថែមទៀត”។
លោក វ៉ាន់ ម៉ាត់ ប្រធានសមាគមខ្មែរអុីស្លាមបានលើកឡើងថា អគ្គលេខាធិការនៃសម្ព័ន្ធមូស្លីមពិភពលោក ដែលបានមករាជធានីភ្នំពេញកាលពីថ្ងៃព្រហស្បតិ៍ សម្រាប់សន្និសីទមួយស្ដីពីសាសនាបានប្រាប់លោកអំពីនិស្សិតទាំងនេះអំឡុងសន្និសីទ។
លោក វ៉ាន់ ម៉ាត់ បានលើកឡើងថា លោក Abdullah bin Abdulmohsen Al-Turki អគ្គលេខាធិការនៃសម្ព័ន្ធមូស្លីមពិភពលោកនេះបានប្រាប់លោកថា និស្សិតទាំងប្រាំបីនាក់នេះកំពុងសិក្សានៅក្នុងរដ្ឋធានីសាណា ប្រទេសយេម៉ែន ប៉ុន្តែត្រូវបានជម្លៀសខ្លួនបន្ទាប់ពីសម្ព័ន្ធមិត្តដឹកនាំដោយប្រទេសអារ៉ាប៊ី សាអូឌីត ចាប់ផ្ដើមទម្លាក់គ្រាប់លើរដ្ឋធានីមួយនេះ។
លោក វ៉ាន់ ម៉ាត់ បានមានប្រសាសន៍ថា ” ខ្ញុំគ្មានព័ត៌មានច្រើនអំពីពួកគេឡើយ។ ពួកគេទាំងអស់បានចាកចេញពីប្រទេសម៉ាឡេស៊ី និងថៃ ដើម្បីបន្តការសិក្សានៅទីនោះ ហើយការសិក្សារបស់ពួកគេគឺផ្ដោតលើសាសនា”។
លោក វ៉ាន់ ម៉ាត់ បានលើកឡើងទៀតថា គេបានប្រាប់លោកថា ស្ថានទូតម៉ាឡេស៊ីបានយកពួកគេទៅទុកនៅកន្លែងមានសុវត្ថិភាពហើយ ហើយកំពុងរៀបចំបញ្ជូនពួកគេត្រឡប់មកកម្ពុជាវិញ។
លោកបានមានប្រសាសន៍បន្ថែមថា ” យើងមិនដឹងថា ពួកគេនៅកន្លែងណាឡើយឥឡូវនេះ ហើយយើងកំពុងតែរង់ចាំព័ត៌មានពីម៉ាឡេស៊ី”។
លោក វ៉ាន់ ម៉ាត់ ក៏បានលើកឡើងបន្ថែមទៀតផងដែរថា លោកមិនដឹងថា តើមានខ្មែរអុីស្លាមប៉ុន្មាននាក់កំពុងសិក្សានៅក្នុងប្រទេសយេម៉ែនឡើយ ហើយថា គ្មានសមាជិកគ្រួសារណាមួយនៃនិស្សិតទាំងនោះបានទាក់ទងមកអង្គការរបស់លោកទេ។
លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានលើកឡើងថា លោកដឹងអំពីប្រតិបត្តិការជួយសង្គ្រោះនិស្សិតទាំងប្រាំបីនាក់នេះ ហើយថា ក្រុមការងារមកពីក្រសួងរបស់លោកកំពុងតែធ្វើការជាមួយក្រសួងការបរទេស ដើម្បីស្វែងរកព័ត៌មានបន្ថែមអំពីពួកគេ។
លោកបានមានប្រសាសន៍ថា ” មកទល់ពេលនេះ យើងនៅមិនទាន់ទទួលបានព័ត៌មានច្រើននៅឡើយទេ ហើយក្រុមការងាររបស់យើងកំពុងតែធ្វើការលើរឿងនេះ”។
កាលពីឆ្នាំមុន ក្រុមសកម្មប្រយុទ្ធ Houthis ជាជនជាតិភាគតិចកាន់សាសនាអុីស្លាមនិកាយស៊ីអុីតក្នុងប្រទេសយេម៉ែន បានវាយដណ្ដើមយកតំបន់មួយភាគធំនៅភាគខាងជើងប្រទេសនេះ រួមទាំងរដ្ឋធានីសាណាផងដែរ។ ចាប់តាំងពីពេលនោះមក ក្រុមអុីស្លាមជ្រុលនិយមមួយនេះ និងក្រុមអាល់កៃដា បានធ្វើការវាយប្រហារជាបន្តបន្ទាប់នៅក្នុងប្រទេសយេម៉ែននេះ ដែលបណ្ដាលឲ្យពលរដ្ឋស៊ីវិលរាប់រយនាក់បាត់បង់ជីវិត។
កាលពីខែមុន សម្ព័ន្ធមិត្តដឹកនាំដោយប្រទេសអារ៉ាប៊ី សាអូឌីត បានចាប់ផ្ដើមបើកការវាយប្រហារតាមផ្លូវអាកាស ដោយផ្ដោតគោលដៅលើទីតាំងរបស់ក្រុមសកម្មប្រយុទ្ធ Houthis ដែលភាគច្រើនស្ថិតនៅក្នុងរដ្ឋធានីសាណា៕ ស៊ុយឈាង