ក្រុមអ្នកគាំទ្រគណបក្សសង្គ្រោះជាតិបានជួបជុំគ្នានៅខាងក្រៅទីស្នាក់ការកណ្ដាលរបស់គណបក្សនេះនៅក្នុងរាជធានីភ្នំពេញកាលពីរសៀលម្សិលមិញ ដើម្បីទទួលស្វាគមន៍សកម្មជនគណបក្សប្រឆាំងប្រាំរូប និងអតីតព្រះសង្ឃបីអង្គដែលបានជាប់ពន្ធនាគារក្នុងរយៈពេលប៉ុន្មានខែថ្មីៗនេះតាមការចោទប្រកាន់ដែលជាទូទៅគេចាត់ទុកថាជារឿងនយោបាយ និងដែលត្រូវបានដោះលែងឲ្យនៅក្រៅឃុំក្រោយតុលាការបើកសវនាការជំនុំជម្រះកាលពីព្រឹកម្សិលមិញ។
អំឡុងសវនាការ ចៅក្រមបានយល់ព្រមដោះលែងសកម្មជនទាំងនេះនៅមុនថ្ងៃបុណ្យចូលឆ្នាំខ្មែរប្រពៃណីជាតិដែលចាប់ផ្ដើមនៅថ្ងៃនេះ ពីព្រោះការឃុំខ្លួនពួកគាត់មិនចាំបាច់ឡើយសម្រាប់ការបន្តនីតិវិធីប្រឆាំងពួកគាត់។
ការដោះលែងសកម្មជនទាំងប្រាំបីរូបនេះកើតមានឡើងពីរថ្ងៃប៉ុណ្ណោះក្រោយពីសកម្មជនសិទ្ធិដីធ្លី១០រូបដែលត្រូវបានចាប់ខ្លួនអំឡុងការតវ៉ាកាលពីខែវិច្ឆិកា ត្រូវបានដោះលែងពីពន្ធនាគារក្រោយទទួលបានព្រះរាជទានលើកលែងទោស និងកើតមានឡើងមិនដល់១សប្ដាហ៍ផងទេក្រោយពីគណបក្សសង្គ្រោះជាតិ និងគណបក្សប្រជាជនកម្ពុជា បានសម្រេចជាចុងក្រោយលើការជ្រើសរើសសមាសភាពនៃគណៈកម្មាធិការជាតិរៀបចំការបោះឆ្នោត (គ.ជ.ប.)ថ្មី។
លោក មាជ សុវណ្ណរ៉ា ដែលជាមន្ត្រីរបស់គណបក្សសង្គ្រោះជាតិ បានដើរមុខគេកាត់ក្រុមអ្នកគាំទ្រដែលឈរជាជួរអមសងខាងនៅទីស្នាក់ការកណ្តាលរបស់គណបក្សនេះក្នុងខណ្ឌមានជ័យ កាលពីរសៀលម្សិលមិញ។ នៅពេលលោក មាជ សុវណ្ណរ៉ា ដើរទៅដល់ខាងចុងជួរ លោក កឹម សុខា អនុប្រធានគណបក្សសង្គ្រោះជាតិបានចាប់លោកឱប មុនពេលលោក សម រង្ស៊ី ប្រធានគណបក្សនេះលើកដៃដាក់លើក្បាលរបស់លោក។
លោក សម រង្ស៊ី បានថ្លែងទៅកាន់ក្រុមអ្នកចូលរួមថា ” ថ្ងៃនេះគឺជាជោគជ័យដ៏ធំធេង។ ព្រះសង្ឃបីអង្គ សកម្មជនដីធ្លីមកពីបឹងកក់ និង [សកម្មជន] គណបក្សសង្គ្រោះជាតិត្រូវបានដោះលែងពីពន្ធនាគារ ហើយមិនយូរទេ បញ្ហាទាំងអស់នេះនឹងបញ្ចប់។ ជួសមុខឲ្យលោកអនុប្រធាន កឹម សុខា និងរូបខ្ញុំក្នុងនាមជាថ្នាក់ដឹកនាំគណបក្សសង្គ្រោះជាតិ មិនដែលចាញ់ការគំរាមកំហែងរបស់អ្នកណាឡើយ”។
ទោះបីជាទទួលបានការដោះលែងឲ្យមានសេរីភាពក្ដី ក៏សកម្មជនទាំងប្រាំបីរូបនេះនៅតែប្រឈមការចោទប្រកាន់ដដែល រួមមានការចូលរួមក្នុងកុបកម្ម ការបង្កអំពើហិង្សាដោយចេតនា ការរារាំងមន្ត្រីរាជការសាធារណៈ និងការចូលរួមក្នុងសមាគមទុច្ចរិត។ លោក សម រង្ស៊ី បានមានប្រសាសន៍តាមទូរស័ព្ទកាលពីម្សិលមិញថា ពេលនេះគណបក្សរបស់លោកកំពុងព្យាយាមស្វះស្វែងធ្វើយ៉ាងណាឲ្យតុលាការដកការចោទប្រកាន់ទាំងនេះចេញ។
ឥស្សរជនគណបក្សប្រឆាំងដែលត្រូវបានដោះលែង រួមមានលោក មាជ សុវណ្ណរា៉ លោក ស៊ុំ ពុទ្ធី ក្រុមប្រឹក្សាខណ្ឌច្បារអំពៅ និងសកម្មជនគណបក្សផ្សេងទៀតដូចជា លោក ទេព ណារិន លោក អ៊ុក ពេជ្រសំណាង និងលោក កែ ឃីម ដែលត្រូវបានចាប់ខ្លួនជុំវិញការតវ៉ាមួយរបស់គណបក្សប្រឆាំងកាលពីខែកក្កដា ដែលបានផ្ទុះអំពើហិង្សាវាយតប់គ្នារវាងក្រុមអ្នកគាំទ្រគណបក្សសង្គ្រោះជាតិ និងសន្តិសុខខណ្ឌ។ ចំណែកឯអតីតព្រះសង្ឃបីអង្គដូចជាព្រះតេជគុណ សឿង ហៃ ព្រះតេជគុណ ឃិត វណ្ណៈ និងព្រះតេជគុណ សាង កុសល ត្រូវបានចាប់ផ្សឹកបញ្ជូនទៅពន្ធនាគារអំឡុងការតវ៉ាកាលពីខែវិច្ឆិកា។
ក្រោយហេតុការណ៍វាយតប់គ្នាកាលពីខែកក្កដា លោកស្រី មូរ សុខហួរ ប្រធានកិច្ចការសាធារណៈរបស់គណបក្សសង្គ្រោះជាតិ និងតំណាងរាស្ត្រប្រាំមួយរូបទៀតត្រូវបានចាប់ខ្លួនបញ្ជូនទៅពន្ធនាគាររយៈពេលប្រហែល១សប្ដាហ៍ មុនពេលទទួលបានការដោះលែងវិញ ពោលគឺតែប៉ុន្មានម៉ោងប៉ុណ្ណោះក្រោយពីលោកនាយករដ្ឋមន្ត្រី ហ៊ុន សែន និងលោក សម រង្ស៊ី បានចរចាបញ្ចប់ការធ្វើពហិការមិនចូលសភារយៈពេល១០ខែរបស់គណបក្សប្រឆាំង។
ការដោះលែងជាថ្មីម្ដងទៀតកាលពីម្សិលមិញ កើតមានឡើងក្រោយបញ្ចប់ការចរចាថ្នាក់កំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិជុំវិញការបង្កើត គ.ជ.ប.ថ្មី។
ពេលទទួលបានការដោះលែងពីពន្ធនាគារព្រៃសនៅវេលាម៉ោងប្រហែល១និង៣០នាទីរសៀល សកម្មជនទាំងនេះទទួលបានការស្វាគមន៍ពីអ្នកគាំទ្រប្រហែល១០០នាក់ រួមមានទាំងលោក ហូរ វណ្ណ តំណាងរាស្ត្រមកពីគណបក្សសង្គ្រោះជាតិ និងលោក វន់ ពៅ ដែលជាប្រធានសហជីពផងដែរ។
លោក មាជ សុវណ្ណរ៉ា ដែលមានសញ្ជាតិអាមេរិក បានថ្លែងទៅកាន់ក្រុមអ្នកយកព័ត៌មានថា លោកមានការប្រុងប្រយ័ត្នណាស់ដោយខ្លាចរូបលោកត្រូវគេប្រើប្រាស់ជាឧបករណ៍តថ្លៃខាងនយោបាយ។ លោកមានប្រសាសន៍ទៀតថា ” បញ្ហានយោបាយត្រូវតែដោះស្រាយតាមរយៈនយោបាយ ដូច្នេះខ្ញុំមិនហា៊ននិយាយអ្វីបំពានឆន្ទានុសិទ្ធិរបស់តុលាការទេ ប៉ុន្តែយើងអាចមើលដឹងពីវិធីដែលប្រទេសរបស់យើងដោះស្រាយ [បញ្ហានេះ] ”។
អតីតព្រះសង្ឃទាំងបីអង្គបានចេញពីពន្ធនាគារដោយគ្រងស្បង់ចីពរ ទោះបីជាពួកគាត់ត្រូវបានចាប់ផ្សឹកមុនពេលបញ្ជូនទៅពន្ធនាគារក្ដី។ ព្រះតេជគុណ សឿង ហៃ បានមានសង្ឃដីកាថា ខណៈជាប់ពន្ធនាគារ ព្រះអង្គ និងព្រះសង្ឃពីរអង្គទៀតមិនដែលប្រព្រឹត្តខុសធម៌វិន័យរបស់ព្រះពុទ្ធសាសនាឡើយ រួមទាំងការមិនឆាន់ចង្ហាន់បន្ទាប់ពីព្រះអាទិត្យជ្រេផងដែរ។ ព្រះអង្គបានមានសង្ឃដីកាបន្តថា ” យើងជាមនុស្សបរិសុទ្ធ មិនបានធ្វើអ្វីខុសទេ”។
នៅពេលទាក់ទងតាមទូរស័ព្ទ ព្រះញាណវង្ស ឃឹម សន ព្រះមេគណរាជធានីភ្នំពេញនៃគណៈមហានិកាយបានមានថេរដីកាថា ព្រះអង្គមិនដឹងថាហេតុអ្វីបានជាអតីតព្រះសង្ឃទាំងនេះចេញពីពន្ធនាគារទាំងគ្រងស្បង់ចីពរនោះទេ។ មុនពេលបដិសេធមិនធ្វើអត្ថាធិប្បាយបន្ថែមទៀត ព្រះអង្គបានលើកឡើងថា ” ពួកគេគួរតែទៅវត្តជួបមន្ត្រីសង្ឃដើម្បីបួសជាសង្ឃឡើងវិញ”។
ក្នុងចំណោព្រះសង្ឃសកម្មជនទាំងបីអង្គដែលសុទ្ធតែជាកម្ពុជាក្រោម ព្រះេតជគុណ សឿង ហៃ មានចរិតហិង្សាជាងគេ ដោយព្រះអង្គជាដឹកនាំការដុតទង់ជាតិវៀតណាមអំឡុងបាតុកម្មនៅខាងមុខស្ថានទូតវៀតណាមក្នុងរាជធានីភ្នំពេញកាលពីឆ្នាំមុន។
លោក ថាច់ សេដ្ឋា មន្ត្រីជាន់ខ្ពស់របស់គណបក្សសង្គ្រោះជាតិ និងជាប្រធានសហគមន៍ខ្មែរកម្ពុជាក្រោមបានមានប្រសាសន៍ទៅកាន់អ្នកគាំទ្រគណបក្សសង្គ្រោះជាតិប្រមាណ៤០០នាក់កាលពីម្សិលមិញថា លោករំពឹងថា ព្រះសង្ឃទាំងនេះនឹងបន្តសកម្មភាពសង្គមរបស់ព្រះអង្គជាបន្តទៅទៀត ទោះបីជាធ្លាប់ជាប់ពន្ធនាគារអស់ប៉ុន្មានខែក្ដី។ លោកបានបន្តថា ” ខ្ញុំគិតថា ពួកគាត់នឹងនៅតែសកម្មដូចពីមុន។ វាជាសិទ្ធិរបស់ពួកគាត់”។
លោក នី ចរិយា ប្រធានផ្នែកឃ្លាំមើលនៅអង្គការសិទ្ធិមនុស្សក្នុងស្រុកអាដហុក បានមានប្រសាសន៍ថា ស្មារតីលើកលែងទោសតាមផ្លូវតុលាការក្នុងរយៈពេលប៉ុន្មានថ្ងៃថ្មីៗនេះ អាចនឹងប្រែប្រួលយ៉ាងឆាប់រហ័សក្នុងកណ្ដាប់ដៃគណបក្សប្រជាជនកម្ពុជាកំពុងកាន់អំណាច។
លោកលើកឡើងថា ” ប្រសិនបើអ្នកនយោបាយធ្វើឲ្យឡើងកម្ដៅម្ដងទៀត វានឹងមានផលប៉ះពាល់។ ប៉ុន្តែប្រសិនបើកម្ដៅនយោបាយនៅតែដូចថ្ងៃនេះ ខ្ញុំជឿថា ការដោះលែងឲ្យនៅក្រៅឃុំជាបណ្ដោះអាសន្ននេះ គឺស្មើនឹងការលើកលែងការចោទប្រកាន់”៕ សុខុម (រាយការណ៍បន្ថែមដោយ Matt Blomberg)