មន្ត្រី បានឲ្យដឹងកាលពីម្សិលមិញថា កូនប្រុសរបស់ឧកញ៉ាម្នាក់ដែលត្រូវបានចោទប្រកាន់កាលពីសប្ដាហ៍មុន ពីបទប្រើអំពើហិង្សាទៅលើកូនប្រុសរបស់ឧកញ៉ាមេឈ្មួញឈើ ទ្រី ភាព នៅក្នុងរាជធានីភ្នំពេញ ត្រូវបានផ្ទេរចេញពីពន្ធនាគារប៉េហ្ស៊ីដែលមានសន្តិសុខធូររលុងទៅ បន្តឃុំខ្លួននៅពន្ធនាគារព្រៃសដែលមានសន្តិសុខតឹងរ៉ឹងបំផុតកាលពី ថ្ងៃអង្គារ។
លោក ថាន់ សាវឿន ប្រធានពន្ធនាគារប៉េហ្ស៊ីបានមានប្រសាសន៍ថា ” ឆ្មាំពន្ធនាគាររបស់យើងបានផ្ទេរគាត់ចេញកាលពីពេលរសៀល [ថ្ងៃអង្គារ]” មុនពេលបង្វែរសំណួរបន្ថែមទៀតទៅមន្ត្រីទៅនៅពន្ធនាគារព្រៃស ដែលមិនអាចទាក់ទងសុំការបំភ្លឺបាន។
ឌួង ឧត្ដមឆវិន ហៅ ឌួង ឆាយ អាយុ២៧ឆ្នាំ ដែលជាកូនប្រុសរបស់លោក ឌួង ងៀប ត្រូវបានកងរាជអាវុធហត្ថចាប់ខ្លួនកាលពីថ្ងៃទី១៦ ខែមេសា បន្ទាប់ពីរូបគេបានទះកំផ្លៀងយុវជន ទ្រី ដាលុច អាយុ២១ឆ្នាំដែលជាកូនប្រុសរបស់ឧកញ៉ា ទ្រី ភាព នៅក្នុងហាងចាក់សាក់មួយកន្លែង។
យោង តាមកងរាជអាវុធហត្ថបានឲ្យដឹងថា ឈ្មោះ ឌួង ឆាយ បានផ្ទុះកំហឹងនៅពេលខ្លួនដឹងថា យុវជន ទ្រី ដាលុច មិនស្គាល់ថារូបគេជានរណា។ ឌួង ឆាយ បាននិយាយក្នុងពេលកើតហេតុថា ” អញ្ញនឹងបាញ់វាចោលព្រោះវាមិនស្គាល់អញ្ញ” ដោយប្រាប់ឲ្យអង្គរក្សរបស់ខ្លួនយកកាំភ្លើងចេញពីរថយន្ត Cadillac ស៊េរីទំនើបមកឲ្យរូបគេ ក្រោយផ្ទុះអំពើហិង្សា។
លោក កុល ប៊ុន ព្រះរាជអាជ្ញារងអមសាលាដំបូងរាជធានីភ្នំពេញ ដែលបានចោទប្រកាន់ឈ្មោះ ឌួង ឆាយ បានបដិសេធមិនឆ្លើយបំភ្លឺជុំវិញការផ្ទេរនេះទេ ដោយបង្វែរសំណួរទៅចៅក្រមស៊ើបសួរ ហេង កេសារ៉ូ ដែលបានមានប្រសាសន៍ថា លោកមិនមែនជាអ្នកចាត់ការលើសំណុំរឿងនេះឡើយ។
សូម រំឭកថា កាលពីឆ្នាំ២០១៣ ឈ្មោះ ឌួង ឆាយ បានជាប់ពន្ធនាគារប៉េហ្ស៊ីរយៈពេល៦ខែ ពីបទវាយបុរសម្នាក់នឹងស្នាប់កាំភ្លើងនៅភោជនីយដ្ឋានមួយកន្លែងក្នុង រាជធានីភ្នំពេញ៕ សុខុម