26 C
Phnom Penh

ក្រុម​​​មនុស្ស​​​ជាង​​​៣០០​​​នាក់​​​ព្រួត​​​វាយ​​​សម្លាប់​​​ចោរ​​​ប្លន់​​​ម្នាក់​​​ក្នុង​​​ខណ្ឌ​​​ដង្កោ

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​ឲ្យ​​​ដឹង​​​ថា ក្រុម​​​មនុស្ស​​​មាន​​​កំហឹង​​​ប្រហែល​​​៣០០នាក់​​​បានព្រួត​​​​​​វាយ​​​សម្លាប់​​​ចោរ​​​ប្លន់​​​ម្នាក់​​នៅ​​​ក្នុង​​​ខណ្ឌ​​​ដង្កោ រាជ​​​ធានី​​​ភ្នំពេញ កាលពី​​​ថ្ងៃសុក្រ។

លោក ទុំ ប៉ូលីន នាយ​​​រង​​​ប៉ុស្តិ៍​​​សង្កាត់​​​ព្រៃ​​​ស​​​បាន​​​មាន​​​ប្រសាសន៍​​​ថា បុរស​​​បី​​​នាក់​​​ជិះ​​​ម៉ូតូ​​​មួយ​​​គ្រឿង​​​​​​បាន​​យក​​​​​​​​​កាំភ្លើង​​​ភ្ជង់​​​ស្ត្រី​​​ម្នាក់​​​​​​​​​​​​ប៉ុនប៉ង​​​ប្លន់​​​ម៉ូតូ​​​នៅ​​​ម៉ោង​​​ប្រហែល​​​​​​៥និង​​​៣០នាទី​​​ល្ងាច​​​ថ្ងៃ​​​សុក្រ​​​បន្ទាប់ពី​​​តាម​​​ស្ត្រី​​​រូប​​​នេះ​​​​​​​​​ចូល​​​ផ្លូវ​​​លំ​​​ស្ងាត់​​​មួយ។

លោក​​​បាន​​​មាន​​​ប្រសាសន៍​​​ថា “​​​ជន​​​សង្ស័យ​​​ទាំងនោះ​​​​​​បាន​​​ដេញ​​​តាម​​​ស្ត្រី​​​រូប​​​នេះ​​​​​​ ហើយ​​​ខណៈ​​​ដែល​​​គាត់​​​​​​បង្អង់​​​ម៉ូតូ ពួកគេ​​​បាន​​​ធាក់​​​ផ្តួល​​​ម៉ូតូ​​​ស្ត្រី​​​រូប​​​នោះ​​​ ហើយ​​​​​បាន​​​ដក​​​កាំភ្លើង​​​ភ្ជង់​​​ដើម្បី​​​ទាម​​​ទារ​​​ឲ្យ​​​ប្រគល់​​​ម៉ូតូ”។

លោក ប៉ូលីន​​​ បាន​​​មាន​​​ប្រសាសន៍​​​ថា ជន​​​រងគ្រោះ​​​ ឈ្មោះ អិុត ពុទ្ធា អាយុ​​​២៤ឆ្នាំ​​​ បាន​​ធ្លាក់​​​​​​ពី​​​​​​​​ម៉ូតូ​​​ បន្ទាប់ពី​​​​​​ត្រូវ​​​ក្រុម​​​ចោរ​​​ធ្លាក់​​​ផ្តួល ហើយ​​​បាន​​​ប្រវាយ​​​ប្រតប់​​​ជាមួយ​​​ក្រុម​​​ចោរ​​​ប្លន់​​​ទាំង​​​នោះ។

លោក​​​បាន​​​មាន​​​ប្រសាសន៍​​​ថា “​​​នៅ​​​ពេល​​​ស្ត្រី​​​រូប​​​នេះ​​​​​​តដៃ ជន​​​សង្ស័យ​​​ម្នាក់​​​​​​បាន​​​ដាល់​​​គាត់
​​​ចំ​​​ភ្នែក​​​ស្តាំ​​​មួយ​​​ដៃ ហើយ​​​បន្ទាប់មក​​​យក​​​កាំភ្លើង​​​វាយ​​​គាត់​​ទៀត”។

លោក ប៉ូលីន បាន​​​មាន​​​ប្រសាសន៍​​​ថា ​​​អ្នកស្រី ពុទ្ធា បាន​​​ស្រែក​​​ឲ្យ​​​គេ​​​ជួយ ដែល​​​បាន​​​ឮ​​​ដល់​​​អ្នក​​​ភូមិ​​​នៅ​​​ក្បែរ​​​នោះ។ ជន​​​សង្ស័យ​​​ម្នាក់​​​​​​បាន​​​រត់​​​គេចខ្លួន​​​តាម​​​ម៉ូតូ​​​របស់​​​ពួកគេ ចំណែក​​​​​​ជន​​​ម្នាក់​​​ទៀត​​​​​​បាន​​​ជិះ​​​ម៉ូតូ​​​របស់​​​​​​ អ្នកស្រី ពុទ្ធា គេ​​​ច​​​ខ្លួន​​​ផង​​​ដែរ។

ជន​​​សង្ស័យ​​​ទី​​​៣ ដែល​​​មាន​​​កាំភ្លើង​​​​​​បាន​​ព្យាយាម​​​រត់​​​គេចខ្លួន​​​ដោយ​​​ថ្មើរ​​​ជើង​​​​​​ចូល​​​ទៅ​​​ក្នុង​​​វាល​​​ស្រែ​​​ក្បែរ​​​នោះ ប៉ុន្តែ​​​​​​ក្រុម​​​មនុស្ស​​​ដែល​​​មាន​​​កំហឹង​​​​​​បាន​​​ចាប់​​​ផ្តើម​​​ឡោម​​​ព័ទ្ធ​​​​ជិត​​​អស់​​​ហើយ។

លោក ប៉ូលីន បាន​​​មាន​​​ប្រសាសន៍​​​ថា “​​​នៅ​​​ពេល​​​ជន​​​សង្ស័យ​​​​​​រត់​​​ចូល​​​ក្នុង​​​វាល​​​ស្រែ​​​ចម្ងាយ​​​ប្រហែល​​​៥០០ម៉ែត្រ​​​ពី​​​ផ្លូវ​​​ មនុស្ស​​​រាប់​​​រយ​​​នាក់​​​បាន​​​ឡោម​​​ព័ទ្ធ​​​ជន​​​នេះ ហើយ​​​បាន​​​ព្រួត​​​វាយ​​​តែ​​​ម្តង”។

លោក​​​បាន​​​បន្ថែម​​​ថា ក្រុម​​​មនុស្ស​​​​​​បាន​​​វាយ​​​ជន​​​នេះ​​​ដោយ​​​ដំបង​​​ឈើ​​​ថែម​​​ទាំង​​​ដាល់​​​និង​​​ទាត់​​​ធាក់​​​ទៀត​​​ផង។

លោក​​​បាន​​​មាន​​​ប្រសាសន៍​​​ថា “​​​មន្ត្រី​​​នគរបាល​​​ប្រហែល​​​២០នាក់​​​​​​បាន​​​ទៅ​​​ដល់​​​កន្លែង​​​កើត​​​ហេតុ ហើយ​​​បាន​​​បញ្ជូន​​​​​​ជន​​​សង្ស័យ​​​រូប​​​នេះ​​​ទៅ​​​មន្ទីរពេទ្យ។ នៅ​​​ពេល​​​ទៅ​​​ដល់​​​មន្ទីរពេទ្យ​​​ គ្រូពេទ្យ​​​​​​ប្រាប់​​​នគរបាល​​​ថា ជន​​​សង្ស័យ​​​រូប​​​នេះ​​​ស្លាប់​​​បាត់​​​ទៅ​​​ហើយ”។

លោក​​​ ប៉ូលីន បាន​​​មាន​​​ប្រសាសន៍​​​ថា “​​​កាំភ្លើង​​​ដែល​​​ជនសង្ស័យ​​​ប្រើ​​​ក្នុង​​​ការ​​​ប្លន់​​​នេះ​​​មិនទាន់​​​រក​​​ឃើញ​​​នៅឡើយ​​​ទេ”។

លោក​​​បាន​​​មាន​​​ប្រសាសន៍​​​ថា “យើង​​​មិន​​​បាន​​​ចាប់ខ្លួន​​​អ្នក​​​ភូមិ​​​ណា​​​ម្នាក់​​​ទេ ពីព្រោះ​​​មាន​​​មនុស្ស​​​ដល់​​​ទៅ​​​ជាង​​​៣០០នាក់​​​ឯណោះ​​​បាន​​​ចូល​​​រួម​​​ក្នុង​​​ការ​​​វាយ​​​សម្លាប់​​​នេះ”។

លោក មិញ វ៉ាង បាន​​​និយាយ​​​ថា នគរបាល​​​​​​បាន​​​ឆែក​​​ផ្ទះ​​​ជួល​​​របស់​​​ រដ្ឋា នៅ​​​ក្នុង​​​សង្កាត់​​​ចោម​​​ចៅ​​​កាលពី​​​ម្សិលមិញ។

លោក​​​បាន​​​និយាយ​​​ថា “​​​យើង​​​បាន​​​រក​​​ឃើញ​​​ស្រោម​​​កាំភ្លើង​​​ ប៉ុន្តែ​​​​​​យើង​​​រក​​​មិន​​​ឃើញ​​​ជន​​​សង្ស័យ​​​ផ្សេង​​​ទៀត​​​​​​ ឬ​​​​​​ម៉ូតូ​​​ណាមួយ​​​ឡើយ”៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស