30 C
Phnom Penh

ស្ថានីយ​ទូរទស្សន៍​របស់​គណបក្ស​ប្រឆាំង​នឹង​បើក​ដំណើរ​ការ​នៅ​ក្នុង​ឆ្នាំ​នេះ​

ដោយ ឌឹ ខេមបូឌា ដេលី

បទវិភាគ

លោក សម រង្ស៊ី មេដឹកនាំ​គណបក្ស​ប្រឆាំង​បាន​លើក​ឡើង​កាលពី​ម្សិលមិញ​ថា ​ស្ថានីយ​ទូរទស្សន៍​​ដែលមាន​ទំនាក់​ទំនង​ជាមួយ​គណបក្ស​ប្រឆាំង​ជាលើក​ដំបូង​នៅ​កម្ពុជា​ នឹង​ចាប់​ផ្ដើម​ធ្វើ​ការ​ផ្សាយទូទាំង​ប្រទេស​នៅ​​ត្រឹម​ដំណាច់​ឆ្នាំ​នេះ។

លោក សម រង្ស៊ី បាន​មាន​ប្រសាសន៍​ដោយ​​ពន្យល់​​ពី​ស្ថានីយ​ទូរទស្សន៍​នេះ​​​​នឹង​​ជា​ការ​ផ្ដោត​ដ៏​សំខាន់​របស់​គណបក្ស​សង្គ្រោះ​ជាតិ​ បន្ទាប់ពី​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.)ថ្មី​ ដែល​ត្រូវ​បាន​ធ្វើ​កំណែទម្រង់​នោះ​បាន​ចាប់​ផ្ដើម​ដំណើរ​ការ​កាលពី​សប្ដាហ៍​មុន​ថា ” វា​នឹង​ចាប់​ផ្ដើម​នៅ​មុន​ដំណាច់​ឆ្នាំ​នេះ”។

លោក​បាន​មាន​ប្រសាសន៍​បន្ថែម​ថា ” យើង​កំពុង​តែ​ស្វែង​រក​ជម្រើស​បច្ចេកទេស​មួយ​ចំនួន។ មួយ​គឺ​ត្រូវ​ជួល​​ឧបករណ៍​​ជាជាង​បង្កើត​ដោយ​ខ្លួន​ឯង។ ឧបករណ៍​ខ្លះ ឬ​​អគារ​ជាដើម​អាច​ជួល​គេ​ ដើម្បី​​ធ្វើ​យ៉ាង​ណា​ឲ្យ​យើង​អាច​ធ្វើ​ការ​ផ្សាយ​ត្រឹម​មុន​ដំណាច់​ឆ្នាំនេះបាន​។ វា​មាន​ពីរ​តំបន់ តំបន់​ក្រុង​យើង​នឹង​ប្រើ​ខ្សែកាប​អ៊ុបទិក ហើយ​រលក​សញ្ញា​នេះ​​នឹង​​​មាន​លក្ខណៈ​ជា​ Digital។ រីឯ​នៅ​តំបន់​ជន​បទវិញ គឺ​យើង​នៅ​ប្រើ​តាម​ប្រព័ន្ធ​​អាណាឡូក នៅ​ឡើយ។ យើង​បាន​ស្នើ​ឲ្យ​អ្នក​បច្ចេកទេស​​​រក​ជម្រើស​​ដ៏ល្អ​បំផុត​ដែល​អាច​ទៅ​រួច”។

ប្រព័ន្ធ​ផ្សព្វ​ផ្សាយ​នៅ​ក្នុង​ប្រទេស​កម្ពុជា​​បច្ចុប្បន្ន​ភាគ​ច្រើន​​មាន​ទំនាក់​ទំនង​ជាមួយ​​​គណបក្ស​ប្រជាជន​កម្ពុជា​ ឬ​គ្រប់​គ្រង​ទាំង​ស្រុង​​ដោយ​សមាជិក​របស់​ខ្លួន​ រួម​ទាំង​កូនស្រី​របស់​​លោក​នាយក​រដ្ឋមន្ត្រី ហ៊ុន សែន ផង​ដែរ។

គណបក្ស​ប្រឆាំង​ត្រូវ​បាន​រារាំង​មិន​ឲ្យ​ធ្វើ​ការ​ផ្សព្វ​ផ្សាយ​តាម​ប្រព័ន្ធ​ផ្សព្វ​ផ្សាយ​នានា​អំឡុង​ការ​បោះ​ឆ្នោត​កាលពី​ឆ្នាំ​កន្លង​ទៅ​ ហើយ​​ការ​ទទួល​បាន​ការ​សន្យា​ផ្ដល់​អាជ្ញាប័ណ្ណ​ទូរទស្សន៍​​គឺ​ដោយសារ​តែ​មាន​កិច្ច​ព្រមព្រៀង​នយោបាយ​ ដែល​លោក ហ៊ុន សែន និង​លោក សម រង្ស៊ី​ បាន​ព្រមព្រៀង​គ្នា​កាលពី​ឆ្នាំ​មុន​។

លោក សម រង្ស៊ី បាន​លើក​ឡើង​​ទៀត​ថា ឥឡូវ​នេះ​យុទ្ធនាការ​រៃអង្គាស​ប្រាក់​បាន​ចាប់​ផ្ដើម​ហើយ​ ដើម្បី​ជួយ​ឲ្យ​មាន​ការ​បើក​ស្ថានីយ​ទូរទស្សន៍​​ដែល​មាន​ទំនាក់​ទំនង​ជាមួយ​គណបក្ស​ប្រឆាំង និង​ដែល​មាន​ឈ្មោះ​ជា​បណ្ដោះ​អាសន្ន​ថា ” ទូរទស្សន៍​ព្រះអាទិត្យ” ជា​ឈ្មោះ​សំដៅ​ទៅ​លើ​​រូប​សញ្ញា​ព្រះអាទិត្យ​រះ​ដែល​ជា​រូប​សញ្ញា​​របស់​គណបក្ស​ប្រឆាំង​តែ​ម្ដង។

លោក​បាន​មាន​ប្រសាសន៍​ថា ” យើង​នឹង​ធ្វើ​ការ​អំពាវ​នាវ​ដល់​សាធារណជន​ដើម្បី​សុំ​ជំនួយ។ ឧបមា​ថា យើង​ត្រូវ​ការ​ដើម​ទុន​ប្រហែល​៣លាន​ដុល្លារ យើង​នឹង​ចែក​ភាគហ៊ុន​៣.០០០ភាគហ៊ុន​ ដោយ​ភាគហ៊ុន​នីមួយៗ​មាន​តម្លៃ​១.០០០​ដុល្លារ ហើយ​យើង​នឹង​អាច​ប្រមូល​បាន​៣លាន​ដុល្លារ”។

លោក​បាន​មាន​ប្រសាសន៍​បន្ថែម​ទៀត​ថា ” ដើម្បី​ឲ្យ​ច្បាស់​ វា​មិន​មែន​គណបក្ស​តែ​ម្នាក់​ទេ [ដែល​គ្រប់​គ្រង​ស្ថានីយ​នេះ] វា​នឹង​មាន​ក្រុម​ហ៊ុន​ឯកជន​មួយ​ដែល​មាន​ទំនាក់​ទំនង​ជាមួយ​គណបក្ស​ ប៉ុន្តែ​វាង​​នឹង​មានការ​ផ្សាយ​កម្មវិធី​របស់​យើង​មួយ​ចំនួន​”។

លោក ហុង សុខហួរ សមាជិក​ព្រឹទ្ធសភា​មកពី​​គណបក្ស​ សម រង្សី ដែល​​កំពុង​ផ្ដល់​ប្រឹក្សា​ដល់​ស្ថានីយ​ទូរទស្សន៍​ប្រឆាំង​ថ្មី​នេះ​ បាន​លើក​ឡើង​ថា ស្ថានីយ​នេះ​អាច​នឹង​ចាប់​ផ្ដើម​ដំណើរ​ការ​ឆាប់ៗ​នៅ​ក្នុង​រាជធានី​ភ្នំពេញ​ប្រសិន​បើ​ប្រាក់​អាច​​រៃអង្គាស​បាន​គ្រប់​គ្រាន់​​ក្នុង​ពេល​ឆាប់ៗ។

លោក សុខហួរ បាន​មាន​ប្រសាសន៍​ថា ” រឿង​សំខាន់​គឺ​ត្រូវ​រៃ​អង្គាស​ប្រាក់​នៅ​ក្រៅ​ប្រទេស និង​នៅ​ក្នុង​ប្រទេស​កម្ពុជា។ លោក សម រង្ស៊ី នឹង​ធ្វើ​ដំណើរ​ទៅ​សហរដ្ឋ​អាមេរិក​ក្នុង​ពេល​ឆាប់ៗ​ដើម្បី​​ចាប់​ផ្ដើម​ដំណើរ​ការ​រៃអង្គាស​ប្រាក់ ហើយ​នឹង​មាន​ព្រឹត្តិការណ៍​ធំមួយ​នៅ​ទីនោះ​​នៅ​ថ្ងៃ​ទី៣០ ខែឧសភា។ និយាយ​ពី​ផ្នែក​បច្ចេកទេស​វិញ យើង​មាន​ការ​​រីក​ចម្រើន​ច្រើន​ហើយ​ឥឡូវ​នេះ។ យើង​ដឹង​ឧបករណ៍​ដែល​ត្រូវ​ទិញ ហើយ​​យើង​មាន​ការ​ប្រកួត​ប្រជែង​ [តម្លៃ​​] ពី​​អ្នក​ផ្គត់​ផ្គង់​មួយ​ចំនួន”។

លោក សុខហួរ បាន​បន្ថែម​ទៀត​ថា លោក​មិន​ព្រួយ​បារម្ភ​ខ្លាច​ក្រែង​ក្រុម​ហ៊ុន​ផ្សេងៗ​មិន​មក​ធ្វើ​ការ​ផ្សព្វ​ផ្សាយ​​​ដើម្បី​ជៀសវាង​ថា មាន​ទំនាក់​ទំនង​ជាមួយ​គណបក្ស​ប្រឆាំង​នោះ​ឡើយ ឬ​មិន​ខ្លាច​ក្រែង​ពី​ជម្លោះ​នយោបាយ​នៅ​ថ្ងៃ​អនាគត​ ដែល​នាំ​ឲ្យ​អ្នក​ផ្សព្វ​ផ្សាយ​ដក​ខ្លួន​ពី​ស្ថានីយ​ទេ។

លោក​បាន​មាន​​ប្រសាសន៍​ថា ” សំណួរ​នេះ​គួរ​តែ​ត្រូវ​បាន​ចោទ​សួរ​នៅ​ក្នុង​បរិបទ​នយោបាយ​ចាស់ ប៉ុន្តែ​ឥឡូវ​នេះ​យើង​មាន​វប្បធម៌​ចរចា​គ្នា ហើយ​គ្មាន​ជម្លោះ​រវាង​គណបក្ស​កាន់​អំណាច និង​គណបក្ស​​ប្រឆាំង​ទៀត​ឡើយ​ ហេតុ​ដូច្នេះ​​អ្វី​ដែល​យើង​ត្រូវ​ធ្វើ​ដើម្បី​ទាក់​ទាញ​អ្នក​មក​ផ្សព្វ​ផ្សាយ​ គឺ​ត្រូវ​បង្កើត​កម្មវិធី​ល្អៗ។ យើង​នឹង​មាន​កម្មវិធី​ជជែក​ដេញ​ដោល​ពាក់​ព័ន្ធ​រឿង​នយោបាយ កម្មវិធី​ព័ត៌មាន ការ​អប់រំ និង​កម្មវិធី​វប្បធម៌។ នៅ​ពេល​យើង​មាន​ទស្សនិកជន​ច្រើន​ អ្នក​ផ្សព្វ​ផ្សាយ​នឹង​មក​រក​យើង​”។

ប៉ុន្តែ​ស្ថានីយ​ទូរទស្សន៍​របស់​គណបក្ស​ប្រឆាំង​មិន​មែន​ជា​ស្ថានីយ​ថ្មី​តែ​មួយ​គត់​ ដែល​នឹង​ឈាន​ចូល​ក្នុង​ទីផ្សារ​នោះ​ទេ ព្រោះ​ថា ស្ថានីយ​ទូរទស្សន៍ “PNN” របស់​លោក​ឧកញ៉ា​ លី យ៉ុងផាត់ ដែល​ជា​អ្នក​ជំនួញ​ និង​ជា​សមាជិក​ព្រឹទ្ធសភា​មកពី​គណបក្ស​ប្រជាជន​កម្ពុជាក៏​​នឹង​បើក​ដំណើរ​ការ​នៅ​ខែ​ក្រោយ​នេះ​ដែរ​ នេះ​បើ​យោង​តាម​លោក សោម ឆាយ៉ា ដែល​ជា​នាយក​រង​នៃ​ស្ថានីយ​ទូរទស្សន៍​​នេះ​​ និង​ដែល​ធ្លាប់​តែ​ជា​អ្នក​រិះគន់​គណបក្ស​សង្គ្រោះ​ជាតិ​នាពេល​កន្លង​មក​។

លោក សោម ឆាយ៉ា បាន​មាន​ប្រសាសន៍​ថា ” យើង​នឹង​សាក​ល្បង​ចាប់​ពី​ពាក់​កណ្ដាល​ខែ​ឧសភា​ទៅ​ក្នុង​រយៈ​ពេល​១ខែ ហើយ​បន្ទាប់​មក​យើង​នឹង​សម្ពោធ”។ លោក​បាន​បន្ថែម​ថា អ្នក​យក​ព័ត៌មាន​របស់​​ស្ថានីយ​ទូរទស្សន៍ “PNN” គឺ​​នឹង​មក​ពី​​​ស្ថាប័ន​ប្រព័ន្ធ​ផ្សព្វ​ផ្សាយ​ផ្សេងៗ។

លោក​បាន​មាន​ប្រសាសន៍​បន្ថែម​ថា ” ពួកគេ​មក​ពី​កន្លែង​ជាច្រើន​រួម​មាន​ដូច​ជា ស៊ីធីអិន ស៊ីអិនស៊ី ខេមបូឌា ដេលី ភ្នំពេញ​ប៉ុស្តិ៍ និង​វិទ្យុ​អាស៊ីសេរី​ជា​ដើម​។ យើង​នឹង​ធ្វើ​ឲ្យ​ស្ថានីយ​ថ្មី​នេះ​មាន​ភាព​ពិសេស​ជាង​ស្ថានីយ​ទូរទស្សន៍​ចាស់ៗ​ ហើយ​​អ្នក​ទាំង​នោះ​ដែល​មិន​ដែល​បង្ហាញ​មុខ​តាម​ទូរទស្សន៍​នឹង​លេច​មុខ​តាម​​កញ្ចក់​​ទូរទស្សន៍​របស់​យើង​”។

លោក​​បាន​មាន​ប្រសាសន៍​បន្ថែម​ថា ” យើង​នឹង​មាន​ព័ត៌មាន​ស៊ីជម្រៅ​ ប៉ុន្តែ​យើង​នឹង​មិន​វាយ​ប្រហារ​នរណា​មួយ ឬ​ញុះញង់​ឲ្យ​កើត​រឿង​អ្វី​ឡើយ។ យើង​នឹង​ធ្វើ​ព័ត៌មាន​ស៊ីជម្រៅ​ដែល​ពលរដ្ឋ​ចង់​បាន​”។

មុន​កិច្ច​ព្រមព្រៀង​នយោបាយ​កាលពី​ឆ្នាំ​មុន រដ្ឋាភិបាល​តែង​តែ​លើក​ឡើង​ម្ដង​ហើយ​ម្ដង​ទៀត​ថា គ្មាន​ហ្វ្រេកង់​ទំនេរ​​ឡើយ​សម្រាប់​គណបក្ស​សង្គ្រោះ​ជាតិ ឬ​អ្នក​ផ្សេង​ដូច​ជា​វិទ្យុ​ប្រឆាំង​រដ្ឋាភិបាល​គ្រប់​គ្រង​ដោយ​លោក ម៉ម សូណង់ដូ ជា​ដើម​។

លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន​មិន​បាន​ឆ្លើយ​តប​នឹង​សំណើ​សុំ​ការ​ធ្វើ​អត្ថាធិប្បាយ​ទេ​កាលពី​ម្សិលមិញ ទាក់​ទិន​នឹង​​​បញ្ហា​ថា​តើ​ហ្វ្រេកង់​​អាច​​នៅ​ទំនេរ​សម្រាប់​អ្នក​ផ្សេង​ទៀត​ដែរ​ឬទេ​ក្រោយ​ពេល​​ផ្ដល់​​ឲ្យ​គណបក្ស​សង្គ្រោះ​ជាតិ និង​លោកឧកញ៉ា​​ លី យ៉ុងផាត់​ រួច។

លោក សម រង្ស៊ី បាន​លើក​ឡើង​ទៀត​ថា លោក​ជឿជាក់​ថា ការ​បើក​ដំណើរ​ការ​ស្ថានីយ​ទូរទស្សន៍​របស់​គណបក្ស​​សង្គ្រោះ​ជាតិ​នឹង​ជា​ព្រឹត្តិការណ៍​ប្រវត្តិសាស្ត្រ​មួយ​នៅ​កម្ពុជា​។

លោក​បាន​មាន​ប្រសាសន៍​ថា ” ខ្ញុំ​មិន​ចង់​ផ្ដល់​មតិ​យោបល់​ទាក់ទិន​និងថា​តើ​​គណបក្ស​សង្គ្រោះ​ជាតិ​​គ្រប់​គ្រង​ស្ថានីយ​ទូរទស្សន៍​​នេះ​ឬយ៉ាង​ណា​នោះ​ឡើយ ប៉ុន្តែ​វា​គឺ​ជា​ប្រវត្តិសាស្ត្រ​លើក​ដំបូង​នៅ​ក្នុង​ប្រទេស​កម្ពុជា​ ដែល​គណបក្ស​ប្រឆាំង​មាន​ស្ថានីយ​ទូរទស្សន៍​។ ខ្ញុំ​គិត​ថា វា​គឺ​ជា​សមិទ្ធផល​មួយ​ដ៏​អស្ចារ្យ​”៕ ស៊ុយឈាង (រាយការណ៍​បន្ថែម​ដោយ ម៉ិច ដារ៉ា)​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស