28 C
Phnom Penh

អ្នក​នាំ​ពាក្យ​​ថា ​គ្រោះ​ថ្នាក់​រថយន្ត​ជាមួយ​រថយន្ត​របស់​ព្រះ​អង្គម្ចាស់​ រណឫទ្ធិ ជា​អំពើ​មនុស្ស​ឃាត

ដោយ ឌឹ ខេមបូឌា ដេលី

បទវិភាគ

កាលពី ​ម្សិលមិញ អ្នក​នាំពាក្យ​គណបក្ស​ហ្វុ៊នស៊ិន​ប៉ិច​បាន​ចាត់ទុក​គ្រោះថ្នាក់រថ​យន្ត​​កាល ​ពី​ថ្ងៃសៅរ៍​ដែលបាន​ប​ណ្តាល​ឲ្យ​​ ព្រះ​អង្គ​ម្ចាស់ នរោត្តម​ រណឫទ្ធិ និង​ ភរិយា​របស់​ព្រះ​អង្គ​រង​របួសក្បាល​ធ្ងន់ធ្ងរ​​នោះ​ថា ជា​ហេតុ​ផល​នយោបាយ គឺ​”អំពើ​ភេរវកម្ម”។

យោង ​តាម​​លោក ឡុង​ ម៉េង​សែ នាយ​នគរបាល​ចរាចរណ៍ខេត្ត​បាន​ឲ្យ​ដឹង​ថា ព្រះ​អង្គ​ម្ចាស់​ រណឫទ្ធិ និង​អ្នកម្នាង​ អ៊ុក ផល្លា ​

រថយន្ត​ BMW SUV របស់​សម្តេច​ក្រុម​ព្រះ​នរោត្តម​ រណឫទ្ធិ នៅ​លើ​ចិញ្ចើម​ផ្លូវ​ជាតិ​លេខ​៧​ ក្នុង​ខេត្ត​កំពង់​ចាម​ បន្ទាប់​ពី​រថយន្ត​នោះ​ត្រូវ​ឡាន​ដី​បុក​កាលពី​ថ្ងៃ​សៅរ៍ ក្នុង​រូប​ថត​ដែល​ឲ្យ​ផ្តល់​ដោយប៉ូលិស​ចរាចរណ៍​ខេត្ត​។
រថយន្ត​ BMW SUV របស់​សម្តេច​ក្រុម​ព្រះ​នរោត្តម​ រណឫទ្ធិ នៅ​លើ​ចិញ្ចើម​ផ្លូវ​ជាតិ​លេខ​៧​ ក្នុង​ខេត្ត​កំពង់​ចាម​ បន្ទាប់​ពី​រថយន្ត​នោះ​ត្រូវ​ឡាន​ដី​បុក​កាលពី​ថ្ងៃ​សៅរ៍ ក្នុង​រូប​ថត​ដែល​ឲ្យ​ផ្តល់​ដោយប៉ូលិស​ចរាចរណ៍​ខេត្ត​។

ស្ថិត​ក្នុង​ចំណោម​មនុស្ស​៨នាក់​ដែលបាន​រង​របួស​នៅ​ពេល​រថយន្ត​ធុន​ធំមួយ​ គ្រឿង​​បាន​បុក​ជាមួយ​រថយន្ត​​ BMW និង​​រថយន្ត​មួយគ្រឿង​ទៀត​នៅ​តាម​ផ្លូវ​នៅក្នុង​ស្រុក​​ព្រៃឈរ ខេត្ត​កំពង់​ចាម​កាល​ពី​​វេលា​​ថ្ងៃត្រង់។

លោក ម៉េង​សែ បាន​មាន​ប្រសាសន៍ថា “មាន ​មនុស្ស​​៨នាក់រង​របួស​ ហើយ​ពីរនាក់​ជាស្ត្រី និង​មនុស្ស​ពីរនាក់ទៀត​រង​របួស​ធ្ងន់​គឺបុរស​ម្នាក​់​និង​ស្ត្រីម្នាក់។ មនុស្ស​មួយ​ចំនួន​បោក​ក្បាល​ផ្ទប់​នឹង​ទ្វារ​រថយន្ត​”។

លោក​បានមាន​ប្រសាសន៍ថា “​ពួកគាត់ ​ធ្វើដំណើរ​ពី​ស្រុក​ព្រៃឈរ​មកកាន់រាជ​ធានីភ្នំពេញ ចំណែក​​រថយន្ត​ដឹក​ដី​មួយ​គ្រឿង​​បើកបរ​ក្នុង​ទិសដៅ​ផ្ទុយ​គ្នា។ ចំពោះគ្រោះ​ថ្នាក់នេះ យើង​បាន​សន្និដ្ឋាន​ជាដំបូង​ថា អ្នក​បើក​បរ​រថយន្ត​ដឹក​ដីបាន​រំលោភ​គន្លង​ផ្លូវ​ ហើយ​បាន​បុក​ក្បួន​រថយន្ត​តែម្តង ហើយ​យើង​កំពុង​ធ្វើការ​ស៊ើប​អង្កេតករណីនេះ​”។

នាយ ​នគរបាល​រូប​នេះ​បាន​មាន​ប្រសាសន៍ថា រថយន្ត​មួ​យគ្រឿង​ទៀត​​ក៏​ជាប់ពាក់ព័ន្ធ​ក្នុង​គ្រោះ​ថ្នាក់​នោះ​ដែរដែលបាន​ ធ្វើ​ឲ្យ​ព្រះ​អង្គម្ចាស់​ រណឫទ្ធិ រង​របួស។

លោក ម៉េងសែ បានមាន​ប្រសាសន៍ថា “​អ្នក ​បើក​បរ​ថយន្ត​ដឹក​ដី បាន​បុក​រថយន្ត​របស់ព្រះ​អង្គ ហើយ​ក៏បុក​រថយន្ត​អង្គរក្ស​របស់ព្រះ​អង្គផងដែរ។ រថយន្ត​នោះ​បាន​បុក​រថយន្ត​របស់​ព្រះ​អង្គពី​ទ្វារ​ខាងឆ្វេងរហូត​​ដល់​ទ្វារ ​ក្រោយ”។

លោក ម៉េង​សែ បានមាន​ប្រសាសន៍ថា អ្នក​បើក​បរ​រថយន្ត​ធុន​ធំ​នោះ​បាន​រត់​បាត់ ប៉ុន្តែ​ថា នគរ​បាល​​កំពុង​ស៊ើប​អង្កេត​​តម្រុយ​មួយ​ចំនួន​។

លោក ញេប ប៊ុន​ជិន អ្នក​នាំពាក្យ​គណបក្ស​ហ្វុ៊នស៊ិនប៉ិច​ដែល​ស្ថិត​នៅក្នុង​ក្បួន​រថយន្ត​នោះ​ ដែរ​ដែលបាន​អម​ដំណើរ​​ព្រះ​អង្គ​ម្ចាស់​កាលពី​ថ្ងៃ​សៅរ៍​នោះ​បាន​មាន​ ប្រសាសន៍ថា អ្នក​ម្នាង​ ផល្លា​​ បាន​រង​របួស​ក្បាល​ធ្ងន់​ធ្ងរ​ ហើយ​ត្រូវបាន​បញ្ជូនទៅ​មន្ទីរ​ពេទ្យ​ក្រុង​បាង​កក​។

លោក​ ប៊ុនជិន បាន​មាន​ប្រសាសន៍ថា “​ខ្ញុំគិតថា វាមិន​មែន​ជា​រឿង​អចេតនានោះទេ ហើយ​បញ្ហានេះ​យើង​ត្រូវ​ធ្វើការ​ស៊ើប​អង្កេត​ឲ្យ​បាន​ល្អិត​ល្អន់ដើម្បី​រក​ ឲ្យ​ឃើញ​ថា មូល​ហេតុ​នោះ​ជាអ្វី​ ពីព្រោះ​​រថយន្ត​​បើក​បរ​ក្នុ​ងទិស​ដៅ​ពីរ​ ហើយ​ស្ថិត​ក្នុង​គន្លង​ផ្លូវ​ពីរ”។

លោក​បាន​បន្ថែម​ថា “​យើង​មាន​ក្បួន​រថយន្ត​ ហើយ​បើក​បរ​ក្នុង​ល្បឿន​យឺតត្រឹមតែ​៣០គីឡូម៉ែត្រ​ក្នុង​មួយម៉ោង​ប៉ុណ្ណោះ​…​ ប៉ុន្តែ​​រថយន្ត​ដឹក​ដី​នេះ​​បាន​គេច​រថយន្ត​ផ្សេង​ទៀត​នៅក្នុង​ក្បួន ប៉ុន្តែ​​បាន​មក​បុក​រថយន្ត​របស់​ព្រះ​អង្គម្ចាស់ រណឫទ្ធិ…​ ហើយ​បន្ទាប់មក​បាន​ជ្រុល​ទៅ​បុក​រថយន្ត​របស់​អង្គរក្សរបស់​ព្រះ​អង្គ​ទៀត”។

លោក ប៊ុនជិន បានមាន​ប្រសាសន៍ថា “​វា ​បាន​គេច​ក្បួន​រថយន្ត​ ប៉ុន្តែបាន​បុក​រថយន្ត​របស់​ព្រះ​អង្គ។ នេះ​ធ្វើ​ឲ្យ​យើង​មានការ​សង្ស័យ​ ហើយ​វា​ប្រាកដ​ជា​​ដោយ​ចេតនា។ ចំពោះ​គ្រោះ​ថ្នាក់នេះ យើង​ចាត់ទុក​ថា ជា​អំពើ​ភេរវ​កម្ម”។

លោក អុី សុខឃី ប្រធាន​នាយកដ្ឋាន​​ប្រឆាំង​​ភេរវកម្ម​នៅ​ក្រសួង​មហា​ផ្ទៃ​​បានមាន​ប្រសា​ សន៍ថា មិន​ទាន​់មានការ​ស៊ើប​អង្កេត​ថា​តើ​ជា​គ្រោះ​ថ្នាក់នេះ​ជា​អំពើ​ភេរវកម្ម​ ឬយ៉ាងណា​​នោះ​ឡើយ​ លុះណាតែអាជ្ញាធរ​ខេត្ត​​ពិនិត្យ​ករណី​នេះសិន។

លោក សុខឃី បានមាន​ប្រសាសន៍ថា “​ឥឡូវនេះ អាជ្ញាធរ​ខេត្ត​កំពង់ចាម​​កំពុង​ស៊ើប​អង្កេត​ករណី​នេះ ហើយ​យើង​ដឹង​ត្រឹមតែថា ករណីនេះ​បង្កឡើង​ដោយ​គ្រោះថ្នាក់​ចរា​ចរណ៍​តែប៉ុណ្ណោះ”។

លោក​បាន​ពន្យល់ថា “​ក្នុង ​ដំណាក់​កាល​ដំបូង​ អាជ្ញាធរ​ខេត្ត​​ធ្វើការ​ស៊ើប​អង្កេត​។ គេ​ត្រូវធ្វើកា​រស៊ើប​អង្កេត​ជាមុន​ ហើយ​ឥឡូវនេះ​ អាជ្ញាធរ​​កំពុង​ពិនិត្យ​មើល​ករណីនេះ ហើយ​យើង​មិន​អាច​និយាយ​បានទេ ពីព្រោះ​យើង​មិន​ទាន់​ទទួលបាន​លទ្ធផល​នៅឡើយ​”។

ការ​ចោទ​ប្រកាន់​ពី​ហេតុ​ផល​នយោបាយ​របស់លោក ប៊ុនជិន ចំពោះ​គ្រោះ​ថ្នាក់​រថយន្ត​នេះ​​មិន​មែន​ជា​លើក​ទី​១នោះ​ទេ។

លោក កឹម សុខា អនុប្រធាន​គណបក្ស​សង្គ្រោះ​ជាតិ​​​ ជា​អតីត​សមាជិក​ព្រឹទ្ធសភាគណបក្ស​ហ្វុ៊នស៊ិនប៉ិច បាន​លាលែង​​កាលពី​ខែ​តុលា ឆ្នាំ​២០០២ ពី​គណបក្ស​រាជានិយម​នេះ​ ប៉ុន្មាន​ថ្ងៃ​ប៉ុណ្ណោះ​​បន្ទាប់ពី​​រថយន្ត​ពណ៌ខ្មៅ​មួយ​គ្រឿង​បាន​ បុករថយន្ត​របស់លោក​ពី​ចំហៀង​ក្នុង​អ្វី​ដែល​លោក​ចាត់ទុក​ថា​ ជាកា​រប៉ុនប៉ង​មនុស្ស​ឃាត។

កាលពី ​ដើម​ឆ្នាំនោះ​លោក យឹម សុខា សមាជិក​សភាគណបក្ស​ សម រង្ស៊ី បាន​ស្លាប់​ក្នុង​គ្រោះ​ថ្នាក់​រថយន្ត​​​ខណៈពេល​បើក​បរ​ទៅកាន់​ក្រុង​ព្រះ​ សីហនុ ជាមួយ​លោក សម រង្ស៊ី ដែល​ជា​ប្រធាន​គណបក្ស​សង្គ្រោះ​ជាតិ​បច្ចុប្បន្ន​ ដោយ​អះ​អាងនៅពេល​នោះ​ថា ជា​អំពើ​មនុស្ស​ឃាត៕ សារុន​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស