យោងតាមការប្រកាសព័ត៌មានចេញដោយសាកលវិទ្យាល័យកាលីហ្វ័រញ៉ា ក្រុងឡស អេនជិឡែស (UCLA) បាន ឲ្យដឹងថា សាស្ត្រាចារ្យសាកលវិទ្យាល័យអាមេរិកម្នាក់និងជាអ្នកប្រជាសាស្ត្រ និយាយថា លោកបានរកឃើញកាប្រមាណត្រឹមត្រូវបំផុតសម្រាប់ចំនួនមនុស្សដែល ស្លាប់ក្រោមរបបខ្មែរក្រហម ដោយលោកបានកំណត់តួលេខរវាង១,២លានទៅ២.៨លាននាក់។
លោក ប៉ាទ្រិក ហឺវេលីន សាស្ត្រាចារ្យផ្នែកសង្គមវិទ្យានៅ UCLA បានទទួលស្គាល់ថា ការប៉ាន់ប្រមាណរបស់លោកគឺទូលំទូលាយ ប៉ុន្តែបាននិយាយថា វិធីសាស្ត្ររបស់លោកបានបន្ថែមភាពស្របច្បាប់ចំពោះលេខដែលមានភាពចម្រូងចម្រាសជាញឹកញាប់។
លោក ហឺវេលីន បានឲ្យដឹងក្នុងសេចក្តីប្រកាសព័ត៌មាន ដែលបានបង្ហោះតាមវិបសាយរបស់ UCLA កាលពីថ្ងៃព្រហស្បតិ៍ថា “មនុស្សច្រើនបំផុតរាយការណ៍ក្នុងកម្រិតដែលឆ្លុះបញ្ចាំងភាពមិនជាក់លាក់ភ្ជាប់ទៅនឹងបញ្ហានេះ។ ខ្ញុំចង់ផ្តល់ភាពជឿជាក់ថា ចំនួនស្លាប់សរុបពិតប្រាកដស្ថិតក្នុងកម្រិតមួយជាក់លាក់”។
យោង តាមសេចក្តីប្រកាសព័ត៌មានឲ្យដឹងថា លោក ហឺវេលីន ដែលការស្រាវជ្រាវរបស់លោកនឹងមានក្នុងការចេញផ្សាយនៃទស្សនាវដ្តី ស្តីពីការសិក្សាអំពីប្រជាជននៅពេលខាងមុខនេះ បាននិយាយថា ការប៉ាន់ប្រមាណថ្មីរបស់លោកខុសគ្នាពីការប្រមាណមុនៗ ហើយត្រឹមត្រូវជាង ពីព្រោះ ការសិក្សានេះយកចំនួនដ៏ធំនៃអថេរមកគិត។
សេចក្តីប្រកាសព័ត៌មាននិយាយថា “អ្នក ធ្វើកិច្ចការនេះមុនលោក បានយកអថេរមិនលើសពីប្រាំទេមកពិចារណា ចំណែកលោកបានបញ្ចូល៤៧អថេរ។ ជាសរុប លោក ហឺវេលីន បានសិក្សាបន្សំ១០.០០០នៃ៤៧អថេរ”។
គំរូ ក្នុងកុំព្យូទ័ររបស់លោក ហឺវេលីន បង្ហាញថា មានឱកាស៩៥ភាគរយ ដែលចំនួនមនុស្សស្លាប់សរុបក្រោមរបបខ្មែរក្រហមនៅចន្លោះ១,២ទៅ២,៨លាន ដោយឱកាស១៥ភាគរយ មានតិចជាង១,៥លាន និងឱកាស១៥ភាគរយ មានច្រើនជាង២,២៥លាននាក់។
ក្នុង របាយការណ៍ឆ្នាំ២០០៩ លោកស្រី អេវ៉ា តាបូ អ្នកប្រជាសាស្ត្រម្នាក់ដែលជួលដោយសាលាក្តីខ្មែរក្រហម បានពិនិត្យមើលតួលេខពី១២ប្រភពផ្សេងគ្នា ក្នុងនោះមានទាំងកិច្ចការពីមុនរបស់លោក ហឺវេលីន ផងដែរ ហើយបានកំណត់ថា ទំនងបំផុតមានចំនួនមនុស្សស្លាប់រវាង១,៧៤៧លាននាក់និង២,២លាននាក់ អំឡុងរបបខ្មែរក្រហម។
ក្នុងសៀវភៅរបស់លោកដែលមានចំណងជើងថា “កម្ពុជា ឆ្នាំ១៩៧៥-១៩៨២” អ្នក ប្រវត្តិសាស្ត្រ ម៉ៃឃើល វិឃើរី សរសេរថា ការប៉ាន់ប្រមាណមានភាពខុសគ្នា ពីព្រោះស្ថិតិជាច្រើនដែលផ្តល់ដោយរដ្ឋាភិបាល ដូចជាចំនួនប្រជាជនសរុប ពីមុននិងក្រោយសម័យខ្មែរក្រហម ក៏មិនស៊ីសង្វាក់គ្នាដែរ។
លោក ហិនរី ឡូកាដ អ្នកប្រវត្តិសាស្ត្របារាំងដែលសិក្សាអំពីប្រទេសកម្ពុជា បាននិយាយកាលពីថ្ងៃអាទិត្យ ការប៉ាន់ប្រមាណមួយថាមានអ្នកស្លាប់ប្រហែល២លាននាក់ ទំនងជាត្រឹមត្រូវបំផុត។
ដោយពន្យល់ថា គាត់បានមកពីការវិភាគដែលធ្វើដោយលោក ម៉ារេក ស្លីវីនស្គី អ្នកប្រជាសាស្ត្របារាំង លោកបាននិយាយថា “វា មិនមែនមិនអាចទៅរួចទេដែលថា មានជាងពីរលាននាក់នោះ។ ប៉ុន្តែ ចំពោះការអភិរក្សនិងសុវត្ថិភាព ពីរលាននាក់គឺជាការប៉ាន់ប្រមាណប្រាកដប្រជា”។
លោក ឡូកាដ បាននិយាយដែរថា កម្រិតប្រមាណរបស់លោក ហឺវេលីន ទូលំទូលាយពេកមិនមានប្រយោជន៍ទេ។
លោកបាននិយាយថា “ទូលំទូលាយណាស់ គ្មានន័យឡើយ។ អ្នកមិនអាចបានផលពីនោះទេ”៕ និត