31 C
Phnom Penh

បេក្ខជន​ដាក់ពាក្យ​សម្រាប់​សមាជិក​គ.ជ.ប.​ថ្មី​កំពុង​ដំណើរការ​ទៅ​មុខ​

ដោយ ឌឹ ខេមបូឌា ដេលី

បទវិភាគ

យោង​​​តាម​​​បញ្ជី​​​ឈ្មោះ​​​ដែល​​​បាន​​​ចេញ​​​ផ្សាយ​​​ដោយ​​​​​​រដ្ឋ​​​សភា​​​កាល​​​ពីម្សិលមិញ​​​ បាន​​​ឲ្យដឹង​​​ថា បេក្ខជន​ដាក់​​​ពាក្យ​​​សម្រាប់​​​សមាជិក​​​​គណៈកម្មាធិការ​​​ជាតិ​​​រៀបចំ​​​ការ​​​បោះ​​​ឆ្នោត​​​ (គ.ជ.ប.)​​​ថ្មី រួមមាន​​​សមាជិក​​​​សភា​​​គណបក្ស​​​កាន់​​​អំណាចម្នាក់​​​ សមាជិក​​​បច្ចុប្បន្ន​​​បួន​​​រូប​​​របស់​​​គ.ជ.ប.​​​ មេ
ដឹក​​​នាំ​​​សហជីព​​​ដែល​​​និយាយ​​​ឥត​​​សំចៃម្នាក់ និង​​​ប្រធាន​ទីប្រឹក្សា​​​របស់​​​លោក កឹម សុខា​​​ អនុ​​​ប្រធាន​​​គណបក្ស​​​ប្រឆាំង​​​។

រដ្ឋ​​​សភា​​​នឹង​​​កោះ​​​ប្រជុំ​​​ពេញ​​​អង្គ​​​នៅថ្ងៃ​​​ច័ន្ទ ដើម្បីជ្រើស​​​រើស​​​សមាជិក​​​ប្រាំ​​​បួន​​​រូប​​​របស់​​​ស្ថាប័ន​​​បោះ​​​ឆ្នោត​​​ថ្មី​​​នេះ ដែលការ​​​​បង្កើត​​​ឡើងនេះ​​​​សំខាន់ណាស់​ចំពោះ​កិច្ច​​​ព្រម​​​ព្រៀង​​​ដែល​​​បាន​​​បញ្ចប់​​​ការ​​​ធ្វើ​​​ពហិការ​​​មិន​​​ចូល​​​ប្រជុំ​​​សភា​​​ ក្រោយ​​​ការ​​​បោះ​​​ឆ្នោត​​​របស់​​​គណបក្ស​​​សង្គ្រោះ​​​ជាតិ​​​កាល​​​ពី​​​ឆ្នាំ​​​មុន​​​។

កាល​​​ពី​​​ចុង​​​ខែ​​​មុន ​​​រដ្ឋ​​​សភា​​​បាន​​​អំពាវ​​​នាវ​ដល់បេក្ខជន​ទាំងអស់​ដែល​​​មាន​​​បទ​​​ពិសោធន៍​ការ​​​ងារពាក់ព័ន្ធ​រយៈ​​​ពេល​​​១០​​​ឆ្នាំ​​​ ហើយ​មាន​​​​​​សញ្ញាបត្រ​ពី​សាកល​វិទ្យាល័យ​​​​ ។

បេក្ខ​​​ជន​​​បួន​​​រូប​​​​នៅក្នុង​​​គ.ជ.ប.​​​ថ្មី ដែល​​​នឹង​​​ត្រូវ​​​ជ្រើស​​​ដោយ​​​គណបក្ស​​​នីមួយ​​​ៗ​​​ជាមួយ​នឹង​​​​តួនាទី​​​ចុងក្រោយ​ដែល​កាន់​​​កាប់​​​ដោយ​​​លោក​​​ ហង្ស ពុទ្ធា នាយក​​​ប្រតិបត្តិ​​​​​គណៈកម្មាធិការ​​​អព្យាក្រឹត​​​ និង​​​យុត្តិធម៌​​​ដើម្បី​​​ការ​​​បោះ​​​ឆ្នោត​​​ដោយ​​​សេរី និង​​​ត្រឹម​​​ត្រូវ​​​នៅ​​​កម្ពុជា​​​។

លោក ហង្ស ពុទ្ធា បាន​​​មានប្រសាសន៍​​​ថា លោក​​​មាន​​​បំណង​​​ជំរុញ​​​ឲ្យ​​​មាន​​​​​​កំណែ​​​ទម្រង់​​​ការ​​​បោះ​​​ឆ្នោត​​​ដែល​​​​​​មិន​​​ត្រូវ​​​បាន​​​យក​​​ចិត្ត​​​ទុក​​​ដាក់​​​ដោយ​​​គណបក្ស​​​ប្រជា​​​ជន​​​កម្ពុជា និង​​​គណបក្ស​​​សង្គ្រោះ​​​ជាតិ​​​រយៈ​​​ពេល​​​ប្រាំ​​​បីខែ​​​​​​ចុងក្រោយ​នេះ​ និង​​​បេក្ខ​​​ជន​​ផ្សេង​​​​ទៀត​​​ក្នុង​​​ចំណោម​​​បេក្ខ​​​ជន​​​២៤​​​រូប​​​ដែល​​​បា​​ន​​​ដាក់​​​ពាក្យ​​​សម្រាប់​​​ស្ថាប័ន​​​នេះ ក៏​​​បាន​​​លើក​​​ឡើង​​​ពី​​ភាព​ចំាបាច់​សម្រាប់​ការ​ធ្វើ​​​​កំណែ​​​ទម្រង់​​​បន្ថែម​​​ទៀត​​​កាល​​​ពី​​​ម្សិលមិញ​​​ផងដែរ​​​។

លោក ស៊ិក ប៊ុនហុក​​​ សមាជិក​​​សភា​​​គណបក្ស​​​ប្រជា​​​ជនកម្ពុជា​​​ ដែល​​​ជា​​​អ្នក​​​ចរចា​​​របស់​​​គណបក្ស​​​កាន់​​​អំណាច​​​ អំឡុង​​​ការ​​​ធ្វើ​​​សេចក្តី​​​ព្រាង​​​​ច្បាប់​​​បោះ​​​ឆ្នោ​​​តថ្មី​​​បាន​​​មាន​​​ប្រសាសន៍​​​ថា លោក​​​បាន​​​ដាក់​​​ពាក្យ​​​សម្រាប់​​​គ.ជ.ប.​​​ នេះ​ដោយ​​​សារ​​​​​​បទ​​​ពិសោធន៍​​​កន្លង​​​មករបស់លោក​​​​ជាទី​​​ប្រឹក្សា​​​ច្បាប់​​​របស់​​​គ.ជ.ប.ចាស់​​​ចាប់​ពី​​​ឆ្នាំ​​​១៩៩៨ ដល់​​​ឆ្នាំ​​​២០០១ ។

លោក​​​បាន​​​មាន​​​ប្រសាសន៍​​​ថា “ប្រសិន​​​បើ​​​ខ្ញុំ​​​ត្រូវ​​​​បាន​​​ជ្រើស​​​រើស​​​ ខ្ញុំ​​​នឹង​​​ប្រឹងប្រែង​​​​ឲ្យ​​​អស់​​​ពីលទ្ធភា​​​ព​​​ដើម្បី​​​ធ្វើ​​​ការ​​​​​​​​ទាក់ទង​ការ​​​បោះ​​​ឆ្នោត​​​ដើម្បី​​​ធានា​​​ថា នឹង​​​គ្មាន​​ភាព​​​ទាល់​​​ច្រក​​​នយោបាយ​​​ បន្ទាប់​​​ពី​​​ការ​​​បោះ​​​ឆ្នោត​​​ទៀត​​​ឡើយ​​​។  ខ្ញុំ​​​មិន​​​ចង់​​​បាន​​​តួ​​​នាទី​​​ខ្ពស់​​​នៅ​​​គ.ជ.ប.​​​ទេ​​​ ប៉ុន្តែ ខ្ញុំ​​​ចង់​​​ឃើញ​​​គណបក្ស​​​នីមួយ​​​ៗ​​​ពេញ​​​ចិត្ត​​​នឹង​​​លទ្ធផល​​​បោះ​​​ឆ្នោត​​​ដែល​​​រៀប​​​ចំ​​​ដោយ​​​គ.ជ.ប.ថ្មី​​​”។

លោក ជូង ជូងី មេធាវី​​​គណបក្ស​​​សង្គ្រោះ​​​ជាតិ​​​ដែល​​​កាល​​​ពី​​​ពេល​​​ថ្មី​​​ៗ​​​នេះ​​​ត្រូវ​​​បាន​​​រក​​​ឃើញ​​​​​​ពិរុទ្ធភាព​​​ថា​​​បាន​​​ជួយ​​​ឲ្យ​​​មាន​​​ការ​​​រត់​​​ចេញ​​​ពី​​​ពន្ធនាគារ​​​​​​នៅ​ក្នុង​​រឿងក្តី​​​​នយោបាយ​​​មួយ​​​ក្នុង​​​ខេត្ត​​​កណ្តាល​​​នោះ​​​ បាន​​​មាន​​​ប្រសាសន៍​​​ថា លោក​​​​​​សង្ឃឹម​​​ថា នឹង​​​ចូល​​​រួម​​​ក្នុង​​​​គ.ជ.ប.​​​ថ្មី​​​។

លោក ជូង ជូងី បាន​​​មាន​​​ប្រសាសន៍​​​ថា “ប្រសិន​​​បើ​​​ខ្ញុំ​​​ត្រូវ​​​បាន​​​ជ្រើស​​​រើស​​​ជា​​​សមាជិក​​​គ.ជ.ប.​​​សម្រាប់​​​គណបក្ស​​​ប្រឆាំង​​​  ខ្ញុំ​​​នឹង​​​ប្រើ​​​ប្រាស់​​​ចំណេះ​​​ដឹង​​​របស់​​​់​​​ខ្ញុំ​​​​​​តតាំង​​​នឹង​​​អ្វី​​​ៗ​​​ ដើម្បី​​​ធ្វើ​​​ឲ្យ​​​ប្រាកដ​​​ថា ការ​​​បោះ​​​ឆ្នោ​​​តនឹង​​​ត្រូវ​​​ធ្វើ​​​ឡើង​​​ដោយ​​​សេរី​​​ និង​​​យុត្តិធម៌”។

បេក្ខ​​​ជន​​​បួន​​​រូប​​​ក្នុង​​​ចំណោម​​​បេក្ខ​​​ជន​​​ទាំងអស់​ ដែល​បច្ចុប្បន្ន​​​របស់​​​​​គ.ជ.ប. នោះគឺ​​​លោក មាន សាទិក លោក ឯម សុផាត លោក សោម ចាន់​​​ឌីណា និង​​​លោក ម៉ៅ សុភិរិទ្ធ ​​​ដែល​​​លោក សោម ចាន់​​​ឌីណា និង​​​លោក ម៉ៅ សុភិរិទ្ធ ត្រូវ​​​បាន​​​តែង​​​តាំង​​​ដោយ​​​គណបក្ស​​​សម​​​រង្ស៊ី ។

លោក គួយ​​​ ប៊ុនរឿន​​​ មន្ត្រី​​​របស់​​​គណបក្ស​​​សង្គ្រោះ​​​ជាតិ​​​ ដែលជា​សមាជិក​គ.ជ.ប.​​​រយៈ​​​ពេល​​​ខ្លី​​​កាល​​​ពី​​​ដើម​​​ទសវត្សរ៍​​​ឆ្នាំ​​​២០០០​​​របស់​​​គណបក្ស​​​សម​​​រង្ស៊ី​​​នោះ ត្រូវ​​​បាន​​​ប្រកាស​​​រួច​​​ហើយ​​​ថា ជា​​​សមាជិក​​​ គ.ជ.ប.​​​ថ្មី​​​របស់​​​គណបក្ស​​​ប្រឆាំង​​​។

លោក អឹុម សួស្តី មន្ត្រី​​​គណបក្ស​​​កាន់​​​អំណាច​​​ ដែល​​​បាន​​​ធ្វើ​​​ជា​​​ប្រធាន​​​គ.ជ.ប.​​​ចាប់​​​តាំង​​​ពី​​​ឆ្នាំ​​​២០០២​​​​​​មក​​​ បាន​​​មាន​​​ប្រសាសន៍​​​ថា លោក​​​បាន​​​សម្រេច​​​មិន​​​ដាក់​​​ពាក្យ​​​សម្រាប់​​​​​​គណៈ​​​កម្មាធិការ​បោះ​​​ឆ្នោត​​​ថ្មី​​​​​​ឡើយ​​​​​​​​​។

លោក អឹុម សួស្តី បាន​​​មាន​​​ប្រសាសន៍​​​ថា “ខ្ញុំ​​​បាន​​​ធ្វើ​​​ការ​​​ជិត​​​២០​​​ឆ្នាំមក​​​ហើយ​​​ ដូច្នេះ​​​វា​​​គ្រប់​​​គ្រាន់​​​សម្រាប់​ខ្ញុំ​ហើយ​​។ទុក​​​ឱកាស​​​ឲ្យ​​អ្នក​ជំនាន់​​​ក្រោយ​​​ធ្វើ​​​ការ​​​នេះ​​​ចុះ​​​​​​​​​​​​ ពីព្រោះឥឡូវ​នេះ​​​​ខ្ញុំ​​​ចាស់​​​ហើយ​​​​​​។ ខ្ញុំ​​​ចង់​​​សម្រាក​​​”។

លោក រ៉ុង​​​ ឈុន ប្រធាន​​​សមាគម​​​គ្រូ​​បង្រៀន​​​កម្ពុជា​​​ឯករាជ្យ​​​​បាន​​​មាន​​​ប្រសាសន៍​​​ថា បើ​​​ទោះ​​​​​ជា​​​លោក​​​ខ្វះ​​​បទ​​​ពិសោធន៍​​​​​​ទាក់​​​ទង​​​នឹង​​​ការ​​​បោះ​​​ឆ្នោត​​​ក៏​​​ដោយ​​​ ក៏​​​លោក​​​បាន​​​ដាក់​​​ពាក្យ​​​សម្រាប់​​​សមាជិក​​​ គ.ជ.ប.​​​ដែរ​​​ ពីព្រោះ​​​​​ការ​ងារ​របស់​​​លោក​​​ការ​​​ពារ​​​សិទ្ធិ​​​មនុស្ស​​​។

លោក​​​ រ៉ុង ឈុន បាន​​​មាន​ប្រសាសន៍ថា “ខ្ញុំ​​​បាន​​​សម្រេច​​​ដាក់​​​ពាក្យ​​​​​សម្រាប់​​​​​​តួនាទី​​​នេះ ពីព្រោះ​​​ខ្ញុ​​ំ​​​សង្ឃឹម​​​ថា ខ្ញុំ​​​អាច​​​ជួយ​​​​​​រក​​​យុត្តិធម៌​​​សម្រាប់​​​អ្នក​​​បោះ​​​ឆ្នោតបាន​​​​។ បើ​​​ទោះ​​​ជា​​​ខ្ញុំ​​​មិ​​​នបាន​​​​ធ្វើ​​​ការ​​​ដោយ​ផ្ទាល់​​​ទាក់ទង​ការ​​​បោះ​​​ឆ្នោត​​​ក៏​​​ដោយ ក៏​​​​​​ខ្ញុំ​​​អនុវត្ត​​​ការ​​​ងារ​​​បោះ​​​ឆ្នោត​​​ទាំង​​​អស់​​​ដោយ​​​ប្រយោល​​​ដែរ ហើយ​​​បាន​​​ដឹក​​​នាំ​​​សហជីព​​​​​​ទាម​​​ទារ​​​សិទ្ធិ​​​ ដូច្នេះ​​​ខ្ញុំ​​​មាន​​​ជំនឿ​​​មុត​មាំថា​​​ ខ្ញុំ​​​អា​​​ច​​​ធ្វើ​​​ការ​​​ងារ​នៅ​​​គ.ជ.ប.​​​បាន​​​”។

​​​លោក ម៉ុត​​​ ចន្ថា ប្រធាន​​​ខុទ្ទកាល័យ​​​របស់​​​លោក កឹម សុខា​ ​​​​​អនុប្រធាន​​​រដ្ឋ​​​សភា​​​បាន​​​មាន​​​ប្រសាសន៍​​​លោក​​​បាន​​​ដាក់​​​ពាក្យ​​​សម្រាប់​​​សមាជិក​គ.ជ.ប.​​​ ពីព្រោះ​​​លោក​​​ជឿ​​​ថា​​​​​​ បទ​​​ពិសោធន៍​​​របស់​​​លោកដែល​​​​ធ្វើ​​​ការ​​​ឲ្យ​​​អ៊ុន​​​តាក់​​​ និង​​​ក្រោយមក​​​ឲ្យ​​​​វិទ្យាស្ថាន​​​ជាតិ​​​ប្រជាធិបតេយ្យ​​​ដែល​​​មាន​​​មូល​​​ដ្ឋាន​​​នៅ​​​សហរដ្ឋ​​​អាមេរិក​​​នោះ​ ធ្វើ​​​ឲ្យ​​​លោក​​​​​​មាន​​​លក្ខណសម្បត្តិ​​​គ្រប់​​​គ្រាន់​​​។

លោក មុត ចន្ថា​​​​​​ បាន​​​មាន​​​ប្រសាសន៍​​​ថា “ខ្ញុំ​​​អាច​​​ផ្តល់​​​ចំណេះ​​​ដឹង​​​ បទ​​​ពិសោធ​​​ន៍​​​ និង​​​ជំនាញ​​​របស់​​​ខ្ញុំ​​​ដើម្បី​​​ជួយ​​​ធានា​​ឲ្យ​មាន​​​​ការ​​​បោះ​​​ឆ្នោត​​​ដោយ​​​សេរី​​​ និង​​​យុត្តិធម៌​​​ស្រប​​​តាម​​​បទ​​​ដ្ឋាន​​​អន្តរ​​​ជាតិ​​​។ ខ្ញុំ​​​ចង់​​​បម្រើ​​​ប្រទេស​​​ជាតិ​​​របស់​​​ខ្ញុំ​​​​​​ ប្រសិន​​​បើ​​​ខ្ញុំ​​​មាន​​​ឱកាស​​​”។

លោក មុត ចន្ថា បាន​​​បដិសេធ​​​ថា លោក​មិន​​​បាន​​​ពិភាក្សា​​​​​​ពី​បេក្ខ​​​ភាពរបស់​​​​លោក ជា​​​មួយ​​​លោក​​​ កឹម សុខា ​​​ដែល​​​ការ​​​គាំទ្រ​​​របស់គាត់​​​​អាច​​​ឲ្យរូប​​​លោក​​​ទទួលបាន​តួនាទី​​​នេះ​​​។

លោក​​​បាន​​​មាន​​​ប្រសាសន៍​​​ថា “ខ្ញុំ​​​មិន​​​រំពឹង​ពី​​គ្រួសារ​និយម​ ឬ​សម្រាប់​​​ទំនាក់​​​ទំនង​​​​​​ជិត​​​ស្និទ្ធ​​​​​របស់​​​ខ្ញុំ​​​​​​ជួយ​​​ខ្ញុំនោះ​​​​ឡើយ​​​ ប៉ុន្តែ ខ្ញុំ​​​ជឿ​​​ជាក់​​​​​​លើ​​​ចំណេះ​​​ដឹង​​​ ជំនាញ​​​ និង​​​បទ​​​ពិសោធន៍​​​ទាក់ទង​​​​ការ​​​ងារ​​​បោះ​​​ឆ្នោតរបស់ខ្ញុំ​​​”៕ សារុន (រាយការណ៍​​​បន្ថែម​​​ដោយ Alex Willemyns)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស