កាលពីម្សិលមិញ សាលាដំបូងរាជធានីភ្នំពេញបានផ្តន្ទាទោសជនជាតិអង់គ្លេសម្នាក់ពីបទទិញពេស្យាចារកុមារ និងប្រព្រឹត្តអំពើមិនសមរម្យលើអនីតិជនឲ្យជាប់ពន្ធនាគារ៨ឆ្នាំ និងពិន័យជាប្រាក់១.០០០ដុល្លារ។
លោក ម៉ៃឃើល ហ្គ្លីន ចូន អាយុ៥៥ឆ្នាំត្រូវបានចាប់ខ្លួននៅខាងក្រៅផ្សារអូរឡាំពិក កាលពីថ្ងៃទី២៤ ខែមិថុនាឆ្នាំមុន បន្ទាប់ពីម្តាយជនរងគ្រោះបានដាក់ពាក្យបណ្តឹងអំពីការរំលោភនេះ ហើយនគរបាលប្រឆាំងការជួញដូរមនុស្សរាជធានីបានធ្វើការសើុបអង្កេតរួមគ្នាជាមួយអង្គការសកម្មភាពដើម្បីកុមារជាអង្គការការពារកុមារ។
លោក ចូន ត្រូវបានចោទប្រកាន់ពីបទរួមភេទជាមួយក្មេងស្រីអាយុ១១ឆ្នាំម្នាក់ ហើយបន្ទាប់មកបានឲ្យលុយកុមារីរូបនេះ និងម្តាយរបស់នាង។ ជនជាតិអង់គ្លេសរូបេនះក៏ត្រូវបានចោទប្រកាន់ពីបទរំលោភក្មេងស្រីបីនាក់ទៀតអាយុ៧ឆ្នាំ ដល់៩ឆ្នាំផងដែរ។
អំឡុងសវនាការជំនុំជម្រះកាលពីខែកុម្ភៈ លោក ចូន បានបដិសេធការចោទប្រកាន់មកលើរូបគាត់ ហើយបានអះអាងថា គាត់គ្រាន់តែនាំក្មេងស្រីទាំងនេះដែលបានសុំលុយនៅក្បែរកាស៊ីណូណាហ្គាវើល ទៅញ៉ាំការ៉េម ហើយបាននាំក្មេងស្រីអាយុ១១ឆ្នាំម្នាក់ទៅមើលកុននៅផ្សារសូរិយាតែប៉ុណ្ណោះ។
លោក លី សុខឡេង ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍នៅពេលប្រកាសសាលក្រមថា “តុលាការបានសម្រេចផ្តន្ទាទោសលោក ម៉ៃឃើល ហ្គ្លីន ចូន ឲ្យជាប់ពន្ធនាគារ៨ឆ្នាំ និងពិន័យជាប្រាក់៤លានរៀល ពីបទទិញពេស្យាចារកុមារ និងពីបទប្រព្រឹត្តអំពើមិនសមរម្យលើអនីតិជនក្រោមអាយុ១៥ឆ្នាំ”។
ចៅក្រម សុខឡេង បានបន្ថែមថា “បន្ទាប់ពីជននេះបញ្ចប់រយៈពេលជាប់ពន្ធនាគារ តុលាការក៏បានហាមឃាត់មិនឲ្យចូលប្រទេសកម្ពុជាផងដែរ។ តុលាការបានបង្គាប់ឲ្យចុងចោទបង់រូបនេះបង់ប្រាក់៨លានរៀលដល់ដើមចោទទាំងពីរនាក់”។
បន្ទាប់ពីចៅក្រម សុខឡេង បានប្រកាសសាលក្រម លោក ចូន បាននិយាយភ្លាមៗថាលោកមានគម្រោងប្តឹងឧទ្ធរណ៍។
មុនពេលសន្តិសុខពន្ធនាគារនាំចេញពីសាលសវនាការតាមសេចក្តីបង្គាប់របស់ចៅក្រម ជននេះបាននិយាយថា “ខ្ញុំនឹងប្តឹងឧទ្ធរណ៍”។
នៅខាងក្រៅសាលសវនាការ លោក រ៉ូ ប៊ីនីកេ មេធាវីរបស់លោក ចូន បានមានប្រសាសន៍ថា មិនមានភ័ស្តុតាងគ្រប់គ្រាន់បង្ហាញថា កូនក្តីរបស់លោកមានពិរុទ្ធភាពឡើយ។
លោកបានមានប្រសាសន៍ថា “វាអយុត្តិធម៌ចំពោះកូនក្តីរបស់ខ្ញុំ ពីព្រោះមិនមានភ័ស្តុតាងគ្រប់គ្រាន់ដើម្បីដាក់បន្ទុកលើកូនក្តីរបស់ខ្ញុំឡើយ។ យើងមិនអាចទទួលយកបានឡើយ ដូច្នេះយើងនឹងប្តឹងឧទ្ធរណ៍”។
លោក សំលៀង សិលា នាយកប្រចាំប្រទេសនៃអង្គការសកម្មភាពដើម្បីកុមារបានមានប្រសាសន៍ថា មានជនរងគ្រោះបួននាក់មកពីគ្រួសារពីរផ្សេងគ្នាជាប់ពាក់ព័ន្ធករណីនេះ
ហើយថា លោកស្វាគមន៍សេចក្តីសម្រេចរបស់តុលាការ។
លោកបានមានប្រសាសន៍ថា “បុរសរូបេនះបានប្រព្រឹត្តបទល្មើសធ្ងន់ធ្ងរលើក្មេងស្រី ហើយត្រូវតែទទួលខុសត្រូវ។ យើងស្វាគមន៍សេចក្តីសម្រេចរបស់តុលាការ”៕ សារុន