36 C
Phnom Penh

តុលាការ​បន្ត​សាក​សួរ​​ឧត្តម​សេនីយ៍ទោ ថោង សារ៉ាត់ ពាក់ព័ន្ធ​ករណី​មនុស្ស​ឃាត

ដោយ ឌឹ ខេមបូឌា ដេលី

បទវិភាគ

នៅ​ថ្ងៃ​នេះ សាលា​ដំបូង​រាជធានី​ភ្នំពេញ​នឹង​បន្ត​ការ​សាក​សួរ​ឧត្ដម​សេនីយ៍​ទោ ថោង សារ៉ាត់ ​ដែល​ប្រឈម​ការ​ចោទ​ប្រកាន់​ពីបទ​រៀបចំ​ការ​ធ្វើ​ឃាត​លោកឧកញ៉ា អុឹង ម៉េងជឺ កាលពី​ខែ​វិច្ឆិកា ​ហើយ​ត្រូវ​បាន​ចាប់​ខ្លួន​កាលពីសប្តាហ៍​មុន បន្ទាប់ពី​រត់​គេច​ខ្លួន​រយៈពេល​ជាង​៤​ខែ​។

លោក លឹម វណ្ណា មេធាវី​​ម្នាក់​ក្នុង​ចំណោម​មេធាវី​របស់​ឧត្ដមសេនីយ៍ទោ ថោង សារ៉ាត់ ​បាន​មាន​ប្រសាសន៍​កាលពី​ម្សិលមិញ​ថា ចៅក្រម​ស៊ើបសួរ​ លី សុខឡេង នឹង​បន្ត​សាកសួរ​កូន​ក្ដី​របស់​លោក​ដែល​ត្រូវ​បាន​ចោទ​ប្រកាន់​កម្បាំង​មុខ​កាលពី​ខែ​ធ្នូ​ ពីបទ​ញុះញង់​ឲ្យ​មាន​ការ​ធ្វើ​ឃាត​ដោយ​គិត​ទុក​ជាមុន​ នៅ​ម៉ោង​២រសៀល​ថ្ងៃ​នេះ។

លោក​បាន​មាន​ប្រសាសន៍​ថា ” ចៅក្រម​ស៊ើបសួរ​ លី សុខឡេង នឹង​សាកសួរ​កូន​ក្ដី​របស់​ខ្ញុំ​នៅ​ថ្ងៃ​ស្អែក​​ម៉ោង​២រសៀល”។ លោក​បាន​បន្ថែម​ថា លោក​​និង​​​សមាជិក​ផ្សេង​ទៀត​នៃ​មេធាវី​ការ​ពារ​របស់​ឧត្ដម​សេនីយ៍ទោ​ ថោង សារ៉ាត់ នឹង​មាន​វត្តមាន​នៅ​សវនាការ​ជំនុំជម្រះ​នោះ​។

ឧត្ដម​សេនីយ៍ទោ ថោង សារ៉ាត់ ​ត្រូវ​បាន​ចាប់​ខ្លួន​កាលពី​យប់​ថ្ងៃព្រហស្បតិ៍ ហើយ​ត្រូវ​បាន​បញ្ជូន​ទៅ​តុលាការ​នៅ​ថ្ងៃ​បន្ទាប់ ទីដែល​លោក​ត្រូវ​បាន​សាកសួរ​រយៈ​ពេល​ប្រហែល​២ម៉ោង មុន​ពេល​បញ្ជូន​ទៅពន្ធនាគារ​ព្រៃស។

កាលពី​ថ្ងៃសុក្រ​ នគរ​បាល​បាន​លើក​ឡើង​ខុសៗ​គ្នា​ពីការ​ចាប់​ខ្លួន​ឧត្ដម​សេនីយ៍ទោ ថោង សារ៉ាត់។ នគរ​​បាល​រាជធានី និង​ការិយាល័យ​អាំងទែប៉ូល​ក្នុង​ប្រទេស​កម្ពុជា​លើក​ឡើង​ថា ឧត្ដម​សេនីយ៍ទោ​រូប​នេះ​ត្រូវ​បាន​ចាប់​ខ្លួន​​ក្នុង​ប្រទេស​វៀតណាម ចំណែក​ឯ​នគរ​បាល​ជាតិ​បាន​អះអាង​ថា លោក​ត្រូវ​បាន​ចាប់​ខ្លួន​ក្នុង​ទឹកដី​កម្ពុជា​តាម​​ព្រំដែន​វៀតណាម​ ក្នុង​ខេត្ត​ស្វាយ​រៀង​ ដោយ​អាជ្ញាធរ​កម្ពុជា​។

លោក វណ្ណា បាន​មាន​ប្រសាសន៍​កាលពី​ម្សិលមិញ​ថា លោក​មិន​ទាន់​មាន​ព័ត៌មាន​លម្អិត​ពី​ការ​ចាប់​ខ្លួន​កូនក្ដី​របស់​លោក​ឡើយ ពីព្រោះ​លោក​មិន​មាន​ឱកាស​និយាយ​ជាមួយ​គាត់​។

ទោះ​ជាយ៉ាង​ណា លោក ឆៃ ស៊ីណារិទ្ធ ប្រធាន​នាយក​ដ្ឋាន​សន្តិសុខ​ផ្ទៃ​ក្នុង​ក្រសួង​មហាផ្ទៃ​ បានស្វះស្វែង​​បញ្ជាក់​ពី​ហេតុការណ៍​ដែល​ឈាន​ទៅ​ដល់​​ការ​ចាប់​ខ្លួន​នេះ។

លោក​បាន​មាន​ប្រសាសន៍​ថា ” អាជ្ញាធរ​វៀតណាម​​បាន​រក​ឃើញ​ថា លោក ថោង សារ៉ាត់ បាន​ឆ្លង​ព្រំដែន​​ចូល​ប្រទេស​វៀតណាម​ដោយ​ខុស​ច្បាប់។ បន្ទាប់​មក​យើង​ដឹង​ថា អាជ្ញាធរ​វៀត​ណាម​បាន​ចាប់​ខ្លួន​គាត់ ហើយ​មាន​គម្រោង​​បណ្តេញ​​គាត់​ពី​ប្រទេស​វៀតណាម​មក​កម្ពុជា”។

ប្រធាន​​នាយក​ដ្ឋាន​សន្តិសុខ​រូប​នេះ​បាន​មាន​ប្រសាសន៍​ថា ” បន្ទាប់ពី​យើង​ទទួល​បាន​ព័ត៌មាន​នេះ យើង​បាន​បញ្ជូន​កម្លាំង​នគរ​បាល​ទៅ​ព្រំដែន ​ដើម្បី​អនុវត្ត​ដីកា​ចាប់​ខ្លួន​របស់​តុលា​ការ​នៅ​ពេល​គាត់​ត្រូវ​បាន​បណ្ដេញ​ចេញពី​ប្រទស​វៀតណាម​”។

លោក ស៊ីណារិទ្ធ បាន​មាន​ប្រសាសន៍​ថា នគរ​បាល​ជាតិ​បាន​ឃុំ​ខ្លួន​ឧត្ដម​សេនីយ៍ទោ​រូប​នេះ​ក្នុង​ក្រុង​បាវិត​ មិន​មែន​នៅ​ច្រក​ព្រំដែន​ទេ​។

អង្គរក្ស​ប្រាំ​នាក់​ក្នុង​ចំណោម​អង្គរក្ស​របស់​ឧត្តម​សេនីយ៍​ទោ ថោង សារ៉ាត់ ស្ថិត​ក្នុង​ពន្ធ​នាគារ​​នៅ​ឡើយ​​រង់ចាំ​ការ​កាត់​ក្ដី​ ដែល​តាម​ចោទ​ពីបទ​​សម្លាប់​លោក អុឹង ម៉េងជឺ ដែល​ត្រូវ​បាន​បាញ់​សម្លាប់​នៅ​ខាង​ក្រៅ​ហាង​លក់​ផ្លែឈើ​មួយ​កណ្ដាល​រាជធានី​ភ្នំពេញ​តាម​បញ្ជា​របស់​ចៅហ្វាយ​ខ្លួន​៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស