31 C
Phnom Penh

ទេវតា​ព្រះនាម​ រាគ្យស​ទេវី​ សោយ​លោហិត​នឹងយាង​​​ចុះ​មក​ថែរក្សា​ប្រទេស​កម្ពុជា​ឆ្នាំនេះ​

ដោយ ឌឹ ខេមបូឌា ដេលី

បទវិភាគ

យោង​តាម​មហា​សង្ក្រាន្ត​ឆ្នាំថ្មី​បាន​ឲ្យ​ដឹង​ថា ទេវតា​ដែល​ទ្រង់​សោយ​លោហិត​នឹង​យាង​ចុះ​មក​ដល់​ប្រទេស​កម្ពុជា​នៅ​ថ្ងៃ​នេះនោះ​ អាច​បណ្ដាល​ឲ្យ​មាន​មនុស្ស​ស្លាប់​ដោយ​នឹក​ស្មាន​មិន​ដល់​ អគ្គិភ័យ​កើន​ឡើង និង​តម្លៃ​អង្ក​រឡើង​ថ្លៃ។

ដោយ​ត្រូវ​បាន​ចេញ​ផ្សាយ​រៀង​រាល់​ឆ្នាំ​ចាប់​តាំង​ពី​ឆ្នាំ​១៩៩៨មក​ ដោយ​ក្រសួង​ធម្មការ​ និង​សាសនា​ មហាសង្ក្រាន្ត​ព្យាករពី​អាកាសធាតុ ជោគ​ជតា​រាសី​ និង​ដំបូន្មាន​សំខាន់ៗ​សម្រាប់​មនុស្ស​គ្រប់រូប​​ក្នុង​ការ​សម្រេច​ចិត្ត​ពី​​បញ្ហា​ធំៗ។

មហា​សង្ក្រាន្ត​ក៏​បានពន្យល់​ពី​បុគ្គលិក​លក្ខណៈ​របស់​ទេវតា​ឆ្នាំ​ថ្មី​ព្រះនាម រាគ្យសទេវី ផងដែរ​ដែល​ភក្សាហារ​ទ្រង់​សោយ​លោហិត។

លោក អុឹម បូរិន ប្រធាន​ស្រាវជ្រាវ​នៃ​គណៈកម្មាធិការ​ជាតិ​រៀបចំ​បុណ្យ​ជាតិ​ និង​អន្តរ​ជាតិ​ និង​ជា​អ្នក​សរសេរ​មហាសង្ក្រាន្ត​បាន​មាន​ប្រសាសន៍​ថា ” នៅ​ពេល​ខ្ញុំ​​ព្យាករ​សម្រាប់​ឆ្នាំ​២០១៥​ ខ្ញុំ​ឃើញ​ថា ព្រះអាទិត្យ​ពណ៌​ក្រហម ដែល​មាន​ន័យ​ថា នៅក្នុង​ប្រទេស​កម្ពុជា​នឹង​មាន​អគ្គិភ័យ​​ច្រើន​ពេញ​មួយ​ឆ្នាំ​…។ សេដ្ឋកិច្ច និង​ផល​ដំណាំ​នឹង​​មាន​ស្ថិរភាព​ដដែល ប៉ុន្តែ​​តម្លៃ​អង្ករ​នឹង​​ឡើងថ្លៃ”។

លោក បូរិន ដែល​អះអាង​ថា បាន​ព្យាករពី​ហេតុ​ការណ៍​សំខាន់​ៗ​ដូច​ជា​ការ​វាយ​ប្រហារ​កាល​ពី​ឆ្នាំ​២០០០​លើ​ក្រសួង​ការ​ពារ​ជាតិ និង​ទីស្ដីការ​គណៈរដ្ឋមន្ត្រី​ពី​សំណាក់​កង​ទ័ព​សេរី​ជាតិ​កម្ពុជា​បាន​មាន​ប្រសាសន៍​ថា នៅ​ឆ្នាំ​នេះ​សំណាង​ល្អ​នឹង​មាន​ដល់​អ្នក​ដែល​តស៊ូ​ពុះពារ​។

លោក​បាន​បន្ថែម​ថា ” ខ្ញុំ​សូម​ណែនាំ​ប្រជាពលរដ្ឋ​ទាំង​អស់​ឲ្យ​ចៀសវាង​ទង្វើ​ប្រាំ​​យ៉ាង​ គឺ​ចៀស​វាង​ការ​សម្លាប់​សត្វ ការ​លួច​ទ្រព្យ​អ្នក​ដទៃ ការ​ប្រព្រឹត្ត​ខុស​ក្នុង​ផ្លូវ​កាម ការ​ផឹក​សុរា និង​មេរ័យ និង​ការ​លេង​ល្បែង​ស៊ីសងគ្រប់ប្រភេទ។ ប្រសិន​បើ​ប្រជាពល​រដ្ឋ​គ្រប់​រូប​នៅ​ឲ្យ​ឆ្ងាយ​ពី​ទង្វើ​មិន​ល្អ​ទាំង​នេះ សំណាង​ល្អ​នឹង​កើត​មាន​ដល់​​ពួកគាត់​ជាមិន​ខានឡើយ​​”។

ចំពោះ​អ្នក​ដែល​មាន​គម្រោង​រៀប​អាពាហ៍ពិពាហ៍​នៅ​ឆ្នាំ​នេះ មហាសង្ក្រាន្ត​ឲ្យ​គិត​តាម​រូប​មន្ត​គណិត​វិទ្យា​ ដើម្បី​កំណត់​ថា​តើ​ការ​រៀបការ​នឹង​ជួប​ប្រសព្វ​​ជោគ​ជ័យ​ឬយ៉ាង​ណា​នោះ។

សូម​យក​អាយុ​កូន​ប្រុស​ និង​កូនស្រី​ដែល​មាន​គម្រោង​រៀប​អាពាហ៍ពិពាហ៍​បូក​បញ្ចូល​គ្នា ហើយ​យក​លទ្ធផល​ចែក​នឹង​៣។ ប្រសិន​បើ​សំណល់​ឃើញ​​១ គឺ​អាច​រៀបការ​បាន ប្រសិន​បើ​សំណល់​ឃើញ​២​ ការ​រៀបអាពាហ៍​ពិពាហ៍​ក៏​ល្អ​ដែរ ប៉ុន្តែ​ប្រសិន​បើ​សំណល់​ស្មើ​០​ មិន​អាច​រៀបការ​បាន​ជា​ដាច់​ខាត​ ពីព្រោះ​ពួកគេ​នឹង​បែក​បាក់​គ្នា​ក្នុង​ពេល​ដ៏ខ្លី​​”។

​មហាសង្ក្រាន្ត​ក៏​បាន​ប្រាប់​ពី​របៀប​ទទួល​ទេវតា​ព្រះនាម រាគ្យសទេវី ដែល​នឹង​មក​ជំនួស​ទេវតា​ឆ្នាំ​ចាស់​នៅ​ម៉ោង​២​រសៀល​ថ្ងៃ​នេះផងដែរ​ ​ដោយ​ព្រហស្ត​ស្ដាំ​ទ្រង់​ត្រីសូល៍ និង​ព្រហស្ត​ឆ្វេង​ទ្រង់​ធ្នូ​ គង់​លើ​ខ្នង​អស្សតរ​ (សេះ​) ជា​ពាហនៈ​។

មហាសង្ក្រាន្ត​ក៏​បាន​លើក​ឡើង​ផង​ដែរ​ថា ” អ្នក​ត្រូវ​មាន​រណ្តាប់​​​ទឹក​អប់​ពីរ​ដប ទៀន​៥​ធូប​៥ ផ្កា៥ ចេក ផ្លែឈើ​១១​មុខ និង​ទឹក​២​កែវ​ផង​ដែរ”។

ប៉ុន្តែ​ការ​ព្យាករ​​ខុស​ប្លែក​ពី​អ្វី​ដែល​ទេវតា​​ព្រះនាម រាគ្យសទេវី នឹង​នាំ​មក​ពិត​ប្រាកដ។ នៅ​​​ផ្សារ​បឹង​កេងកក​មួយ​ផ្នែក​ដែលពោរពេញដោយ​ធូប​ កាលពី​សប្ដាហ៍​មុន អ្នកស្រី ពិល សុធី អាយុ​៥១​ឆ្នាំ ដែល​បាន​ព្យាករ​ពី​អនាគត​ចាប់​តាំង​ពី​អ្នកស្រី​មាន​អាយុ​១៨​ឆ្នាំ​មក​នោះ បាន​និយាយ​ថា អ្នក​ស្រី​មិន​យល់​ស្រប​នឹង​ការ​ព្យាករជា​ច្រើន​​នៅ​ក្នុង​មហាសង្ក្រាន្ត​ឡើយ​។

យោង​តាម​អ្នកស្រី សុធី បាន​ឲ្យ​ដឹង​ថា ការ​សោយ​លោហិត​របស់​ទេវតា​ព្រះនាម រគ្យសទេវី ​មិន​មែន​ជា​ផល​អវិជ្ជមាន​ទេ​ ប៉ុន្តែ​វា​ជា​សញ្ញា​នៃ​កម្លាំង​ថាមពល​ទៅ​វិញ​ទេ។

អ្នកស្រី​ សុធី បាន​និយាយ​ថា ” ខ្ញុំ​គិត​ថា វា​នឹង​ធ្វើ​ឲ្យ​ប្រជាពល​រដ្ឋ​កម្ពុជា​សប្បាយ​រីក​រាយ​ជាង​ឆ្នាំ​មុន ពីព្រោះ​​ទេវតា​សោយ​លោហិត ដូច្នេះ​មាន​ន័យ​ថា ប្រជាពលរដ្ឋ​នឹង​មាន​កម្លាំង​ពលំខ្លាំង​ក្លា និង​មាន​​ការ​​​ចម្រើនលូតលាស់​​បន្ថែម​ទៀត​នៅ​ក្នុង​របរអាជីវកម្ម​របស់​ខ្លួន។ ទេវតា​នឹង​នាំ​មក​នូវ​កម្លាំង​ពលំ​ដល់​ប្រជាជន​កម្ពុជា​”។

នៅ​តូប​ក្បែរ​ខាង​នោះ​ដែរ អ្នកស្រី ឈិត មុំ អាយុ​៥១​ឆ្នាំ ដែល​អះអាង​ថា បាន​ព្យាករ​ពី​ការ​ផ្អើល​​រត់​ជាន់​គ្នា​នៅ​ស្ពាន​កោះពេជ្រ​ដែល​បាន​សម្លាប់​មនុស្ស​៣៥៣​នាក់​កាលពី​ឆ្នាំ​២០១០នោះ​ បាន​និយាយ​ថា ព្រលឹង​បាន​ចូល​សណ្ឋិត​ក្នុង​ខ្លួន​របស់​អ្នកស្រី​ ហើយ​បាន​និយាយមកកាន់​អ្នកស្រី​​អំពី​អនាគត​នឹង​កើត​ឡើង​។

អ្នកស្រី មុំ​ បាន​ដាស់តឿន​​ប្រជាពលរដ្ឋ​ទាំង​​​អស់​​ឲ្យ​ប្រុង​ប្រយ័ត្ន​បន្ថែម​ទៀត​នៅ​ឆ្នាំ​នេះ ពីព្រោះ​ទេវតា​​ព្រះនាម រាគ្យសទេវី នឹង​មិន​ការ​ពារយើង​ពីការ​ស្លាប់ឡើយ​។

អ្នកស្រី​បាន​បន្ថែម​ថា ” មនុស្ស​ជា​ច្រើននឹង​ស្លាប់ ហើយ​ទេវតា​មិន​អាច​ការ​ពារ​ពួក​យើង​បាន​ទេ ពីព្រោះ​ទេវតា​សោយ​លោហិត។ មនុស្ស​ទាំង​អស់​ត្រូវ​រួសរាយ​រាក់​ទាក់​ដាក់​គ្នា​​ឲ្យ​បាន​ច្រើន ហើយ​ដោះ​ស្រាយ​បញ្ហា​ដោយ​ការ​ពិភាក្សា​គ្នា​ ពីព្រោះ​​ទេវតាមិន​​​មើលថែ​​​​យើង​គ្រប់​ពេល​វេលានោះ​​ឡើយ​”៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស