29 C
Phnom Penh

ប្រទះ​ឃើញ​សាក​សព​ក្មេង​ប្រុស​អាយុ​១១ឆ្នាំ​ត្រូវ​គេ​សម្លាប់​ សង្ស័យ​ជម្លោះ​រឿង​របរ​រក​ស៊ី​របស់​ឪពុក​ម្តាយ​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ នគរបាល​ខេត្ត​រតន​គិរី​បាន​លើក​ឡើង​ថា ពួកគេ​មិន​មាន​តម្រុយជុំវិញ​​​ការ​សម្លាប់​ក្មេង​ប្រុស​​អាយុ​១១​ឆ្នាំម្នាក់គួរ​ឲ្យ​សង្ស័យ​​ ដែល​សាក​សព​ត្រូវ​បាន​​ប្រទះ​ឃើញ​​ចង​ដៃ​​ចង​ជើង​ និង​​ដេក​ផ្កាប់​មុខ​​នៅ​ក្នុង​ផ្ទះកាលពី​មួយ​ថ្ងៃមុន។

លោក ឡោ មករា នាយ​ប៉ុស្តិ៍​ឃុំ​​​បាន​មាន​ប្រសាសន៍​ថា “​ក្មេង​ប្រុស ថៃ ជាន់គីម អាយុ​១១​ឆ្នាំ​ ត្រូវ​បាន​បងប្រុស​របស់​ខ្លួន​ប្រទះ​ឃើញ​ស្លាប់នៅក្នុង​ផ្ទះ​របស់ពួកគេ​​ស្ថិត​ក្នុង​ឃុំអូរជុំ ស្រុក​អូរ​ជុំ នៅម៉ោង​ប្រហែល​​៦ល្ងាច​​ថ្ងៃពុធ។

លោក​បានមាន​ប្រសាសន៍ថា ឪពុក​ម្តាយ​ក្មេង​ប្រុស​រូបនេះ​​បាន​ទុក​ក្មេងប្រុសនេះ​ឲ្យ​នៅ​ផ្ទះ​តែ​ម្នាក់​ឯងរយៈពេល​​ពីរ​បី​ម៉ោងដើម្បី​ឲ្យ​នៅ​មើល​តូប​លក់​ចាប់​ហួយ​ក្នុង​ក្រុង​បាន​លុង​។

លោក​បានមាន​ប្រសាសន៍ថា “ដៃនិង​ជើង​របស់​វា​ត្រូវបាន​ចង​ ហើយ​​មាត់​ត្រូវ​បាន​យក​ស្កុត​បិទទៀត​​។ ក្មេង​ប្រុស​រូបនេះ​ត្រូវ​បាន​នាំទៅ​សង្គ្រោះ​នៅ​មន្ទីរ​ពេទ​្យ​បង្អែក​ខេត្ត​ ប៉ុន្តែ​ជា​អកុសល វា​ស្លាប់បាត់​ទៅ​ហើយ”។

លោក ថាក់ ឡៅ អធិការ​នគរបាល​ស្រុក​​បាន​មាន​ប្រសាសន៍ថា “ការ​ស្លាប់នេះ​​ត្រូវ​បាន​ចាត់​ទុក​ថា ជា​ករណី​មនុស្ស​ឃាតគួរ​ឲ្យ​សង្ស័យ។

លោក​បាន​មាន​ប្រសាសន៍ថា “វាមិន​មែន​ជា​ករណី​ប្លន់​ទេ ពីព្រោះ​​ទ្រព្យសម្បត្តិ​របស់​ក្រុមគ្រួសារ​នេះ​មិន​បាន​បាត់​បង់​ឡើយ។ ករបស់ក្មេងប្រុស​នេះ​មានស្នាម​ជាំ ដូច្នេះ​យើង​​សន្និដ្ឋាន​ថា ក្មេងប្រុស​នេះ​ត្រូវ​បាន​គេ​រឹតកសម្លាប់”។ លោក ឡៅ បានមាន​ប្រសាសន៍ថា មនុស្ស​ប្រាំនាក់​ ដែល​ភាគ​ច្រើន​ជា​អ្នក​ជិត​ខាង​ ត្រូវ​បាន​សាកសួរ។

លោក​បានមាន​ប្រសាសន៍ថា “យើង​បាន​សាកសួរ​​មនុស្ស​ប្រាំនាក់​​ចាប់តាំង​ពី​ម្សិលមិញ ប៉ុន្តែ​​យើង​មិន​ទាន់​បាន​ចាប់ខ្លួន​នរណាម្នាក់​នៅឡើយ​ទេ ពីព្រោះ​យើ​ងមិន​មាន​ភ័ស្តុ​តាង​គ្រប់គ្រាន់​។ យើង​មាន​ការ​លំបាក​ស៊ើប​អង្កេត​​ណាស់ ពីព្រោះ​មិន​មាន​សាក្សី​ឃើញ​ជន​សង្ស័យ​ណាម្នាក់​ដើរ​ចូលក្នុង​ផ្ទះនោះ​មុនពេល​សម្លាប់​ឡើយ”។

នគរបាល​សង្ស័យ​ថា ក្មេងប្រុស​រូបនេះ​​ត្រូវបាន​សម្លាប់​ ដោយសារ​ជម្លោះ​រឿងរបរ​​រក​ស៊ី​​របស់​ឪពុក​ម្តាយ​វា​ ប៉ុន្តែ​​លោក ឡៅ បាន​លើក​ឡើង​ថា ឪពុកម្តាយ​ក្មេងប្រុស​នេះ​អះ​អាង​ថា ពួកគាត់​មិន​មាន​សត្រូវដែល​ចង់​សង​សឹកនោះ​ឡើយ។

លោក​បានមាន​ប្រសាសន៍​ថា “​បុរស​ជា​ឪពុក​ម្តាយ​នោះ​បាន​ប្រាប់​នគរបាល​ថា ពួកគាត់​មិន​ដឹង​ថា ជន​សង្ស័យ​ជា​នរណា​នោះឡើយ ពីព្រោះ​ពួក​គាត់​​មិន​ដែល​មាន​ជម្លោះ​​ជាមួយ​នរណាឡើយពីមុន​មក”។

លោក​ ឡៅ បាន​មាន​ប្រសាស​ន៍ថា ឪពុក​ម្តាយក្មេង​ប្រុស​រូបនេះ​​​បានដឹក​សព​កូន​ប្រុស​របស់ខ្លួន​ទៅ​ស្រុក​កំណើត​​នៅក្នុង​ខេត្ត​កំពង់​ចាម​​ដើម្បីចាត់ចែង​​ធ្វើ​បុណ្យ​៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស