29 C
Phnom Penh

រដ្ឋាភិបាល​​ងាក​ទៅ​រក​នគរបាល​ជា​ស្ត្រី​ចំពោះ​ការ​បំពេញការ​ងារ​ដោយ​ភាព​​ទន់ភ្លន់​

ដោយ ឌឹ ខេមបូឌា ដេលី

បទវិភាគ

អ្នកស្រី ទុយ ធីតា អាយុ​២៨​ឆ្នាំ​ជា​មន្ត្រី​​នគរ​បាល​ចរាចរ​បាន​និយាយ​ថា អ្នកស្រី​មិន​​ទទួល​សំណូក​ទេ។ ការ​​ស្ទង់មតិពី​ការ​ធ្វើ​​ចរាចរនៅ​​ចំណុច​ប្រសព្វ​នៃ​មហាវិថី​ព្រះសីហនុ និង​ផ្លូវ​លេខ៦៣​ក្នុង​រាជធានី​ភ្នំពេញ អ្នកស្រី ធីតា អាច​ជា​មុខ​មាត់​របស់​​ក្រសួង​មហាផ្ទៃ​ក្នុងការ​ជំរុញ​ឲ្យ​បង្កើន​ចំនួន​នគរ​បាល​ជា​ស្ត្រី​ក្នុង​ចំណោម​កម្លាំង​នគរ​បាល​ទូទាំង​ប្រទេស​ពី​ប្រហែល​៥ភាគរយ ឲ្យដល់​យ៉ាង​តិច​ក៏​៣០​ភាគ​រយ​ដែរ។

អ្នកស្រី​ ធីតា បាន​និយាយ​ថា “​នៅ​ពេល​ធ្វើការ​ពិន័យ​មនុស្ស​ ខ្ញុំ​ត្រូវ​អនុវត្ត​តាម​​ច្បាប់​ចរាចរណ៍។ ប៉ុន្តែ​ខ្ញុំ​មិន​​ប្រាកដ​ពី​នគរ​បាល​ផ្សេង​ទៀត​ឡើយ។​ ជួន​កាល​ពួកគាត់​​​ស្គាល់​គ្នា ដូច្នេះ​ហើយ​ពួកគាត់​អត់​ឱន ​ ហើយអនុញ្ញាត​​ឲ្យ​​ពួកគាត់​​ទៅ”។

នៅ​ក្នុង​ពិធី​ប្រគល់​សញ្ញាបត្រ​នៅ​បណ្ឌិត្យ​សភា​នគរ​បាល​ក្នុងខេត្ត​កណ្ដាល ​កាលពី​ខែ​មករា មាន​នគរ​បាល​ជា​ស្ត្រី​ដែល​បញ្ចប់​ការ​សិក្សា​តែ​៦៥​នាក់​ប៉ុណ្ណោះ​បើ​ប្រៀប​ធៀប​ទៅនឹង​នគរ​បាលជា​បុរស​១.១៤២​នាក់​ ស្រប​តាម​ការ​ប៉ាន់ប្រមាណរបស់លោក គៀត ច័ន្ទថារិទ្ធ អ្នក​នាំាពាក្យ​នគរ​បាល​​ជាតិ​​ថា ស្ត្រី​មាន​តែ​៥ភាគ​រយ​ប៉ុណ្ណោះ​ក្នុង​ចំណោម​នគរ​បាល​​ទូទាំង​ប្រទេស​៥៨.០០០​នាក់​។

​នៅ​ថ្ងៃ​នោះ​​លោក ស ខេង រដ្ឋមន្ត្រី​ក្រសួង​មហាផ្ទៃ​បាន​មាន​ប្រសាសន៍​ថា មន្ត្រី​នគរ​បាល​​ជា​ស្ត្រី​កាន់តែ​ច្រើន​ជា​ការ​ប្រសើរ​ក្នុង​​កង​កម្លាំង​នគរ​បាល​ ដោយ​លើក​ឡើង​ថា ពួកគេ​មិន​សូវ​ច្រងេងច្រងាង​​ដូច​បុរស​ទេ។

​យោង​តាម​មន្ត្រី​នគរ​បាល​មូលដ្ឋាន​ដែល​បាន​ទាក់​ទង​កាលពី​​ម្សិលមិញ​បាន​ឲ្យ​ដឹង​ថា នៅ​ក្នុងរយៈ​ពេល​ប៉ុន្មាន​ខែ​ចាប់​តាំង​ពី​ខេត្ត​កណ្ដាល​បាន​បញ្ជូន​ស្ត្រី​មួយ​ក្រុម​ដំបូងមាន​គ្នា​​១២​នាក់ ឲ្យ​ចុះ​ធ្វើ​ចរាចរណ៍​តាម​ផ្លូវ​ ខេត្ត​សៀមរាប​បាន​បង្កើត​ស្ត្រី៨នាក់​ជា​បី​​ក្រុម​ ​ដែល​ផ្លាស់​ប្ដូរ​វេន​គ្នា​ ហើយ​រាជធានី​ភ្នំពេញ​មាន​ស្ត្រី​សរុប​១៤​នាក់ រួម​មាន​បី​នាក់​ជា​ផ្នែក​នៃ​ក្រុម​ឆ្លើយ​តប​ឧបទ្ទវហេតុផ្សេង​ៗ​។

លោក ទី ឡុង អនុប្រធាន​​សណ្ដាប់ធ្នាប់​សាធារណៈ​នៃ​ក្រសួង​មហាផ្ទៃ​ បាន​មាន​ប្រសាសន៍​ថា នគរ​បាល​ចរាចរ​ជាស្ត្រី​​បានបង្ហាញ​ពី​ភាព​​ជោគ​ជ័យ​។

លោក​បាន​មាន​ប្រសាសន៍​ថា “មិន​សូវ​មាន​ការ​ប្រឈម​មុខ​ជាមួយ​នគរ​បាល​ជាស្ត្រី​ទេ។ យើង​ជឿ​ថា មន្ត្រី​នគរ​បាល​ជា​ស្ត្រី​របស់​យើង​អាច​ធ្វើ​ការ​បាន​ល្អជាង​នគរ​បាល​ជា​បុរស​ទៅ​ទៀត ពីព្រោះ​​អត្តចរិត​របស់​ពួកគេ​មិន​សូវ​ច្រងេងច្រងាង​ ហើយ​មាន​ហេតុ​ផល​ជាង”។

ជា​ទូទៅ ​នគរ​បាល​ចរាចរ​ធ្វើ​ការ​ជាក្រុម​ ដោយ​មួយ​ក្រុម​មានគ្នា​២​នាក់ ដោយ​ម្នាក់ជាអ្នក​​ហៅ​អ្នក​ល្មើស​ច្បាប់ ហើយ​ឲ្យ​ឡើង​ទៅ​លើ​ចិញ្ចើម​​ផ្លូវ​​ទៅ​​ដោះ​ស្រាយ​ជាមួយ​មន្ត្រី​ទី​២ម្នាក់​ទៀត​។ ជា​ទូទៅ​នគរ​បាល​ជា​ស្ត្រី​បំពេញ​តួនាទី​ទី២​​ ទទួល​ខុស​ត្រូវ​ចំពោះ​ការ​សរសេរ​ពី​ការ​ពិន័យ​ឬ​ធ្វើ​ការ​ព្រមាន​។

លោក សេង ចាន់ណាត នាយ​នគរ​បាល​ចរាចរ​ខេត្ត​សៀមរាប​បាន​មាន​ប្រសាសន៍​ថា តួនាទី​នេះ​​​សក្ដិ​សម​សម្រាប់​ស្ត្រី​ទាំង​នោះ​ដែល​បាន​ចូល​រួម​បំពេញ​ការ​ងារ។

ដោយ​សំដៅ​ដល់​អ្នក​​​ល្មើសច្បាប់​​ដែល​នគរបាល​បាន​ឃាត់ ប៉ុន្តែ​បាន​អនុញ្ញាត​ឲ្យ​ចាក​ចេញ​ ​ដោយ​មិន​បាន​ធ្វើ​ការ​ដាក់​ទោស​ទណ្ឌ​នោះ លោក​បាន​មាន​ប្រសាសន៍​ថា ” ខ្ញុំ​ជឿ​ថា នគរ​បាល​ជា​ស្ត្រី​នឹង​មិន​លើក​លែង​ដល់​អ្នក​ដែល​ប្រព្រឹត្ត​ខុស​ដូច​នគរ​បាល​បាន​ធ្វើ​​ក្នុង​ពេល​កន្លង​មក​ឡើយ”។

សម្រាប់​អ្នក​ស្រី ធីតា វិញ​ដែល​បាន​ធ្វើជា​មន្ត្រី​នគរ​បាល​ចរាចរ​រាជធានី​ភ្នំពេញ​បន្ទាប់​ពី​ធ្វើ​ជាកម្មការិនី​រោងចក្រ​ បេឡាករ​នៅ​ហាង​មួយ និយាយ​ថា ការ​បំពេញការ​ងារ​ប្រកបដោយ​សុចរិតភាព​គឺ​ជាផ្នែក​ដ៏សំខាន់នៃ​ការ​ងារ​នេះ​។

អ្នកស្រី​បាន​និយាយ​ថា ” ខ្ញុំ​ចង់​សាក​ល្បង​ការ​ងារ​ជា​នគរ​បាល​​ម្ដង។ វា​មាន​ភាព​ផ្សេង​គ្នា។ មនុស្ស​ជាច្រើន​ដែល​ខ្ញុំ​ឃាត់ ​ព្យាយាម​មិន​ទទួល​កំហុស​របស់​ខ្លួនទេ ប៉ុន្តែ​ខ្ញុំ​ប្រឹង​ប្រែង​អស់ពី​លទ្ធភាព​ដើម្បី​ធ្វើ​ឲ្យ​ពួកគាត់​យល់ពី​ច្បាប់​ចរាចរណ៍​ និង​យល់​ពី​កំហុស​របស់​ខ្លួន​”៕ សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស