37 C
Phnom Penh

ក្រសួង​ហិរញ្ញវត្ថុ​រៀបចំ​ផែនការ​យុទ្ធសាស្ត្រ​ថវិកា​ឆ្នាំ​២០១៦

ដោយ ឌឹ ខេមបូឌា ដេលី

បទវិភាគ

ក្រសួង​ហិរញ្ញវត្ថុ​បាន​បញ្ចេញ​ឲ្យ​ដឹង​ផែនការ​យុទ្ធសាស្ត្រ​របស់​ខ្លួន​សម្រាប់​ថវិកា​ឆ្នាំ​បន្ទាប់ អំឡុង​វេទិកា​មួយ​កាលពី​ថ្ងៃ​អង្គារ​នៅ​ទីស្តីការ​ក្រសួង ក្នុង​ក្រុង​ភ្នំពេញ ដោយ​ផ្តោត​លើ​ការ​បង្កើន​ចំណូល​រដ្ឋ បង្កើន​ផលិតភាព​សេដ្ឋកិច្ច និង បែងចែក​ផល​ប្រយោជន៍​ពី​កំណើន​សេដ្ឋកិច្ច។

លោក អូន ព័ន្ធមុនីរ័ត្ន រដ្ឋ​មន្ត្រី​ក្រសួង​ហិរញ្ញវត្ថុ​បាន​មាន​ប្រសាសន៍​ថា រដ្ឋាភិបាល​នឹង​ស្វះស្វែង​បន្ត​ពង្រីក​មូលដ្ឋាន​ពន្ធដារ​របស់​ខ្លួន ក្នុង​គោលដៅ​បង្កើន​ចំណូល​ចរន្ត​០,៥​ភាគរយ​នៃ​ផលិតផល​ក្នុង​ស្រុក​សរុប សម្រាប់​រាល់​បី​ឆ្នាំ​បន្ទាប់។ កាលពី​ឆ្នាំ​មុន ចំណូល​រដ្ឋ​មាន​ចំនួន​ស្មើ​នឹង​១៦,៣៥​ភាគរយ​នៃ​ផលិតផល​ក្នុង​ស្រុក​សរុប។

លោក ព័ន្ធមុនីរ័ត្ន បាន​មាន​ប្រសាសន៍​ថា “ក្រសួង​សេដ្ឋកិច្ច​និង​ហិរញ្ញវត្ថុ​នឹង​បន្ត​ខិតខំ​ប្រឹងប្រែង​ក្នុង​ការ​កៀងគរ​ចំណូល​រយៈ​ពេល​ខ្លី​និង​មធ្យម​ ឲ្យ​បាន​កាន់តែច្រើន​បន្ថែម​ទៀត តាម​រយៈ​ការ​អនុវត្ត​យ៉ាង​ម៉ឺងម៉ាត់​នូវ​វិធានការ​នានា ដែល​បាន​កំណត់​ក្នុង​គោល​នយោបាយ​កៀងគរ​ចំណូល​រយៈ​ពេល​មធ្យម​២០១៤​ដល់​ឆ្នាំ​២០១៨”។

រដ្ឋមន្ត្រី​ក្រសួង​ហិរញ្ញវត្ថុ​មិន​បាន​និយាយ​លម្អិត​អំពី​វិធានការ​ដែល​ត្រូវ​អនុវត្ត​ទេ ប៉ុន្តែ​កាលពី​ឆ្នាំ​មុន រដ្ឋាភិបាល​បាន​បង្កើន​ការ​ខិតខំ​ប្រមូល​ពន្ធគយ និង​បាន​ចាប់​ផ្តើម​អនុវត្ត​ច្បាប់​រយៈ​ពេល​វែង ដោយ​យក​ពន្ធ​ពី​បណ្តា​ក្រុមហ៊ុន​ដែល​ជួល​កម្មករ​បរទេស។

លោក វង្សី វិសុទ្ធ រដ្ឋលេខាធិការ​ក្រសួង​ហិរញ្ញវត្ថុ បាន​មាន​ប្រសាសន៍​ថា ថវិកា​ឆ្នាំ​២០១៦ ដែល​ដាក់​ជិត​៤០​ភាគរយ​នៃ​ថវិកា​ជាតិ​ទៅ​ផ្នែក​កិច្ចការ​សង្គម នឹង​នាំ​មក​នូវ​សមធម៌​សេដ្ឋកិច្ចប្រសើរ​ឡើង។

លោក វិសុទ្ធ បាន​និយាយ​ថា “ថវិកា​ជាតិ​ជា​ឧបករណ៍​អភិវឌ្ឍ​ដ៏​សំខាន់ ក្នុង​ការ​ចែកចាយ​ផលទុន​សរុប​ក្នុង​ស្រុក​របស់​ជាតិ ដើម្បី​ធានា​កំណើន​សេដ្ឋកិច្ច និង​ធានា​សមធម៌​សង្គម”។

យោងតាម​លោក ហាវរតនៈ ប្រធាន​នាយកដ្ឋាន​រៀបចំ​ថវិកា​បាន​ឲ្យ​ដឹង​ថា ចេញពី​គម្រោង​ថវិកា​ជាតិ​ឆ្នាំ​២០១៦​មាន​ទឹកប្រាក់​៤,៣៤​ពាន់លាន​ដុល្លារ ក្រសួង​មាន​ផែនការ​បែងចែក​៣៨,៦៥​ភាគរយ​សម្រាប់​កិច្ចការ​សង្គម ២៤,៧៦​ភាគរយ​សម្រាប់​វិស័យ​ការពារ​ជាតិ​និង​សន្តិសុខ ១៣,៤៤​ភាគរយ​សម្រាប់​រដ្ឋបាល​ទូទៅ និង​១០,៧៦​ភាគរយ​សម្រាប់​ការ​ពង្រីក​វិស័យ​សេដ្ឋកិច្ច។

លោក ផាន ផល្លា អគ្គនាយក​នៃ​អគ្គនាយកដ្ឋាន​ផ្នែក​គោល​នយោបាយ​សេដ្ឋកិច្ច​និងហិរញ្ញវត្ថុ​សាធារណៈ បាន​មាន​ប្រសាសន៍​ថា ថវិកា​នេះ​នឹង​ជួយ​រដ្ឋាភិបាល​ឲ្យ​ឈាន​ដល់​គោលដៅ​នៃ​ផលិតផល​ក្នុង​ស្រុក​សរុប​ចំនួន​២០,៣៧​ពាន់លាន​ដុល្លារ​ក្នុង​ឆ្នាំ​២០១៦៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស