នគរបាលនៅក្រុងសៀមរាបបាននិយាយកាលពីថ្ងៃព្រហស្បតិ៍ថា ពួកគេបានចាប់មនុស្ស៦នាក់កាលពីថ្ងៃពុធមកសាកសួរទាក់ទិននឹងការលួចដុតខ្លោងទ្វារ ដែលសង់សម្រាប់ពិធីបុណ្យអង្គរសង្ក្រាន្ត។
ខ្លោងទ្វារនេះ ដែលសង់និងរចនាតុបតែងដោយសហភាពសហព័ន្ធយុវជនកម្ពុជា ជាក្រុមយុវជនដែលដឹកនាំដោយកូនប្រុសរបស់លោកនាយករដ្ឋមន្ត្រី ហ៊ុន សែន បានទទួលរងការរិះគន់ខឹងពីអ្នកប្រើហ្វេសប៊ុកខ្មែរជាច្រើននាក់ ដែលតវ៉ាថា ខ្លោងទ្វារនោះមិនបានសង់តាមរចនាប័ទ្មខ្មែរឲ្យបានត្រឹមត្រូវ។
យោងតាមប៉ូលិសឲ្យដឹងថា បុរស៦នាក់ដែលកំពុងផឹកស៊ីនៅជិតខ្លោងទ្វារនោះនាពេលភ្លើងឆេះ អំឡុងពេលរំលងអធ្រាត្រចូលថ្ងៃអង្គារ ត្រូវបានគេសាកសួរនៅព្រឹកនោះ ប៉ុន្តែបានដោះលែងវិញនៅពេលរសៀល។
លោក ថោង សុឃុន ស្នងការរងនគរបាលខេត្ត បានមានប្រសាសន៍កាលពីថ្ងៃព្រហស្បតិ៍ថា បុរសមួយក្រុម៦នាក់ផ្សេងទៀតត្រូវបានចាប់ខ្លួនកាលពីថ្ងៃពុធ និងកំពុងឃាត់ខ្លួនដើម្បីសាកសួរ។
លោកបាននិយាយថា “យើងបានប្រមូលចាប់មនុស្ស៦នាក់ផ្សេងទៀតដើម្បីសាកសួរ ពីព្រោះយើងសង្ស័យថា ពួកគេជាប់ពាក់ព័ន្ធក្នុងការដុតនេះ។ នគរបាលរបស់យើងបានសហការជាមួយស្នងការនគរបាលជាតិ ដើម្បីស៊ើបអង្កេតករណីនេះ ដូច្នេះខ្ញុំមិនអាចអត្ថាធិប្បាយច្រើនបានទេ”។
លោកបានបដិសេធដែលថា អ្នកដែលគេចាប់៦នាក់នោះជាមនុស្សដដែល ដែលត្រូវបានសាកសួរកាលពីថ្ងៃអង្គារនោះ។ ទោះជាយ៉ាងនេះក្តី អង្គការសិទ្ធិមនុស្សលីកាដូ បានអះអាងកាលពីថ្ងៃព្រហស្បតិ៍ថា មនុស្ស៦នាក់ដែលគេសាកសួរកាលពីថ្ងៃអង្គារ មិនទាន់ត្រូវបានគេដោះលែងទេ ហើយតាមការពិត មនុស្សដដែលនោះហើយ ដែលលោក សុឃុន បាននិយាយថា ត្រូវបានដោះលែងកាលពីថ្ងៃពុធ។
លោក ចៅ លក្ខវណ្ណា មន្ត្រីអង្គការលីកាដូនៅខេត្តសៀមរាបបាននិយាយថា “យើងកំពុងតាមដានករណីនេះ។ មិនមានភ័ស្តុតាងថា ជនសង្ស័យបានប្រព្រឹត្តបទល្មើសទេ។ ប្រសិនបើពួកគេប្រព្រឹត្តបទល្មើស ពួកគេគេចខ្លួនបាត់ហើយ”។
លោក លក្ខវណ្ណា បាននិយាយដែរថា បុរសទី៧ ឈ្មោះ ញាញ់ ផល ក៏ត្រូវចាប់ខ្លួនក្នុងករណីនេះដែរ។
អ្នកស្រី ម៉ៅ សារីន អាយុ៦៥ឆ្នាំ ជាម្តាយរបស់លោក ផល បាននិយាយកាលពីថ្ងៃព្រហស្បតិ៍ថា កូនប្រុសរបស់អ្នកស្រីត្រូវបានចាប់ខ្លួននៅផ្ទះគ្រួសាររបស់ពួកគេកាលពីថ្ងៃពុធ។ អ្នកស្រីបាននិយាយថា កូនប្រុសរបស់អ្នកស្រីបានទៅផឹកជាមួយបុរស៦នាក់ដែលគេសាកសួរកាលពីថ្ងៃអង្គារទេ។
អ្នកស្រីបាននិយាយថា “កូនប្រុសរបស់ខ្ញុំនិង៦នាក់នោះមិនបានប្រព្រឹត្តបទល្មើសឡើយ”។ ប៉ូលិសមិនអាចទាក់ទងសុំការអត្ថាធិប្បាយអំពីការចាប់ខ្លួនលោក ផល បានទេ៕ និត