ស្រុកលើកដែក, ខេត្តកណ្ដាល-រថយន្តទំនើបៗជាង៨០គ្រឿងដែលដឹកសុទ្ធតែថ្នាក់ដឹកនាំ មន្ត្រីអ្នកមុខអ្នកការ និងកងការពារសន្តិសុខបានធ្វើដំណើរជាលើកដំបូងឆ្លងកាត់ស្ពានដ៏វែងជាងគេ និងថ្មីជាងគេនៅក្នុងប្រទេសកម្ពុជាកាលពីម្សិលមិញ មុនពេលវាត្រូវបានបើកសម្រាប់ពលរដ្ឋឆ្លងកាត់ដោយធ្វើឲ្យមានការកកស្ទះចរាចរណ៍ជាលើកដំបូងភ្លាមៗ។
ស្ពានត្សឹបាសា ប្រវែង២,២គីឡូម៉ែត្រ ដែលត្រូវបានសាងសង់អស់ទឹកប្រាក់ចំនួន១២៧លានដុល្លារក្រោមជំនួយឥតសំណងរបស់ជប៉ុនត្រូវបានសម្ពោធឲ្យប្រើប្រាស់ជាផ្លូវការដោយលោកនាយករដ្ឋមន្ត្រី ហ៊ុន សែន កាលពីព្រឹកម្សិលមិញ។ ដោយកាត់ទន្លេមេគង្គ ស្ពាននេះនឹងភ្ជាប់ រាជធានីភ្នំពេញទៅនឹងខេត្តស្វាយរៀង និងខេត្តព្រៃវែង ព្រមទាំងប្រទេសវៀតណាមផងដែរ។
ពេលថ្លែងទៅកាន់មនុស្សជាង៨.០០០នាក់ដែលប្រមូលផ្ដុំគ្នាក្បែរស្ពាន លោកនាយករដ្ឋមន្ត្រី ហ៊ុន សែន បានគូសបញ្ជាក់ពីនាយករដ្ឋមន្ត្រីនីមួយៗរបស់ប្រទេសជប៉ុន ដែលបានប្ដូរមេដឹកនាំអស់ចំនួន១៨រូបរួចមកហើយចាប់តាំងពីលោកនាយករដ្ឋមន្ត្រី ហ៊ុន សែន ឡើងកាន់អំណាចក្នុងឆ្នាំ១៩៨៥មក ហើយបន្ទាប់មកទៀត លោកបានថ្លែងអំណរគុណដល់ប្រទេសជប៉ុន ដែលនៅតែបន្តគាំទ្រការអភិវឌ្ឍនៅក្នុងប្រទេសកម្ពុជា។
លោក ហ៊ុន សែន បានមានប្រសាសន៍ថា ” រឿងសំខាន់គឺថា ជប៉ុនមានកុងសង់ស៊ីសនយោបាយ។ មិនថាគណបក្សណាកាន់អំណាចឬក៏នាយករដ្ឋមន្ត្រីណានោះទេ អាជំនួយមកកម្ពុជានៅតែបន្តឥតឈប់។ មិត្តភាពកម្ពុជាជប៉ុនយូរអង្វែង”។
ពេលលើកសរសើរដល់លោក ស៊ិនហ្សូ អាបេ នាយករដ្ឋមន្ត្រីជប៉ុន លោក ហ៊ុន សែន ក៏បានពន្យល់អំពីសារៈសំខាន់សេដ្ឋកិច្ចនៃស្ពានត្សឹបាសា ដែលជាផ្នែកនៃគម្រោងជាយូរមកហើយ ដើម្បីស្ថាបនាផ្លូវភ្ជាប់រវាងទីក្រុងហូជីមិញ និងក្រុងបាងកក ដោយឆ្លងកាត់រាជធានីភ្នំពេញ និងក្រុងប៉ោយប៉ែត។
លោក ហ៊ុន សែន បានមានប្រសាសន៍បន្ថែមថា ” ស្ពានហ្នឹងមានតម្លៃធំធេងក្រៅពីភ្ជាប់តំបន់នីមួយៗនៅក្នុងប្រទេសកម្ពុជា វាក៏ភ្ជាប់ទៅនឹងថ្នាក់តំបន់ផងដែរ”។ លោកបានបន្តដោយពន្យល់ថា គេនឹងចងចាំលោកជារៀងរហូតថា ជាបុរសដែលធ្វើឲ្យការសាងសង់នេះកើតមានឡើង។
លោកបានមានប្រសាសន៍បន្ថែមថា ” មិនថាយ៉ាងណាទេ ប្រវត្តិសាស្ត្រនឹងកត់ត្រាអ្នកមកបើក អ្នកដែលតភ្ជាប់ និងអ្នកដែលមកសម្ពោធ។ ទោះបីជា១.០០០ឆ្នាំបន្ទាប់ពីខ្ញុំស្លាប់ទៅ ឈ្មោះរបស់ខ្ញុំនឹងនៅតែនៅទីនេះ”។
យោងតាមទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA) ដែលកំពុងផ្ដល់មូលនិធិសម្រាប់ស្ថាបនាផ្លូវហាយវ៉េនេះឲ្យដឹងថា ផ្លូវភ្ជាប់រវាងទីក្រុងហូជីមិញនិងក្រុងបាងកក នឹងក្លាយជាផ្នែកនៃផ្លូវហាយវ៉េអាស៊ានទី១ ដែលគេគ្រោងនឹងបញ្ចប់នៅឆ្នាំ២០២០ ។
អំឡុងពិធីសម្ពោធស្ពានកាលពីម្សិលមិញ លោក Akhiko Tanaka ប្រធាន JICA បានអង្គុយនៅពីក្រោយលោក ហ៊ុន សែន ក្នុងចំណោមអ្នកនយោបាយ យោធា និងអ្នកជំនួញធំៗជាច្រើននាក់ទៀត។
លោក Tanaka បានមានប្រសាសន៍ថា ” ខ្ញុំសង្ឃឹម និងជឿជាក់ថា ស្ពានត្សឹបាសាមិនគ្រាន់តែពង្រឹងទំនាក់ទំនងរវាងកម្ពុជានិងជប៉ុនប៉ុណ្ណោះទេ ប៉ុន្តែវាក៏នឹងដើរតួនាទីយ៉ាងសំខាន់ជានិមិត្តរូបនៃសន្តិភាព និងការអភិវឌ្ឍនៅក្នុងតំបន់ផងដែរ”។
បន្ទាប់ពីពិធីផ្លូវការត្រូវបានបញ្ចប់ លោក ហ៊ុន សែន បាននាំអ្នកចូលរួមសំខាន់ៗទាំងអស់ដើរចម្ងាយ១គីឡូម៉ែត្រទៅកាន់កន្លែងកាត់ខ្សែបូ ហើយបង្ហោះប៉ោងប៉ោងពណ៌ក្រហម ស និងខៀវរាប់រយទៅលើអាកាស។
បន្ទាប់មក រថយន្តទំនើបៗរាប់សិបគ្រឿង ដែលដឹកឧបនាយករដ្ឋមន្ត្រី រដ្ឋមន្ត្រី មេបញ្ជាការយោធា សមាជិកសភា និងអង្គរក្ស បានធ្វើដំណើរឆ្លងកាត់ស្ពាននេះ ហើយឈប់នៅពាក់កណ្ដាលស្ពានដើម្បីថតរូប។
បន្ទាប់មកទៀត នៅម៉ោងប្រហែល១០និង៤០នាទីព្រឹក ថ្នាក់ដឹកនាំ និងមន្ត្រីអ្នកមុខអ្នកការបានបើកឱកាសឲ្យពលរដ្ឋរាប់ពាន់នាក់ដែលតម្រង់ជួរគ្នា និងភាគច្រើនជិះម៉ូតូបានក្លាយជាអ្នកដំបូងគេដែលបានឆ្លងកាត់ស្ពាននេះម្ដង។
ដោយពលរដ្ឋម្នាក់ៗមានចិត្តចង់ក្លាយជាអ្នកដំបូងគេដែលបានឆ្លងកាត់ស្ពាន វាធ្វើឲ្យស្ពាននេះកកស្ទះភ្លាមៗជាងមួយម៉ោង។
ចម្ងាយប្រហែល១គីឡូម៉ែត្រពីស្ពាន កំពង់ចម្លងអ្នកលឿងដែលបញ្ចប់ប្រតិបត្តិការរបស់ខ្លួនកាលពីម្សិលមិញ បានមានដំណើរការរហូតដល់ស្ពានត្រូវបានបើកជាផ្លូវការ ប៉ុន្តែនៅត្រឹមពាក់កណ្ដាលថ្ងៃម្សិលមិញ ស្រឡាងចម្លងបានឈប់ប្រតិបត្តិការរបស់ខ្លួនទាំងស្រុង។
គ្រួសារអ្នកលក់ដូរមួយបានរុះរើតូបលក់អាហាររបស់ខ្លួន ហើយដាក់លើរថយន្តកែច្នៃមួយគ្រឿងនៅក្បែរកំពង់ចម្លង។ ខណៈពួកគេបើកចេញទៅ ដោយប្រហែលជាលើកចុងក្រោយហើយសម្រាប់ពួកគេនោះ ក្មេងស្រីម្នាក់ដែលជិះនៅពីក្រោយដៃកាន់សង្ក័សីបានស្រែកទាំងសប្បាយរីករាយថា ” យើងទៅឆ្លងស្ពានថ្មី!”៕ ស៊ុយឈាង