32 C
Phnom Penh

ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​ចំនួន​​​ប្រាំ​​​នាក់​​​​​​នៅ​​​លើ​​​ប្រទេស​​​ដែន​​​កោះ​​​ណូរូ​​​យល់​​​ព្រម​​​មក​​​តាំង​​​​​​លំនៅ​​​ថ្មី​​​នៅ​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​អង្គការ​​​តស៊ូ​​​មតិ​​​សម្រាប់​​​ជន​​​ភៀស​​​ខ្លួន​​​បាន​​​ឲ្យ​​​ដឹង​​​ថា ជន​​​ស្វែង​​​រក​​​សិទ្ធិ​​​ជ្រក​​​កោន​​​ប្រហែល​​៥នាក់​​​ក្នុង​​​ចំណោម​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​រាប់​​​រយ​នាក់ ដែល​​​ប្រទេស​​​អូស្ត្រាលី​​​កំពុង​​​ឃុំ​​​ខ្លួន​​​នៅ​​​លើ​​​ប្រទេស​​​ដែន​​​កោះ​​​ណូរូ​​​នោះ​​​បាន​​​យល់​​​ព្រម​​​ធ្វើ​​​ជា​​​អ្នក​​​​​​ដំបូង​​​គេ​​​ដែល​​​ទទួល​​​យក​​​​​​ការ​​​ផ្តល់​​​ពី​​​ប្រទេស​​​កម្ពុជា​​​​​​ឲ្យ​​​តាំង​​​ទី​​​លំនៅ​​​ថ្មី​​​នៅ​​​ទី​​​នេះ។​​​​​​

ប្រទេស​​​អូស្ត្រាលី​​​បាន​​​បដិសេធ​​​មិន​​​ទទួល​​​យក​​​ជនស្វែង​​​រក​​​សិទ្ធិ​​​ជ្រក​​​កោន​​​ដែល​​​ព្យាយាម​​​​​​ចូល​​​ប្រទេស​​​របស់​​​ខ្លួន​​​ណា​​​ម្នាក់​​​ឡើយ​​​ ហើយ​​​បាន​​​​​​ប្រើ​​​​​​កញ្ចប់​​​ជំនួយ​​​ដែល​​​​​​មាន​​​ទឹក​​​ប្រាក់​​​​​​៣១​​​លាន​​​ដុល្លារ​​​ កាល​​​ពី​​​ឆ្នាំ​​​មុន​​​ដើម្បី បញ្ចុះ​​​បញ្ចូល​​​ប្រទេស​​​កម្ពុជា​​​ឲ្យ​​​យល់​​​ព្រម​​​ផ្តល់​​​លំនៅ​​​ថ្មី​​​សម្រាប់​​​ជន​​​ស្វែង​​​រក​​​សិទ្ធិ​​ជ្រក​​​កោន​​​​​​​​​​ចំនួន​​​មួយ​​​ដែល​​​មិន​​​​កំណត់​​​​​​​ជំនួសខ្លួនវិញ​។

កាល​​​ពី​​​ម្សិលមិញ លោក​​​ អៀន រិន​​​ថូល (Ian Rintoul) អ្នក​​​តស៊ូមតិមួយ​​​រូប​​​នៅ​​​សម្ព័ន្ធ​​​សកម្មភាព​​​ជន​​​ភៀស​​​ខ្លួន​​​ (Refugee Action Coalition) ដែល​​​មាន​​​មូល​​​ដ្ឋាន​​​នៅ​​​ទីក្រុង​​​សីុដនី​​​​​​ និង​​​ដែល​​​​​​កំពុង​​​ទាក់​​​ទង​​​ជាមួយ​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​នៅ​​​ប្រទេស​​​ដែន​​​កោះ​​​ណូរូ​​​ បាន​​​លើក​​​ឡើង​​​ថា ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​ម្នាក់​​​មក​​​ពី​​​ប្រទេស​​​អីុ​​​រ៉ង់​​​បាន​​​យល់​​​ព្រម​​​​​​មក​​​ប្រទេស​​​កម្ពុជា​​​ ហើយ​​​ថា ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​បួន​​​នាក់​​​ទៀត​​​​​​មក​​​ពី​​​ប្រទេស​​​ភូមា និង​​​ស្រីលង្ការ​​​ក៏​​​ប្រហែល​​​ជា​​​យល់​​​ព្រម​​​ដែរ​​​។

លោក រិនថូល បាន​​​លើក​​​ឡើង​​​តាម​​​រយៈ​​​អុីម៉េល​​​ថា “ខ្ញុំ​​​អាច​​​ត្រឹម​​​តែ​​​បញ្ជាក់​​​ថា ជន​​​ជាតិ​​​អីុរ៉ង់​​​ម្នាក់​​​បាន​​​យល់​​​ព្រម​​​ ប៉ុន្តែ គេ​​​បាន​​​ប្រាប់​​​ខ្ញុំ​​​ថា មាន​​​ជនជាតិ​​​ភាគ​​​តិច​​​​​​ខ្លា​​តាមិល​​​​​​​​​ចំនួន​​​បីនាក់​​​ និង​​​ជនជាតិ​​​ភាគ​​​តិច​​​រ៉ូហីង​​​យ៉ា ម្នាក់​​​ក៏​​​ប្រហែល​​​ជា​​​យល់​​​ព្រម​​​ដែរ​​​”។

លោក​​​បាន​​​​​​លើក​​​ឡើងទៀត​​​ថា ​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​ទាំង​​​ប្រាំ​​​នាក់​​​នេះ​​​គឺ​​​សុទ្ធតែ​​​ជា​​​បុរស​​​ ហើយ​​​ត្រូវ​​​បាន​​​គេ​​​ដាក់​​​ឲ្យ​​​រស់​​​នៅ​​​ដាច់​​​ដោយ​​​ឡែក​​​ពី​​​ជន​​​ភៀស​​​ខ្លួន និង​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​ផ្សេង​​​ៗ​​​ដែល​​​ត្រូវ​​​បាន​​​ឃុំ​​​ខ្លួន​​​នៅ​​​លើ​​​ប្រទេស​​​ដែនកោះ​​​ណូរូ​​​នេះ​​​​​​។

អង្គការ​​​អន្តរជាតិ​​​ទេសន្តរប្រវេសន៍​​​ (IOM) ដែល​​​​​​យល់​​​ព្រម​​​ជួយ​​​ជន​​​ភៀស​​​​​​ខ្លួន​​​ណា​​​​​​ដែល​​​ទទួល​​​យក​​​ការ​​​ផ្តល់​​​​​​លំនៅ​​​ថ្មី​​​នៅកម្ពុជា​​​​​​​​​​​​បាន​​​លើក​​​ឡើង​​​ថា ខ្លួន​​​មិន​​​អាច​​​បញ្ជាក់អំពី​​​អ្វី​​​ដែល​​​លោក រិន​​​ថូល​​​ បាន​​​លើក​​​ឡើង​​​នេះ​​​ឡើយ​​​។

យោ​​​ង​​​តាម​​​កិច្ច​​​ព្រម​​​ព្រៀង​​​ជាមួយ​​​ប្រទេស​​​អូស្ត្រាលី​​​​​​ កម្ពុជា​​​​​​បាន​​​យល់​​​ព្រម​​​ទទួល​​​យក​​​តែ​​​អ្នក​​​ដែល​​​​​​គេ​​​ចាត់​​​ទុក​​​ជា​​​ជន​​ភៀស​​​ខ្លួន​​​​​​ដែល​​​ទទួល​​​បាន​​​សិទ្ធិ​​​រស់​​​នៅ​​​លើ​​​ប្រទេស​​​ដែន​​​កោះ​​​ណូរូ និង​​​អ្នក​​​ដែល​​​ស្ម័គ្រ​​​ចិត្ត​​​តែ​​​ប៉ុណ្ណោះ។ ប៉ុន្តែ ដោយ​​​សារ​​​នៅ​​​មិន​​​ទាន់​​​មាន​​​ជន​​​ភៀស​​​ខ្លួន​​​ណា​​​ម្នាក់​​​ចាប់​​​អារម្មណ៍​​​​​​មកតាំង​​​លំនៅ​​​ថ្មី​​​នៅ​​​​​​ប្រទេស​​​កម្ពុជា​​​នៅឡើយ​​​​​​នោះ​​​ លោក រិនថូល​​​ បាន​​​​​​លើក​​​ឡើង​​​ថា ប្រទេស​​​អូស្ត្រាលី​​​ប្រហែល​​​ជា​​​​​​ព្យាយាម​​​ពន្លឿន​​​ដំណើរ​​​ការ​​​រៀប​​​ចំ​​​ពាក្យ​​​សុំ​​​សម្រាប់​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​ទាំង​​​ប្រាំ​​​នាក់​​​នេះ​​​។

នៅក្នុ​​​ងលិខិត​​​មួយច្បាប់​​​​​​ផ្ញើ​​​ជូន​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​នៅ​​​លើ​​​ប្រទេស​​​ដែន​​​កោះ​​​ណូរូ កាល​​​ពី​​​សប្តាហ៍​​​មុន​​​​​​ដោយ​​​បញ្ចុះបញ្ចូល​​​ថា ប្រទេស​​​កម្ពុជា​​​ជា​​​ប្រទេស​​​លំនៅ​​​ថ្មី​​​នោះ ប្រទេស​​​អូស្ត្រាលី​​​បាន​​​លើក​​​ឡើ​​​ងថា ការ​​​ធ្វើ​​​ដំណើរ​​​ជា​​​លើក​​​ដំបូង​​​របស់​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​មក​​​រាជ​​​ធានី​​​ភ្នំពេញ​​​ នឹង​​​ចាប់​​​ផ្តើម​​​កាល​​​ពីម្សិលមិញ​​​។ តែ​​​ទោះ​​​ជា​​​យ៉ាង​​​ណា​​​ កាល​​​ពី​​​ព្រឹក​​​ម្សិលមិញ​​​ លោក​​​ ផេតធើ  ដាត់​​​ធិន (Peter Dutton)  រដ្ឋ​​​មន្ត្រី​​​ក្រសួង​​​អន្តោប្រវេសន៍​​​អូស្ត្រាលី​​​​​​​​​​​​​​​បាន​​​លើក​​​ឡើង​​​ថា ការ​​​ធ្វើ​​​ដំណើរ​​​នេះ ត្រូវ​​​បាន​​​ពន្យារ​​​ពេល​​​។

លោក រិន​​​ថូល បាន​​​មាន​​​ប្រសាសន៍​​​បន្ថែម​​​ថា​”​ ក្តី​​​ព្រួយ​​​បារម្មណ៍​​​​​​របស់​​​យើង​​​គឺ​​​ថា រដ្ឋាភិបាល​​​ [​​​អូស្ត្រាលី​​​] កំពុង​​​ព្យាយាម​​​នាំ​​​​​​មនុស្ស​​​ឡើង​​​យន្ត​​​ហោះ​​​ដើម្បី​​​ស្តា​​​រមុខ​​​មាត់​​​​​​ផ្នែក​​​នយោបាយ​​​ ហើយ​​​ព្រួយ​​​បារម្ភ​​​ថា​​​ ជន​​​ស្វែង​​​រក​​​សិទ្ធិ​​​ជ្រក​​​កោន​​​កំពុង​​​ត្រូវ​​​បាន​​​គេ​​​បង្ខិត​​​បង្ខំ​​​ឲ្យទទួល​​​យក​​​អ្វី​​​ដែល​​​ខ្លួន​​​មិនចង់​​​បាន​​​ ព្រោះ​​​ពួក​​​គេ​​​ទទួល​​​បាន​​​ប្រាក់​​​ជា​​​ច្រើន​​​ ដែល​​​ជា​​​ហេតុ​​​​​​​​​ធ្វើ​​​ឲ្យ​​​ពួក​​​គេ​​​យល់​​​ឃើញ​​​ថា ការ​​​ទ​​​ទួល​​​យក​​​ប្រទេស​​​កម្ពុជា គឺ​​​ជា​​​ជម្រើស​​​តែ​​​មួយ​​​គត់​​ដើម​​​្បី​​​​​​​​​​​​ធានា​​​ឲ្យ​​​ពួក​​​គេ​​​ទទួល​​​បាន​​​​​​ទិដ្ឋាការ​​​ជន​​​ភៀស​​​ខ្លួន​​​នោះ​​​”។

លោក​​​បាន​​​លើក​​​ឡើង​​​ទៀត​​​ថា គេ​​​បាន​​​ផ្តល់​​​ប្រាក់​​រហូត​​​ដល់​​​ចំនួន១១.៦៧៥​​​ដុល្លារ ឲ្យ​​​​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​នៅ​ក្នុង​ប្រទេស​​​ណូរូសម្រាប់​​​ការ​​​យល់​​​ព្រម​​​មក​​​ប្រទេស​​​កម្ពុជា​​​។

អ្នក​​​នាំ​​​ពាក្យ​​​ក្រសួង​​​​​​ការ​​​បរទេស​​​កម្ពុជា​​​​​​បាន​​​​​​លើក​​​ឡើង​​​ថា ខ្លួន​​​​​​មិន​​​បាន​​​ដឹង​​​អំពី​​​បញ្ហា​​​នេះ​​​ទេ។ រីឯ​​​អ្នក​​​នាំ​​​ពាក្យ​​​ក្រសួង​​​មហាផ្ទៃ​​​វិញ​​​ក៏​​​បាន​​​លើក​​​ឡើង​​​ផង​​​ដែរ​​​ថា ខ្លួន​​​​​​​​​​​​​​​​​​ក៏​​​មិន​​​ទទួល​​​បាន​​​ព័ត៌​​​មាន​​​ថ្មីៗ​​​​​​អំពី​​​បញ្ហា​​​នេះ​​​ដែរ​​​។

លោក គឹម សារិន​​​ ប្រធាន​​​ការិយាល័យ​​​ជន​​​ភៀស​​​ខ្លួន​​​នៃ​​​​នាយកដ្ឋាន​​​អន្តោប្រវេសន៍​​​​​​នៅ ​​ក្រសួង​​​មហាផ្ទៃ​​​បាន​​​លើក​​​ឡើង​​​ថា គណៈប្រតិភូកម្ពុជា​​​ចំនួន​​​បី​​​រូប​​​​​​បាន​​​ចាក​​​ចេញ​​​ទៅ​​​ប្រទេស​​​ដែន​​​កោះ​​​ណូរូ កាល​​​ពី​​​ល្ងាច​​​ថ្ងៃ​​​អាទិត្យ​​​ដើម្បី​​​ស្វែងរក​​​អ្នក​​​ស្ម័គ្រ​​​ចិត្ត​​​ ប៉ុន្តែ មិន​​​បាន​​​ជួប​​​ជា​​​មួយ​​​​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​ណា​​​ម្នាក់​​​​​​ឡើយ​​​។

លោក​​​បាន​​​មាន​​​ប្រសាសន៍​​​ថា “គោល​​​ដៅ​​​របស់​​​យើង​​​គឺដើម្បី​​​ជួប​​​ជា​​​មួយ​​​ជន​​​ភៀស​​​ខ្លួន​​​ គឺ​​​មាន​​​ន័យ​​​ថា អ្នក​​​ដែល​​​ទទួល​​​បាន​​​សិទ្ធិជា​​​ជន​​​ភៀស​​​ខ្លួន​​​​​​រួច​​​ហើយ​​​មិន​​​មែន​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​នោះ​​​ទេ​​​”។

គណៈប្រតិភូ​​​កម្ពុជា​​​​​​ចំនួន​​​ពីរ​​​រូប​​​​​​លើក​​​មុន​​​ ដែល​​​បាន​​​ទៅ​​​ប្រទេស​​​ណូរូ​​​នៅ​​​ក្នុង​​​​​​ឆ្នាំ​​​​​នេះ​​​​​​បាន​​​ត្រឡប់​​​មក​​​ប្រទេស​​​​​​កម្ពុជា​​​វិញ​​​ដោយ​​​ដៃ​​​ទទេ។

កាល​​​ពី​​​សប្តាហ៍​​​មុន​​​ អ្នក​​​នាំ​​​ពាក្យ​​​របស់​​​លោក​​​​​​ ដាត់ធិន បាន​​​​​​លើក​​​ឡើង​​​ថា ជន​​​ភៀស​​​ខ្លួន​​​មួួ​​យ​​​ចំនួ​​​ន​​​​​​បាន​​​សំដែង​​​ការ​​​ចាប់​​​អារម្មណ៍​​ក្នុង​​​ការ​​​មក​​​ប្រទេស​​​កម្ពុជា​​​ហើយ​​​ថា ក្រុម​​​ទី​​​១​​​នឹង​​​មក​​​ដល់​​​កម្ពុជា​​​”ក្នុង​​​ពេល​​​ឆាប់​​​ៗ” ។

លោក ដាត់ធិន បាន​​​ប្រាប់​​​វិទ្យុ​​​ABC ថា ការ​​​ធ្វើ​​​ដំណើរ​​​មក​​​រាជ​​​ធានី​​​ភ្នំពេញ​​​ត្រូវ​​​បាន​​​ពន្យារ​​​ពេល​​​ គឺ​​​ដោយ​​​សារ​​​តែ​​​ “បញ្ហា​​​​​​ភស្តុភារ”។ លោក​​​មិន​​​បាន​​​ពន្យល់​​​ឲ្យ​​​បាន​​​ច្បាស់​​​ថា តើ​​​បញ្ហា​​​នោះ​​​ជា​​​អ្វី​​​នោះ​​​ឡើយ​​​ ប៉ុន្តែ បាន​​​ចោទប្រកាន់​​​អ្នក​​​តស៊ូមតិ​​​សម្រាប់​​​ជន​​​ភៀស​​​ខ្លួន​​​ថា បាន​​​រំខាន​​​ដល់​​​កិច្ច​​​ខិត​​​ខំប្រឹង​​​ប្រែង​​​​​​ផ្តល់​​​លំនៅ​​​ថ្មី​​​ដល់​​​ជន​​​ភៀស​​​ខ្លួន តាម​​​រយៈ​​​ការ​​​ផ្សព្វផ្សាយ​​​ព័ត៌​​​មាន​​​មិន​​​ពិត។

លោក​​​ត្រូ​​​វបាន​​​គេ​​​ដក​​​ស្រង់​​​សម្តី​​​​​​មក​​​ថា “ទាក់ទិន​​​នឹង​​​ការ​​​អះអាង​​​ថា ​​​គេ​​​​​​មិន​​​បាន​​​រៀប​​​ចំ​​​ធ្វើ​​​ដំណើរ​​​នោះ​​​ គឺជា​​​រឿង​​​ខុស​​​។ ខ្ញុំ​​​គិត​​​ថា យើង​​​នឹង​​​បង្ហាញ​​​ឲ្យឃើញ​​​ពីភាព​​​ជោគជ័យ​​​ ប្រសិនបើ​​​អ្នកទាំង​​​នោះ​​​​​​មក​​​ដល់​​​ប្រទេស​​​កម្ពុជា ប្រសិនបើ​​​ពួក​​​គេ​​​រៀប​​​ចំ​​​ជីវិត​​​ថ្មី​​​នៅ​​​ទី​​​នេះ។ ពួកគេ​​​នឹង​​​អាច​​​​​​ផ្ញើ​​​សារ​​​ទៅ​​​វិញ ហើយ​​​ខ្ញុំ​​​គិត​​​ថា​​​អ្នក​​​តស៊ូ​​​មតិ​​​សម្រាប់​​​ជន​​​ភៀស​​​ខ្លួន និង​​​អ្នក​​​ដែល​​​ព្យាយាម​​​​​​រំខាន​​​ដល់​​​ដំណើរ​​​ការ​​​នេះ​​​ គឺ​​​សុទ្ធ​​​តែ​​​មាន​​​បំណង​​​ល្អ ប៉ុន្តែ បញ្ហា​​​នៅ​​​ត្រង់​​​ថា ពួកគេ​​​ទទួល​​​ព័ត៌​​​មាន​​​ខុស​​​”។

ការិយាល័យ​​​របស់​​​លោក ដាត់ធិន មិន​​​បាន​​​ឆ្លើយ​​​តប​​​នឹង​​​សំណើ​សុំ​​​ការ​​​ធ្វើ​​​អត្ថាធិប្បាយ​​​ឡើយ​​​។ លិខិត​​​​​​​​​​​​​​​​​​​​​ពីការ​​​ិយាល័យ​​​របស់​​​លោក​​​ដែល​​​ផ្ញើ​​​ទៅ​​​កាន់​​​ប្រទេស​​​ណូរូ​​​គឺ​​​រៀប​​​រាប់​​​អំពី​​​ជំនួយ​​​ដល់​​​ជន​​​ភៀស​​​ខ្លួន​​​ដែល​​​​​​យល់​​​ព្រម​​​មក​​​តាំង​​​ទីលំ​​​នៅថ្មី​​​នៅ​​​កម្ពុជា​​​នៅពេល​​​ដែល​​​ពួកគេ​​​មក​​​ដល់​​​រាជ​​​ធានីភ្នំពេញ​​​។ ជំនួយ​​​ទាំង​​​នេះ​​​រួ​​​ម​​​មាន​​​ដូច​​​ជា​​​​​​​​​ការផ្តល់​​​ប្រាក់​​​សុទ្ធ​​​ដល់​​​ដៃ​​​ គណនី​​​ធនាគារ​​​​​​ ការ​​​ធានា​​​រ៉ាប់​​​រង​​​សុខភាព​​​ ការ​​​បង្រៀន​​​ភាសា​​​ ការ​​​ផ្តល់​​​លំនៅ​​​បណ្តោះ​​​អាសន្ន​​​ដោយ​​​ឥត​​​គិត​​​ថ្លៃ​​​ និង​​​ការ​​​ជួយ​​​រក​​​កន្លែង​​​ស្នាក់​​​នៅ​​​ និង​​​​​​ការងារ​​​អចិន្ត្រៃយ៍។  ហើយ​​​គ្រួសារ​​​របស់​​​អ្នក​​​ទាំង​​​នោះ​​​​​​អាច​​​នឹង​​​មក​​​រស់​​​នៅ​​​ជា​​​មួយ​​​ពួកគេ​​​បាន​​​ ដោយ​​​ដាក់​​​ពាក្យ​​​សុំ​​​ចូល​​​​សញ្ជាតិ​​​ខ្មែរ​​​ ហើយ​​​​​​ប្រសិន​​​បើ​​​ពួកគេ​​​មាន​​​កូន​​​នៅ​​​ក្នុង​​​ប្រទេស​​​កម្ពុជា​​​នោះ​​​​​​ កូន​​​របស់​​​ពួកគេ​​​ក៏​​​នឹង​​​ទទួល​​​បាន​​​សញ្ជាតិ​​​ខ្មែរ​​​ដែរ​​​។

ប៉ុន្តែ លិខិត​​​នេះ​​​​​ក៏​​​បាន​​​ធ្វើ​​​ការ​​​អះ​​​អាង​​​​​​ខុស​​​មួយ​​​ចំនួន​​​ដែរ​​​អំពី​​​​ស្ថានភាព​រស់​​​​​នៅ​​​​​​ក្នុង​​​ប្រទេស​​​កម្ពុជា។

លិខិត​​​នេះ​​​អះ​​​អាង​​​ថា ពល​​​រដ្ឋ​​​ខ្មែរ​​​ “សុទ្ធតែ​​​មាន​​​​​​សិទ្ធិ​​​សេរីភាព​​​ក្នុង​​​សង្គម​​​ប្រជាធិបតេយ្យ” រួម​​​មាន​​​ដូច​​​ជា​​​ការ​​​បញ្ចេញ​​​មតិយោបល់​​​ដោយ​​​សេរី​​​ មិន​​​ប្រឈម​​​នឹង​​​អំពើ​​​ហិង្សា​​​ ហើយ​​​មាន​​​ស្តង់ដារ​​​ថែ​​​ទាំ​​​សុខភាព​​​ខ្ពស់​​​​​​។

គេហទំព័រ​​​​​​របស់​​​​​​ក្រសួង​​​អន្តោប្រវេសន៍​​​​​​​​​​​​អូស្ត្រាលី​​​​​​ ដែល​បាន​​​ណែនាំ​​​​​​ភ្ញៀវ​​​ទេសចរ​​​ដែល​​​មក​​​លេង​​​ប្រទេស​​​កម្ពុជា​​​ ​​​​​​​ផ្ទុយ​​​ទៅ​​​នឹង​​​ការ​​​អះអាង​​​ទាំង​​​បី​​​ចំណុច​​​នៅ​​​ក្នុង​​​​​​លិខិត​​​នេះ​​​។ គេ​​​ហទំព័រ​​​នេះ​​​បាន​​​លើក​​​ឡើង​​​ថា  ជួន​​​កាល​​​នគរ​​​បាល​​​​​​​​​បាន​​​ឆ្លើយ​​​តប​​​នឹង​​​អ្នក​​​តវ៉ា​​​​​​ពាក់​​​ព័ន្ធ​​​រឿង​​​នយោបាយ​​​ដោយ​​​ប្រើ​​​កម្លាំង​​​ ហើយ​​​បាន​​​រៀប​​​រាប់​​​ពី​​​​​​ភាព​​​គ្រោះ​​​ថ្នាក់​​​មួយ​​​ចំនួន និង​​​បាន​​​ចាត់​​​ទុក​​​ការ​​​ថែ​​​ទាំ​​​សុខភាព​​​ជាទូទៅ​​​នៅ​​​កម្ពុជា​​​ថា មាន​​​ស្តង់​​​ដារ​​​ “អន់​​​ណាស់​​​”។

ក្រសួង​​​អន្តោប្រវេសន៍​​​អូស្ត្រាលី​​​បាន​​​បដិសេធ​​​មិន​​​ទទួល​​​ខុស​​​ត្រូវ​​​​ចំពោះ​​​ការ​​​អះអាង​​​ខុស​​​នៅ​​​ក្នុង​​​លិខិត​​​នេះ​​​ឡើយ​​​៕ ស៊ុយឈាង (រាយការណ៍​​​បន្ថែម​​​ដោយ ហ៊ុល​​​ រស្មី)​​

​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស