28 C
Phnom Penh

លោក ហ៊ុន សែន ​ប្រាប់​មន្ត្រី​ឲ្យ​ឈប់​ទម្លាក់​កំហុស​ដាក់​គ្នា

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ពុធ លោក​នាយករដ្ឋមន្ត្រី ហ៊ុន សែន បាន​ប្រាប់​អភិបាល​ខេត្ត​ឲ្យ​ទទួល​ខុសត្រូវ​ចំពោះ​ការ​ទប់ស្កាត់​ឧក្រិដ្ឋកម្ម​ព្រៃឈើ​ក្នុង​ខេត្ត​រៀងៗ​ខ្លួន និង​បាន​ស្តី​បន្ទោស​មន្ត្រី​ដែល​ទម្លាក់​កំហុស​ដាក់​គ្នា ពេល​ដែល​មាន​ការ​រក​ឃើញ​ការ​កាប់​ឈើ​ខុស​ច្បាប់។

លោក ហ៊ុន សែន បាន​មាន​ប្រសាសន៍​នៅ​ក្នុង​ពិធី​បិទ​សន្និបាត​ប្រចាំ​ឆ្នាំ​របស់​ក្រសួង​កសិកម្ម រុក្ខាប្រមាញ់ និងនេសាទ នៅ​វិទ្យាស្ថាន​ជាតិ​អប់រំ​ ក្នុង​ក្រុង​ភ្នំពេញ​ថា “បញ្ហា​ព្រៃ​ឈើ​ជា​បញ្ហា​ធ្ងន់ធ្ងរ​មួយ​ដែល​ទាមទារ​នូវ​ការ​ទទួល​ខុសត្រូវ​ដែល​មិន​អាច​ឆ្លើយ​ដាក់​គ្នា”។

លោក​នាយករដ្ឋមន្ត្រី​បាន​មាន​ប្រសាសន៍​ថា កាលពី​ឆ្នាំ​មុន លោក​បាន​បញ្ជា​រដ្ឋបាល​ព្រៃ​ឈើ​និង​ជលផល​ទាំងអស់​ត្រូវ​ស្ថិត​នៅ​ក្រោម​ការ​គ្រប់គ្រង​របស់​អាជ្ញាធរ​ខេត្ត ដែល​ទទួល​ខុសត្រូវ​ឲ្យ​ប្រាកដ​ថា​ មន្ត្រី​មូលដ្ឋាន​ធ្វើ​ការងារ​របស់​ខ្លួន។

លោក ហ៊ុន សែន បាន​មាន​ប្រសាសន៍​ថា “ប្រសិនបើ​វា​ជា​…​គ្រឿង​ញៀន វា​ពិបាក​ចាប់​ខ្លួន។ ពួកគេ​លាក់​គ្រឿង​ញៀន​ក្នុង​ហៅប៉ៅ​របស់​ពួកគេ ប៉ុន្តែ​ឈើ ពួកគេ​ដឹក​តាម​ឡាន ហើយ​យើង​មាន​ភ្នែក​រាប់លាន​មើល​ឃើញ”។

លោក​បាន​បន្ថែម​ថា “តើ​ភ្នែក​របស់​យើង​ទៅណា​អស់​ហើយ? ហេតុអ្វី​បណ្តោយ​ឲ្យ​ដឹក​ឈើ? វា​បំផ្លាញ​ព្រៃ​ឈើ​និង​បំផ្លាញ​ផ្លូវ​ថ្នល់”។

លោក​នាយករដ្ឋមន្ត្រី​ក៏​បាន​ប្រាប់​ក្រសួង​កសិកម្ម​ថា ពេល​ដែល​ខ្លួន​ដក​ហូត​ដី​សម្បទាន​សេដ្ឋកិច្ច​ពី​ក្រុមហ៊ុន​នានា ដែល​បាន​រំលោភ​កិច្ច​សន្យា​របស់​ខ្លួន​ជាមួយ​រដ្ឋាភិបាល ពួកគេ​ត្រូវ​តម្រូវ​ឲ្យ​ក្រុមហ៊ុន​ទាំងនោះ​សង​រដ្ឋ​វិញ ចំពោះ​ការ​កាប់​បំផ្លាញ​ព្រៃ​ឈើ​ដែល​បាន​កើត​ឡើង​លើ​ដី​របស់​ពួកគេ។

លោក ហ៊ុន សែន បាន​មាន​ប្រសាសន៍​ថា “បើ​យើង​គ្រាន់តែ​យក​ដី​មក​វិញ វា​គ្មាន​តម្លៃ​អី​ទេ ពីព្រោះ​ពួកគេ​បាន​បំផ្លាញ​វា”។

លោក​បាន​មាន​ប្រសាសន៍​បន្ថែម​ថា ក្រុមហ៊ុន​នានា​ដែល​ដី​សម្បទាន​សេដ្ឋកិច្ច​របស់​ពួកគេ​ត្រូវ​បាន​ដក​ហូត​វិញ ក៏​ត្រូវ​ផាក​ពិន័យ​ដែរ បើ​ពួកគេ​បាន​រំលំ​ដើម​ឈើ​នៅ​ក្រៅ​ព្រំដី​សម្បទាន​របស់​ពួកគេ​នោះ។ លោក​បាន​មាន​ប្រសាសន៍​ថា “នៅ​លើ​ដី​មួយ​ចំនួន គាត់​មិន​បាន​ធ្វើ​អី​សោះ បាន​ត្រឹមតែ​កាប់​ឈើ ដូច​ឲ្យ​គាត់រួច​ខ្លួន​ស្រួល។ [យើង] ត្រូវ​ឲ្យ​គេ​សង”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស