នគរបាលបាននិយាយកាលពីម្សិលមិញថា បុរសម្នាក់ដែលទើបលែងលះប្រពន្ធកាលពីពេលថ្មីៗនៅក្នុងក្រុងបាត់ដំបង បានចាប់កូនស្រីរបស់ខ្លួនជាចំណាប់ខ្មាំងបន្ទាប់ពីនគរបាលបានមកដល់ផ្ទះរបស់ជននេះដើម្បីស៊ើបអង្កេតពាក្យបណ្ដឹងពីបទបង្ករបួសស្នាម។
លោក សុត វណ្ណី ស្នងការរងនគរបាលខេត្តទទួលបន្ទុកការិយាល័យយុត្តិធម៌បានមានប្រសាសន៍ថា មន្ត្រីរបស់លោកបានមកដល់សង្កាត់ព្រែកព្រះស្ដេច ជាផ្ទះរបស់បុរសរូបនេះដែលមានឈ្មោះថា វ៉ាន់ អាយុ៣០ឆ្នាំ ដើម្បីពិនិត្យមើលពាក្យបណ្ដឹងដែលចោទប្រកាន់ជនសង្ស័យរូបនេះថា បានទះកំផ្លៀងប្អូនថ្លៃស្រីរបស់ខ្លួនមានផ្ទៃពោះ ដែលរស់នៅជាមួយបុរសរូបនេះ។
យោងតាមនគរបាលបានឲ្យដឹងថា នៅពេលនគរបាលមកដល់ផ្ទះបុរសរូបនេះកាលពីរសៀលម្សិលមិញ ជនសង្ស័យរូបនេះបានរុញប្អូនថ្លៃស្រី និងម្ដាយរបស់ខ្លួន និងម្ដាយរបស់ខ្លួនដែលបានរស់នៅជាមួយបុរសរូបនេះដែរចេញក្រៅផ្ទះ ហើយបានដាក់គន្លឹះទ្វារខាងក្នុងជាមួយកូនស្រីរបស់ខ្លួន។
លោក វណ្ណី បានមានប្រសាសន៍ថា ជនសង្ស័យរូបនេះដែលទំនងជាមានជំងឺផ្លូវចិត្តនោះបានប្រាប់នគរបាលថា ប្រសិនបើពួកគេព្យាយាមចូលក្នុង គាត់នឹងសម្លាប់ក្មេងស្រីនោះ។
លោកបានមានប្រសាសន៍ថា ” ជនសង្ស័យរូបនេះមានអារម្មណ៍ក្រៀមក្រំបន្ទាប់ពីលែងលះប្រពន្ធ នោះជាមូលហេតុដែលគាត់ធ្វើរឿងឆ្កួតៗបែបនេះ”។គិតមកដល់ល្ងាចថ្ងៃម្សិលមិញ នគរបាលបានឡោមព័ទ្ធផ្ទះនោះ។ លោក វណ្ណី បានមានប្រសាសន៍ថា “ក្មេងស្រីដែលត្រូវបានចាប់ជាចំណាប់ខ្មាំងមិនបានរងរបួសទេ”៕ សារុន