34.8 C
Phnom Penh

ជា​សត្រូវ​ចាស់​ លោក ហ៊ុន សែន លោក សម រង្ស៊ី មើលឃើញ​ក្តី​សង្ឃឹម

ដោយ ឌឹ ខេមបូឌា ដេលី

បទវិភាគ

បន្ទាប់ពី​មាន​វោហារ​សាស្ត្រ​ជូរ​ចត់​និង​អំពើ​ហិង្សា​ជាច្រើន​ឆ្នាំ លោក សម រង្ស៊ី មេដឹកនាំ​បក្ស​ប្រឆាំង ដែល​ទទួល​បាន​ការ​លើក​លែង​ទោស​ថ្មីៗ បាន​ត្រឡប់​ពី​ការ​រស់​នៅ​និរទេស​ក្នុង​ប្រទេស​បារាំង ដើម្បី​ប្រកាស​ការ​បញ្ចប់​វប្បធម៌​នយោបាយ​ដែល​ឈ្នះ​ចាញ់​នៅ​ប្រទេស​កម្ពុជា និង​ការ​ចាប់​ផ្តើម​ថ្មី​ក្នុង​ទំនាក់​ទំនង​របស់​លោក​ជាមួយ​ លោក​នាយក​រដ្ឋមន្ត្រី ហ៊ុន សែន។

លោក សម រង្ស៊ី មេដឹកនាំបក្សប្រឆាំង និង លោកនាយករដ្ឋមន្ត្រី ហ៊ុន សែន  ដើរទស្សនា​ពិព័រណ៍​អង្គរសង្គ្រាន្តក្នុងក្រុងសៀមរាម កាលពីសប្តាហ៍មុន។  Alex Willemyns
លោក សម រង្ស៊ី មេដឹកនាំបក្សប្រឆាំង និង លោកនាយករដ្ឋមន្ត្រី ហ៊ុន សែន ដើរទស្សនា​ពិព័រណ៍​អង្គរសង្គ្រាន្តក្នុងក្រុងសៀមរាម កាលពីសប្តាហ៍មុន។ Alex Willemyns

លោក រង្ស៊ី បាន​មាន​ប្រសាសន៍​បន្ទាប់ពី​កិច្ច​ប្រជុំ​នៅ​ភូមិគ្រឹះ​របស់​លោក​នាយក​រដ្ឋមន្ត្រី​ក្នុង​ក្រុង​ភ្នំពេញ​ថា “យើង​ចង់​បង្កើត​វប្បធម៌​ថ្មី ដែល​ជា​វប្បធម៌​សន្ទនា ហើយ​បោះបង់​ចោល​ការ​វាយ​ប្រហារ​គ្នា ក្នុង​បំណង​ឲ្យ​មាន​ជំហរ​រួបរួម​គ្នា​ដើម្បី​ការពារ​ប្រយោជន៍​ជាតិ”។

លោក​បាន​មាន​ប្រសាសន៍​ថា “លោក​នាយក​រដ្ឋមន្ត្រី ហ៊ុន សែន បាន​អំពាវនាវ​ឲ្យ​ខ្ញុំ​ប្រើ​គតិបណ្ឌិត​ដើម្បី​ជួយ​កសាង​ជាតិ”។

គឺ​នៅ​ខែ​កុម្ភៈ​ឆ្នាំ​២០០៦​ហើយ ការ​សាទរ​ចំពោះ “វប្បធម៌​សន្ទនា” ថ្មី​ដែល​ទទួល​បាន​ការ​សរសើរ​ពី​សំណាក់​លោក រង្ស៊ី និង លោក ហ៊ុន សែន ដែល​លុប​បំបាត់​ចោល​ប្រវត្តិ​នៃ​ការ​មើល​ងាយ​គ្មាន​មេត្តា​លើ​គូ​ប្រឆាំង​របស់​លោក គឺ​ជា​ការ​អំពល់​ចិត្ត​ចុង​ក្រោយ​របស់​បក្ស​ប្រឆាំង។

តំណាង​រាស្ត្រ​គណបក្ស​ប្រឆាំង លោក អេង ឆៃអ៊ាង បាន​មាន​ប្រសាសន៍​នៅ​ពេល​នោះ​ថា “នេះ​ជា​វប្បធម៌​ថ្មី​មួយ​សម្រាប់​ប្រទេស​កម្ពុជា ដែល​ប្រមុខ​រដ្ឋាភិបាល​ចរចា​នឹង​បក្ស​ប្រឆាំង។ ពេល​ដែល​ខ្មែរ​រៀន​និយាយ​រក​ខ្មែរ គឺ​ល្អ​សម្រាប់​ប្រទេស”។

បី​ឆ្នាំ​ក្រោយ​មក ក្នុង​ពេល​មាន​បណ្តឹង​រដ្ឋាភិបាល​ដ៏​ច្រើន​ចំពោះ​សកម្មជន​និង​តំណាង​រាស្ត្រ​បក្ស​ប្រឆាំង លោក រង្ស៊ី បាន​ដក​បង្គោល​តម្រុយ​ព្រំដែន​វៀតណាម ក្នុង​ការ​តវ៉ា​មួយ ហើយ​ខ្លួន​លោក​បាន​ជាប់​បណ្តឹង​ព្រហ្មទណ្ឌ និង​ប្រឈម​ការ​ជាប់​ពន្ធនាគារ​មួយ​ទសវត្សរ៍។ ជា​ថ្មី​ទៀត លោក​បាន​ភៀសខ្លួន​ទៅ​ប្រទេស​បារាំង ស្នាក់​នៅ​ទី​នោះ​រហូត​ដល់​ខែ​កក្កដា​ឆ្នាំ​២០១៣ ខណៈ​ដែល​លោក ហ៊ុន សែន សប្បាយ​នឹង​អំណាច​លើស​លុប​គ្មាន​គូ​ប្រៀប។

ឥឡូវ​នេះ ជិត​មួយ​ទសវត្សរ៍​បន្ទាប់ពី​ការ​ប្រកាស​ពី​ដំបូង​របស់​លោក រង្ស៊ី នូវ “វប្បធម៌​សន្ទនា” ពាក្យ​នេះ​ស្ថិត​នៅ​លើ​បបូរ​មាត់​ជា​ថ្មី​ទៀត ដោយ​មេដឹកនាំ​បក្ស​ប្រឆាំង​លើក​កម្ពស់​គំនិត​មួយ​ប្រកប​ដោយ​សុទិដ្ឋិ​និយម​ថា លោក ហ៊ុន សែន ជា​មនុស្ស​កែប្រែ។

នៅ​អង្គរ​សង្ក្រាន្ត​ក្នុង​ក្រុង​សៀមរាប​កាលពី​សប្តាហ៍​មុន លោក រង្ស៊ី បាន​អង្គុយ​ញញឹម​ពី​ក្រោយ​លោក​នាយក​រដ្ឋមន្ត្រី ស្តាប់​សុន្ទរកថា​ដ៏​វែង​របស់​លោក​នាយក​រដ្ឋមន្ត្រី ក្រោយមក​ទៀត​អ្នក​ទាំង​ពីរ​ដើរ​ទស្សនា​ពិធី​បុណ្យ​យ៉ាង​សប្បាយ​ជាមួយ​គ្នា ដោយ​ពាក់​មួក​ស្លឹក​ត្នោត​ទៀត​ផង។

លោក ហ៊ុន សែន បាន​មាន​ប្រសាសន៍​ក្នុង​សុន្ទរកថា​របស់​លោក ដោយ​បែរ​ទៅ​រក​លោក រង្ស៊ី ថា “ប្រទេស​យើង​បាន​ឈាន​ដល់​ចំណុច​ថ្មី​មួយ​ដោយ​មាន​វត្តមាន​ឯក​ឧត្តម សម រង្ស៊ី …​នៅ​វេទិកា​ថ្ងៃ​នេះ។ វប្បធម៌​សន្ទនា​បាន​កើត​មាន​ក្នុង​ប្រទេស​កម្ពុជា ហើយ​ជំនួស​វប្បធម៌​ឈ្លោះ​ទាស់ទែង​និង​សម្លាប់​គ្នា”។

យោង​តាម​លោក សុខ ទូច អ្នក​វិភាគ​នយោបាយ​បាន​ឲ្យ​ដឹង​ថា លើ​ផ្ទៃ​មុខ អារម្មណ៍​ថ្មី​របស់​លោក ហ៊ុន សែន លេច​ឡើង បង្ហាញ​ជំនឿ​មុតមាំ​ថា ការ​បោះ​ឆ្នោត​ជាតិ​ឆ្នាំ​២០១៨​នឹង​ត្រូវ​ប្រកួត​គ្នា​ដណ្តើម​យក​អ្នក​បោះ​ឆ្នោត​និយម​កណ្តាល​ ដែល​មិន​គាំទ្រ​បក្ស​ណាមួយ ហើយ​ដែល​ចង់​បាន​កំណែ​ទម្រង់​ខ្លាំង ប៉ុន្តែ​ស្ទាក់​ស្ទើរ​ចំពោះ​ការ​ប្តូរ​របប។

លោក ទូច បាន​មាន​ប្រសាសន៍​ថា “វា​ជា​វិធី​មួយ​ដើម្បី​បាន​សន្លឹក​ឆ្នោត​ពី​ម្ចាស់​ឆ្នោត​គណបក្ស​ប្រជាជន​កម្ពុជា​និយម​កណ្តាល​មួយ​ចំនួន ដែល​អាច​ពិចារណា​អំពី​ការ​ប្តូរ​ទៅ​រក​គណបក្ស​សង្គ្រោះ​ជាតិ ក្នុង​ពេល​ដែល​រដ្ឋាភិបាល​ត្រូវ​ធ្វើការ​កែប្រែ​និង​ធ្វើ​ឲ្យ​ប្រសើរ​ឡើង បើ​ពុំ​នោះ​ទេ ខ្លួន​អាច​ចាញ់​ការ​បោះ​ឆ្នោត​លើក​ក្រោយ”។

លោក​បាន​និយាយ​ថា “វា​ត្រឹមត្រូវ​ដែរ​ដែល​ភាគរយ​តិចតួច​អាច​របូត​ចេញ​ពី​បក្ស​ប្រឆាំង។ ពួកគេ​អាច​លើក​ហេតុផល​និង​ប្រកួត​ប្រជែង​គ្នា​អំឡុង​ពេល​បោះ​ឆ្នោត ប៉ុន្តែ​ឥឡូវ ពួកគេ​ត្រូវតែ​ធ្វើ​ខ្លួន​ជា​កីឡា​ករ​ ដើម្បី​ទទួល​យក​លទ្ធផល​បោះ​ឆ្នោត ទោះ​ជា​អ្នក​ណា​ឈ្នះ​ក៏ដោយ”។

ក្រោម​ទស្សនៈ​បែប​នេះ ការ​សម្រេច​ចិត្ត​របស់​លោក រង្ស៊ី ដែល​អាច​ធ្វើ​ឲ្យ​បាត់បង់​អ្នក​គាំទ្រ​មួយ​ចំនួន ដោយ​ការ​ស្និទ្ធស្នាល​នឹង​លោក ហ៊ុន សែន គឺ​ជា​ផ្នែក​មួយ​នៃ​យុទ្ធ​សាស្ត្រ​ដើម្បី​បង្ហាញ​ថា វប្បធម៌​ហិង្សា​នយោបាយ​ចាស់​និង​ការ​បែក​បាក់ ពិត​ជា​មិន​អាច​កើត​ឡើង​ទេ។

លោក ធន សារ៉ាយ ប្រធាន​​​អង្គការ​​​សិទ្ធិ​​​មនុស្ស​​​អាដហុក និង​ជា​មេដឹកនាំ​សង្គម​ស៊ីវិល​លេច​ធ្លោ​ម្នាក់​តាំងពី​ទសវត្សរ៍​ឆ្នាំ​១៩៨០​មក​បាន​មាន​ប្រសាសន៍​ថា “ឥឡូវ​នេះ​មាន​របៀប​ដោះស្រាយ​ថ្មី​ពី​បក្ស​ប្រឆាំង”។

លោក សារ៉ាយ បាន​មាន​ប្រសាសន៍​ថា “ពេល​នេះ ខ្ញុំ​គិត​ថា លោក សម រង្ស៊ី មាន​លក្ខណៈ​ស្និទ្ធ​ស្នាល​ជាង​មុន ហើយ​កំពុង​ព្យាយាម​មិន​រិះគន់​គណបក្ស​ប្រជាជន​កម្ពុជា​ខ្លាំងៗ​ទេ ដើម្បី​ព្យាយាម​បង្កើត​ឲ្យ​មាន​ការ​ផ្ទេរ​អំណាច​ដោយ​រលូន ប្រសិនបើ​គណបក្ស​ប្រឆាំង​ឈ្នះ​ក្នុង​ការ​បោះ​ឆ្នោត​លើក​ក្រោយ”។

“លោក ហ៊ុន សែន កំពុង​ព្យាយាម​បង្ហាញ​ថា គណបក្ស​ប្រឆាំង​គាំទ្រ​សេចក្តី​សម្រេច​របស់​លោក ថា​លោក​ព្យាយាម​ស្វែងរក​ការ​សម្រប​សម្រួល និង​ថា បក្ស​ប្រឆាំង​គឺ​មិន​ខុស​គ្នា​ខ្លាំង​ពី​លោក​ទេ”។

ចំពោះ​លោក រង្ស៊ី ការ​មាន​ទំនាក់​ទំនង​ល្អូកល្អិនជា​ថ្មី​ជាមួយ​លោក ហ៊ុន សែន គឺ​តាម​ពិត ​ជំរុញ​ដោយ​ជំនឿ​ស្មោះ​ត្រង់​ថា លោក​នាយក​រដ្ឋមន្ត្រី​អាច​ទទួល​ការ​លួង​លោម​ទៅ​ក្នុង​អារម្មណ៍​ប្រជាធិបតេយ្យ និង​ជឿជាក់​ ក្នុង​ការ​ប្រគល់​អំណាច ប្រសិនបើ​លោក​ចាញ់​នៅ​ឆ្នាំ​២០១៨​មែន​នោះ។

លោក រង្ស៊ី បាន​មាន​ប្រសាសន៍​ក្នុង​អីុម៉េល​កាលពី​ថ្ងៃ​ច័ន្ទ​ថា “ខ្ញុំ​ធ្លាប់​ស្អប់ លោក ហ៊ុន សែន ដូច​ដែល​ខ្ញុំ​​ស្អប់​ជន​ផ្តាច់ការ​លើ​ពិភព​លោក​ដូច្នោះ​ដែរ។ ប៉ុន្តែ ថ្មីៗ​នេះ​ខ្ញុំ​នឹក​ឃើញ​​ថា ខ្ញុំ​មិន​គួរ​ស្អប់​ខ្ពើម​នរណា​ម្នាក់​ទេ​ក្នុង​នាម​ជា​មនុស្ស ទោះជា​ពួកគេ​អាក្រក់​យ៉ាងណា​ក៏ដោយ ប៉ុន្តែ ខ្ញុំ​ស្អប់​និង​ប្រឆាំង​តែ​ឧក្រិដ្ឋកម្ម ដែល​មនុស្ស ‘អាក្រក់’ បាន​ប្រព្រឹត្ត​ប៉ុណ្ណោះ។

លោក​បាន​បន្ថែម​ថា “ខ្ញុំ​ដឹង​ថា សូម្បី​សត្វ​ចម្លែក​ក៏​អាច​មាន​អារម្មណ៍​មនុស្ស​ជាតិ​ដែរ។ បញ្ហា​ប្រឈម​បំផុត គឺ​ត្រូវ​ជួយ​មនុស្ស​ឲ្យ​ចម្រើន​លូតលាស់​គ្រប់​ទីកន្លែង”។

“ពេលណា​អ្នក​គ្មាន​ការ​ស្អប់​ខ្ពើម​ក្នុង​ខ្លួន ពេល​នោះ​អ្នក​ក៏​គ្មាន​អារម្មណ៍​ភ័យ​ខ្លាច​ដែរ ហើយ​សេរីភាព​ថ្មី​នេះ ធ្វើឲ្យ​លោក​អ្នក​ចាប់​ផ្តើម​ធ្វើ​អ្វីមួយ ដែល​លោក​អ្នក​មិន​ដែល​គិត​ដល់​ពី​មុន​មក ដូចជា​ការ​ចូល​រួម​សន្ទនា​ជាមួយ​អតីត​សត្រូវ​អាក្រក់​បំផុត​របស់​អ្នក​ជាដើម”។

ប៉ុន្តែ លោក​ ដេវិដ ឆាណ្ឌល័រ (David Chandler) ជា​អ្នក​ប្រវត្តិ​សាស្ត្រ​ដ៏​ល្បី​អំពី​ប្រទេស​កម្ពុជា និង​ជា​សាស្ត្រាចារ្យ​កិត្តិយស​ នៅ​សាកល​វិទ្យាល័យ​ម៉ែលប៊ិន បាន​មាន​ប្រសាសន៍​ថា សុទិដ្ឋិ​និយម​របស់​លោក រង្ស៊ី ផ្ទុយ​គ្នា​នឹង​បទ​ពិសោធ​អតីត​កាល​ជាមួយ​លោក​ ហ៊ុន សែន ដែល​លោក​បាន​មាន​ប្រសាសន៍​ថា ទំនង​ជា​ប្រើ​មេដឹកនាំ​គណបក្ស​ប្រឆាំង​រូប​នេះ​ជា​វ៉ាល់​សម្ពាធ​ ដើម្បី​ដោះ​ស្រាយ​​ភាព​ទោមនស្ស​កាន់​តែ​ច្រើន​ឡើង​​នៅ​ក្នុង​ការ​បោះ​ឆ្នោត​នា​ឆ្នាំ​២០១៣​កន្លង​មក​នេះ។

លោក ឆាណ្ឌល័រ​ បាន​មាន​ប្រសាសន៍​ថា “តាម​ពិត​ទៅ លោក​ ហ៊ុន សែន​ ជាអ្នក​លេង​អុក​ មិន​បាន​ធ្វើ​អ្វី​មួយ​ដែល​បន្ធូរ​បន្ថយ​ ឬ​គំរាម​កំហែង​ពី​ចម្ងាយ​លើ​ការ​គ្រប់​គ្រង​ល្បែង​របស់​លោក​ឡើយ​។ លោក​អាច​គិត​ថា ការ​មាន​វត្តមាន​លោក​ រង្ស៊ី ដែល​ស្តាប់​តាម​និង​ដែល​មាន​សង្ឃឹម​នៅ​ក្នុង​ក្រុម​ចម្រុះ​ដែល​គ្រប់​គ្រង​ដោយ​ ហ៊ុន សែន នឹង​ដោះ​ស្រាយ​បញ្ហា​បក្ស​សង្គ្រោះ​ជាតិ”។

លោក ឆាណ្ឌល័រ បាន​មាន​ប្រសាសន៍​បន្ត​ថា “តាម​ពិត បញ្ហាគឺ​ចេញ​ពី​ប្រអប់​នយោបាយ​បោះ​ឆ្នោត​ គណបក្ស​នានា​។ល។ និង​មាន​ភាព​ច្រាស់ច្រាល​និង​ការ​មិន​ពេញ​ចិត្ត​ដែល​កើត​ឡើង​ជាទូទៅ ជំរុញ​ដោយ​សារព័ត៌មាន​បណ្តាញ​សង្គម​ និង​តាម​វិធី​ដែល​កម្ពុជា​ត្រូវ​គ្រប់​គ្រង​”។

លោក អ៊ា សុផល អ្នក​និពន្ធ​សៀវភៅ​ឆ្នាំ​២០១២​ ដែល​មាន​ចំណង​ជើង​ថា “ការ​ពឹង​ផ្អែក​ជំនួយ​នៅ​ក្នុង​កម្ពុជា​” បាន​មាន​ប្រសាសន៍​ថា ដរាប​ណា​ស្ថានការណ៍​នៅ​តែ​ដដែល​ ដរាប​នោះ លោក​ ហ៊ុន​ សែន​ នឹង​បន្ត​សរសើរ​លោក​ រង្ស៊ី ហើយ​និង​មាន​ទស្សនៈ​ថា មេដឹក​នាំ​គណបក្ស​សង្គ្រោះ​ជាតិ​រូប​នេះ​កំពុង​ផ្លាស់​ប្តូរ​វប្បធម៌​នយោបាយ​ប្រទេស​ជាតិ។

លោក សុផល​ ដែល​ជា​សាស្ត្រាចារ្យ​រង​ផ្នែក​កិច្ច​ការ​ពិភព​លោក​នៅ​ឯ​មហាវិទ្យាល័យ អុកស៊ីដិន​ថល ក្នុង​ក្រុង​ឡូស​អេន​ជេឡេស​ បាន​មាន​ប្រសាសន៍ថា “វា​គ្មាន​អ្វី​ថ្មី​ទេ​។ លោក​អ្នក​ចាប់​បាន​រុយ​ច្រើន​ ដោយ​ប្រើ​ទឹក​ឃ្មុំ​ ជាជាង​ប្រើ​ទឹក​ខ្មេះ​។ ទោះ​ជា​យ៉ាង​នេះ​ក្តី​ វា​គ្រាន់​តែ​ជា​នយោបាយ​ប៉ុណ្ណោះ​។ ថ្ងៃ​ស្អែក​ អ្វីៗ​នឹង​ផ្សេង​ទៅវិញ​”។

លោក សុផល បាន​មាន​ប្រសាសន៍​បន្ត​ថា “មនុស្ស​ខ្លះ​នឹង​ត្រូវ​ចាប់​ខ្លួន​មិន​យូរមិន​ឆាប់​។ មនុស្ស​ខ្លះ​នឹង​ត្រូវ​ដោះ​លែង​។ វា​ជា​ល្បែង​ឆ្មា​​និង​កណ្តុរ​។ ប៉ុន្តែ មាន​តែ​កណ្តុរ​ប៉ុណ្ណោះ​ដែល​ផ្លាស់​ប្តូរ​”។

​​​​​​លោក រង្ស៊ី បាន​មាន​ប្រសាសន៍​នៅ​ក្នុង​កិច្ច​សម្ភាស​ដាច់​ដោយ​ឡែក​​មួយ​​ កាលពី​ថ្ងៃ​អាទិត្យ​ថា លោក​មិន​ព្រួយ​បារម្ភ​អំពី​ការ​ប្រៀបធៀប​រវាង​ស្ថានការណ៍​បច្ចុប្បន្ន​ និង​ការ​ប៉ុន​ប៉ង​ដែល​មិន​បាន​សម្រេច​កន្លង​មក​ ដើម្បី​ធ្វើ​ការ​ឆ្ពោះ​ទៅ​រក​វប្បធម៌​នយោបាយ​ថ្មី​មួយ​ជាមួយ​លោក​ ហ៊ុន សែន នោះ​ទេ។

លោក​ សម រង្ស៊ី បាន​មាន​ប្រសាសន៍​ការពារ​សេចក្តី​សង្ឃឹម​នៃ​ការ​ផ្លាស់​ប្តូរ​យូរ​អង្វែង​ថា ការ​ប៉ុន​ប៉ង​ទី​១ ទី២ ឬ​ទី៣ មិន​តែង​តែ​ទទួល​បាន​ជោគ​ជ័យ​ទេ​។ វា​ត្រូវ​ការ​ពេល​វេលា​និង​ការ​ថ្លឹង​ថ្លែង​ ដើម្បី​ទទួល​បាន​ទំនាក់ទំនង​យូរ​អង្វែង​ និង​ប្រកប​ដោយ​សន្តិវិធី​។

លោក​ រង្ស៊ី បាន​មាន​ប្រសាសន៍​ថា ជួន​កាល​ប្រវត្តិសាស្ត្រ​អាច​ផ្លាស់​ប្តូរ​តាម​រយៈ​ទំនាក់​ទំនង​ផ្ទាល់​ខ្លួន​។ នៅ​ពេល​ដែល​អ្នក​ចាប់​ផ្តើម​កសាង​ទំនុក​ចិត្ត​នោះ​ គឺ​ជា​ទំនាក់ទំនង​មនុស្ស។ ការ​វិភាគ​ផ្នែក​នយោបាយ​ស៊ីជម្រៅ​ ធ្វើ​ឲ្យ​យល់​បញ្ហា​នេះ​។ វា​ជា​រឿង​ផ្ទាល់​ខ្លួន​ ឬ​ខ្ញុំ​អាច​និយាយ​ថា ការ​ផ្សះផ្សា​ស្មារតី​។

យោង​តាម​លោក​ ឆាណ្ឌល័រ ឲ្យ​ដឹង​ថា តាម​វិធី​មួយ គណបក្ស​ប្រឆាំង​ដែល​រួប​រួម​គ្នា​របស់​លោក​ សម រង្ស៊ី គឺ​ជា​ការ​គំរាម​កំហែង​ដ៏​ធំ​បំផុត​​ចំពោះ​អំណាច​លោក​ ហ៊ុន សែន ចាប់​តាំង​ពី​គណបក្ស​ ហ្វុន​ស៊ីនបុិច នា​ទសវត្សរ៍​ឆ្នាំ​១៩៩០​ ដែល​លោក​ ហ៊ុន សែន បាន​អូស​ទាញ​យ៉ាង​ប៉ិន​ប្រសប់​ ហើយ​បន្ទាប់​មក​ទាត់​ចោល​ដោយ​មាន​ប្រសិទ្ធ​ភាព​វិញ​នោះ។

លោក ឆាណ្ឌល័រ បាន​មាន​ប្រសាសន៍​ថា “ខ្ញុំ​មាន​មន្ទិល​ ថាតើ រង្ស៊ី នឹង​អាច​ចាកចេញ​ពី​សំបុក​ពីង​ពាង​ បាន​ងាយ​ស្រួល​ដូចជា​ពេល​ដែល​លោក​បាន​ចូល​មក​នោះ​ឬ​យ៉ាងណា​ទេ។ រាល់​ថ្ងៃ ឬ​រាល់​សប្តាហ៍​នឹង​មិន​មាន​អំពើ​ហិង្សា​ គឺ​ជា​រឿង​ល្អ ប៉ុន្តែ​ខ្ញុំ​មិន​មាន​សុទិដ្ឋិនិយម​ថា សន្តិភាព​នេះ​នឹង​កើត​មាន​យូរ​អង្វែង​ឡើយ”៕ និត និង រើន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស