លោក នីកូឡៃ ដូរ៉ូសិនកូ ជាអ្នកជំនួញជនជាតិរុស្ស៊ី ដែលត្រូវបានបញ្ជូនទៅពន្ធនាគារកាលពីខែមីនា ក្រោមការចោទប្រកាន់ពីបទឆបោកពាក់ព័ន្ធនឹងជម្លោះជាមួយអតីតដៃគូជំនួញរបស់លោក គឺលោក សេរហ្គេ ប៉ូលុនស្គី សេដ្ឋីជនជាតិរុស្សីដែលរត់គេចខ្លួននោះ នឹងទទួលបានសេចក្តីសម្រេចពីសាលាឧទ្ធរណ៍អំពីសំណើរចុងក្រោយសុំនៅក្រៅឃុំរបស់លោកនៅថ្ងៃច័ន្ទ។
បន្ទាប់ពីការបើកសវនាការអស់រយៈពេល៣០នាទីនៅសាលាឧទ្ធរណ៍ក្នុងរាជធានីភ្នំពេញកាលពីម្សិលមិញលោក ឃុន លាងម៉េង ចៅក្រមប្រធានក្រុមប្រឹក្សាជំនុំជម្រះ បានលើកឡើងថា លោក ដូរ៉ូសិនកូ អាយុ៥៤ឆ្នាំត្រូវតែរង់ចាំលទ្ធផលថា តើលោកនឹងត្រូវដោះលែងពីពន្ធនាគារខេត្តព្រះសីហនុដែរ ឬអត់។
ចៅក្រម ឃុន លាងម៉េង បានមានប្រសាសន៍ដោយបដិសេធមិនធ្វើអត្ថាធិប្បាយច្រើនថា “ចៅក្រមដែលបានបើកសវនាការកំពុងតែត្រួតពិនិត្យឯកសារឡើងវិញនៅឡើយ ហើយយើងនឹងប្រកាស[លទ្ធផល] នៅថ្ងៃទី២៧ ខែមេសា”។
លោក ដូរូ៉សិនកូ ដែលសំណើសុំនៅក្រៅឃុំលើកដំបូងរបស់គាត់ត្រូវបានបដិសេធដោយសាលាដំបូងខេត្តព្រះសីហនុកាលពីដើមខែនេះនោះមិនបានបង្ហាញខ្លួនឡើយ អំឡុងពេលបើកសវនាការកាលពីម្សិលមិញ ហើយលោក ណាច ទ្រី ដែលជាមេធាវីរបស់លោកជាអ្នកមកជំនួស។
នៅខាងក្រៅសាលាឧទ្ធរណ៍កាលពីម្សិលមិញ លោក ណាច ទ្រី បានបដិសេធមិនធ្វើអត្ថាធិប្បាយលើសំណុំរឿងកូនក្តីលោកឡើយ។
លោកបានមានប្រសាសន៍ថា “យើងមិនអាចនិយាយដោយមិនគិតមុខក្រោយអំពីសំណុំរឿងនេះបានឡើយ។ ប្រសិនបើយើងហាននិយាយ ប្រហែលជាភាគីម្ខាងទៀតនឹងធ្វើការវាយប្រហារពាក្យសម្តីមួយផ្សេងទៀត”។
កងរាជអាវុធហត្ថបានចាប់ខ្លួនលោក ដូរ៉ូសិនកូ ដែលមានសញ្ជាតិខ្មែរនិងដែលរស់នៅក្នុងក្រុងព្រះសីហនុជាយូរមកហើយនៅក្នុងភោជនីយដ្ឋានផ្ទះពស់របស់គ្រួសារលោក កាលពីថ្ងៃទី២៥ ខែមីនា ដោយសារលោកមិនបានបង្ហាញខ្លួននៅក្នុងការបើកសវនាការចំនួនពីរលើកពាក់ព័ន្ធនឹងការចោទប្រកាន់ដែលថា លោកបានចុះហត្ថលេខាលើឯកសារក្លែងក្លាយ ដើម្បីបោកប្រាស់យកប្រាក់ពីលោក ប៉ូលុនស្គី អាយុ៤២ឆ្នាំចំនួន១០លានដុល្លារ។
នៅក្នុងសេចក្តីថ្លែងការណ៍មួយកាលពីថ្ងៃច័ន្ទ លោក អូសថេប ដូរ៉ូសិនកូ ដែលជាកូនប្រុសរបស់លោក ដូរ៉ូសិនកូ និងដែលជាអនុសេនីយ៍ឯកក្នុងកងកម្លាំងនគរបាលអន្តោប្រវេសន៍ខេត្តព្រះសីហនុបានរៀបរាប់ថា ឪពុករបស់ខ្លួនគឺជាមនុស្សដែលមានកេរ្តិ៍ឈ្មោះល្អ ហើយបានអំពាវនាវសុំឲ្យមានការដោះលែងឪពុកខ្លួន។
សេចក្តីថ្លែងការណ៍នេះក៏បានអះអាងផងដែរថា លោក ប៉ូលុនស្គី ជាជនដែលគេតាមចាប់ខ្លួននៅក្នុងប្រទេសរុស្សីពីបទកិបកេងប្រាក់រាប់លានដុល្លារនោះ បានចំណាយប្រាក់ចំនួន២៥០.០០០ដុល្លារដើម្បីឲ្យមានការចាប់ខ្លួនគូប្រជែងរបស់ខ្លួនដាក់ពន្ធនាគារ ប៉ុន្តែការអះអាងនេះត្រូវប្រឈមនឹងការគំរាមចាត់វិធានការផ្លូវច្បាប់ដោយលោក បែនសុន សម័យ មេធាវីរបស់លោក ប៉ូលុនស្គី។
លោក បែនសុន សម័យ បានមានប្រសាសន៍កាលពីម្សិលមិញថា “កូនក្តីរបស់ខ្ញុំ និងខ្ញុំកំពុងតែរៀបចំឯកសារដើម្បីប្តីលោក អូសថេប ពីបទបរិហារកេរ្តិ៍។ ខ្ញុំនឹងដាក់ពាក្យប្តឹងដោយស្នើសួររកថា តើនរណាដែលត្រូវគេផ្តល់សំណូក និងថា តើភ័ស្តុតាងនៅឯណា”។
ពេលទាក់ទងកាលពីល្ងាចម្សិលមិញលោក អូសថេប បានលើកឡើងថា លោកទទួលបានដំណឹងនេះពីអាជ្ញាធរបុណ្យស័ក្តិខ្ពស់ ដែលថាលោក ប៉ូលុនស្គី បានផ្តល់ប្រាក់ឲ្យគេដើម្បីចាប់ឪពុកលោកដាក់ឃុំ។
លោកបាននិយាយថា “ពលរដ្ឋខ្មែរមានទ្រព្យសម្បត្តិច្រើន និងបុណ្យស័ក្តិខ្ពស់បាននិយាយជាមួយខ្ញុំ ហើយបានប្រាប់ខ្ញុំអំពីបញ្ហានេះ។ ខ្ញុំមិនអាចប្រាប់ឈ្មោះពួកគេបានឡើយ ប៉ុន្តែ ពួកគេមិនមែនជាមនុស្សធម្មតាទេ៕ស៊ុយឈាង (រាយការណ៍បន្ថែមដោយ Matt Blomberg)