ក្រុមមន្ត្រីបាននិយាយកាលពីម្សិលមិញថា មន្ត្រីទាហានម្នាក់ត្រូវបានចាប់ខ្លួននៅក្នុងប្រទេសថៃកាលពីថ្ងៃសៅរ៍បន្ទាប់ពីជួញដូរវត្ថុបុរាណចំនួនបីឆ្លងកាត់ព្រំដែនខេត្តបន្ទាយមានជ័យតាមរថយន្តរបស់ខ្លួន។
លោក ប្រាក់ ស ប្រធានច្រកព្រំដែនបឹងត្រកួនក្នុងស្រុកអូរជ្រៅ ខេត្តបន្ទាយមានជ័យបានមានប្រសាសន៍ថា លោក សឿន អឿន អាយុ៤៩ឆ្នាំ ជាមន្ត្រីស៊ើបអង្កេតមកពីយោធភូមិភាគ៥នៃកងយោធពលខេមរភូមិន្ទក្នុងខេត្តបាត់ដំបង ត្រូវបានចាប់ខ្លួននៅម៉ោងប្រហែល៥ល្ងាច បន្ទាប់ពីឆ្លងព្រំដែនតាមប៉ុស្តិ៍ត្រួតពិនិត្យខាងភាគីកម្ពុជាបានបន្តិចមក។
លោក ប្រាក់ ស បានមានប្រសាសន៍ថា”យើងមានការធ្វេសប្រហែសមិនបានពិនិត្យមើលរថយន្តនេះ ដែលមានលាក់វត្ថុបុរាណចំនួនបីនៅក្នុងនោះ ប៉ុន្តែគាត់ត្រូវបានចាប់ខ្លួនដោយនគរបាលព្រំដែនថៃ”។
លោកបានមានប្រសាសន៍ថា លោក អឿន តែងឆ្លងកាត់ច្រកព្រំដែននេះជាប្រចាំនៅក្នុងឃុំអូរបីជាន់ ដើម្បីទៅទិញអាហារ ឬសាំងនៅក្នុងប្រទេសថៃ។
លោកបានមានប្រសាសន៍ថា “ជនសង្ស័យរូបនេះទៅមកៗរាល់ថ្ងៃ”។ លោកបានបន្ថែមថា នគរបាលព្រំដែនកម្ពុជាមិនដែលសង្ស័យពីសកម្មភាពដូចនេះឡើយ។
លោក ប្រាក់ ស បានមានប្រសាសន៍ថា អាជ្ញាធរថៃ បានឆែកឆេររថយន្តរបស់លោក អឿន នៅច្រកព្រំដែនខាងភាគីថៃ ហើយបានរកឃើញវត្ថុបុរាណទាំងនេះ ដែលពួកគេបានរឹបអូស។
នគរបាលព្រំដែនថៃបានប្រគល់លោក អឿន និងរថយន្តមកឲ្យសមភាគីកម្ពុជាកាលពីយប់ថ្ងៃសៅរ៍ ប៉ុន្តែបានរក្សាទុកវត្ថុបុរាណទាំងនេះ។
លោកវរសេនីយ៍ទោ ប្រាក់ ស បានមានប្រសាសន៍ថា “ថ្ងៃស្អែក យើងនឹងបន្តធ្វើការលើរឿងនេះ ដើម្បីយកវត្ថុបុរាណទាំងបីនេះមកវិញ ហើយបញ្ជូនជនសង្ស័យនេះទៅតុលាការ។ នគរបាលថៃមិនបានអនុញ្ញាតឲ្យនគរបាលរបស់យើងប៉ះពាល់វត្ថុបុរាណទាំងនេះទេ ដូច្នេះយើងមិនដឹងថា តើវត្ថុបុរាណទាំងនេះពិត ឬក្លែងក្លាយនោះឡើយ”។
លោក ញេន ឡាញ់ អនុប្រធានច្រកព្រំដែនបឹងត្រកួនបានមានប្រសាសន៍ថា លោក អឿន កំពុងត្រូវបានឃុំខ្លួននៅស្នងការដ្ឋាននគរបាលខេត្តបន្ទាយមានជ័យ ហើយគ្រោងបង្ហាញខ្លួននៅតុលាការនៅថ្ងៃនេះ៕ សារុន