បន្ទាប់ពីកុមារបីនាក់បានលង់ទឹកស្លាប់ក្នុងអាងហែលទឹកក្នុងសណ្ឋាគារកាលពីសប្តាហ៍មុន រដ្ឋមន្ត្រីក្រសួងទេសចរណ៍បានមានប្រសាសន៍កាលពីម្សិលមិញថា លោកនឹងស្នើឲ្យនគរបាលចុះទៅសើុបអង្កេតសណ្ឋាគារពីរដែលមានគ្រោះថ្នាក់កើតឡើង ដើម្បីសម្រេចថា តើសណ្ឋាគារនោះត្រូវទទួលខុសត្រូវឬយ៉ាងណានោះ។
លោក ថោង ខុន បានមានប្រសាសន៍ថា លិខិតស្នើសុំមួយដែលគ្រោងចេញនៅថ្ងៃនេះក៏នឹងស្នើឲ្យនគរបាលទៅបិទសណ្ឋាគារទាំងនោះរហូតដល់ការស៊ើបអង្កេតចប់សព្វគ្រប់។
លោកបានមានប្រសាសន៍ថា “យើងនឹងសរសេរលិខិតផ្ញើជូនសណ្ឋាគារដែលកុមារទាំងនោះបានលង់ទឹកស្លាប់នៅក្នុងអាងហែលទឹក ហើយប្រសិនបើនគរបាលរកឃើញថា សណ្ឋាគារមានកំហុស យើងនឹងបិទសណ្ឋាគារនោះ។
លោក ថោង ខុន បានបន្ថែមថា នាពេលអនាគតក្រសួងនឹងចុះធ្វើអធិការកិច្ចសណ្ឋាគារទាំងអស់ទូទាំងប្រទេស ដើម្បីធានាថា គ្រប់សណ្ឋាគារមានអ្នកចាំជួយសង្គ្រោះនៅតាមអាងហែលទឹករបស់ខ្លួន។ លោកមិនបានលើកឡើងថា តើការចុះធ្វើអធិការកិច្ចនៅពេលណា ឬនៅកន្លែងណានោះឡើយ ហើយបានបន្ថែមថា បច្ចុប្បន្ននេះដោយសារមិនទាន់មានច្បាប់ដាក់កម្រិតលើសណ្ឋាគារដែលមានអាងហែលទឹកនោះ ក្រសួងនឹងផ្តល់អនុសាសន៍ឲ្យសណ្ឋាគារជួលអ្នកចាំជួយសង្គ្រោះអ្នកលង់ទឹក។
កាលពីថ្ងៃទី១៥ ខែមេសា ក្មេងប្រុសពីរនាក់អាយុ៦ឆ្នាំ និង១៧ឆ្នាំ បានលង់ទឹកស្លាប់នៅអាងហែលទឹកនៅសណ្ឋាគារ Rock Royal Hotel & Resort ក្នុងក្រុងកែប។
លោក ផល ភស្តា អធិការនគរបាលក្រុងព្រះសីហនុ បានមានប្រសាសន៍ថា “ហើយកាលពីល្ងាចថ្ងៃច័ន្ទ ក្មេងប្រុសអាយុ៤ឆ្នាំម្នាក់ បានលង់ទឹកស្លាប់នៅអាងហែលទឹកនៅសណ្ឋាគារ Hotel Gold Cambodia ក្នុងក្រុងព្រះសីហនុ។
លោក ភស្តា បានមានប្រសាសន៍ថា ឪពុកម្តាយក្មេងប្រុស ប៉ាង ពិភព មកពីខេត្តកំពង់ធំ បានទុកក្មេងប្រុសនេះឲ្យម្តាយមីងមើលនៅអាងហែលទឹកនោះនៅម៉ោងប្រហែល៧យប់។
លោកបានមានប្រសាសន៍ថា “ប៉ុន្តែ ម្តាយមីងនោះបានឈរនិយាយជាមួយសាច់ញាតិ ស្រាប់តែក្មេងប្រុសអាយុ៤ឆ្នាំនោះធ្លាក់ទឹក ហើយលង់ស្លាប់”។
លោក កង វ៉ាន់ធូ ជំនួយការអ្នកគ្រប់គ្រងនៅសណ្ឋាគារនេះបាននិយាយថា សណ្ឋាគាររបស់លោកបានជួលអ្នកចាំជួយសង្គ្រោះម្នាក់ ប៉ុន្តែ រហូតដល់ម៉ោង៦និង៣០នាទីល្ងាចតែប៉ុណ្ណោះ។
លោក វ៉ាន់ធូ បាននិយាយថា “នេះមិនមែនជាកំហុសរបស់យើងទេ ពីព្រោះពួកគេដឹងថា អ្នកចាំជួយសង្គ្រោះរបស់យើងបានចាកចេញនៅម៉ោង៦ និង៣០នាទីល្ងាចហើយ”។ លោកបានបន្ថែមថា សាច់ញាតិរបស់ក្មេងប្រុសនេះប្រហែល១០នាក់បាននៅកន្លែងអាងហែលទឹកនោះនៅពេលមានគ្រោះថ្នាក់កើតឡើង។
លោក វ៉ាន់ធូ បាននិយាយថា “សណ្ឋាគារមិនជំទាស់នឹងការសើុបអង្កេតពីការស្លាប់របស់ក្មេងប្រុសនេះឡើយ។ លោកបាននិយាយថា “ប្រសិនបើក្រសួងទេសចរណ៍ចាំបាច់ត្រូវឲ្យយើងបិទនោះ យើងមិនអាចប្រឆាំងបានឡើយ។ប៉ុន្តែ ពួកគេដឹងថា ក្មេងប្រុសនេះស្លាប់ដោយសារតែកំហុសរបស់ឪពុកម្តាយ”។
យោងតាមអង្គការសុខភាពពិភពលោកបានឲ្យដឹងថា ការលង់ទឹកស្លាប់គឺជាមូលហេតុទូទៅបំផុតនៃការស្លាប់របស់កុមារអាយុពី៥ឆ្នាំ ដល់១៤ឆ្នាំ ក្នុងប្រទេសកម្ពុជា៕សារុន