35 C
Phnom Penh

លោក កឹម សុខា បញ្ជាក់​ថា​ គណបក្ស​សង្គ្រោះ​ជាតិ​នៅ​តែ​ខិត​ខំ​ដើម្បី​​​ទម្លាក់​គណបក្ស​ប្រជាជន​​ចេញពី​​អំណាច​

ដោយ ឌឹ ខេមបូឌា ដេលី

បទវិភាគ

លោក កឹម សុខា អនុប្រធាន​គណបក្ស​សង្គ្រោះ​ជាតិ​បាន​​ថ្លែង​ប្រាប់​ក្រុម​អ្នក​គាំទ្រ​កាលពី​ម្សិលមិញ​ថា ថ្វីបើ​គណបក្ស​របស់​​លោក​ចូល​រួម​ក្នុង​វប្បធម៌​​ថ្មី​នៃ​កិច្ចសហប្រតិបត្តិការ​ជាមួយ​គណបក្ស​ប្រជាជន​កម្ពុជា​កំពុង​កាន់​អំណាច​ក្ដី ក៏​គណបក្ស​ប្រឆាំង​មួយ​នេះ​​​នៅ​តែ​ខិត​ខំ​ដើម្បី​ទម្លាក់​​រដ្ឋាភិបាល​ “​កុម្មុយនីស្ត” ចេញពី​អំណាច​ឲ្យ​បាន​​តាម​រយៈ​ការ​បោះ​ឆ្នោត​។

លោក​បាន​ថ្លែង​ទៅ​កាន់​អ្នក​គាំទ្រ​នៅ​ក្នុង​ខេត្ត​កំពង់​ឆ្នាំង​ថា អ្នកគាំទ្រ​គណបក្ស​សង្គ្រោះ​ជាតិ​កុំ​​គួរ​ភាន់​ច្រឡំ​​ឲ្យ​សោះ​ចំពោះ​ឥរិយាបថ​​រួស​រាយ​រាក់​ទាក់​​ថ្មី​រវាង​គណបក្ស​នយោបាយ​ធំទាំង​ពីរ​ដូចបាន​ឃើញ​​ក្នុង​សប្ដាហ៍​កន្លង​ទៅ​ នៅ​ពេល​លោក សម រង្ស៊ី ប្រធាន​គណបក្ស​សង្គ្រោះ​ជាតិ​​បាន​ចូល​រួម​ជាមួយ​លោក​នាយក​រដ្ឋមន្ត្រី ហ៊ុន សែន ដើម្បី​ប្រារព្ធ​អបអរ​សាទរ​​ពិធីបុណ្យ​ចូល​ឆ្នាំ​ខ្មែរ​ប្រពៃណីជាតិ​នៅ​ក្នុង​ក្រុង​សៀមរាប។

លោក​បាន​មាន​ប្រសាសន៍​យ៉ាង​ដូច្នេះ​ថា ” បង​ប្អូន​ខ្លះ​ក្នុង​ដំណាក់​កាល​នយោបាយ​ចុង​ក្រោយ​នេះ​ មាន​ការ​ភាន់​ច្រឡំ​ មាន​ការ​មន្ទិល​ថា​តើ​គោល​នយោបាយ​ គោល​ដៅ​របស់​គណបក្ស​សង្គ្រោះ​ជាតិ​ទៅ​ណា​? គោល​ដៅ​របស់​គណបក្ស​សង្គ្រោះ​ជាតិ​គឺ​ដើម្បី​ឈាន​ទៅ​ដឹក​នាំ​ប្រទេស​។ គោល​ដៅ​របស់​យើង​គឺ​ត្រូវ​ធ្វើ​ឲ្យ​មាន​ការ​ផ្លាស់​ប្ដូរ​អ្នក​ដឹកនាំ​នៅ​​ប្រទេស​កម្ពុជា​តាម​រយៈ​ការ​បោះ​ឆ្នោត​ដោយ​សេរី ត្រឹម​ត្រូវ និង​យុត្តិធម៌​ឲ្យ​បាន​។ យើង​ត្រូវ​ស្គាល់​ឲ្យ​ច្បាស់​ថា ខ្លួន​យើង​ជាអ្នក​ណា​ គណបក្ស​សង្គ្រោះ​ជាតិ​នេះ? យើង​ជា​អ្នក​ប្រជាធិបតេយ្យ​ ហើយ​គូប្រកួត​របស់​យើង​ជា​អ្នក​ណា? ជា​ពួក​កុម្មុយនីស្ត​។ កុំ​យល់​ថា​ឥឡូវ​ឃើញ​មេដឹកនាំ​ជិតស្និទ្ធ​គ្នា​ អីបែប​យើង​ដូរ​ហើយ​។ អត់​ទេ គណបក្ស​សង្គ្រោះ​ជាតិ​រក្សា​គោល​ជំហរ​ដដែល ប៉ុន្តែ​គណបក្ស​នយោបាយ​មួយៗ​មាន​យុទ្ធសាស្ត្រ យុទ្ធសាស្ត្រ​វា​ទៅ​តាម​ពេល​វាលា ទៅ​តាម​កាលៈទេសៈ​ដើម្បី​សម្រេច​គោល​ដៅ​ដែល​យើង​ចង់​បាន​ទាំង​អស់​គ្នា”។

ក្នុង​ពេល​ថ្មីៗ​នេះ​ លោក ហ៊ុន សែន បាន​ធ្វើ​ល្អ​ដាក់​លោក សម រង្ស៊ី ប៉ុន្តែ​បែរជា​ធ្វើ​ផ្ទុយ​ពី​នេះ​ដាក់​លោក កឹម សុខា ដោយ​អះអាង​ថា លោក កឹម សុខា មាន​បំណង​ប្រើ​ប្រាស់​មហាបាតុ​កម្ម​ក្រោយ​ការ​បោះ​ឆ្នោត​ជ្រើស​តាំង​តំណាង​រាស្ត្រ​ឆ្នាំ​២០១៣​ ដើម្បី​ផ្ដួល​រំលំ​រដ្ឋាភិបាល​របស់​លោក​ដោយ​ខុស​ច្បាប់។

លោក ឈឹម​ ផលវរុណ អ្នក​នាំពាក្យ​គណបក្ស​ប្រជាជន​កម្ពុជា ​បាន​មាន​ប្រសាសន៍​ថា លោក កឹម សុខា យល់​ថា​ខ្លួន​ឯង​កាន់​តែ​ឯកោ​ខ្លាំង​ឡើង​ ដោយ​សារ​លោក​បដិសេធ​មិន​ចូល​រួម​​ “​វប្បធម៌​សន្ទនា​” ថ្មី​រវាង​គណបក្ស​កាន់​អំណាច​ និង​គណបក្ស​ប្រឆាំង។

លោក​បាន​មាន​ប្រសាសន៍​បន្ត​ថា ” ពេល​នេះ​ គឺ​ជា​ចុង​បញ្ចប់​នៃ​ជីវិត​នយោបាយ​របស់​គាត់​ហើយ​នៅ​ក្នុង​ការ​​ជំទាស់​អ្វី​ដែល​គណបក្ស​ប្រជាជន​​កំពុង​ធ្វើ ជា​ពិសេស​វប្បធម៌​នៃ​ការ​សន្ទនា​រវាង​​សម្ដេច​នាយក​រដ្ឋមន្ត្រី និង​លោក​ប្រធាន​ សម រង្ស៊ី។ លោក កឹម សុខា ខ្លួន​ឯង​កំពុង​តែ​ស្លន់ស្លោ​​ដោយ​សារ​តែ​សាធារណមតិ​ជាតិ និង​អន្តរជាតិ​​បាន​បោះបង់​គាត់​ចោល​”៕ សុខុម​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស