30 C
Phnom Penh

លោក ភី ភួន អតីត​​​កង​​​ការ​​​ពារ​​​ ប៉ុល ពត​​​ ស្លាប់​​​ក្នុង​​​អាយុ​​​៦៨ឆ្នាំ

ដោយ ឌឹ ខេមបូឌា ដេលី

បទវិភាគ

លោក រចំ តុន ​ជា​ជន​ជាតិ​ដើម​ភាគ​តិច​ចារ៉ាយ​ដែល​​​ជា​ទាហាន​បដិវត្តន៍​ហៅ​ថា ភី ភួន និង​ជា​កង​ការ​ពារ​របស់​ ប៉ុល ពត អំឡុង​សង្គ្រាម​ស៊ីវិល​​ក្នុង​ទសវត្សរ៍​ឆ្នាំ​១៩៧០នោះ​​​​​ បាន​ស្លាប់​នៅ​ផ្ទះ​របស់​ខ្លួន​​ក្នុង​ខេត្ត​បន្ទាយ​មានជ័យ​កាលពី​ព្រឹក​​​ម្សិល​​​មិញ ក្នុង​អាយុ​៦៨​ឆ្នាំ។

លោក ហ៊ែនរី ឡូកាដ អ្នក​​​សរសេរ​​​ប្រវត្តិ​​​សាស្ត្រ​​​​​កម្ពុជា​​ដែល​បាន​បញ្ចប់​ការ​សរសេរ​ជីវប្រវត្តិ​របស់​លោក រចំ តុន កាលពី​ពេល​ថ្មីៗ​បាន​និយាយ​តាម​ទូរស័ព្ទ​ពី​អតីត​ទីតាំង​រឹងមាំ​នៅ​ស្រុក​ម៉ាឡៃ​ថា ” វា​ជា​កា​រ​​​ស្លាប់​ឆាប់​​​រហ័ស​​​បំផុត​​​​ដោយ​សារ​ជំងឺ​​​ដាច់​សរសៃ​ឈាម​ក្នុង​ខួរក្បាល”។

លោក​បាន​បន្ថែម​ថា ” ពិធី​បុណ្យ​សព​នឹង​​​រៀបចំ​​​​ធ្វើ​នៅ​ថ្ងៃពុធ ដោយសារ​​​​យើង​រង់ចាំ​ក្រុម​គ្រួសារ​របស់​គាត់​មកពី​ខេត្ត​រតនគិរី”។

យោង​តាម​ជីវប្រវត្តិ​ ប៉ុល ពត ឆ្នាំ​២០០៥​ របស់​លោក ហ្វីលីព​ សត បាន​ឲ្យ​ដឹង​ថា លោក រចំ តុន គឺ​ជា​ទាហាន​បដិវត្តន៍​​ម្នាក់​​​ក្នុង​​​ចំណោម​​​ទាហាន​​​បដិវត្តន៍​​​ដំបូង​គេ​​​​ដែល​បាន​​​ចូល​ក្រុង​ភ្នំពេញ​​កាលពី​ថ្ងៃ​ទី​១៧ ខែ​មេសា ឆ្នាំ​១៩៧៥​ រយៈ​ពេល​៤០​ឆ្នាំ​មក​ហើយ​គិត​មក​ដល់​ថ្ងៃ​​​សុក្រ ជា​មនុស្ស​សំខាន់​ក្នុង​ការ​រៀបចំ​ការ​កាន់​កាប់​រដ្ឋធានី​របស់​ខ្មែរ​ក្រហម​។

លោក ឡូកាដ បាន​មាន​ប្រសាសន៍​ថា ទំនាក់​ទំនង​របស់​​​លោក ភី ភួន ជា​មួយ​ ប៉ុល ពត ចាប់​តាំង​ពី​ពេល​ដែល​ ប៉ុល​ ពត បាន​មក​ដល់​ខេត្ត​រតនគិរី​កាល​​​ពីចុង​ឆ្នាំ​១៩៦៧​ ហើយ​​លោក​ត្រូវ​បាន​​​តែង​​​តាំង​ជា​ប្រធាន​កង​ការ​ពារ​”។

លោក​បាន​មាន​ប្រសាសន៍​ថា ” អំឡុង​សង្គ្រាម​ស៊ីវិល ​គាត់​មាន​ទំនាក់​ទំនង​ជាមួយ ប៉ុល ពត អៀង សារី និង​ ខៀវ សំផន បើ​ទោះ​ជា​គាត់​បដិសេធ​ក៏ដោយ​ នៅ​ពេល​នោះ​ពួកគេ​បាន​​​ជួប​ប្រជុំ​​​គ្នា​ជា​បន្ត​បន្ទាប់”។

ដោយ​សំដៅ​ដល់​​រដ្ឋមន្ត្រី​ការ​ពារ​ជាតិ​នៃ​របប​កម្ពុជា​ប្រជាធិបតេយ្យ​ លោក​បាន​បន្ថែម​ថា ” នៅ​​​ពេល​រណ​​​សិរ្ស​​​នេះ​​​បាន​ចូល​មក​​​កៀក​​​​ក្រុង​​​​ភ្នំពេញ គាត់​បាន​គ្រប់​គ្រង​ពួក​ឧទ្ទាម​ ហើយ​ធ្វើ​ការ​យ៉ាង​ជិត​ស្និទ្ធ​ជាមួយ​ សុន សេន”។

បន្ទាប់ពី​ខ្មែរ​ក្រហម​កាន់​កាប់​អំណាច លោក រចំ តុន បាន​​ធ្វើ​ជា​ប្រធាន​ភ័ស្តុភារ​​​នៅ​​ B-1​របស់​ក្រសួង​ការ​បរទេស​ ដែល​បុគ្គលិក​ក្រសួង​បាន​រស់​នៅ​ និង​ធ្វើ​ការ​អំឡុង​របប​នោះ។

នៅ​​​ពេល​កង​ទ័ព​វៀតណាម​បាន​ឈ្លាន​ពាន​កាលពី​ខែ​មករា ឆ្នាំ​១៩៧៩ លោក រចំ តុន បាន​​​ជម្លៀស​​​​ព្រះអង្គម្ចាស់​ នរោត្តម សីហនុ ចេញពី​ក្រុង​ភ្នំពេញ​ទៅ​កន្លែង​សុវត្ថិភាព​នៅ​ព្រំដែន​ថៃ។

យោង​​​តាម​​​លោក ឡូកាដ បាន​​​ឲ្យ​​​ដឹង​​​ថា អតីត​ទាហាន​បដិវត្ដន៍​រូប​នេះ​គឺ​ជា​មេបញ្ជាការ​កង​វរ​​​សេនា​​​តូច​អំឡុង​​​សង្គ្រាម​​​ស៊ីវិល​​​​ទសវត្សរ៍​ឆ្នាំ​១៩៨០ ប្រឆាំង​រដ្ឋាភិបាល​ក្រុង​ភ្នំពេញ ហើយ​បាន​ក្លាយ​ជា​អភិបាល​រង​ស្រុក​ម៉ាឡៃ​បន្ទាប់​ពី​ខ្មែរ​ក្រហម​បាន​ចុះ​ចូល​កាល​ពី​ទសវត្សរ៍​ឆ្នាំ​១៩៩០​។

កាលពី​ខែ​កក្កដា ឆ្នាំ​២០១២ លោក រចំ តុន បាន​​​បណ្តាល​​​ឲ្យ​​​មាន​​​ភាព​​​ចម្រូង​ចម្រាស​នៅ​ពេល​លោក​បាន​ផ្ដល់​សក្ខីកម្ម​នៅ​សាលា​ក្ដី​ខ្មែរ​ក្រហម​ថា លោក ហោ ណាំហុង រដ្ឋមន្ត្រី​ក្រសួង​ការ​បរទេស​បច្ចុប្បន្ន​ទទួល​បន្ទុក​​ពន្ធនាគារ​បឹង​​ត្របែក។

លោក ហោ ណាំហុង បាន​ចេញ​សេចក្ដី​ថ្លែង​ការ​ណ៍ដោយ​បង្ខំ​មួយ​ច្រាន​ចោល​ការ​អះអាង​នេះ ហើយ​ក្នុង​រយៈ​ពេល​ប៉ុន្មាន​ថ្ងៃ​ប៉ុណ្ណោះ លោក រចំ តុន បាន​ប្រាប់​អ្នក​យក​ព័ត៌​​​មាន​ថា លោក​បាន​ពិចារណា​ឡើង​វិញ​ ហើយ​ចង់​មិន​ទទួល​ស្គាល់​ពាក្យ​សម្ដី​របស់​លោក​​​​​​។

លោក ឡូកាដ បាន​មាន​ប្រសាសន៍​ថា លោក​មាន​គម្រោង​ធ្វើ​ដំណើរ​ជា​មួយ​លោក រចំ តុន ពី​ស្រុក​ម៉ាឡៃ​ទៅ​ខេត្ត​កំណើត​របស់​​​​លោក គឺ​ខេត្ត​រតនគិរី​នៅ​ក្នុង​រយៈ​ពេល​ប៉ុន្មាន​ថ្ងៃ​ខាង​មុខ​នេះ បន្ទាប់ពី​ចំណាយ​ពេល​ជាច្រើន​ខែ​សម្ភាស​ពី​ប្រវត្តិ​ផ្ទាល់​ខ្លួន​​​របស់​​​គាត់​​​។

លោក​បាន​មាន​ប្រសាសន៍​ថា ” ខ្ញុំ​ទើប​តែ​បាន​បញ្ចប់​​ការ​សរសេរ​ជីវប្រវត្តិ​របស់​គាត់ ហើយ​ខ្ញុំ​បាន​សុំ​ឲ្យ​គាត់​ធ្វើ​ការ​វាយ​តម្លៃ​ផង​ដែរ ប៉ុន្តែ​ឥឡូវ​នេះ​មិន​អាច​ឡើយ​”។

លោក រចំ តុន បាន​ស្លាប់​ចោល​ប្រពន្ធ​ និង​កូន​បួន​នាក់​ដែល​រស់​នៅ​ក្នុង​ស្រុក​ម៉ាឡៃ និង​ស្រុក​អន្លង់វែង​ ខេត្ត​ឧត្ដរមានជ័យ ជា​អតីត​ទីតាំង​រឹងមាំ​មួយ​​​ទៀត​​​របស់​ខ្មែរ​ក្រហម​៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស