ក្រសួងមហាផ្ទៃរបស់កម្ពុជា បានលើកឡើងកាលពីម្សិលមិញថា ក្នុងចំណោមជនភៀសខ្លួនរាប់រយនាក់ដែលប្រទេសអូស្ត្រាលី កំពុងឃាត់ទុកនៅលើប្រទេសដែនកោះណូរូ នៅកណ្ដាលមហាសមុទ្រប៉ាស៊ីហ្វិកខាងត្បូង ខ្លួនរកបានអ្នកស្ម័គ្រចិត្តដំបូងដែលចង់មកកសាងជីវិតថ្មីក្នុងប្រទេសកម្ពុជា។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា គណៈប្រតិភូមួយក្រុមរបស់កម្ពុជា ដែលបច្ចុប្បន្នកំពុងចុះទៅពិនិត្យមើលជំរំជនភៀសខ្លួនលើកោះណូរូ បានបញ្ជាក់ថា បុរសជនជាតិភាគតិចរ៉ូហ៊ីងយ៉ា ម្នាក់ដែលបានភៀសខ្លួនពីប្រទេសភូមា ដោយសង្ឃឹមថានឹងបានទៅដល់ទឹកដីនៃប្រទេសអូស្ត្រាលីនោះ បានស្ម័គ្រចិត្តមកតាំងលំនៅក្នុងប្រទេសកម្ពុជាហើយ ប៉ុន្តែលោកមិនដឹងថា បុរសម្នាក់នោះនឹងមកដល់នៅពេលណាទេ។
លោកមានប្រសាសន៍ថា ” យើងទទួលបានអ្នកស្ម័គ្រចិត្តតែម្នាក់ប៉ុណ្ណោះ ហើយពេលនេះក្រុមរបស់យើងកំពុងធ្វើការជាមួយសមភាគីអូស្ត្រាលី”។
ប្រទេសអូស្ត្រាលីសង្ឃឹមថា នឹងបញ្ជូនអ្នកស្ម័គ្រចិត្តមួយក្រុមមកកាន់ប្រទេសកម្ពុជា កាលពីថ្ងៃច័ន្ទ ប៉ុន្តែបានពន្យារពេលជើងហោះហើរដំបូងដោយសារ “បញ្ហាភ័ស្តុភារទាក់ទិននឹងមន្ត្រីទៅពីកម្ពុជា ដែលជាប់ពាក់ព័ន្ធក្នុងដំណើរការនេះ”។ នៅពេលនោះ កម្ពុជាបានលើកឡើងថា ខ្លួនមិនដឹងថាមានអ្នកស្ម័គ្រចិត្តទេ។
ប្រសិនបើបុរសជនជាតិរ៉ូហុីងយ៉ា ខាងលើនេះពិតជាមកដល់មែននោះ គាត់នឹងក្លាយជាជនភៀសខ្លួនទី១ នៅលើកោះណូរូ ដែលមកតាំងលំនៅក្នុងប្រទេសកម្ពុជា ក្រោមកិច្ចព្រមព្រៀងដ៏ចម្រូងចម្រាសមួយដែលកម្ពុជា បានចុះហត្ថលេខាជាមួយប្រទេសអូស្ត្រាលីកាលពីឆ្នាំមុន ដើម្បីទទួលយកជនភៀសខ្លួនក្នុងចំនួនគ្មានកំណត់ ជាថ្នូរនឹងកញ្ចប់ជំនួយថវិកា៣១លានដុល្លារ។
ប្រទេសអូស្ត្រាលី បានបដិសេធមិនទទួលយកជនភៀសខ្លួនទាំងនេះដោយខ្លួនឯងទេ ហើយដោយសារតែបែបនេះបានរងការរិះគន់ពីសំណាក់បណ្ដាអង្គការសិទ្ធិមនុស្ស និងតំណាងរាស្ត្រគណបក្សប្រឆាំងទាំងនៅក្នុងទឹកដីរបស់ខ្លួន និងក្នុងប្រទេសកម្ពុជាព្រមទាំងអង្គការសហប្រជាជាតិផងដែរចំពោះការប្រគល់ពួកគេឲ្យមកប្រទេសមួយដែលស្ថិតក្នុងចំណោមប្រទេសក្រីក្របំផុត និងពុករលួយបំផុតក្នុងពិភពលោក។
សម្ព័ន្ធសកម្មភាពជនភៀសខ្លួន (Refugee Action Coalition) ជាអង្គការមួយមានមូលដ្ឋាននៅក្នុងទីក្រុងស៊ីដនី ដែលតស៊ូមតិដើម្បីសិទ្ធិរបស់ជនភៀសខ្លួន បានលើកឡើងកាលពីសប្ដាហ៍មុនថា ខ្លួនដឹងថា ជនស្វែងរកសិទ្ធិជ្រកកោនរហូតដល់ទៅប្រាំនាក់នៅលើកោះណូរូដែលបានយល់ព្រមផ្លាស់មករស់នៅក្នុងប្រទេសកម្ពុជា ប៉ុន្តែការអះអាងទាំងនេះមិនទាន់មានការបញ្ជាក់ទេ។
ស្ថិតក្រោមកិច្ចព្រមព្រៀងរបស់ខ្លួនជាមួយអូស្ត្រាលី កម្ពុជាបានយល់ព្រមទទួលយកតែជនភៀសខ្លួនផ្លូវការ និងនៅក្នុងករណីដែលពួកគេស្ម័គ្រចិត្តប៉ុណ្ណោះ។ អង្គការនេះព្រួយបារម្ភថា ប្រទេសអូស្ត្រាលី កំពុងដាក់គំនាបឲ្យជនស្វែងរកសិទ្ធិជ្រកកោនទាំងនេះចុះហត្ថលេខា និងជំរុញឲ្យពួកគេរើចេញឆាប់ៗតាមរយៈដំណើរការអះអាងនេះ។
លោក ខៀវ សុភ័គ បានមានប្រសាសន៍ថា បុរសជនជាតិរ៉ូហុីងយ៉ានេះគឺជាជនភៀសខ្លួនម្នាក់ដែលមានការបញ្ជាក់ត្រឹមត្រូវ។ លោកថ្លែងថា ” ពួកគេមានឋានៈជាជនភៀសខ្លួនរួចទៅហើយ ហើយគាត់បានស្ម័គ្រចិត្តមកតាមរយៈការបញ្ជាក់របស់ក្រុមកម្ពុជាយើង”។
លោកបានលើកឡើងទៀតថា លោកមិនដឹងថា បុរសម្នាក់នេះនឹងមកប្រទេសកម្ពុជានៅពេលណាទេ ប៉ុន្តែបានមានប្រសាសន៍ថា បុរសម្នាក់នេះនឹងមិនមកជាមួយគណៈប្រតិភូកម្ពុជា ដែលបានចេញទៅកាន់កោះណូរូ កាលពីថ្ងៃអាទិត្យ និងដែលរំពឹងថានឹងត្រឡប់មកវិញនៅសប្ដាហ៍នេះ ឬសប្ដាហ៍ក្រោយទេ។
លោកថ្លែងថា ” គាត់នឹងនៅទីនោះរហូតទាល់តែគាត់ទទួលបានភ្លើងខៀវ”។ ឧត្ដមសេនីយ៍រូបនេះបានបញ្ជាក់បន្ថែមថា ក្រសួងមហាផ្ទៃនឹងបន្តធ្វើការពីរាជធានីភ្នំពេញ ដើម្បីពិនិត្យមើលអ្នកស្ម័គ្រចិត្តរូបនេះ ប៉ុន្តែមិនមានប្រសាសន៍ថា ដំណើរការនេះស៊ីពេលយូរប៉ុណ្ណាឡើយ។
ក្រោមកិច្ចព្រមព្រៀងរបស់ខ្លួនជាមួយអូស្ត្រាលី កម្ពុជា ត្រូវពិនិត្យមើល “ឯកសារពាក់ព័ន្ធ” របស់អ្នកស្ម័គ្រចិត្តទាំងអស់ រួមទាំងឯកសារគ្របដណ្ដប់ព័ត៌មានផ្ទាល់ខ្លួន និងប្រវត្តិសុខភាពផងដែរ។
លោក កែម សារិន ប្រធាននាយកដ្ឋានជនភៀសខ្លួននៃក្រសួងមហាផ្ទៃ បានមានប្រសាសន៍ថា “យើងមិនទាន់មានប្រវត្តិរបស់គាត់នៅឡើយទេ។ នៅពេលយើងពិនិត្យមើលប្រវត្តិ និងសុខភាពរបស់គាត់រួចរាល់ ហើយនៅពេលយើងដឹងថា គាត់មិនបានប្រព្រឹត្តបទល្មើសណាមួយ និងមិនប្រើប្រាស់គ្រឿងញៀន ពេលនោះយើងនឹងជូនដំណឹងទៅគាត់ថា គាត់អាចមករស់នៅក្នុងប្រទេសរបស់យើងបាន”។
ស្ត្រីអ្នកនាំពាក្យក្រសួងអន្តោប្រវេសន៍នៃប្រទេសអូស្ត្រាលី បានលើកឡើងថា លោកស្រីគ្មានព័ត៌មានបច្ចុប្បន្នភាពស្ដីពីកិច្ចប្រឹងប្រែងតាំងលំនៅថ្មីទេចាប់តាំងពីសប្ដាហ៍មុន
ជាពេលដែលលោកស្រីលើកឡើងថា ក្រសួងនេះកំពុងចរចាជាមួយជនភៀសខ្លួនដែលបានបង្ហាញចំណាប់អារម្មណ៍ចង់ផ្លាស់មករស់នៅក្នុងប្រទេសកម្ពុជា។
ការបញ្ជាក់អំពីអ្នកស្ម័គ្រចិត្តដំបូងនេះ កើតមានឡើងចំពេលអូស្ត្រាលី ជំរុញយ៉ាងខ្លាំង
ឲ្យជនភៀសខ្លួននៅលើកោះណូរូ ទទួលយកការផ្តល់ឲ្យនេះ។កាលពីម្សិលមិញ កាសែត ឌឹ ហ្គាឌាន (The Guardian) បានបង្ហោះខ្សែវីដេអូលោក ភីតធើ ដាត់ធិន (Peter Dutton) រដ្ឋមន្ត្រីអន្តោប្រវេសន៍អូស្ត្រាលី នៅលើគេហទំព័ររបស់ខ្លួនដែលត្រូវបានចាក់បញ្ចាំង
ឲ្យជនភៀសខ្លួននៅលើកោះណូរូ មើលកាលពីពេលរសៀលថ្ងៃនោះ។
នៅក្នុងវីដេអូនោះ លោក ភីតធើ ដាត់ធិន បានលើកឡើងថា ” បងប្អូនមិនអាចតាំងលំនៅក្នុងប្រទេសអូស្ត្រាលី បានទេទោះស្ថិតក្នុងកាលៈទេសៈណាក៏ដោយ។ ប្រទេសអូស្ត្រាលី មិនមែនជាគោលដៅតាំងលំនៅសម្រាប់បងប្អូន ឬគ្រួសាររបស់បងប្អូនឡើយ។ នៅពេលវាមិនមែនជាប្រទេសអូស្ត្រាលីនោះ កម្ពុជា ផ្ដល់សុវត្ថិភាព សន្តិសុខ និងឱកាសដល់បងប្អូន”។
រដ្ឋមន្ត្រីរូបនេះបានហៅកម្ពុជាថាជា “ប្រទេសដែលមានការរីកចម្រើនឆាប់រហ័ស និងស្វាហាប់ជាមួយនឹងសេដ្ឋកិច្ចមានស្ថិរភាព និងមានឱកាសការងារច្រើន” ហើយបានជំរុញឲ្យជនភៀសខ្លួនទាំងនេះកុំយកចិត្តទុកដាក់ចំពោះ “ជនប្រឆាំង” ដែលណែនាំពួកគេមិនឲ្យទទួលយកការផ្តល់ឲ្យនេះ។
ការចាក់បញ្ចាំងខ្សែវីដេអូនេះធ្វើឡើងក្រោយមានលិខិតមួយច្បាប់កម្រាស់ប្រាំទំព័រដែលក្រសួងរបស់លោកបានចាប់ផ្តើមចែកទៅឲ្យជនភៀសខ្លួនទាំងនេះកាលពីដើមខែនេះ ដោយប្រាប់ពួកគេអំពីជំនួយដែលខ្លួនអាចរំពឹងទទួលបាន នៅពេលពួកគេមកដល់រាជធានីភ្នំពេញភ្លាម។
ការផ្ដល់ឲ្យនេះ រួមមានសាច់ប្រាក់ក្នុងដៃ និងការចំណាយរស់នៅទាំងអស់បង់ឲ្យរយៈពេល១ឆ្នាំ ព្រមទាំងមានអត្ថប្រយោជន៍មួយចំនួន ក្នុងនោះរួមមានទាំងការធានារ៉ាបរងសុខភាពរយៈពេលវែង ហើយជួយស្វែងរកការងារ ឬចាប់ផ្ដើមអាជីវកម្ម។
ប៉ុន្តែលិខិតនេះក៏ធ្វើការអះអាងមិនពិតមួយចំនួនដែរអំពីជីវិតរស់នៅក្នុងប្រទេសកម្ពុជា។ លិខិតនេះសរសេរថា ប្រជាពលរដ្ឋកម្ពុជាមាន “ការថែទាំសុខភាពដែលមានស្តង់ដារខ្ពស់ មានសេរីភាពគ្រប់បែបយ៉ាងក្នុងសង្គមប្រជាធិបតេយ្យ” ហើយមិនប្រឈមបញ្ហាឡើយជាមួយនឹងបទល្មើសហិង្សា។
ទោះជាយ៉ាងណា ដំបូន្មានផ្ទាល់ខ្លួនរបស់រដ្ឋាភិបាលអូស្ត្រាលី ស្តីពីការធ្វើដំណើរសម្រាប់ភ្ញៀវទេសចរដែលមកកម្សាន្តនៅកម្ពុជា ផ្ទុយគ្នាពីការអះអាងនៅក្នុងលិខិតនេះ
លើចំណុចទាំងបី។
ប៉ុន្តែទោះបីជាបែបនេះក្តី ក្រសួងអន្តោប្រវេសន៍របស់អូស្ត្រាលី បានបដិសេធមិនធ្វើការបកស្រាយឡើយជុំវិញការភូតកុហកនៅក្នុងលិខិតនេះ៕ សុខុម (រាយការណ៍បន្ថែមដោយ ម៉ិច ដារ៉ា)