នគរបាលបានឲ្យដឹងថា បុរសបួននាក់ត្រូវបានចាប់ខ្លួននៅក្នុងស្រុកកូនមុំ ខេត្តរតនគិរីកាលពីព្រឹកម្សិលមិញ ពីបទប៉ុនប៉ុងសម្លាប់ប្តីប្រពន្ធពីរនាក់ដែលពួកគេចោទប្រកាន់ថា ចេះអំពើអាបធ្មប់។
លោក ភោគ សារិទ្ធ អធិការនគរបាលស្រុកកូនមុំ បានលើកឡើងថា បុរសឈ្មោះ ណែម ភី អាយុ៣៧ឆ្នាំ សាត អាន អាយុ២៧ឆ្នាំ សា ពៅ អាយុ២៣ឆ្នាំ និង សាត ទៀង អាយុ១៩ឆ្នាំ បានយកកាំបិតខ្វែវវាយប្រហារប្តីប្រពន្ធពីរនាក់ដែលប្តីឈ្មោះ សុខ សៅ ប្រពន្ធឈ្មោះ លាវ សន និងមានអាយុ៥២ឆ្នាំដូចគ្នា កាលពីយប់ថ្ងៃអាទិត្យ។
លោក សារិទ្ធ បានមានប្រសាសន៍ថា “បុរសជាប្តីបានត្រូវគេកាប់ចំជើងឆ្វេងពីរកន្លែង និងដៃស្តាំមួយកន្លែង រីឯប្រពន្ធវិញត្រូវគេកាប់ចំជើងឆ្វេង។ ពួកគេទាំងពីរនាក់សុទ្ធតែរងរបួសធ្ងន់”។
លោក សេ សេន នាយប៉ុស្តិ៍ឃុំត្រពាំងក្រហមបានឲ្យដឹងថា ស្ត្រីជាប្រពន្ធ ក៏ត្រូវគេកាប់ចំក្បាល និងដងខ្លួនផងដែរ។
លោក សារិទ្ធ បានមានប្រសាសន៍បន្តថា “បន្ទាប់ពីពួកគេព្យាយាមវាយប្រហារលើប្តីប្រពន្ធពីរនាក់នេះម្តងហើយម្តងទៀត ផ្លែកាំបិតបានរបូតចេញពីដង ហេតុដូច្នេះស្ត្រីជាប្រពន្ធបានទៅយកកាំបិតខ្វែវនោះវាយប្រហារលើពួកគេវិញ ហើយក្នុងចំណោមជនសង្ស័យទាំងនោះមានម្នាក់ត្រូវរបួសត្រង់ដៃ។ ពួកគេបានរត់គេចខ្លួន បន្ទាប់ពីស្ត្រីជាប្រពន្ធបានស្រែក និងវាយប្រហារលើពួកគេ”។
លោកអធិការនគរបាលស្រុកបានលើកឡើងបន្តថា បុរសទាំងបួននាក់នេះបានរត់គេចចូលក្នុងព្រៃ ប៉ុន្តែ បានត្រឡប់ចូលភូមិវិញជាទីដែលពួកគេត្រូវបានចាប់ខ្លួន។
លោក សារិទ្ធ បានមានប្រសាសន៍ទៀតថា “យើងបានចាប់ខ្លួនពួកគេនៅម៉ោងប្រហែល៨ និង៣០នាទីព្រឹកនេះក្នុងឃុំត្រពាំងក្រហម បន្ទាប់ពីយើងបានដើររកពួកគេ និងសួរនាំអ្នកភូមិខ្លះៗ។ យើងបានឃើញពួកគេចេញមក ហើយបន្ទាប់មកយើងបានឲ្យពួកគេដោះអាវចេញ ហើយយើងបានឃើញបុរសម្នាក់មានរងរបួស”។
លោកបានមានប្រសាសន៍បន្ថែមថា “ពួកគេបានសារភាពថាខ្លួនបានព្យាយាមសម្លាប់ប្តីប្រពន្ធពីរនាក់នេះ ព្រោះពួកគាត់ចេះអំពើអាបធ្មប់ ហើយតែងតែធ្វើអំពើឲ្យពួកគេឈឺ និងក្តៅខ្លួន”។
ការចោទប្រកាន់អំពីការចេះអំពើអាបធ្មប់នៅតែកើតឡើងញឹកញាប់នៅតាមទីជនបទដោយអ្នកភូមិតែងតែបន្ទោសលើអ្នកចេះអំពើអាបធ្មប់ថា បានធ្វើឲ្យគេស្លាប់ ឬក៏ឈឺ ហើយក្រោយមកតែងតែមានការវាយប្រហារពីសំណាក់អ្នកភូមិ។
កាលពីដើមខែនេះ បុរសម្នាក់នៅក្នុងស្រុកបរកែវ ខេត្តរតនគិរីនេះដដែលបានរត់គេចចេញពីផ្ទះរបស់ខ្លួន បន្ទាប់ពីមានការគំរាមសម្លាប់ម្តងហើយម្តងទៀតពីសំណាក់អ្នកភូមិ ដែលបានចោទប្រកាន់បុរសរូបនេះថា ចេះអំពើអាបធ្មប់ដោយធ្វើឲ្យបុរសក្នុងភូមិហើមប្រដាប់ភេទរហូតដល់ស្លាប់”៕ ស៊ុយឈាង